1-2. Hi nga landreya dzipasu dza Jesu khu ndziya muni? Ninga giyeyedzo.

NGA dundrugeya na wuri ga tsawa nyo khaguri wu gimbiyago ga wulanga gu tadego khu maheho, ganiolu oyu a thangeyago tsawa wowo a ngu guti gwadi omu mu yedego gu gandra gasi mu si paywi khu maheho. Tepo a gimbiyago, uye a gu tshiya migondro yaye gasi mu landriseya omu a gandrago umo. Khu gu gimbiya nya tepo, u tugula gu khuwe oyu a thangeyago kha wonegi gambe! Ganiolu, isoso kha si gu thavisi. Wulangani nya isoso, uwe gumogo ni vambe avba nya tsawa mo dzi garadzeya gu landreya migondro yaye. Litigo leli nyo vivbe hi vbanyago ga ilo muhuno, la gu fana ni wulanga gu tadego khu maheho.

² Nigu Makristo nya lisine ma gu fana ni tsawa wule wu gimbiyago ga wulanga gu tadego khu maheho. Hi ngu bonga ngudzu Jehovha kholu a hi ningidego muthangeyi nya wadi, a gu Gyanana gyaye Jesu Kristo, oyu hi nga si kodzago gu landriseya migondro yaye. (1 Ped. 2:21) Guya khu Bhibhiliya nyo khaguri, avba Pedro a gu fananisa Jesu ni muthangeyi. Gufana ni muthangeyi a tshiyago dzipeghadha dzaye a gu ba a gimbiya, Jesu nuye a hi tshiyede dzipeghadha mwendro dzipasu gasi hi dzi landreya. Omu nya ndrima yeyi, hi na hlamula siwudziso siraru. So thula ginani gu landreya dzipasu dza Jesu? Khu ginani hi yedego gu landreya dzipasu dza Jesu? Nigu, hi nga landreya kharini dzipasu dza Jesu?

3. So thula ginani gu landreya dzipasu nya muthu nyo khaguri?

³ So thula ginani gu landreya dzipasu dza muthu nyo khaguri? Dzimbe dzitepo, Bhibhiliya yi ngu thumisa lito “gu gimbiya” ni “migondro” gasi gu thula esi muthu a girago womini waye. (Gen. 6:9; Mav. 4:26 NM.) Mavbanyelo nya muthu, ma nga fananiswa ni dzipeghadha mwendro dzipasu edzi muthu a tshiyago a gu ba a gimbiya. Khu kharato, hi nga ganeya gu khethu gu landreya dzipasu  nya muthu nyo khaguri, so thula gu pimedzeya giyeyedzo gyaye.

4. So thula ginani gu landreya dzipasu dza Jesu?

⁴ So thula ginani gu landreya dzipasu dza Jesu? Khu gu piya, so thula gu landreya giyeyedzo gyaye. Avba nya lowo nya ndrima yeyi, mupostoli Pedro a di gu ganeya khu giyeyedzo nya gyadi gya Jesu avba nyo timiseye dzitshanisa, ganiolu, gu na ni silo nya singi esi Jesu a giridego hi nga si pimedzeyago. (1 Ped. 2:18-25) Khu lisine, satshavbo esi Jesu a ganedego ni gu gira womini gwaye, giyeyedzo nya gyadi gwathu gasi gu gi landreya.

5. Ina vathu nya mba vbeleya va nga si kodza gu pimedzeya giyeyedzo nyo vbeleye gya Jesu? Tshamuseya.

⁵ Olu hi gu vathu nya mba vbeleya, ina hi nga si kodza gu landreya giyeyedzo gya Jesu? Ina, hi nga si kodza. Kha hi na nga si kodza gu landreya dzipasu dza Jesu khu gu vbeleya. Ganiolu, ha gu landreya gwadi dzipasu dza Jesu, hi bwe hi gira satshavbo hi si kodzago ambari olu hi gu vathu nya mba vbeleya, hi na ba hi thumisa wusingalagadzi wa mupostoli Johane wu gu khuwo: ‘Vbanya nga edzi a vbanyidego khidzo Jesu Kristo.’— 1 Joh. 2:6.

