Siwudziso si girwago khu valeri
Ina malito ma gu khayo nyi na va “sayisa,” ma gu romo omu ga Ndzimo 12:7 ma gu thula “sisiwana” (livhesi 5) mwendro “magana ya Pfhumu Nungungulu” (livhesi 6)?
Mongo nya livhesi leli wa gu thula vathu.
Omu ga Ndzimo 12:1-4, ha gu leri gu khethu “gutumbega gu mwalo gambe vbakari nya vathu.” Nigu khu gu landreya, Ndzimo 12:5-7 yari khiyo:
“‘Pfhumu Nungungulu a di khuye: Olu nyi na khuga nyi ema,
Kholu va nya gusolega va ngu saniswa,
Sisiwana si ngu keta khu wuvi,
Nyi na va resela guvbanyiswa va gu vbwetago.’
Magana ya Pfhumu Nungungulu khya lisine, ma agide;
[Ma] gu fanana ni parata yi hutidwego, yi mburisedwa ngudzu niloni, livbandre na dzimbili dzinyondro.
Uwe Pfhumu Nungungulu u na [va] sayisa,
U [na va] vbulugisa ga melana yoyu kala gupindruga.”
Livhesi 5 la gu ganeya khesi Jehovha a na gireyago “sisiwana.” Uye a na va vbanyisa.
Livhesi 6 la gu engedza gu khilo “magana ya Pfhumu Nungungulu khya lisine, ma agide,” “gu fanana ni parata yi hutidwego.” Khidzo hi dzipwago khidzo maningano ni Lito la Jehovha. — Ndzi. 18:30; 119:140.
Olu wona esi livhesi li landreyago li ganeyago omu ga Ndzimo 12:7: “Uwe Pfhumu Nungungulu u na [va] sayisa, u [va] vbulugisa ga melana yoyu kala gupindruga.” Lito li gu khilo “va” la gu thula ginani?
Khu kotani nya olu livhesi 7 li ganeyago khu “magana ya Pfhumu Nungungulu,” vathu nyo khaguri va nga pimisa gu khavo ma gu thula gu “khayo” Nungungulu a gu “sayisa” magana yaye. Nigu hi ngu dziti gu khethu Nungungulu, sayiside Bhibhiliya ambari olu vawugeyi va nga zama gu fuvisa ni gu himbedzeya gu vbindrugedzedwa nya Bhibhiliya. — Isa. 40:8; 1 Ped. 1:25.
Ganiolu, esi livhesi 5 li ganeyago lisine. Jehovha a ngu hi phasa nigu a na simama gu phasa “sisiwana” ni vale va “ketago khu wuvi.” — Joba 36:15; Ndzi. 6:4; 31:1, 2; 54:7; 145:20.
Ganiolu, lito li gu khilo “va” li khumbugwago omu nya livhesi 7 la gu thula ginani?
Tepo hi gevesisago gwadi Ndzimo 12 sa gu wonegisa gu khatshi lito “va” la gu thula vathu.
Ga Ndzimo 12:1-2, Dhavhidhe a gu ganeya khu ‘vathu nyo tumbege’ va nga liphedwa khu vathu va vivbedwego khu myonyo. Khu gu landreya, ha gu leri esi Jehovha a na girago vale va ganeyago silo nyo vivbe. Hi nga tiyisega gu khethu Jehovha a na gira isoso, kholu livhesi 6 la gu ganeya gu khilo magana ya Jehovha ma agide.
Khu kharato, livhesi 7 la gu ganeya gu khilo Jehovha a na sayisa ni gu vhikeya ‘ava’ va tshanisekago.
Lito “va” li gomogo omu nya livhesi 7, li thumisidwe ngudzu omu nya Milowo nya Gihebheru. Septuaginta grega ya gu thumisa guvili lito “ethu” li thulago sithumi nyo tumbege si tshaniswago. Khu gu hegisa, livhesi 7 la gu ganeya gu khilo ‘vale’ va tumbegago va na vhikedwa ga vathu va andrisago guvbivba “ga melana yoyu kala gupindruga.” (Ndzi. 12:7, 8) Wuvbindrugedzeyi nya Milowo nya Gihebheru khu lidimi nya Giaramaiko wa gu ganeya gu khuwo: “Uwe, Pfhumu, u na vhikeya va nya gu lulama, u va sayisa ga melana wowu nyo vivbe kala gupindruga.” Wuvbindrugedzeyi wowu, wa gu vega guagani gu khuwo Ndzimo 12:7 kha yi thuli magana ya Nungungulu.
Khu gighelo gegi, livhesi leli la gu ninga gutumba ‘vathu nyo tumbege’ gu khavo Nungungulu a na gira gilogyo.
