Egi gi si tsakisigo khu gu, tepo nyi nga ba nyiri ni 13 myaga wupari wangu ni Jehovha wu di pheya gu vbola, si di gu gira gu khatshi dzikolega dzangu xikwatunu dzi diri ni gutshulega nigu aneni nyi di gu vbweta gu mana gutshulega. Si di gira khatshi milayo ya vavelegi vangu ni milayo ya Jehovha yi di gu nyi segeya gu gira gilogyo nigu gu khodzeya Jehovha si ngu ningana thumo. Nyi di gu khodwa gu kheni Jehovha womo, ganiolu nyi di si dzipwi vbafuvbi gwaye, ambari ulolo, kha nya ema gutshumayela nigu nyi di gu dzigaradzeya gu gira ni gevbini gasi nyi si vboli khu liphuvboni.

Tepo nyi nga ba nyi hongola thumoni nyo tshumayele nyi di si dzi dongiseyi, nigu si di gu garadza gu pheya mabhulo ni mune ndranga, khu kharato, nyi di si mani mihandro nya yadi thumoni nyo tshumayele esi si nga ba si nyi gira nyi engedzeya gu mba wu gola thumo wowu. Nyi di gu dzi wudzisa gu kheni: ‘Vambe va gu si kodza kharini gu tshumayela semana ni semana, ngima ni ngima?’

Tepo nyi nga gira 17 myaga nyi di gu vbweta gutshulega basi, khu kharato, nyi di dongiseya silo sangu nyi dugeya nyi hongola Austrália. Vavelegi vangu kha va tsaka tepo nyi nga duga khu ndragani,  avo va garadzegide, ganiolu, va di gu pimisa gu khavo nyi na ya simama gu thumeya Jehovha.

Na nyiri Austrália, nyi di engedzeya gu vbola khu liphuvboni. Mitshanganoni nyi di gu hongola nyo mana tepo, nyi di gu gola gu hagana ni vaphya va nga ba vari ni mavbanyelo nyo fane ni yangu, nya gu limbe litshigu nyi di romo mitshanganoni, limbe nyi hongola diskoteka nya hana ni gu seya wadwa. Nya gu khedza hwane, nya gu wona gu kheni nyi diri lisineni ni gu nyi di gu lumba gambe litigo, ganiolu gu mwalo wulanga gu nga ba u nyi ninga litsako.

Hwane nya myaga mivili, nyi tivanide ni ndriyathu nyo khaguri nya nyamayi. Nya mba si vireya a nyi giride nyi dundrugeya khu mavbanyelo yangu. Nyi di gu khala nyi 5 vandriyathu nya vanyamayi va nga ba va nga si tshadi. Hi di konvhidhari muwoneleyi nya gipandre ni mwangadzi waye Tamara gasi va ta khala gaya gwathu semana mweyo. Tepo muwoneleyi nya gipandre a nga ba a khathaleya silo sa libandlani, Tamara a di gu tshala ni ethu hi hagana. Si di gu tsakisa ngudzu. Tamara a diri muthu nyo ninganiseyi silo nigu si di gu vbevbuga gu bhula naye. Si tsakiside guti muthu a vidzidwego khu liphuvboni, ganiolu a golago gu bhula ni gu hegiseya vambe.

Tamara a diri muthu nya sighingi nigu si di gu kuha monyo gu wona edzi a nga ba a gola khidzo lisine ni thumo nyo tshumayele. Uye a di gu tsaka khu lisine kholu a di gu dzi garadza thumoni wa Jehovha, gasi eni nyi di si tsaki kholu nyi di si dzi garadzi thumoni wa Jehovha. Mawonelo yaye nya yadi khu silo ni litsako a nga ba a lipwa si kuhide gundzu womi wangu. Giyeyedzo gyaye gi nyi giride nyi dundrugeya khu malito yaya nya lisima: Jehovha o vbweta gu khuye hi mu thumeya “khu gu tsaka” na hi gu “womba mikulungwane.”  — Ndzi. 100:2.

Nyi di gu vbweta gutsaka nga Tamara, ganiolu gasi nyi mana gutsaka gogo nyi di yede gu vbindrugedza silo nya singi womini gwangu. Si dzegide tepo, ganiolu nyi phede gu vbindrugedza vbadugwana-vbadugwana. Nyi di pheya gu dzidongiseya na nyi si hongoli thumoni nyo tshumayele nigu dzimbe dzitepo nyi di gu thuma kha nga piyonero nyo phasedzeye. Isoso si nyi phaside gu vbungula  hwanga nyi bwe nyi dzipwa na nyi tiyide. Gu thumisa ngudzu Bhibhiliya thumoni nyo tshumayele si nyi giride nyi wu tsakeya thumo wowu. Nya mba hweya nyi di pheya gu thuma kha nga piyonero nyo phasadzeye ngima ni ngima.

Nyi di pheya gu gira wupari ni vathu nya dzitanga dzatshavbo va nga ba va dzi garadza thumoni wa Jehovha ni gu wu gola. Giyeyedzo gyawe nya gyadi gi nyi phaside gu dundrugeya khesi si gu na ni lisima womini gwangu nyi bwe nyi pheya gu hevbula Bhibhiliya tshigu ni tshigu. Nyi di pheya gu wu gola gundzu thumo nyo tshumayele, khu kharato, nyi di pheya gu thuma kha nga piyonero nya tepo yatshavbo. Hwane nyo ba gu vbindride myaga nya yingi nya mba tsaka, khu gu hegisa nyi manide litsako nyi bwe nyi dzipwa gaya libandlani.

