1-2. Khu ginani Jesu a nga ba a garadzega ngudzu?

GA Litshigu laye nyo hegise mafuni, Jesu a di gu garadzega. Nya mba hweya a di hadzi songwa khu ndziya nya litsoro khu vathu nya mba na nayo. Jesu kha nga ba a garadzega basi khu kotani nya olu a nga hadzi gufa. A di gu haladza ngudzu Papayi waye nigu a di gu vbweta gu mu tsakisa. Jesu a di gu dziti gu khuye o gara a simama gu tumbega ga gilingo gile nyo garadze ngudzu gi nga ba gita, a di hadzi phasa gu agisa lina la Jehovha. Jesu a di gu haladza vathu gambe, nigu a di gu dziti gu khuye gutumba nya gu hi mana womi nya pindrugedwa gu diri mandzani gwaye.

² Ambari olu a nga ba ari sigaradzoni soso, Jesu a di rude. A di embede vapostoli vaye khuye: “Nyi ngu mi ningani gurula gwangu.” (Joh. 14:27) A diri ni “gurula ga Nungungulu,” gurula gu manwago khu muthu a gu na ni wupari nya wukhongolo ni Jehovha. Gurula gogo khugo gu rudzisidego mapimo ni monyo wa Jesu. — Filp. 4:6, 7.

3. Ginani hi na bhulago khigyo avba nya ndrima yeyi?

³ Mwalo gwathu a na tshukago a emisana ni silo nya nga esi si timisedwego khu Jesu, ganiolu vatshavbo valandreyi va Jesu va na tshangana ni silingo. (Mat. 16:24, 25; Joh. 15:20) Nigu kha nga Jesu, dzimbe dzitepo hi na tshuka hi garadzega. Ginani hi nga girago gasi hi si garadzegi ngudzu nyo bwe hi vbeledwa khu gurula mapimoni? Hongoleni hi bhula khu silo siraru si giridwego khu Jesu ndrani nya thumo waye mafuni, hi bwe hi wona edzi hi nga mu pimedzeyago khidzo tepo hi tshanganago ni silingo.

4. Khu guya khu 1 Vatesalonika 5:17, ninga siyeyedzo si vegago gwadi guagani gu khiso Jesu gombede ngudzu ga litshigu laye nyo hegise mafuni.

⁴ Leri 1 Vatesalonika 5:17. Jesu gombede ngudzu ndrani nya litshigu nyo hegise nya womi waye mafuni. Tepo Jesu a nga yeyedza valandreyi vaye magirelo nya gidundrugiso nya gufe gwaye, a di gombeleya gibaba ni vhinyu. (1 Kor. 11:23-25) Na va si gu khugi avba va giredego avbo Phasika, a di gombeya ni vapizane. (Joh. 17:1-26) Tepo va nga vboha Gigomoni nya miOlivha wutshigu wule, a di gombeya gunganigungani. (Mat. 26:36-39, 42, 44) Nigu malito nyo hegise a ganedego Jesu na si gufi, ma diri malito nya nombelo. (Luka 23:46) Khu gu thumisa nombelo, Jesu a di gu embeya Jehovha ni gevbini gi nga ba gi dugeleya ga litshigu laye nyo hegise mafuni.

5. Khu ginani vapostoli va nga mba tiya hwambo?

⁵ Gimwegyo nya sighelo gi giridego Jesu a kodza gu timiseya, khu gu gombede ngudzu a lomba gu khuye Papayi waye a mu ninga tshivba nyo timiseye. Ganiolu vapostoli kha va si kodza gu simama gu gombeya ga wutshigu wowo. Kha nga handro wakone, kha va tiya hwambo tepo va nga emisana ni gilingo. (Mat. 26:40, 41, 43, 45, 56) Ha gu tshangana ni silingo, hi na simama gu tumbega basi ho landreya giyeyedzo gya Jesu nyo simame gu gombeya. Ganiou hi nga gombeleya ginani?

