1-2. a) Sathane a gu kanganyisa vathu khu dzindziya muni? b) Ginani hi na ganeyago khigyo avba nya ndrima yeyi?

SATHANE, “babe nya malipha”, a gu kanganyisa vathu gukhugeya gupheyani nya matimo nya vathu. (Joh. 8:44) Mambe nya malipha yaye mo pata sihevbudzo nya malipha khava va fudego ni womi hwane nya gufe. Sihena ni sigiro nya singi nyo olovelege sa gu seketedwa khu gihevbudzo nya malipha gya Sathane maningano ni gufa. Khu kharato, vandriyathu nya vangi gu vbwetega va ‘dwana khu kotani nya gukhodwe’ tepo muthu nyo khaguri wa ndrangani gwawe mwendro gipandreni gwawe a fago. — Judha 3.

² Wa gu tshuka u emisana ni sigaradzo nya nga isoso, ginani gi nga gu phasago gu emeya esi Bhibhiliya yi si hevbudzago khu gufa? (Efes. 6:11) Hi nga thaveleya ni gu tiyisa kharini muKristo-khwathu a gurumedzwago gu beleya sihena si gu mba tsakisa Nungungulu? Ndrima yeyi yi na ganeya khu wusingalagadzi owu Jehovha a hi ningago. Gupheya, hongoleni hi wonani esi Bhibhiliya yi si ganeyago khu gufa.

3. Mihandro muni yi residwego khu malipha nyo pheye?

³ Nungungulu kha nga ba a vbweta gu khuye vathu vafa. Ganiolu gasi gu vbanya kala gupindruga, Adhamu ni Evha va di yede gu engisa Jehovha, a nga ba a va ningide ginaywana gegi nyo vbevbuge: “Handro nya simbo nya guti gu hambanisa silo nya sadi niso nyamba sadi, u nga wu hodzi. Kholu litshigu u na gu wu hodzago u nafa.” (Gen. 2:16, 17) Khavbovbo, Sathane huye vbondza ni malipha yaye! Khu gu thumisa nyoga, a di embeya Evha khuye: “Khu lisine kha mu na ngafa gilo!” Egi gi si  tsakisigo khu gu, Evha a di khodwa a hodza handro wule. Khu hwane, mwama waye nuye a di hodza handro. (Gen. 3:4, 6) Khu ndziya yoyo, gi beya gighoho ni gufa ga vathu vatshavbo. — Rom. 5:12.

4-5. Sathane a gu simama kharini gu kanganyisa vathu?

⁴ Adhamu ni Evha va difa kha nga a ganedego Nungungulu. Ganiolu Sathane kha diga gu lipheya vathu khu gufa. Khu gu gimbiya nya tepo, a di pheya gambe mambe malipha. Limwedo nya malipha yoyo, khu gihevbudzo nya gu muthu a gufa, a gufa givili basi, ganiolu gyomo gipandre gi tshalago gi vbanya, adzina kha nga liphuvbo. Guhambanahambana nya malipha yoyo ma ngu kanganyisa vathu nya vangi kamo ngudzu kala muhuno. — 1 Thim. 4:1.

⁵ Khu ginani vathu nya vangi va kanganyiswago? Sathane a ngu wuti wuvi owu vathu va wu pwago va gu fedwa, khu kharato a gu thumisa gudzipwa gogo kamo gasi gu va riya khugo. Khu kotani nya olu hi giredwego gu vbanya kala gupindruga, kha hi dzini gufa. (Muh. 3:11) Ha gu wona gufa kha nga nala. — 1 Kor. 15:26.

6-7. a) Ina Sathane a ngo si kodza gu siha lisine khu gufa? Tshamuseya. b) Bhibhiliya ya gu hi phasa kharini gu mba thava ava va fudego?