6-7. Khu ginani hi nga ganeyago gu khethu ha gu landreya dzipasu dza Jesu, hi na khala dzipari nya dzikhongolo dza Jehovha?

⁶ Ha gu landreya dzipasu dza Jesu, hi na khala dzipari nya dzikhongolo dza Jehovha. Khu ginani hi ganeyago isoso? Nyo pheye, Jesu a hi tshiyede giyeyedzo nya gyadi nya edzi hi nga vbanyago khidzo khu ndziya yi tsakisago Nungungulu. (Joh. 8:29) Khu kharato, ha gu landreya dzipasu dzaye, hi na tsakisa Jehovha. Nigu, hi nga tiyisega gu khethu Papayi wathu wa ndzadzini a na khala pari ya vale va dzi garadzeyago gu mu tsakisa. — Jak. 4:8.

⁷ Nya wuvili, Jesu pimedzede Papayi waye khu gu vbeleya. Khu kharato, uye ganede gu khuye: “Uye a nyi wonago, a ngu wona Babe.”  (Joh. 14:9) Hi nga pimedzeya makhalelo ya Jesu ni edzi a pharidego khidzo vambe. Khu giyeyedzo, yeyedzide gukhathala khu nyamayi wule a nga ba a dwala ngudzu a bwe a pweya wusiwana vale va nga ba va fedwe khu sigodwa sawe. Ha gu pimedzeya Jesu sa gu fana ni gu pimedzeya Jehovha kamwe. (Marko 1:40, 41; 5:25-34; Joh. 11:33-35) Tepo hi yago hi pimedzeya makhalelo ya Jehovha, wupari wathu naye wo engedzeya gutiya.

8. Tshamuseya gu khuwe khu ginani gu landreya dzipasu dza Jesu si hi phasago “gu pala” litigo leli.

⁸ Gu landreya dzipasu dza Jesu, si na hi phasa gu mba dzumeleya litigo leli nyo vivbe li hi tsolopeteya gu thumeya Jehovha. Ga wutshigu waye nyo hegise na si gufi, Jesu ganede gu khuye: “Nyi pade litigo.” (Joh. 16:33) Jesu kha dzumeleya gu khuye mipimiso, makungo ni mithumo nya litigo leli si kutsedzeya mavbanyelo yaye. Jesu kha diga gu vega gupima avba nya gighelo gi nga mu gira a ta mafuni, a gu gu emeya lina la Jehovha. Ahanti ethu ke? Omu nya litigo leli, gu na ni silo nya singi si nga hi girago hi si vegi gupima avba nyo thumeye Jehovha. Khu kharato, gufana ni Jesu, anethu hi yede gu vega gupima avba nya gu gire gugola ga Jehovha. Ha gu gira isoso hi na si kodza nethu gu ganeya gu khethu ‘hi pade’ litigo. — 1 Joh. 5:5.

9. Ginani hi yedego gu gira gasi hi simama ndziyani yi yisago womini nyo pindruge?

⁹ Ha gu landreya dzipasu dza Jesu hi na mana womi nyo pindruge. Tepo lidzaha nyo khaguri nya gighanyi li nga wudzisa gu khilo ginani nyi yedego gu gira gasi nyi mana womi nyo pindruge, Jesu a di khuye: “Delu uta nyi landreya.” (Mat. 19:16-21) Tepo a nga ba a bhula ni Vajudha nyo khaguri va nga ba va si khodwi gu khavo uye khuye Kristo, Jesu a di khuye: “Dzinvuta ndzangu dzi ngu nyi landra. Nyi ngu dzi ninga guvbanya nya gupindruge.” (Joh. 10:24-29) Nigu tepo a nga bhula ni Nikodhemu, givbango nya tribhunali nya yikhongolo nya Gijudha, Jesu a di ganeya gu khuye: “Ni wevbi a khodwago gwaye” a di hadzi ‘mana guvbanya nya gupindruge.’ (Joh. 3:16) Hi nga yeyedza kharini gu khethu hi ngu khodwa ga Jesu? Khu gu hi thumisa esi a si hevbudzidego hi bwe hi pimedzeya giyeyedzo gyaye. Ha gu gira isoso, hi na simama ndziyani yi yisago womini nyo pindruge. — Mat. 7:14.