6. Gukhodwa gu na hi phasa kharini gu simama gurula?

⁶ Hi nga gombeya ga Jehovha gasi a “engedzela gukhodwa gwathu.” (Luka 17:5; Joh. 14:1) Hi ngu vbweta gukhodwa kholu Sathane a na linga vatshavbo va landreyago Jesu. (Luka 22:31) Gukhodwa gu na hi phasa kharini gu simama ni gurula ambari ho emisana ni silingo  nyo landreyane? Ho ba hi giride satshavbo si gomogo tshivbani gwathu gasi gu pala gilingo nyo khaguri, gu khodwa gu khethu Jehovha a na hi phasa si na hi gira hi ema gu garadzega kholu hi ngu dziti gu khethu Uye a na lulamisa gigaradzo gyathu khu tepo nya yadi. Kha nga olu hi tumbago gu khethu a na ni tshivba nyo gire gilogyo guvbindra ethu, hi na ni gurula mapimoni ni monyoni. — 1 Ped. 5:6, 7.

7. Ginani u gi hevbulago ga esi si ganedwego Robert?

⁷ Nombelo wa gu hi phasa gu rudzisa mapimo yathu ambari ho ba hi emisana ni sigaradzo nyo khale kharini. Nga dundrugeya khu giyeyedzo gya Robert, lidhota nyo tumbege li gu na ni 80 myaga olu. Wari khuye: “Wusingalagadzi wu gomogo omu ga Vafilipi 4:6, 7 wu ngu nyi phasa gu emisana ni sigaradzo nya singi guvbanyani gwangu. Si di gu nyi garadzeya ngudzu gu mana dzitsapawu. Nigu khu tepo nyo khaguri nyi di emide gu thuma kha nga lidhota.” Ginani gi phasidego Robert gu simama ni gurula mapimoni? Wari khuye: “Nyo ka nyi pheya gu garadzega, nyo dzegeya gu gombeya. Nyi ngu tumba gu kheni nyo gombeya ngudzu, nyo engedzeya gu mana gurula.”

8. Kha nga si ganedwego ga Johane 8:29, khu gevbini gimbe gighelo gi giridego Jesu a rula mapimo?

⁸ Leri Johane 8:29. Ambari tepo a nga ba a tshaniswa, Jesu a di rude mapimo kholu a di gu dziti gu khuye a di gu tsakisa Papayi waye. A di simama gu engisa ambari tepo dzi nga ba dzi wuya gu gira isoso. A di gu haladza Papayi waye, a bwe a wona gu thumeya Jehovha kha nga gilo nya lisima ngudzu guvbanyani gwaye. Na si guti mafuni, a diri meseri nya mithumo ya  Nungungulu. (Mav. 8:30) Nigu tepo a nga ba ari mafuni, dzi garadzede gu hevbudza vambe guti Papayi waye. (Mat. 6:9; Joh. 5:17) Thumo wowo wu mu ningide gutsaka nya gukhongolo Jesu. — Joh. 4:34-36.

9. Gu pharega thumoni nyo tshumayele go hi phasa kharini gu simama gu rula mapimo?

⁹ Hi nga pimedzeya Jesu khu gu engisa Jehovha hi bwe hi “thuma gikhati gyatshavbo . . . esi Nungungulu a si vbwetago.” (1 Kor. 15:58) Ho “dzi ningela khu tshivba” thumoni nyo tshumayele, kha hi na nga dzega sigradzo sathu hi si gira sighodho. (Mith. 18:5) Khu giyeyedzo, vale hi va manago gutshumayelani va ngu emisana ni sigaradzo nyo fane ni esi sathu. Ambari ulolo, tepo va hevbulago gu haladza Jehovha ni gu thumisa wusingalagadzi waye guvbanyani gwawe, womi wawe wo tshukwata va bwe va mana gutsaka nya lisine. Tepo yatshavbo hi wonago isoso na si gu girega, ho engedzeya gu tiyisega gu khethu Jehovha a na hi khathaleya. Nigu gutiyisega gogo ga gu hi phasa gu simama gu rula mapimo. Ndriyathu moyo nya nyamayi a tshanisekago khu madwali nyo hamuge gutsaka (depressão) ni gu dzi wona na si phasi gilo a li wonide lisine nya isoso. Wari khuye: “Tepo nyi nga ba nyi pharega thumoni nya gutshumayele, nyi di gu kodza gu woneleya gudzipwa gwangu nigu nyi di gu tsaka. Isoso si di gu kodzega khu gu tepo nyi gomogo thumoni nya gutshumayele, nyo dzipwa vbafuvbi ngudzu ni Jehovha.”