⁶ Ambari olu Sathane a gu mba lala ni malipha yaye, lisine khu gufa kha li ngo sihade gambe. Khu lisine, vathu nya vangi muhuno va ngu siti esi Bhibhiliya yi si hevbudzago khu giemo gya ava va fudego ni gutumba va gu nago va bwe va hevbudza vambe. (Muh. 9:5, 10; Mith. 24:15) Lisine lolo li ngu hi thaveleya, li bwe li hi phasa gu mba thava ni gu kanakana khesi si giregago a gufa muthu. Khu giyeyedzo, kha hi thavi ava va fudego, ambari gu thava gu khethu va na tshuka va dugeledwa khu silo nyo vivbe. Sa gu fana ni gu ba va lade ligovbe nya guete. (Joh. 11:11-14) Hi ngu dziti gambe gu khethu ava va fudego kha va yipwi tepo ni guvbindra. Khu kharato guwuswani ga ava va fudego, ambari vale va fudego mazanazana myaga, kha va na nga yipwa tepo yi vbindridego; si na gira nga khatshi va di pfhuma, va vbedza va tula maho.

⁷ Ina kha wu khodwi gu khuwe lisine khu gufa muhuno li ngu pwisisega nigu pwala gwadi? Li hambanide ngudzu ni malipha nya mba pwala ya Sathane. Vbavbandze nyo kanganyise vathu basi, malipha yoyo ma gu vala Muvangi wathu. Gasi gu hi phasa gu pwisisa sigaradzo hi vangidwego khu Sathane, hi na ganeya khu siwudziso sesi: Malipha ya Sathane ma gu vala kharini Jehovha? Ma gu gira kharini vathu va si li woni lisima nya muphaso nya gudzegiswe wa Kristo? Ma gu engedzeya kharini wuvi ni gutshaniseka nya vathu?

8. Kha nga si yeyedzwago ga Jeremiya 19:5, malipha ya Sathane khava va fudego mo vala Jehovha khu ndziya muni?

⁸ Malipha ya Sathane khava va fudego ma gu vala Jehovha. Malipha yoyo mo pata gihevbudzo nya malipha nya guvbiswe nya vathu niloni. Sihevbudzo soso so vala Nungungulu! Khu ndziya muni? Sihevbudzo soso so gira vathu va khodwa gu khavo Nungungulu nya lihaladzo a ngu fana ni Dhiyabhulosi. (1 Joh. 4:8) Wa gu dzipwa kharini khu gupwa isoso? Ahati uye mune Jehovha ke? Gasi gu ganeya lisine, uye a ngu nyenya guvivba gwatshavbo. — Leri Jeremiya 19:5.

9. Malipha ya Sathane ma khuha kharini gukhodwa ga vathu avba nya muphaso nya gudzegiswe wa Kristo kha nga si ganedwego omu ga Johane 3:16 ni 15:13?

⁹ Malipha ya Sathane khu gufa mo gira vathu va si li woni lisima nya muphaso nya gudzegiswe wa Kristo. (Matewu 20:28) Mambe malipha nya wusathane khaya nyo khayo hefemulo nya vathu kha wufi. Nari khatshi isoso lisine, hatshavbo na hi gu vbanya kala gupindruga. Na ga sa vbwetega gu Kristo a ningeya womi waye kha nga dzegiso gasi hi mane womi nya gupindruge. Dundruga gu khuwe muphaso wa Kristo giyeyedzo nya gikhongolo ngudzu nya lihaladzo laye khu vathu. (Leri Johane 3:16; 15:13.) Nga dundrugeya khedzi Jehovha ni Gyanana gyaye va dzipwago khidzo khu sihevbudzo soso si gu mba ninga lisima muphaso nya gudzegiswe!