10. Guya khu Johane 17:3, ginani hi yedego gu gira gasi hiti gwadi Jesu?

¹⁰ Na hi nga si landreyi dzipasu dza Jesu, hi yede gu pheya khu gu muti. (Leri Johane 17:3.) “Guti Jesu Kristo” gilo hi yedego gu simama gu gira. Gu vbwetega hi simama gu hevbula nya singi khuye, nya nga makhalelo yaye, mapimiselo yaye ni milayo a yi landrisago. Gani hi nani myaga nya yingi lisineni mwendro ne, gu vbwetega hi simama gu dzi garadzeya “guti” Jehovha ni Gyanana gyaye.

11. Mabhuku yaya nya 4, a gu Matewu, Marko, Luka ni Johane, ma gu ganeya khu ginani?

¹¹ Gasi gu hi phasa guti gwadi Gyanana gyaye,  Jehovha patide 4 Dziivhangeli dzi ganeyago khu womi wa Jesu ni thumo waye nyo tshumayele omu nya Lito laye. Mabhuku yaya ma gu tshamuseya esi Jesu a ganedego ni gu gira nigu ma ngu hi yeyedza edzi a dzipwidego khidzo. Khu gu phaswa khu mabhuku yaya nya 4, a gu libhuku la Matewu, Marko, Luka ni Johane, hi nga si kodza gu dundrugeya gwadi khu giyeyedzo gya Jesu. (Hebh. 12:3) Mabhuku yaya ma na ni dzipasu edzi Jesu a hi tshiyedego. Khu kharato, ha gu vbweta guti gwadi Jesu Kristo, hi yede gu ma hevbula. Ha gu gira isoso, hi na si kodza gu landreya gwadi dzipasu dzaye.

12. Ginani hi yedego gu gira gasi hi hevbula nya singi omu nya mabhuku yaya nya 4?

¹² Gasi gu hi phasega gwadi khu mabhuku yaya, gu vbwetega hi gira nya singi gu vbindra gu ma leri basi. Hi yede gu dzi ninga tepo nyo ma leri hi bwe hi dundrugeya gwadi khayo. (Fananisa ni Josuwa 1:8) Hongoleni hi bhula khu silo sivili si nga hi phasago gu dundrugeya khu mabhuku yaya ni edzi hi nga thumisago khidzo esi hi si hevbulago omu nya mabhuku yaya.

13. U nga gira kharini gasi gu mahungu ma lovidwego omu nya mabhuku yaya nya 4 ma manega ni tshivba?

¹³ Nyo pheye, gira gu mabhuku yaya ma manega ni tshivba. Thumisa mapimo yago gasi gu wona ni gupwa esi si nga ba si girega. Ndziya nya yadi yi nga gu phasago gu gira isoso, gu gira dzipesquiza. Hengeledzano ya Jehovha yi ngu hi ninga dziferameta nya dzingi nyo hevbule khidzo. Zama gu wona mongo wakona mwendro silo si dugeledego na ma nga si lowi matimo u hevbulago khayo ni hwane nyo ba ma lovidwe. Vbwetedzeya mahungu ma ganeyago khu vathu ni malanga ma khumbugwago omu nya matimo u ganeyago khayo. Fananisa mahungu u hevbulago khayo ni aya ma lovidwego ga limbe libhuku omu nya mabhuku yaya nya 4. Dzimbe dzitepo, mulovi a ngu pata dhetaliye nya lisima eyi mumbe a nga ne yi pata avba nya libhuku laye.

14-15. Ginani hi yedego gu gira gasi gu thumisa esi hi si hevbulago omu nya matimo nya guvbanye ga Jesu?

¹⁴ Nya wuvili, thumisa esi u si hevbulago omu nya mabhuku yaya womini gwago. (Joh. 13:17) Hwane nyo ba u hevbude gwadi matimo nya  mabhuku yaya, dzi wudzise gu khuwe: ‘Esi nyi si hevbulago omu nya matimo yaya, ina gyomo nyi nga gi thumisago womini wangu? Nyi nga ma thumisa kharini matimo yaya gasi gu phasa vambe?’ Zama gu dundrugeya khu muthu u mu tigo, khavbovbo, khu ndziya nya lihaladzo mu bhuleye esi u si hevbudego avba nya matimo yoyo.