10. Ginani u gi hevbulago ga esi si ganedwego khu Brenda?

¹⁰ Nga dundrugeya gambe khu giyeyedzo gya ndriyathu Brenda. Uye ni nyamahegyana waye va di gu tshaniswa khu madwali nyo garadze ngudzu. Brenda kha kodzi gu gimbiya, o gimbiya khu gikarinyana nigu sivbango saye so khaleya gu vbola. A ngu ba a tshumayela khu ndranga ni ndranga a gu si kodza, ganiolu egi a girago ngudzu gu tshumayela khu malangaliya. Wari khuye: “Gu pwisisa ni gu dzumeya gu kheni madwali yangu kha ma na nga hawulugiswa mafuni momu, si ngu nyi phasa gu vega ngudzu gupima thumoni nyo tshumayele. Khu lisine, gu tshumayela gu ngu nyi phasa gu mba dundrugeya khu sigaradzo sangu. Wulangani nya isoso, go nyi phasa gu vega gupima avba nyo phase vale nyi va manago gipandreni hi tshumayelago umo. Nigu go nyi dundrugisa tepo yatshavbo khu gutumba nyi gu nago khu wumindru.”

11-13. a) Vapostoli ni vambe va yeyedzide kharini gu khavo va diri dzipari nya lisine dza Jesu? b) Dzipari dza Jesu dzi mu giride a dzipwa kharini?

¹¹ Ndrani nya thumo watshavbo wa Jesu mafuni, vapostoli va yeyedzide gu khavo va diri dzipari nyo tumbege dza Jesu. Va diri lifumbo nya dzipari edzi Bhibhiliya yi gu khiyo: “Dzomo dzipari dzi tumbegago guvbindra ndriyago.” (Mav. 18:24) Avo va diri dzipari nya lisima ngudzu ga Jesu. Ndrani nya thumo waye, mwalo ga vandriyaye a nga ba a khodwa gwaye. (Joh. 7:3-5) Ga tepo nyo khaguri, valongo vaye va pimiside gu khavo Jesu a di gu handruga. (Marko 3:21) Gu hambana navo, Jesu embede vapostoli vaye nyo tumbege ga wutshigu waye nyo hegise khuye: “Enu khenu mu nga nyi bangaladzani gikhati gyatshavbo gulingwani gwangu.” — Luka 22:28.

¹² Vapostoli va di gu tshuka va mu khunguvanyisa Jesu, ganiolu uye a di si vegi gupima avba nya sihoso sawe, wulangani nya isoso, a di gu si wona gu khuye va ngu khodwa gwaye. (Mat. 26:40; Marko 10:13, 14; Joh. 6:66-69) Ga wutshigu nyo hegise na si gu songwi, Jesu embede vama vovo nyo tumbege, khuye: “Nya gu mi rana dzipari dzangu kholu nyi mi tiviside satshavbo nyi nga si pwago ga Babe wangu.”  (Joh. 15:15) Kha si kanakanisi gu khiso Jesu tiyisidwe ngudzu khu dzipari dzaye. Giphaso egi vapizane va ningidego Jesu thumoni gwaye, gi mu ningide gutsaka nya gukhongolo ngudzu.— Luka 10:17, 21.

¹³ Vbavbandze nya vapostoli, Jesu a diri ni dzimbe dzipari, nya vama ni vanyamayi, dzi nga ba dzi mu phasedzeya thumoni gwaye ni gu mu phasa khu dzimbe dzindziya. Vambe va di gu mu rana dzindrangani gwawe gasi a ya hodza navo. (Luka 10:38-42; Joh. 12:1, 2) Vambe va di gu endra naye va bwe va mu ninga silo sawe. (Luka 8:3) Jesu a diri ni dzipari nya dzadi kholu uye nuye a diri pari nya yadi. A di gu va gireya silo nya sadi, nigu kha nga ba a vireya gu khuye va gira silo si gu mwalo dzitshivbani gwawe. Jesu a diri muthu nyo vbeleye, ganiolu a di gu bonga ngudzu khu giphaso a nga ba a ningwa khu dzipari dzaye nya mba vbeleya. Nigu, kha hi kanakani gu khethu dzi mu phaside gu simama gu rula mapimo.

14-15. Hi nga dzi mana kharini dzipari nya dzadi, nigu dzi nga hi phasa kharini?

