Winston, nga hi tshamuseya edzi u giridego khidzo gasi u muti Nungungulu.

Nyi velegedwe ndrangani yi nga ba yiri mwalo tepo khu tshetshe gipandreni gya Queenslândia, Australásia. Kha nga olu hi nga ba hi vbanya phuvbo mbade, nyi di si manani ni vambe vathu vbavbandze nya ava va ndrangani gwathu basi. Tepo nyi nga ba nyiri ni 12 myaga, nyi di pheya gu vbweta guti lisine khu Nungungulu. Nyi di gombeya gwaye, nyi mu lomba gu kheni a nyi phasa guti lisine khuye. Nyi di hegisa khu gu khuga khu gaya nyi hongola Adelaide, Muhwa-dambo ga Australásia, nyi ya thuma iyoyo. Tepo nyi nga ba nyiri ni 21 myaga, nyi di manana ni Pam na nyiri omu nya dziferiya dhoropani ga Sydney, nigu a di nyi bhuleya khu tsawa nyo khaguri nya wukhongeyi nyo pwani Inglaterra-Israel, wu nga ba wu khuwo vathu va Inglaterra situgulwana nya mahundzu nyo dzimeye ya na Israyeli. Tsawa wowo wari khuwo, mahundzu yaya khaya nya likhumi nya mufumo wa wuronga, ma hongodego wugumbini khu lizana myaga nya wu 8 na ma si gu vbohi matshigu yathu. Khu kharato, tepo nyi nga bweleya Adelaide, nyi di ya bhula khiso ni githumi-khwathu gi nga ba gi phede gu hevbula Bhibhiliya ni Dzifakazi dza Jehovha. Nyi di bhula naye khu dziora nyo khaguri basi. Hi di bhula ngudzungudzu khesi Dzifakazi dza Jehovha dzi si khodwago. Hwane nya mabhulo yathu, nyi di tugula gu kheni nombelo nyi giridego na nyi ngo guya wu di hlamudwe. Nyi di gu hevbula lisine khu Muvangi wangu ni Mufumo waye! Nyi di manide ndralama nya lisima ngudzu. — Mat. 13:45, 46.

Pam, anuwe u phede gu vbwetedzeya ndralama yeyi na wu ngari muphya. U yi mane kharini?

Nyi dandrede ndrangani nya vakhongeyi, dhoropani ga Coffs Harbour, Nova Gales do Sul. Vavelegi vangu ni vavhovho vangu va di khodwe ga sihevbudzo  sa na Inglaterra-Israel. Eni, koma wangu, nandra wangu, ni dziprimo dzathu hi dandrisidwe na hi gu hevbudzwa pwani Nungungulu a ngu tsakeya vathu ava vanyapandre vawe va gu sisumbudwa sa Inglaterra. Ambari ulolo, kha nya si khodwa isoso, nigu kha nya nga ba nyi dzipwa vbafuvbi ni Nungungulu. Tepo nyi nga ba nyiri ni 14 myaga, nyi lingedzede dzitshetshe nya dzingi, gupata ni Anglicana, Batista, ni Adventista do Sétimo Dia. Ganiolu ndzala yangu ya liphuvboni yi di ngo simama.

Hi di fuluga hi hongola Sydney, iyo nyi nga ya manana ni Winston na romo dziferiyani dzaye. Kha nga a ganedego, mabhulo yathu khu wukhongeyi ma mu kutside gu pheya gu hevbula ni Dzifazazi dza Jehovha. Hwane nya isoso, malangaliya a nga ba a nyi rumeleya ma di tade khu milowo basi! Gasi gu ganeya lisine, gupheyani kha sa nga ba si nyi phara gwadi — si di gu nyi gorosa. Ganiolu vbadugwanavbadugwana nyi di pheya gu wona kheni esi a nga ba a nyi loveya gu diri lisine maningano ni Nungungulu.

Khu 1962, nyi di hongola Adelaide gasi nyi ya manega vbafuvbi ni Winston. A di bhude ni patwa nyo khaguri nya Dzifakazi gasi nyi ya khala nawo — Thomas ni Janice Sloman — va nga ba va thumide kha nga vamisiyonariyo tigoni ga Papua-Nova Guiné. Va nyi pharide gwadi; teponi yoyo nyi diri ni 18 myaga basi, nigu va nyi phaside ngudzu gu muti gwadi Jehovha. Khu kharato, aneni nyi di pheya gu hevbula Lito la Nungungulu, khavbovbo nyi di pheya gu si wona gu kheni nyi li manide lisine. Hwane nyo tshade ni Winston, hi di dzegeya gu pheya womi nya makategwa nya mangi thumoni ga Jehovha — ambari olu hi tshanganidego ni silingo nya singi, uwo wu hi phaside ngudzu gu simama hi ninga lisima ndralama yile nya lisima hi yi manidego.