¹⁵ Hongoleni hi wona giyeyedzo nya edzi hi nga thumisago khidzo mawonelo yaya ya mavili. Hi na hevbula khu matimo ya noni nya gisiwana, eyi Jesu a yi wonidego tempeleni.

16. Leri Marko 12:41 u bwe u tshamuseya esi si nga ba si girega.

¹⁶ Gira gu matimo yaya ma manega ni tshivba. (Leri Marko 12:41.) Nga dundrugeya khesi si nga dugeleya. I 11 nya nisani nya mwaga nya wu 33 matshiguni yathu, ulolo gu tshade matshigwana basi gasi gu Jesu a songwa. Uye a gu vbedza tepo nya yingi na gu hevbudza tempeleni. Ganiolu vathangeyi nya wukhongeyi va gu mu wugeya. Vambe gwawe va gu mu wudzisa gu khavo a gu yi mana hayi tshivba nyo gire thumo waye. Vambe va gu mu gira siwudziso nyo garadze na va zama gu mu linga. (Marko 11:27-33; 12:13-34) Olu Jesu a gu khuga khu vbale a hongola wumbe wulanga tempeleni. Khavba a gu romo a ngu kodza gu wona dzikhofre nya miningelo. So wonega gu khatshi womo ga wulanga wu ranwango pwani “Pátios das Mulheres” mwendro wulanga gu khalago vanyamayi. Uye a gu khala a pheya gu khedziseya vathu na va gu theya miningelo omu nya dzikhofre. Uye a gu wona sighanyi nya singi na si gu theya dzitsapawu nya dzingi, adzina a diri vbafuvbi nyo ka apwa ligwaha nya dzitsapawu na dzi gu thedwa omu nya dzikhofre.

17. Ginani egi noni nya gisiwana yi khumbugwago ga Marko 12:42 yi giridego?

¹⁷ Leri Marko 12:42. Hwane nya tepwana, gilo nyo khaguri gya gu ndrindra gupima ga Jesu. Uye a gu wona “gisiwana gimwegyo nya noni.” (Luka 21:2) Womi waye kha wu vbevbugi, nigu so wonega khatshi si ngu yi garadzeya gu mana gilo nyo dzi vbanyise. Ambari ulolo, iyo ya gu hongola avba nya khofre yi ya theya sikinyetana sayo sa sivili nya mba ndrindra gupima nya vathu. Sikinyetana silo nya sidugwana ngudzu nya gu ne kha si giri ligwaha tepo si thegago omu nya khofre. Jesu a ngu giti egi noni yile yi thedego omu nya khofre. Gu diri sikinyetana sivili nya lepton, a gu dzitsapawu nya dzidugwana ngudzu dzi nga ba dzi thumiswa tepo yoyo. Sikinyetana soso si mwalo ngudzu lisima, kholu kha si kodzegi gu renga khiso pardali, a gu ginyoni nya baratu ngudzu egi muthu a nga rengago gasi gu hodza.

18. Guya khu Marko 12:43, 44, ginani egi Jesu a ganedego khu ningelo nya noni?

¹⁸ Leri Marko 12:43, 44. Jesu a gu hlamadziswa ngudzu khu noni yile. Khu kharato, uye a gu rana vapizane vaye ata va yeyedza noni yile khuye: “Noni yeyi nya gisiwana yi ningede guvbindra vatshavbo.” Khavbovbo, a tshamuseya khuye: “Avo, [ngudzungudzu sighanyi] va di ningeya esi si nga va tshalelago, aholu iyo, yi di ningeya satshavbo yi si thembago mu wusiwanani wayo.” Tepo noni yeyi yi nga theya satshavbo sikinyetana sayo omu nya khofre tempeleni, yi di gu tumba gu khiyo Jehovha a na yi khathaleya. — Ndzi. 26:3.