10. Malipha ya Sathane khu gufa mo engedzeya kharini wuvi ni gutshaniseka ga vathu?

¹⁰ Malipha ya Sathane ma gu engedzeya wuvi ni gutshaniseka nya vathu. Vavelegi va vbisegago khu gufedwa khu gyanana gyawe va nga embedwa pwani khu Nungungulu a nga dzega gyanana gyawe, adzina gasi gi ya khala ngilozi ndzadzini. Ina malipha yoyo nya wusathane mo vbodzisa mwendro mo engedzeya gu va khurunga? Gihevbudzo nya malipha nya guvbiswe nya vathu ndzadzini pwani gyo emeya gutshaniswa, gupata ni gu vbiswa nya vathu vbasimbotunu khu gu wugeya sihevbudzo nya tshetshe. Khu guya khu libhuku Inquisição Espanhola, vambe nya vathangeyi nya guvivba gogo va di gu khavo vo ninga vawugeyi vovo “magavbudzo basi nya esi va nga hadzi ya si mana ndzadzini” gasi va kodza gu dzi laya na va si gufi, va vbuluga gu yavbya ndzadzini. Mayigoni nya mangi, vathu vo gurumedzega gu khidzimeya vakokwe vawe va fudego, va va khozeya, mwendro va lomba gu kategiswa khavo. Vambe va gu va khongoteya gasi va si tshaniswi khavo. Egi gi si tsakisigo khu gu, sihevbudzo soso nya wusathane ni gu va thaveleya kha si va thaveleyi. Wulangani nya isoso, so va gira va garadzega mwendro va thava nya mba gighelo.

11. Valongo ni dzipari va nga zama kharini gu hi kutsedzeya gu mba engisa Lito la Nungungulu?

¹¹ Gu haladza Nungungulu ni Lito laye, so hi kutsa gu engisa Jehovha ambari tepo valongo mwendro dzipari va zamago gu hi gurumedza gu hengeya omu nya sihena si dwanisanago ni Bhibhiliya maningano ni ava va fudego. Adzina va nga zama gu hi tshonegisa, khu gu khavo kha ha nga ba hi mu gola mwendro gu mu ninga githawo mufi. Mwendro gu khavo mavbanyelo yathu ma na gorosa mufi, a hi wugeya. Ga giemo gegi, hi nga li seketeya kharini lisine nya Bhibhiliya? Wona edzi u nga thumisago khidzo matshina nya Bhibhiliya ma landreyago.

12. Sihena muni khava va fudego si dzegeyago gu wonega gu khiso si ngu dwanisana ni Bhibhiliya?

¹² Dzi emiseye gu “hambana” ni sihevbudzo ni sihena si dwanisanago ni Bhibhiliya. (2 Kor. 6:17) Vathu nya vangi Caribe va gu khodwa gu khavo muthu a gufa, “githusa” gyaye gi na tshala gi dzegisa pota vatshavbo va mu tshanisidego. Libhuku nyo khaguri lari khilo: “Githusa” gyogyo gi nga “worisa vathu gipandreni.” Omu Afrika,  si olovelegide gu vathu va fenengedzeya mabona ndrangani ga oyu a fudego ni gu fenengedza dzifoto dzi khedza dzindzarini nya dzinyumba. Khu ginani? Vambe vari khavo vo gireya gu mba wonwa khoyu a fudego! Kha nga sithumi sa Jehovha, kha hi khodwi ni gyevbini gihena gi gomogo mwendro gu patega omu nya sigiro si andrisago malipha ya Sathane! — 1 Kor. 10:21, 22.

13. Wa gu ba u kanakaneya sihena nyo khaguri, ginani u yedego gu gira, khu guya khu Jakobe 1:5?

¹³ Wo ba u kanakaneya sihena mwendro sigiro nyo khaguri khava va fudego, gombeya ga Jehovha, u mu lomba guti gwaye. (Leri Jakobe 1:5.) Khavbovbo u gevisisa omu nya mabhuku yathu. Sa gu lombega, wudzisa madhota ya libandlani gwago. Ayo kha ma na nga gu embeya esi u yedego gu gira, ganiolu ma nga gu phasa gu mana matshina nya milayo nya Bhibhiliya nya yadi, nya nga aya ma tshamusedwego vbatshaniyana vbavba. Tepo u girago isoso, wo dzi olovedza gu thumisa makodzelo yago nyo ‘hambanise’ silo, nigu makodzelo yoyo ma na gu phasa gu “hambanisa esi nya sadi ni esi nya guvivbe.” — Heb. 5:14.

