1. Ginani egi sithumi satshavbo sa Nungungulu si yedego gu gira, nigu khu ginani? (Wona foto avba nya kapa.)

JESU KRISTO a di ruma valandreyi vaye gu “gimbila [va] hevbudza mwendro gu gira vapizane mayigo yatshavbo.” (Mat. 28:19) Satshavbo sithumi nyo tumbege sa Nungungulu gu vbwetega si hevbula dzindziya nyo ‘vbedzise’ mwendro nyo gire thumo si ningidwego khu guvbeleya. (2 Thim. 4:5) Gu diga satshavbo, thumo wowu wu na ni lisima ngudzu, nigu khwa givbiredza guvbindra satshavbo guvbanyani. Ambari ulolo, si nga garadza gu vbedza tepo nyo laphe gutshumayelani kha nga edzi hi dogoreyago khidzo.

2. Sigaradzo muni hi tshanganago naso thumoni gwathu?

² Gu na ni yimbe mithumo nya lisima yi vbwetago tepo ni tshivba yathu. Adzina gu vbwetega hi thuma dziora nya dzingi khu litshigu gasi hi kodza gu dzi vbanyisa. Adzina hi ngu tshangana ni simbe sigaradzo ndrangani, nya nga madwali, gu hamuga gutsaka, mwendro sigaradzo nya gugumbe. Hi nga si kodza kharini gu gira gwadi thumo wathu na hi gu emisana ni sigaradzo nya nga isoso?

3. Khu guya khu malito ya Jesu ma gomogo omu ga Matewu 13:23, mahegiso muni hi nga ma vboheyago?

³ Abari gu siemo sathu si ngu hi tandregisa gu hengeya khu gitalo thumoni wa Jehovha, hi nga vbeyi tshivba. Jesu a ngu dziti gu khuye khandrethu hatshavbo hi si kodzago gu ninga mihandro nyo fane nya Mufumo. (Leri Matewu 13:23.) Jehovha a ngu si ninga lisima satshavbo hi girago thumoni waye, ho nga nga si gira khu monyo watshavbo. (Hebh. 6:10-12) Ganiolu, dzimbe dzitepo adzina siemo sathu si nga hi dzumeleya gu gira nya singi. Avba nya ndrima yeyi, hi na wona edzi hi nga thangisago khidzo thumo nyo tshumayele guvbanyani gwathu, gu vbevbugisa womi wathu, ni gu tshukwadzisa matshumayelelo ni mahevbudzelo yathu. Gasi sa gu thula ginani gu gira thumo wathu khu guvbeleya?

4. Sa gu thula ginani gu gira thumo wathu khu guvbeleya?

 ⁴ Khu ndziya nyo piye, gasi hi kodza gu gira thumo wathu khu guvbeleya, gu vbwetega hi hengeya ngudzu khavba hi si kodzago khavbo thomoni nyo tshumayele ni gu hevbudza. Ganiolu, isoso kha si thuli basi gu vbedza tepo nya yingi na hi gu gira thumo wowu. Kholu Jehovha a gu khedza ngudzu gighelo gi hi kutsago gu gira thumo wowu. Khu kotani nya olu hi haladzago Jehovha ni vathu, gu vbwetega hi thumisa tshivba yathu yatshavbo thumoni gwathu nya wuKristo. * (Marko 12:30, 31; Kol. 3:23) Gu thumeya Nungungulu khu tshivba yathu yatshavbo sa gu thula gu khiso hi ngu tsaka khu gu gira satshavbo si gomogo tshivbani gwathu thumoni waye. Tepo hi pwisisago gu khethu lithomo nya likhongolo gu tshumayela mahungu nya yadi, ha gu gira satshavbo hi si kodzago gasi gu vbohiseya mahungu nya yadi ga vathu nya vangi khavba hi si kodzago khavbo.

5-6. Ninga giyeyedzo nya edzi muthu a gu mwalo tepo nya yingi a nga thangisago khidzo thumo nyo tshumayele guvbanyani.

⁵ Nga dundrugeya khu lidzaha li golago gu womba vhiyola. La gu gola gu womba dzindzimo ni hayini li gomogo. Khu guhegisa, li mana thumo nyo wombe vhiyola wulangani va hongola vathu va ya seya gilogyo guvbeyani nya dzisemana. Ganiolu, dzitsapawu a dzi manago khandri dza doni. Khu kharato a gu thuma omu nya loja gukhugeya Muvhulo kala Livbandre. Ambari olu a vbedzago tepo nya yingi khu gu rengisa lojani, monyo waye womo vhiyolatunu. A gu vbweta gu tshukwadzisa mawombelo yaye a bwe a khala muembeleyi nya ndruma. Ambari ulolo, a gu londrola ni gevbi gitepwana a gi manago gasi gu womba, ambari na gi rode kharini.