Winston, nga hi bhuleya khu myaga yago nyo pheye thumoni ga Jehovha.

Na gu vbindride gitepwana basi na nyi tshadhide ni Pam, Jehovha a di pheya gu hi ninga mithumo nyo hathege. (1 Kor. 16:9) Thumo nyo pheye hi di kutswa khu ndriyathu Jack Porter, a thumidego omu nya gibandlana gyathu kha nga muwoneleyi nya gipandre. (Olu a gu thuma kha nga givbango nya Kometi nya litamo la Australásia.) Jack ni mwangadzi waye Roslyn, va di hi kutsa gu thuma kha nga va vapiyonero nya tepo yatshavbo — thumo hi dzi buzidego khuwo khu 5 myaga. Tepo nyi nga ba nyiri ni 29 myaga, Pam ni eni hi lombwa gu ya thuma kha nga vawoneleyi nya gipandre omu sidwani sa Pacífico Sul, si nga ba si woneledwa khu Bheteli ya Fiji. Sidwani soso gu diri Samoa Americana, Samoa, Quiribati, Nauru, Niuê, Toquelau, Tonga, Tuvalu ni Vanuatu.

Matshiguni yoyo, vathu va sidwani nyo khaguri si gomogo hwindzo va di gu kanakaneya Dzifakazi dza Jehovha, khu kharato hi di yede gu gengeya. (Mat. 10:16) Mabandla ma diri madugwana, nigu mambe ma diri mwalo makodzelo nya gu hi ninge wulanga nyo lale. Khu kharato hi di lomba gu khala ni vathu va gipandreni mule; avo va di gu hi phara gwadi tepo yatshavbo.

Winston, u ngu wu gola ngudzu thumo nya wuvbindrugedzeyi. Gasi ginani gi gu giridego u wu gola kharato?

Tepo hi nga pheya gu thumeya gidwani gya Tonga, vandriyathu va diri ni sidangaliyana ni sibhukwana nya sidugwana khu lidimi lawe giTongani. Thumoni nyo tshumayele, va di gu thumisa libhuku A Verdade Que Conduz à Vida Eterna, khu giNgiza. Khu kharato, ndrani nya xikola nya madhota nya dzisemana dzina, madhota mararu ma dzumeleyanide ni mawonelo nyo vbindrugedzedwe libhuku leli khu giTongani, ambari olu va nga ba va si giti gwadi giNgiza. Pam a di lova mahungu yakona, hi vbedza hi rumeya Bheteli ya Estados Unidos gasi ma ya ghandlwa. Thumo watshavbo wu dzegide gipimo nya 8 dzisemana. Ambari olu wuvbindrugedzeyi wathu wu nga ba wu siri nya tshukwana, libhuku lolo li phaside vaTongani nya vangi gu hevbula lisine. Eni ni Pam kha hiri vavbindrugedzeyi, ganiolu thumo wowo wu hi giride hi wu gola ngudzu wuvbindrugedzeyi.

Pam, guhambana muni gu gomogo vbakari nya womi wa sidwani ni Australásia?

Khu lisine, guhambana gukhongolo! Malangani nyo khaguri, hi di gu vhikisana ni dzitshuna, lihani nya dahudahu ni lithonga, magondzo, madwali, ni  gu hamuga guhodza nyo eneye. Ambari ulolo, tepo li pfolago, si di gu tsakisa gu khedziseya linene khomu nya gibarakana gyathu nyo pwani i fale — gi gu gibarakana nyo pfhuledwe khu mwasi, ganiolu gi si bhiywi mudzibambe. Mambe matshigu, ngima wu di gu huwo dada nyo bwe hi wona migokho, wu bwe wu wonega khomu nya yiphwa. Dzitepo dzodzo nyo tsakise dzi di gu hi gira hi dundrugeya khu silo nya sadi ni gu gombeya, iso si hi phasidego gu vega gupima avba nya silo nya sadi vbavbandze nya silo nyo vivbe.

Hi di gu gola ngudzu sanana. Esi si nga si ba gira ni gu ganeya so wona ethu vatsungu, si di gu hi tsakisa ni gu hi samadzisa. Tepo hi nga ba hiri Niuê, gikhwathana gimwegyo gi di pharaphara mawoya ya bogoni ga Winston, khigyo: “Nyi ngu ma gola mambapi yaya yago,” na gi thula mawoya. Si di dzegeya gu wonega gu khiso gi di gu pheya gu ma wona; khu kharato gi di si liti ni lina lakona!

