1. Ginani paradhesi ya liphuvboni, nigu ginani hi yedego gu dzi emiseya gu gira?

 MUHUNO, gu na ni paradhesi nyo fananisi omu mafuni, umo vathu nya vangi va vbanyago khu gurula ni gu gira silo nya singi. Avo va vbanyago paradhesini momo va dzi emisede gu mba duga. Avo va gu vbweta gu khavo vathu nya vangi va dzi pata navo wulangani momo nya gu tsakise ngudzu. Wulanga muni uwowo? Paradhesi ya liphuvboni! a

2. Ginani gi gu hlamadzisago ngudzu ha gu ganeya khu paradhesi ya liphuvboni?

² Si ngu samadzisa ngudzu gu ba Jehovha a giride wulanga nya gurule vbakari nya litigo leli Sathane a li tadzidego khu wuvivbi, lidiwo ni dzimhango. (1 Joh. 5:19; Gutu. 12:12) Nungungulu wathu nya lihaladzo a ngu hi ninga giphaso hi gi vbwetago gasi hi simama gu dandra khu liphuvboni ni gu simama gu mu thumeya na hi tsakide. Bhibhiliya ya gu tshamuseya paradhesi ya liphuvboni nga “wuthavelo” mwendro ‘lithembwe nya senge li thedzedwago gwadi mati.’ (Isa. 4:6; 58:11) Khu gu kategiswa khu Jehovha, avo va vbanyago paradhesini momo va ngupwa litsako ni gu vhikelega, ambari va tshanganago ni sigaradzo nya litshigu ni litshigu. — Isa. 54:14; 2 Thim. 3:1.

3. Giprofeto gi gu romo omu ga Isaya gipimo 65, gi tadzisegide kharini Israyeli wa gale?

³ Jehovha tshamusede edzi wu na ba wuri idzo womi paradhesini nya liphuvbo khu gu thumisa muprofeti Isaya. U nga hevbula mitshamuselo nya giprofeto gyogyo omu ga Isaya gipimo 65 gi  nga pheya gu tadzisega khu 537 na ma si vbohi matshigu yathu. Khiyo tepo yoyo Vajudha va nga duswa wugumbini Bhabhiloni va wuya tigoni gwawe nya mavelego. Jehovha kategiside vathu vaye, a va phasa gu vbahedza lidhoropa la Jerusalema ni gu bwe va wusedza tempele, a gu umo gu nga ba gu giredwa umo wukhozeyi nya lisine. — Isa. 51:11; Zak. 8:3.

4. Giprofeto gi gu romo omu ga Isaya gipimo 65, gi tadzisegide kharini matshigoni yathu?

⁴ Giprofeto gya Isaya gi tadzisegide khu tepo nya wuvili khu 1919 matshigoni yathu, tepo khiyo vakhozeyi va Jehovha va nga duswa wugumbini ga Bhabhiloni nya khongolo. Gukhugeya khu tepo yoyo, paradhesi ya liphuvboni yi di pheya gu dandra mafuni. Vahuweleyi nya mufumo va wumbide mabandla nya mangi nigu va manide mihandro nya yingi nya liphuvbo. Vama ni vanyamayi va nga ba vari sighevenga, va nga ba vari ni mavbanyelo nya mba handzega va phede gu “ambala muthu nya muphya, oyu a giridwego khu guya khu gugola ga Nungungulu.” (Efes. 4:24) Nya mba kanakana, makategwa nya mangi ma nga tshamusedwa omu nya giprofeto gya Isaya ma na tadzisega mindru watshigu mafuni nya maphya. Ambari ulolo, avo va gu romo paradhesini ya liphuvboni va ngu tsaka ngudzu kholu va ngu wuyedwa khu dzindziya nya dzingi. Omu nya ndrima yeyi, hi na wona gu khethu khu ginani si gu na ni lisima gu manega paradhesini ya liphuvboni, nigu khu ginani hi gu mba yela gu duga.

AVA VA GU ROMO PARADHESINI YA LIPHUVBONI VA GU DZIPWA KHARINI?

5. Guya khu giprofeto gi gu romo omu ga Isaya 65:13, avo va gu romo paradhesini ya liphuvboni va gu wuyedwa khu ndziya muni?

⁵ Va na manega ni mawugelo nya yadi ni gu hodza gwadi. Giprofeto gya Isaya gya gu yeyedza gu khigyo gomo guhambana ga vale va vbanyago paradhesini ya liphuvboni ni vale va gu mba vbanya umo. (Leri Isaya 65:13.) Jehovha a ngu ninga satshavbo si vbwetegago sithumi saye gasi si simama gu mu khozeya. Uye a ngu hi ninga liphuvbo laye nya guage, Bhibhiliya ni guhodza ga liphuvboni gasi hi si kodza gu ‘hodza . . . gu seya . . . ni gu tsaka.’ (Fananisa ni Gutuledwa 22:17.) Giemo gyathu gi hambanide ni egi gya vale va gu mwalo paradhesini ya liphuvboni, kholu avo ‘va ngupwa ndzala . . . va ngupwa lidora . . . ni gu khala dzitshoni.’ Avo va gu dzipwa na va gu keneledwa khu gilo nyo khaguri womini gwawe kholu va mwalo wupari ni Nungungulu. — Amosi 8:11.

6. Joyele 2:21-24 a gu tshamuseya kharini malulamiselo ya liphuvboni hi ningwago khu Jehovha nigu hi nga wuyedwa kharini?