⁶ Khu ndziya nyo fane, adzina tepo yago kha yi gu dzumeleyi gu hengeya thumoni nya gutshumayele nga edzi u nga u ba dzina khidzo. Ambari ulolo, khuwo thumo u wu golago gu gira. Wa gu dzi garadzeya gu tshukwadzisa makodzelo yago nyo khuhe myonyo nya vathu khu mahungu nya yadi. Kha nga olu u gu na ni silo nya singi nyo gire, adzina u nga dzi wudzisa gu khuwe u nga thangisa kharini thumo nyo tshumayele guvbanyani gwago.

7-8. Hi nga ma pimedzeya kharini mawonelo ya Jesu khu thumo nyo tshumayele?

⁷ Jesu hi vegede giyeyedzo nya gyadi avba nya edzi a nga ba a wu wona khidzo thumo nyo tshumayele. A di gu thangisa gu ganeya khu Mufumo wa Nungungulu guvbanyani gwaye. (Joh. 4:34, 35) A di gu gimbiya mazanazana nya dzikilometro na gu tshumayela vathu nya vangi a nga ba a va mana. Tepo yatshavbo a di gu vbweta dzindziya nyo bhule ni vathu dzindrangani gwawe mwendro malanga gu nga ba gu manega ngudzu vathu. Jesu a di gu thangisa thumo nyo tshumayele guvbanyani gwaye.

⁸ Hi nga pimedzeya Kristo khu gu vbweta dzindziya nyo bhule ni vathu khu mahungu nya yadi ni hayini mwendro ni yevbini tepo. Hi dzi emisede gu diga gukhadzisega gwathu gasi hi vbisegeya thumo nyo tshumayele. (Marko 6:31-34; 1 Ped. 2:21) Vambe libandlani va ngu thuma kha nga vapiyonero nya guhathege, nya tepo yatshavbo, mwendro nyo phasedzeye. Vambe va ngu hevbuleya gu ganeya limbe lidimi mwendro gu fuluga va hongola omu gu vbwetegago ngudzu vatshumayeli. Ambari ulolo, thumo nya wungi nya gutshumayele wo girwa khu vahuweleyi va gu mba gira mithumo yeyi, ganiolu va dzi hitago khu monyo watshavbo. Gani u ngu kodza gu gira nya singi mwendro sidugwana thumoni nyo tshumayele, Jehovha kha vireyi gu khuye u gira silo si gu mwalo tshivbani gwago. O vbweta gu khuye hi tsaka khu thumo wathu nya guage tepo hi huweleyago “Ivhangeli nya wudhumo wa Nungungulu” nya gutsake. — 1 Thim. 1:11; Dhet. 30:11.

9. a) Pawulo thangiside kharini thumo nyo tshumayele ambari tepo a nga ba a yede gu gira thumo nyo dzi vbanyise? b) Libhuku la Mithumo 28:16, 30, 31, la gu yeyedza kharini mawonelo ya Pawulo khu thumo waye nyo tshumayele?

⁹ Mupostoli Pawulo hi vegede giyeyedzo nya gyadi khu gu thangisa thumo nyo tshumayele guvbanyani gwaye. Tepo a nga ba ari Korinto ga liendro laye nya wuvili nya wumisiyonariyo, a di tsonide nigu a di yede gu thuma gasi a kodza gu dzi vbanyisa. Ambari ulolo, Pawulo kha wona thumo nyo gire matendra kha nga uwo nya lisima guvbanyani. A di gu gira thumo wowo gasi wu mu phasedzeya thomoni nyo tshumayele mahungu nya yadi ga vaKorinto nya mba “lomba gu hakhiswa” khavo. (2 Vakorinto 11:7) Ambari olu Pawulo a nga ba a yede gu gira thumo nyo dzi vbanyise, simamide gu thangisa thumo nyo tshumayele, nigu a di gu tshumayela dziSabhadho dzatshavbo. Tepo giemo gyaye gi nga tshukwata, Pawulo a diri ni tepo nyo vege ngudzu gupima avba nya thumo nyo tshumayele. A di “dzi ningela khu tshivba thumoni nya guhevbudze mahungu basi, . . . a tivisa ga Vajudha khuye Jesu khuye Kristo.” (Mith. 18:3-5; 2 Kor. 11:9) Khu gu gimbiya nya tepo, Pawulo a di gu tshumayela ava va nga ba va ya mu wuseya ni gu lova malangaliya tepo a nga ba a khothedwe khu myaga mivili ndrangani gwaye Roma. (Leri Mithumo 28:16, 30, 31.) Pawulo a di hungide gu mba dzumeleya gilo gi tsolopeteya thumo waye nyo tshumayele. A di lova khuye: “[Kha] hi . . . swihali thumoni momu hi nga ningwago.” (2 Kor. 4:1) Kha nga Pawulo, ambari ha gu ba hi vbedza tepo nyo laphe thumoni nya gudzivbanyise, hi ngu kodza gu simama gu thangisa thumo nya Mufumo guvbanyani gwathu.