14. Hi nga potsa kharini gu khunguvanyisa vathu?

¹⁴ “Satshavbo girelani gu rungudza Nungungulu. Mu nga khali gikhunguvanyiso.” (1 Kor. 10:31, 32) Tepo hi vbwetago gu hunga gu khethu ni na patega mwendro ne omu nya sihena nyo khaguri, gu vbwetega hi dundrugeya gambe khedzi esi hi na hungago gu gira si na khuhago khidzo livhalo la vambe, ngudzungudzu maKristo makhwathu. Khu lisine, kha hi vbweti gu khunguvanyisa muthu! (Marko 9:42) Ganiolu, kha hi vbweti gu khunguvanyisa gambe ava va sirigo Dzifakazi. Lihaladzo li na hi kutsa gu bhula navo khu ndziya nya yadi, iso si rungudzago Jehovha. Kha hi yeli gu vbenyeleya vathu mwendro gu va hega khu sihena sawe. Dundruga gu khuwe lihaladzo li na ni tshivba! Ha gu haladza hi bwe hi khathala khu vambe, si nga gira hi rudzisa myonyo ya vawugeyi vathu.

15-16. a) Khu ginani wu gu wugengeyi gu bhuleya ava hi vbanyago navo esi hi si khodwago? Ninga giyeyedzo. b) Malito ya Pawulo ma gomogo omu ga Varoma 1:16 ma gu thuma kharini gwathu?

¹⁵ Dzi tivegise kha nga Fakazi ya Jehovha omu u vbanyago umo. (Isa. 43:10) Ga gu tshuka gufa muthu gilongoni gwago, valongo ni vavhizinyu vago va nga goroga ngudzu kholu u gu mba patega omu nya sihena nyo khaguri. Si nga gu vbevbugeya gu lulamisa gigaradzo gyogyo wo va tshamuseya esi u si khodwago na  gu ngari dzimindru. Francisco, wa Mosambiki, lovide khuye: “Tepo eni ni mwangadzi wangu Carolina, hi nga hevbula lisine, hi di embeya valongo vathu gu khethu kha hi na nga khozeya gambe ava va fudego. Gifungo gyogyo gyathu gi lingindwe tepo a ngafa ndriye nya nyamayi wa Carolina. Gipandreni gwathu gu diri ni gihena nyo hambe magufa. Khavbovbo gu di yede gu manega nongo moyo wa oyu a fudego gasi a lala matshigu mararu avba va hambisedwego avbo magufa. Avo va di gu khavo sihena soso si na khongoteya liphuvbo la oyu a fudego. Valongo va Carolina va di gu vbweta gu khavo a landreya gihena gyogyo.”

¹⁶ Ginani a giridego Francisco ni mwangadzi waye? Francisco wari khuye: “Khu kotani nya olu hi haladzago Jehovha ni gu vbweta gu mu tsakisa, hi di bomba gu patega omu nya gihena gyogyo. Valongo va Carolina va di goroga ngudzu. Va hi singedza gu khavo hi mwalo githawo khu mufi, va bwe va tumbisa gu mba hi wuseya gambe mwendro gu hi phasa. Kha nga olu hi va tshamusedego gukhodwa gwathu gupheyani, kha ha vbweta gu bhudzisana navo na va ngo vbiside mihungo. Vambe valongo va di ema ni ethu, havo khavo hi va tshamusede gale giemo gyathu. Khu gu gimbiya nya tepo, valongo va Carolina va di rula mapimo, wulongo wu wuyeleya. Gasi gu ganeya lisine, vambe vakona va dzude gaya gwathu va ta lomba mabhuku yathu.” Gima hi nga khalini dzitshoni gu ema hi tiya hi emeya lisine khu gufa. — Leri Varoma 1:16.