Tepo hi nga ba hi wona wusiwana va nga ba vari nawo vathu, si di gu hi homola myonyo. Va di gu vbanya wulangani nyo mbure ngudzu, ganiolu va diri mwalo dzixipitali nigu mati ma nyo seye ma di gu kala. Ambari ulolo, va di si garadzegi vandriyathu. Va di olovede gu vbanya kharato. Va di gu tsaka khu gu manega ni dzindranga dzawe vbafuvbi, gu manega ni wulanga nyo gireye avbo mitshangano, ni gu dhumisa Jehovha na va tshulegide. Giyeyedzo gyawe gi hi phaside gu simama gu thangisa esi si gu na ni lisima ngudzu guvbanyani gwathu.

Pam, dzimbe dzitepo u di yede gu dzi vbweteya mati ni gu dongiseya guhodza wabune. U di gu gira kharini isoso?

Nyi ngu mu bonga ngudzu Papyi wangu. Nyi hevbudzide silo nya singi nya sadi, nya nga gu khutha nilo vbavbandze ni gu phula khuwo, ni gu vbanya khu sitsapawana. Tepo hi nga endreya Quiribati, hi khade gibarakanani gi nga ba gi pfhuledwe khu mwasi, gi londrwa khu sifilori sa phwani, ni dzindzari nya misengele. Gasi gu phula guhodza, nyi di gu kela liphala nya lidugwana gasi nyi gira gikhu, nyi thumisa sikuti kha nga dzikhuni. Gasi gu mana mati, nyi di gu ya foleya nambutunu ni vanyamayi vakhwathu va gipandreni. Gasi gu rega mati yakona, va di gu hungeleya ngodzi nya purumwa avba nya simbo nya tinga nya dzimetro dzimbili, nga khatshi xangwa. Ganiolu wulangani nyo hunge gilowo khu tshokatunu, va di gu hunga purumwa. Nyamayi ni nyamayi, yo vboha tepo yaye a di gu rinya purumwa namboni, a yi kutsunga, yi rega mati yi tala. Nyi di gu kheni pimisa gu kheni si ngu vbevbuga — kala yi nga vboha tepo yangu. Nyi di rinya purumwa gungangungani, ganiolu wulangani nyo rege mati yi di gu deluga basi! Hwanye nyo ba vatshavbo va emide gu nyi hega, nyamayi moyo a di dzi ningedza gu nyi phasa. Avo va diri vathu nya vadi, va golago gu phasa vambe.

Mu gu gode ngudzu gu thuma sidwani. Mu nga hi embeya matshango nyo khaguri mu ma manidego iyoyo?

Winston: Si di gu hi garadzeyanyana gu pwisisa mavbanyelo nyo khaguri ya gipandreni mule. Khu giyeyedzo, tepo vandriyathu va nga ba va hi ninga guhodza, gutala nya dzitepo va di gu hi ninga gwatshavbo va nga ba vari nago. Gupheyani, kha ha nga dziti gu khethu hi yede gu va tshiyela gilogyo navo. Khu kharato, hi di gu hodza gwatshavbo hugo bhi! Khu lisine, tepo hi ngaya hi pwisisa giemo gyawe, hi di pheya gu va tshiyela gilogyo. Ambari olu hi nga ba hi hosisa, vandriyathu va di gu hi pwisisa. Nigu va di gu tsaka khu gu hi wona hwane nya 6 migima, mwendro tepo hi va endreyago gambe. Vbavbandze nya vandriyawe va libandlani, va gu khavo va nguti dzimbe Dzifakazi dza Jehovha, gu diri ethu basi.

Maendro yathu ma di gu ninga wufakazi nya wadi gipandreni. Vathu nya vangi gipandreni va di gu pimisa gu khavo Dzifakazi dza Jehovha wu diri wukhongeyi vandriyathu va nga dzina va wu khugeya mapimoni gwawe. Khu kharato, va gu wona vathu va limbe litigo na va gu endreya vandriyathu, si di gu va samadzisa ni gu va hevbudza gilogyo.

Pam: Litshango nyo samadzise ngudzu gwangu kheli li dugeledego Quiribati, gu nga ba guri ni libandla li nga ba liri ni vandriyathu nya vadudwana. Lidhota la limwedo li nga ba li romo, Ndriyathu Itinikai Matera, li di gu gira satshavbo li nga ba li si kodza gasi gu hi khathaleya. Litshigu limwedo a di hi teya ni rava wu nga ba wuri ni lidandra limwedo nya gu mwedo. Huye khuye: “Khyanu.” Mandra nya  khugu ma di gu hi kaleya ngudzu. Gigirwana gyogyo nya wuhindzi gi khugide ngudzu myonyo yathu.