10-11. Hi nga wu gira kharini thumo wathu khu guvbeleya ambari ha gu ba hi dwala?

¹⁰ Ha gu ba hi tandrega gu tshumayela ngudzu khu ndranga ni ndranga khu kotani nya gugumbe mwendro madwali, hi ngu kodza gu tshumayela khu dzimbe dzindziya. Vavhangeli va lizana myaga nyo pheye va di gu kodza gu vboheya vathu ni hayini va nga ba va manega umo. Va di gu londrola ni levbini lithomo li nga ba li manega gasi gu ganeya khu lisine — khu ndranga ni ndranga, omu gu nga ba gu manega ngudzu vathu, khu githugedza — ni hayini omu vathu va nga ba va  “manega avbo.” (Mith. 17:17; 20:20) Ha gu ba hi si kodzi gu gimbiya, hi nga khala omu gu vbindravbindrago ngudzu vathu gasi hi tshumayela vavbindri nya ndziya. Mwendro hi nga ningeya wufakazi nya githugedza, khu gu lova malangaliya, mwendro gu thumisa telefone. Vahuweleyi nya vangi va gu na ni sitshetsheya soso, va nga tsaka ngudzu khu gu thumisa dzindziya dzedzi gasi gu tshumayela.

¹¹ Ambari wa gu ba u dwala, u ngu kodza gu gira thumo wago khu guvbeleya. Nga dundrugeya khu giyeyedzo gya mupostoli Pawulo. A di khuye: “Tshivba yeyi yatshavbo nya yikhongolo kha yi dugeli gwathu ya guta khu ga Nungungulu.” (2 Kor. 4:7) Pawulo yi vbwetide tshivba yoyo tepo a nga dwala maendroni yaye nya wumisiyonario. Embede vaGalatiya khuye: “Enu mu ngu alakanya gukhenu gikhati nya guphele nyi ngata mi tivisa Ivhangeli nyi di si vbanyi gwadi.” (Gal. 4:13) Khu ndziya nyo fane, madwali yago nuwe ma nga gu ninga mathomo nya mangi nyo tshumayele mahungu nya yadi ga vambe, nya nga vadhotori, vaenferimero, ni ava va gu khathaleyago. Vangi vawe vomo mithumoni gwawe tepo va endredwago dzindrangani dzawe khu vahuwuleyi.

12. Malito maho yago ma gu bani ma “wona gwadi”, mo thula ginani?

¹² Jesu a di khuye: “Kandriya nya givili khu maho. Maho yago ma gu bani ma wona gwadi, givili gyago gyatshavbo gi na wenengedzwa.” (Mat. 6:22) A di gu vbweta khuye ginani? A di vbweta khuye gu vbwetega hi vbevbugisa womi wathu mwendro gu vega gupima avba nya gilo gimwegyo, hi si tsolopetedwi khu gilo. Jesu vegide giyeyedzo nya isoso khu gu thangisa thumo nyo tshumayele guvbanyani gwaye, nigu hevbudzide vapizane vaye gu simama gu thangisa gu thumeya Jehovha ni Mufumo  waye. Ethu ha gu pimedzeya Jesu khu gu thangisa thumo nyo tshumayele guvbanyani gwathu, hi ‘dwanela Mufumo wa Nungungulu ni gugola gwaye.’ — Mat. 6:33.

13. Ginani gi nga hi phasago gu vega gupima avba nya thumo nyo tshumayele nya wuKristo?

¹³ Mweyo nya dzindziya nyo yeyedze khiyo gu khethu maho yathu ma ngu wona gwadi mwendro hi ngu vega gupima avba nya thumo wathu, khu gu vbevbugisa womi gasi gu hi kodza gu mana tepo nya yingi nyo phase vambe guti ni gu haladza Jehovha. * Khu giyeyedzo, ina hi nga vbindrugedza dziora nya thumo wathu nya gudzivbanyise gasi hi tshaledwa khu tepo nya yingi nyo patege thumoni nyo tshumayele ndrani nya semana? Ina hi nga vbungula sivbungadzo nyo khaguri si hi dzegeyago ngudzu tepo?