¹⁴ Dzipari nya dzadi dzi na hi phasa gu simama gu tumbega ga Jehovha. Nigu ndziya nya yadi nyo gire dzipari nya dzadi, khu gu khala nuwe pari nya yadi. (Mat. 7:12) Khu giyeyedzo, Bhibhiliya ya gu hi kutsa gu thumisa tshivba ni tepo yathu gasi gu phasa vambe, ngudzungudzu “sisiwana.” (Efes. 4:28) Ina u nguti muthu libandlani gwago nya gu u nga mu phasa? Ina u nga ya rengeya silo nyo khaguri muhuweleyi a si kodzigo gu khuga khu ndrangani khu kotani nya madwali mwendro gugumba? Ina u nga ninga gilo hodze ndranga yi emisanago ni gigaradzo nyo hamuge dzitsapawu? Wa gu ba u kodza  gu thumisa sayiti jw.org^® mwendro JW Library^®, ina u nga phasa vambe libandlani gwago gu si thumisa navo? Ha gu vega gupima avba nyo phase vambe, gutsaka gwathu gu na gira khu gu vbalageya. — Mith. 20:35.

¹⁵ Dzipari dzathu dzi na hi thaveleya tepo hi emisanago ni silingo, dzi bwe dzi hi phasa gu simama gu rula mapimo. Kha nga Elihu a nga engiseya gwadi Joba tepo a nga ba a phofula sigaradzo saye, dzipari dzathu nethu dzi na hi phasa khu gu hi engiseya gwadi tepo hi va tshamuseyago esi hi si pwago. (Joba 32:4) Hi nga vireyi gu khethu dzipari dzathu dzi hi embeya esi hi yedego gu gira, ganiolu hi na gira gwadi khu gu engiseya wusingalagadzi nya Bhibhiliya va hi ningago. (Mav. 15:22) Nigu kha nga Pfhumu Dhavhidhe a dzumedego khu gudzinogisa gu phaswa khu dzipari dzaye, anethu kha hi yeli gu dzi khusedza hi bomba gu phaswa khu dzipari dzathu. (2 Sam. 17:27-29) Khu lisine, dzipari dzodzo giningwa hi ningidwego khu Jehovha. — Jak. 1:17.

16. Khu guya khu Vafilipi 4:6, 7, khu yevbini ndziya yamweyo hi nga manago khiyo gurula? Tshamuseya.

¹⁶ Leri Vafilipi 4:6, 7. Khu ginani Jehovha a gu khuye hi nga hakha gurula gwaye “khu ga Kristo Jesu”? Khu gu hi nga mana gurula nya mba vbeya mapimoni gwathu ni myonyoni gwathu ho pwisisa ni gu khodwa gipandre gi girwago khu Jesu ndrani nya makungo ya Jehovha. Khu giyeyedzo, khu kotani nya muphaso nyo dzegiswe wa Jesu, hatshavbo hi ngu divaledwa sighoho sathu. (1 Joh. 2:12) Ngapwani gutshulega gogo! Kha nga Pfhumu nya Mufumo wa Nungungulu, Jesu a na a dusa ni gevbini gigaradzo hi resedwego khu Sathane ni litigo laye. (Isa. 65:17; 1 Joh. 3:8; Gutu. 21:3, 4) Ina khandri gutumba nyo samadzise ugogo? Nigu ambari olu Jesu a hi ningidego thumo nyo garadze, uye a na ni ethu, a hi phasa matshiguni yaya nyo hegise. (Mat. 28:19, 20) Isoso si ngu hi tiyisa hwambo! Gutshulega, gutumba ni gutiya-hwambo — mawowo nya makhalelo nya lisima ngudzu ma hi girago hi rula mapimo.

17. a) Mukristo a nga simama kharini gu rula mapimo? b) Kha nga si tumbisidwego ga Johane 16:33, ginani hi na gi kodzago gu gira?

¹⁷ Ina ka, u nga simama kharini gu rula mapimo ambari na wu emisana ni silingo nya sikhongolo? U nga gira isoso khu gu pimedzeya esi a giridego Jesu. Nyo pheye, gombeya, u simama gu gombeya ambari go dugeleya ginani. Nya wuvili, engisa Jehovha ni gu tshumayela khu sighingi ambari tepo si garadzago gu gira isoso. Ni nya wuraru, vbweta giphaso ga dzipari dzago gasi dzi gu phasa silingoni sago. Khavbovbo, gurula ga Nungungulu gu na sayisa mapimo ni monyo wago. Nigu kha nga Jesu, u na pala ni gevbini gilingo. — Leri Johane 16:33.