19. Gilo muni nya lisima hi gi hevbulago khesi Jesu a ganedego maningano ni noni yile nya gisiwana?

¹⁹ Thumisa esi u si hevbudego avba nya matimo yaya womini gwago. Dzi wudzise gu khuwe: ‘Ginani nyi nga gi hevbulago khesi Jesu a ganedego maningano ni noni yeyi nya gisiwana?’ Dundrugeya vbadugwana khu noni yile. Khu lisine, iyo yi di gu vbweta gu ningeya nya singi ga Jehovha. Ambari ulolo, iyo yi giride esi yi nga si kodza, khu gu ningeya esi yi nga ba yiri naso ga Jehovha. Nigu Jesu a di gu dziti gu khuye, ningelo  wule wu diri wa lisima ngudzu ga Jehovha. Avba hi ngu hevbula gilo nya lisima: Jehovha a ngu tsaka ngudzu tepo hi girago satshavbo hi si kodzago gasi gu mu thumeya khu hefemulo ni monyo wathu watshavbo. (Mat. 22:37; Kol. 3:23) Jehovha a ngu tsaka khu gu wona gu dzi garadza gwathu! Isoso so pata tepo hi yi vbezago na hi gu tshumayela, na hi gu hongola mitshanganoni ni gu gira ni gevbini avba nya wukhozeyi waye.

20. U nga thumisa kharini esi u si hevbudego ga matimo ma ganeyago khu noni? Ninga giyeyedzo.

²⁰ U nga thumisa kharini esi u si hevbulago avba nya matimo ma ganeyago khu noni? Dundrugeya khu vandriyathu u nga va tiyisago khu gu va dundrugisa gu khuwe Jehovha a ngu tsaka khu satshavbo va girago gasi gu mu thumeya. Khu giyeyedzo, adzina u guti ndriyathu nya nyamayi a dandridego khu tanga a gu mwalo mawugelo nya yadi, nigu a mwalo tshivba nyo gire nya singi thumoni nyo tshumayele nga edzi a nga ba a gira khidzo gale. Khu kotani nya isoso, uye a gu dzipwa nandru a bwe a dzipwa na si phasi gilo, mwendro adzina u ngu dundruga ndriyathu nyo khaguri a gu na ni madwali nya makhongolo. Khu kotani nya olu a tandregago gu wona yatshavbo mitshangano salawuni nya mufumo uye a gu dzipwa na vbede tshivba. Ginani u nga girago gasi gu va phasa? Ganeya navo “magana nya yadi.” (Efes. 4:29) Va bhuleye mahungu nyo tiyise u ma hevbudego avba nya matimo nya noni nya gisiwana. Malito yago nyo tiyise ma nga va gira va tiyisega gu khavo Jehovha a ngu tsaka khu gu dzigaradza hi gu girago thumoni gwaye. (Mav. 15:23; 1 Tes. 5:11) Tepo u zundzago vandriyathu khu gu dzigaradza va gu girago gasi gu thumeya Jehovha, wa gu yeyedza gu khuwe u ngu landreya dzipasu dza Jesu.

21. Ginani u dzi emisedego gu gira?

²¹ Hi ngu bonga ngudzu khu Dziivhangeli dzedzi dzi hi ningago dzidhetaliye nya dzingi maningano ni gu vbanya ga Jesu, kholu idzo dzi ngu hi phasa gu pimedzeya Jesu hi bwe hi landreya dzipasu dzaye! Gwadi gu hevbula khu Dziivhangeli dzedzi avba nya gihevbulo gyago nya muthu enga mwendro avba nya wukhozeyi nya ndranga. Dundruga gu khuwe gasi gu phasega khesi u na si hevbulago omu nya Dziivhangeli dzedzi, u yede gu gira gu matimo yaya ma manega ni tshivba u bwe u thumisa esi u si hevbulago guvbanyani gwago. Ganiolu, kha si eneyi basi gu pimedzeya esi Jesu a giridego, hi yede gambe gu engisa esi a ganedego. Omu nya ndrima yi landreyago, hi na wona esi hi nga si hevbulago avba nya malito nyo hegise ya Jesu a ganedego na si gufi.