14. Ginani gi vbindrugedzidwego khu patwa nyo khaguri gasi wu engedzeya tepo ni sighingi thumoni nyo tshumayele?

¹⁴ Isoso khiso si giridwego khu lidhota nyo khaguri nyo pwani khu Elias, ni mwangadzi walo. Wari khuye: “Kha ha dzegeya gu pheya wupiyonero khu tepo yoyo, ganiolu somo hi nga ba hi gira gasi gu hi patega ngudzu thumoni nyo tshumayele. Khu kharato hi di dzi vbunguleya silo gasi hi kodza gu tshaledwa khu tepo nya yingi nyo patege thumoni nyo tshumayele. Khu giyeyedzo, hi di vbungula sirengarenga. Hi di bwe hi tugula gu khethu hi di gu vbedza tepo nya yingi khu gu vbungadza, khavbovbo hi vbungula. Hi bwe hi lomba vapatrawu vathu va hi vbindrugedzeya milongoloko nya mathumelo yathu gasi hi tshaledwa khu tepo nyo tshumayele. Kha nga handro wakona, hi kodzide gu tshumayela ni wutshigwana, hi gimbidzisa sihevbulo nya singi nya Bhibhiliya, hi bwe hi patega gambe guvili khu ngima avba nya tshangano wa vbakari nya semana nya thumo nya lithembwe. Hi si tsakede ngudzu!”

15-16. Khu guya khu 1 Thimoti 4:13, 15, hi nga gira kharini gasi hi tshukwadzisa mathumelo yathu kha nga vavhangeli? (Wona gambe kwadru “ Misuwo yi na nyi phasago gu gira thumo wangu nyo tshumayele khu guvbeleya.”)

¹⁵ Yimbe ndziya nyo gire khiyo thumo wathu khu guvbeleya gu tshukwadzisa matshumayelelo yathu. Muthu a tigo thumo nyo khaguri a nguta na gu wuyedzeya gu hevbula sileletelo nya mathumelo yaye gasi gu tshukwadzisa mapwisiselo ni makodzelo yaye. Khidzo saye ni vatshumayeli nya Mufumo. Gu vbwetega hi simama gu hevbula dzindziya nyo tshukwadzise khidzo thumo wathu. — Mav. 1:5; leri 1 Thimoti 4:13, 15.

¹⁶ Hi nga gira kharini gasi hi simama gu dugeleya thumoni gwathu? Khu gu landreya sileletelo hi ningwago avba nya tshangano nya Thumo ni mavbanyelo nya semana ni semana. Tshangano wowu wu ngu ninga sileletelo nya lisima ngudzu si hi phasago gu simama gu tshukwadzisa mathumelo yathu thumoni nyo tshumayele. Khu giyeyedzo, tepo muphari nya gikhalo a ningago wusingaladzi ga gihevbuli nyo khaguri, hi nga hevbula silo si kodzago gu hi phasa gu tshukwadzisa thumo wathu. Hi nga thumisa mawonelo yoyo tepo hi na bhulago ni muthu khu mahungu nya yadi. Hi nga lomba wusingalagadzi mwendro gu thuma ni muwoneleyi nya tsawa wathu nya thumo nyo tshumayele, mwendro ni mumbe muhuweleyi a vidzidwego, piyonero, ambari mowoneleyi nya gipandre. Tepo hi yago hi oloveya gu thumisa ferameta ni ferameta nyo hevbudze khiyo, hi na wu gola ngudzu thumo wathu nyo tshumayele ni gu hevbudza.

17. Ginani u na gi manago wa gu gira thumo wago khu guvbeleya?

¹⁷ Lithomo nya likhongolo gu ba na Jehovha a dzumelede gu khuye hi khala ‘sithumi si thumago gumogo’ naye! (1 Kor. 3:9) Wo dzi garadzeya gu “hatha iso si gu sadi” mwendro nya lisima u bwe u vega gupima avba nya thumo nya wuKristo, u na thumeya mwendro gu ‘khozeya PFHUMU Nungungulu khu gutsaka.’ (Filp. 1:10; Ndzi. 100:2) Kha nga moyo nya sithumi sa Nungungulu, tiyisega gu khuwe a na gu ninga tshivba u yi vbwetago gasi u gira thumo wago khu guvbeleya ambari wo ba u tshangana ni sigaradzo nyo khale kharini. (2 Kor. 4:1, 7; 6:4) Gani giemo gyago gi ngu gu dzumeleya gu tshumayela ngudzu mwendro vbadugwana, u ngu kodza ‘gu dzi zundza’ mwendro gu tsaka khu sighingi sago thumoni gwago. (Gal. 6:4) Tepo u girago thumo wago khu guvbeleya, wa gu yeyedza lihaladzo lago khu Jehovha ni vathu-kwanu. “Khu kharato, u na mana guvbanyiswa uwe ni vale va gu yingisago.” — 1 Thim. 4:16.