Na wu vbindride mwaga moyo, nyi di tivana ni Alex, mwama nya wadi a nga ba a gola Jehovha ni thumo nyo tshumayele. Uye a diri muphasedzeyi nya libandla nigu a diri ni 6 myaga na gu thuma kha nga piyonero nya tepo yatshavbo. Alex thumide gambe Malawi kholu gu di gu vbwetega ngudzu vahuweleyi. Iyoyo a di ya tivana ni vamisiyonariyu nyo khaguri. Avo va mu ningide giyeyedzo nya gyadi nigu va mu kutside gu thangisa thumo wa Jehovha womini gwaye.

Khu 2003, eni ni Alex hi ni tshada hi bwe hi simama umo nya thumo nya tepo yatshavbo. Hi hevbude silo nya lisima nigu Jehovha a hi kategiside khu dzindziya nya dzingi.

Khu 2009, hi di ranwa gasi guya thuma kha nga Vamisiyonariyu tigoni ga Timor-Leste, li gomogo gafuvbi ni Indonésia. Hi thurugide, hi tsaka hi bwe hi thava khu tepo yamweyo. Hwane nya 5 migima hi di vboha Díli kapitali ya Timor-Leste.

Gasi gu thuma ga litigo lile si lombide gu vbindrugedza nya singi, satshavbo mule si di gu hambanide, tumbunugo, lidimi, guhodza ni mavbanyelo. Khu kharato, si lombide gu hi dzi pwananisa ni giemo gya mule. Thumoni nyo tshumayeli hi di gu bhula ni vathu nya sisiwana, va nga mba hevbula ngudzu nigu va nga ba va tshaniswa. Nya vangi gwawe va diri ni sibawa givilini nigu va di gu garadzega  monyoni khu kotani nya nyimbi ni wughevenga. *

Si di gu tsakisa gu tshumayela, khu giyeyedzo litshigu limwedo nyi tide gyagadzyana gimwego nya 13 myaga nyo pwani khu Maria. * Mamayi waye a di fude myagana hwane nigu si di gu mu garadzeya gu wona papayi waye. Gufana ni sanana nya singi nya tingana yaye, Maria a di si mati makungo nya womi waye. Nyo dundruga litshigu limwedo a nga liya na tshamuseya edzi a nga ba a dzipwa khidzo, ganiolu kha nya nga ba nyi si pwisisa esi a nga ba a ganeya, kholu nyi di si liti gwadi lidimi laye. Nyi di gombeya ga Jehovha gasi a nyi phasa gu tiyisa Maria, khu kharato, nyi di pheya gu mu lereya milowo nyo tiyise. Ga myaga yi nga landreya nyi wonide edzi lisine li vbindrugedzidego khidzo makhalelo ni mavbanyelo ya Maria. Uye bhabhatisidwe nigu olu a gu gimbidzisa abune sihevbulo nya Bhibhiliya. Muhuno, Maria o gira gipandre nya ndraga nya yikhongolo ya liphuvboni ni gu a gu dzipwa na gu haladzwa.

Jehovha a ngu kategisa thumu nyo tshumayele Timor-Leste. Ambari olu gutala nya vahuweleyi va bhabhatisidwego ndrani nya 10 myaga yi vbindridego, nya vangi va gu thuma kha nga vapiyonero, vaphasedzeyi nya libandla mwendro madhota. Vambe va gu thuma RTO (Escritorio remoto de tradução) gasi gu dusa guhodza ga liphuvboni khu madimi ya gipandreni mule. Nyi tsakine ngudzu khu gu vapwa na va gu hembeleya mitshanganoni na va tsakide nyi bwe nyi va wona na va gu dandra khu liphuvboni.

Mavbanyelo Timor-Leste ma di gu hambanine ni aya hi nga ba hi ri nawo Austrália, ganiolu si di gu tsakisa. Dzimbe dzitepo hi di gu manyana umo nya movha nyo tale khu vathu, na hi randredwe khu ndzidzandzi nyo bange nyi mitongwe na va gu hongola merkadhu. Dzimbe dzitepo hi di gu gimbidzisa gihevbulo umo nya ginyumbana nyo vbise, nyo londrwe khu mafu, dzikhugu na dzi gu tutuma-tutuma ndrangani. Ambari si nga ba si garadza, tepo yatshavbo nyi di gu ganeya gukheni: ‘Edzi si tsakisago khidzo!’

Nyo khedza hwane nya gu bonga gundzu vavelegi vangu khu gu ba va nyi hevbudzide maningano khu Jehovha, va bwe va nyi seketeya ambari tepo wupari wangu ni Jehovha wu nga ba wu vbode. Malito ma gomogo umo ga Mavingu 22:6, ma ngu nyi kuha ngudzu. Papayi wangu ni mamayi wangu va ngu dzipwa gundzu matshandza kheni ni Alex. Avo va ngu tsaka gundzu khu gu hi wona na hi gu thumiswa khu Jehovha. Gukhugeya 2016 ha gu thuma kha nga vawoneleyi nya gipandre Austrália ni Nova-Zelândia.

Ina u ngu khodwa gu khuwe nyi di si wu goli thumo nyo tshumayele! Olu nyi ngu u gola ngudzu thumo nyo tshumayele! Nyi si wonide gu kheni ambari ha gu emisana ni sigaradzo womini, hi nga si kodza gu mana gutsaka nya lisine ha gu thumeya Jehovha khu monyo wathu watshavbo. Khu lisine, 18 myaga yeyi nyi thumeyago Jehovha ni Alex khiyo nya gu tsakise ngudzu womini gwangu. Olu nyi ngu li pwisisa lisine li ganedwego khu Dhavhidhe muembi nya dzindzimo tepo a nga embeya Jehovha khuye: “Va na nengele vatshavbo va thavelago avbo gwago, va na kulungele kala gupindruga; uwe u ngu va vhikela, avo va nengela khu uwe, avo va golago lina Iago.” — Ndzi. 5:11.