17. Ginani gi nga hi phasago gu khala dzipari nya lisine ga muKristo-khwathu a fedwego?

¹⁷ Tepo muKristo-khwathu a fedwago khu muthu a mu haladzago, gu vbwetega hi gira satshavbo hi si kodzago gasi hi hiri dzipari nya lisine, dzi khalago kha nga ndriyathu dziteponi nya sigaradzo. (Mav. 17:17) Hi nga khala kharini pari nya lisine, ngudzungudzu ga ndriyathu a fedwego a kutsedzedwago gu beleya sihena si dwanisanago ni Bhibhiliya? Wona matshina mavili nya milayo ma kodzago gu hi phasa gu thaveleya ava va gomogo sigaradzoni soso.

18. Khu ginani Jesu a nga liya, nigu ginani hi gi hevbulago ga giyeyedzo gyaye?

¹⁸ “Lila ni vale va lilago.” (Rom. 12:15) Adzina si nga hi garadzeya gu mana malito nyo embeye muthu a fedwego. Ambari ho ba hiri mwalo lito  nyo ganeye, vo hi wona na hi liya, va na si wona gu khavo hi ngu garadzega nethu. Tepo pari ya Jesu, Lazaro, yi ngafa, Mariya, Marta ni vambe va di gu liya khu kotani ya ndriyawe ni pari yawe yi nga ba yi fude. Hwane nya 4 matshigu na fude, a di vboha Jesu, uye nuye a di ‘liya’, ambari olu a nga ba a dziti gu khuye nya mba hweya a na wusa Lazaro. (Joh. 11:17, 33-35) Marongo ya Jesu ma yeyedzide edzi Jehovha a nga ba a dzipwa khidzo khu gufa ga Lazaro. Ma yeyedzide gambe edzi Jesu a nga ba a yi haladza khidzo ndranga yile, iso si thaveledego ngudzu Mariya ni Marta. Khu ndziya nyo fane, tepo vandriyathu va si wonago gu khavo hi ngu va haladza ni gu khathala khavo, kha va dzipwi vonga, ganiolu vo dzipwa na va randredwe khu dzipari dzi khathalago dzi golago gu va phasa.

19. Hi nga thumisa kharini Muhevbudzi 3:7, tepo hi thaveleyago muKristo-khwathu a fedwego?

¹⁹ “Gikhati nya gudegule, ni gikhati nya guganele.” (Muh. 3:7) Yimbe ndziya nyo thaveleye khiyo muKristo-khwathu a fedwego khu gu khala muengiseyi nya wadi. Diga ndriyago a dzi phofula, nigu u nga gorogi a gu ganeya malito nyo duge ndziyani. (Joba 6:2, 3) Si nga gira na dzuwegide mapimo khu kotani nya gu wugedwe khu valongo va sirigo Dzifakazi. Khu kharato gombeya naye. Lomba Muengiseyi nya milombelo a mu ninga tshivba ni gu mu tuledzeya mapimo. (Ndzi. 65:2) Giemo gyo dzumeleya, lerini gumogo Bhibhiliya. Mwendro gu leri ndrima nyo khaguri nyo tsakise nya mabhuku yathu, nya nga matimo nya guvbanya nyo tiyise.

20. Ginani hi na bhulago khigyo avba ndrima yi landreyago?

²⁰ Hi ngu bonga ngudzu kholu hi tigo lisine khava va fudego ni gutumba nyo tsakise gu vireyago ava va gomogo marowoni! (Joh. 5:28, 29) Khu kharato, hongoleni hi emeya lisine nya Bhibhiliya, hi bwe hi bhuleya vambe ni yevbini tepo hi tulegedwago khu ndziya nyo gire isoso. Ndrima yi landreyago yi na yeyedza yimbe ndziya eyi Sathane a zamago khiyo gu segeya vathu gidemani nya liphuvbo — wudhemoni. Hi na wona gu khethu khu ginani hi yedego gu potsa sigiro ni mihagano yi gimbileyanago ni madhemoni.