Pam, myaga yi nga landreya u hamugide. Ginani gi gu phasidego gu emisana ni gigaradzo gyogyo?

Tepo hi nga ba hiri Pacífico Sul khu 1973, nyi di khura mimba. Hi di hunga gu bweleya Australia, migimana yi nga landreya nyi di hamuga. Winston nuye si mu vbiside ngudzu kholu gi diri gyanana gyaye nuye. Khu gu gimbiya nya tepo, wuvi wu di gu vbunguga, ganiolu kha wa nga dzegeya gu vbeya huwo bhi kala hi nga hakha Mukhedziseyi nya 15 nya Abril nya 2009. “Siwudziso sa valeri” nya revhista yoyo gi di gu khigyo: “Ina gomo gutumba nya gu gyanana gi fedego ndrani ga mamayi wagyo gi wuswa?” Ndrima yeyi yi hi tiyisegide gu khiyo Jehovha gi wonide gigaradzo gyathu nigu a ngu giti egi a na girago kholu uye a ngu gira silo nya sadi tepo yatshavbo. A na dusa gwatshavbo guvbisa hi gu pwago kholu hi vbanyago tigoni momu nyo vivbe tepo a na rumago Gyanana “guta pfhungumula mithumo ya Sathane.” (1 Joh. 3:8) Ndrima yoyo yi hi phaside gambe gu engedzeya gu ninga lisima “ndralama” hi gu nayo kha nga vathu va Jehovha! Gasi gu ganeya lisine, kha hi dziti gu khethu na hiri hayi olu nari khatshi hi diri mwalo gutumba nya Mufumo!

Hwane nyo fedwe khu gyanana gyathu, hi di bweleya thumoni nya tepo yatshavbo. Hi thumide khu migima nyo khaguri Bheteli ga Australia, hi hegisa khu gu bweleya thumoni nyo endreye mabandla. Khu 1981, hwane nyo thume khu 4 myaga Nova Gales do Sul ni Sydney, hi di rumedwa Bheteli ga Australia, kha nga edzi yi nga ba ranwa khidzo, hi ngari iyo kala muhuno.

Winston, gu ba na u thumide sidwani sa Pacifico Sul si gu phaside kharini thumoni gwago kha nga givbango nya Kometi nya litamo la Australásia?

Khu lisine, si nyi phaside khu dzindziya nya dzingi. Nyo pheye, tepo hi nga ba hiri Australia nyi lombidwe gu woneleya gidwani gya Samoa Americana ni Samoa. Khavbovbo, Bheteli ya Nova Zelândia yi di patwa ni ya Australia. Olu, gipandre nya Bheteli ya Australásia gyo pata Australia, Samoa Amaricana ni Samoa, Sidwani sa Cook, Nova Zelândia, Niuê, Timor-Leste, Toquelau, ni Tonga — esi nya singi sakona nyi manidego lithomo nyo si endreye kha nga muemeyi wa Bheteli. Matshango nyi ma manidego khu gu thuma ni vandriyathu vale nyo tumbege sidwani, ma ngu nyi phasa ngudzu olu nyi va thumeyago na nyi nyiri khu Bheteli.

Gasi gu sega, nyi di gu tsakeya gu ganeya gu kheni khu myaga nya yingi eni ni Pam hi si wonide gu khethu khandri ava va dandridego khu tanga basi va kodzago gu vbweta Nungungulu. Ethu hi giyeyedzo nya isoso. Vaphya navo va nga yi mana ndralama yeyi nya lisima ngudzu — ambari vo mba seketedwa khu sivbango nya dzindranga dzawe. (2 Dzipf. 5:2, 3; 2 Dzik. 34:1-3) Gasi gu ganeya lisine, Jehovha Nungungulu nya lihaladzo a gu vbweta gu khuye vatshavbo, vaphya ni ava va dandridego khu tanga, va mana guvbanya!

Tepo eni ni Pam hi nga pheya gu vbweta Nungungulu 50 myaga yi vbindridego, kha ha nga ba hi dziti gu khethu isoso si na hi yisa hayini. Kha hi kanakani gu khethu lisine nya Mufumo i ndralama nya lisima ngudzu! Hi dzi emisede gu phara ndralama yeyi khu mandza mavili!