Khu ginani Jesu na si gufi, a nga ganeya malito ya Dhavhidhe ma gomogo omu ga Ndzimo 22:1?

▪ Na si gufi, Jesu ganede malito ma gomogo omu ga Matewu 27:46: “Nungungulu wangu, Nungungulu wangu, khu ginani u nyi digidego?” Tepo Jesu a nga ganeya malito yaya, gu di gu tadzisega malito ya Dhavhidhe ma gomogo omu ga Ndzimo 22:1. (Marko 15:34) Si di hadzi gu mba pwala gu pimisa gu khethu Jesu tepo a nga ganeya malito yaya, a di khunguvanyegide mwendro gu vbeledwa khu gu khodwa khu gitepwana. Jesu a di gu pwisisa gu khuye khu ginani a nga ba a yede gufa nigu a di dzi emisede gu gira isoso. (Mat. 16:21; 20:28) Jesu a di gu dziti gambe gu khuye ya gu vboha tepo nya gu afa, Jehovha a di yede gu ema gu mu vhikeya. (Joba 1:10) Khu kharato, Jesu a di hadzi yeyedza gu khuye tumbegide ga Jehovha ambari na gu emisana ni lifo nya xapi. — Marko 14:35, 36.

Khu ginani Jesu a ganedego malito ma gomogo omu ga ndzimo? Ambari olu hi gu mba tiyisega, hongoleni hi wona adzina saye sighelo nyo khaguri. *

Khu gu ganeya malito yaya, adzina Jesu a di gu tshingisa gu khuye Jehovha kha na nga himbedzeya gu khuye a songwa. Jesu a di yede gu livba dzegiso nya mba phaswa khu Jehovha. Uye a diri muthu nya nyama nigu a di yede gufa kha nga muthu nya nyama khu kotani nya vathu vatshavbo. — Hebh. 2:9.

Jesu adzina ganede malito nyo khaguri nya ndzimo yeyi, gasi gu vambe va dundruga ndzimo  yatshavbo. Matshiguni ya Jesu, Vajudha va di gu oloveya gu vegedza hungoni Dzindzimo nya dzingi. Va gupwa livhesi nya Ndzimo nyo khaguri avo va di gu dundruga ndzimo yatshavbo. Abari gu esi khiso a nga ba a si pimisa Jesu, adzina uye a di gu vbweta gu khuye vapizane vaye nya Vajudha va dundruga gu khavo ndzimo yeyi, yi na ni siprofeto nya singi maningano ni gufa gwaye. (Ndzi. 22:7, 8, 15, 16, 18, 24) Na siri isoso basi, mavhesi nyo hegise nya ndzimo yeyi, ma gu dhumisa Jehovha ni gu yeyedza gu khayo uye Pfhumu nya mafu yatshavbo. — Ndzi. 22:27-31.

Jesu adzina a di gu vbweta gu si vega guagani gu khuye uye a diri mwalo nandru. Na si gufi, Jesu lamudwe khu ndziya nya gu yi diri mwalo omu nya nayo a bwe a singedzwa gu pwani muhembululi. (Mat. 26:65, 66) Gulamula gogu gu giridwe khu givbiredza ni wutshigu nigu si diri mwalo omu nya nayo wa tepo yoyo. (Mat. 26:59; Marko 14:56-59) Tepo Jesu a nga khuye: “Nungungulu wangu, Nungungulu wangu, khu ginani u nyi digidego?” adzina a di gu vbweta gu tshingisa gu khuye a diri mwalo nandru nigu gu diri mwalo gighelo nyo songwe khu ndziya yile.

Jesu adzina a di gu vbweta gu dundrugisa vambe gu khuye gu tshaniseka ga Dhavhidhe gu di si yeyedzi gu khugo a di si tsakedwi khu Jehovha. Giwudziso egi Dhavhidhe a giridego kha gi yeyedzi gu khigyo a di vbeledwe khu gukhodwa. Hwane nyo gire giwudziso gegi, Dhavhidhe ganede gu khuye a di gu tumba gu khuye Jehovha a di hadzi vbulugisa vathu vaye nigu Jehovha simamide a mu kategisa. (Ndzi. 22:23, 24, 27) Khu ndziya nyo fane, ambari olu Jesu “Mwamana wa Dhavhidhe” a nga ba a tshaniseka avba nya simbo nya tshanisa, isoso kha sa nga ba si thula gu khiso a di si tsakedwi khu Jehovha. — Mat. 21:9.

Adzina Jesu, a di gu ganeya khu gu vbisa ogu a nga ba a gupwa khu gu ba a sa vhikedwa khu Jehovha ga tepo yile. Jehovha kha nga ba adzina gu khuye Gyanana gyaye gi tshaniseka gi bwe gifa. Isoso si vbwetegide basi kholu Adhamu ni Evha va digide gu engisa Nungungulu. Jesu kha nga ba a giride gilo nyo vivbe, ganiolu, si lombide gu a tshaniseka a bwe afa gasi gu hlamula esi Sathane a nga ganeya, ni gu gira malulamiselo nya dzegiso wu nga ba wu vbwetega gasi gu mana esi vathu va nga ba va si luzide. (Marko 8:31; 1 Ped. 2:21-24) Isoso si di hadzi kodzega basi khu gu ba Jehovha a si mu vhikeyi ga gitepwana gile.

Adzina Jesu a di gu vbweta gu phasa valandreyi vaye gu pimisa khu gighelo nyo ba Jehovha a dzumelede gu khuye afa khu ndziya yile. * Jesu a di gu dziti gu khuye nya vangi va di hadzi khunguvanyega khu gu ba a fude kha nga gighevenga. (1 Kor. 1:23) Ganiolu, valandreyi vaye va gu vega gupima avba nya gighelo gi nga mu gira a songwa va di hadzi pwisisa tshamuselo wakona. (Gal. 3:13, 14) Khu kharato, vapizane vaye va di hadzi gu mu wona kha nga muvbulugisi na siri gighevenga.

Khu gevbini gighelo gi nga gira Jesu a ganeya malito yale? Lisine khu gu uye a di gu dziti gu khuye a di yede gufa avba nya simbo nya tshanisa gasi a gira gugola ga Jehovha. Hwanenyana nyo ba a ganede malito yale, Jesu a di khuye: “Si tadzisegide!” (Joh. 19:30; Luka 22:37) Ambari olu Jehovha a nga mba mu vhikeya ga tepo yile, Jesu si kodzide gu tadzisa esi si nga mu gira ata mafuni nigu a si kodzide gu tadzisa satshavbo si nga lowa maningano ni uye “khu Mosi, khu Vaprofeti ni Dzindzimo.” — Luka 24:44.