⁶ Umo nya giprofeto gyaye, Joyele thumiside silo hi sitigo nya nga dzimbewu, vhinyu ni mafura gasi gu yeyedza gu khuye Jehovha a ngu hi ninga satshavbo hi si vbwetago gasi hi simama gu tiyisa gukhodwa gwathu gu pata ni guhodza ga liphuvboni. (Joy. 2:21-24) Khu giyeyedzo, a gu hi ninga Bhibhiliya, mabhuku ma seketedwago umo nya Bhibhiliya, sayiti yathu, mitshangano, dziasembleya ni dzikongresu. Hi ngu wuyedwa khu malulamiselo yaya tshigu ni tshigu, nigu kha nga handro wakone khu ndziya nyo fananise hi ngu manega ni mawugelo nya yadi ni gu hodza gwadi.

7. Silo muni si hi girago hi ‘tsaka monyoni?’ (Isaya 65:14)

⁷ Na va tshakide. Vathu va Nungungulu va ngu “embelela khu gutsaka” kholu myonyo yawe yi ngu bonga Jehovha khu satshavbo a va gireyago. (Leri Isaya 65:14.) Lisine li hi tiyisago, situmbiso nyo thaveleye si gomogo omu nya Lito la Nungungulu ni gitumbiso gi seketedwago avbo nya dzegiso wa Jesu Kristo, si ngu hi ninga “litsako monyoni.” Ha gu bhula ni vandriyathu va liphuvboni khu silo sesi hi na engedzeya gu tsaka. — Ndzi. 34:8; 133:1-3.

8. Khu sevbini silo sivili nya lisima si tivegisago paradhesi ya liphuvboni?

⁸ Lihaladzo ni gupwanana nya vathu va  Jehovha khiso silo sivili si tivegisago paradhesi ya liphuvboni. Gu “pwanana khu gu vbeleya” giyeyedzo nya edzi womi wu na khalago khidzo mafuni nya maphya, tepo sithumi sa Jehovha si na vbanyago khu lihaladzo ni gupwanana nya gukhongolo guvbindra ogu ga muhuno. (Kol. 3:14) Na gu tshamuseya khesi a nga si tugula khu tepo nya gupheye a ngati Dzifakazi dza Jehovha, ndriyathu nya nyamayi wari, khuye: “Eni nyi di si dziti gu kheni ginani gutsaka ambari kamu ndrangani gwangu. Vathu nyo pheye nyi nga va wona na va gu haladzana, Dzifakazi dza Jehovha.” Watshavbo muthu a vbwetago gu tsaka khu lisine a yede guti paradhesi ya liphuvboni. Ambari vathu nya litigo va gu ganeya ginani khu sithumi sa Jehovha, ethu hi ngu dziti gu khethu hi na ni lina nya ladi nigu hi ngu wonwa khu ndziya nya yadi khu Jehovha gumogo ni vandriyathu mafuni gwatshavbo.— Isa. 65:15.

9. Guya khu Isaya 65:16, 17, ginani gi na giregago ni sigaradzo hi tshanganago naso?

⁹ Na va rude ni gu mba garadzega. Isaya 65:14 a gu ganeya khu vale va hathago gu simama vbavbandze nya paradhesi ya liphuvboni. Avo va gu “keta khu gu vbisega monyoni [gwawe ni gu] womba huwa khu gu vbisega hefemuloni.” Ina so thula gu khiso vathu va Nungungulu anavo va na tshaniseka? Khu lisine, silo soso “si na [divadwa] si bwe si sihwa mahoni ga [Nungungulu].” (Leri Isaya 65:16, 17.) Jehovha a na dusa sigaradzo sathu nigu khu gu gimbiya nya tepo kha hi na nga dundruga gambe edzi si nga ba si hi kuha khidzo.

10. Khu ginani u bongago khu lithomo u gu nalo nya gu tshangane ni vandriyathu nya Makristo? (Wona fotu.)

¹⁰ Ambari muhuno, hi ngupwa gurula tepo hi hongolago mitshanganoni nya Wukristo. Iyoyo hi ngu si kodza gurula hi bwe hi divala satshavbo nyo vivbe si gomogo mafuni momu. Ethu hi ngu phasa gambe vandriyathu gu dzipwa na va rude tepo hi yeyedzago mihandro nya liphuvbo la Nungungulu nya nga lihaladzo, gutsaka, wuwadi ni gu dzivbevbugisa. (Gal. 5:22, 23) Hi ngu bonga ngudzu khu gu manega hengeledzanoni ya Nungungulu! Vale va simamago paradhesini ya liphuvboni va na wona gutadzisega nya gitumbiso gi ganeyago khu “ndzadzi nya yiphya ni mafu nya maphya.”

11. Guya khu Isaya 65:18, 19, wa gu dzipwa kharini khu gu dziti gu khuwe Jehovha a giride paradhesi ya liphuvboni?

¹¹ Na va gu bonga ni gu tsaka. Muprofeti Isaya a hi embede gimbe gighelo gi yedego gu hi gira hi ‘tsaka ni gu nengela’ paradhesini ya liphuvboni. Kholu paradhesi yoyo yi di girwa khu Jehovha. (Leri Isaya 65:18, 19.) Khu kharato, kha si samadzisi gu ba Jehovha a hi thumisa gasi gu  phasa vathu gu duga khomu nya dzihengeledzano nya mafu yaya dzi gu mba hevbudza lisine maningano khu Nungungulu hi bwe hi va phasa gu gira gipandre nya paradhesi nyo fananise. Ethu hi ngu tsaka ngudzu khu makategwa hi ma manago lisineni, nigu ha gu vbweta gu bhuleya vambe maningano khu makategwa yaya nya gu samadzise. — Jer. 31:12.

12. Wa gu dzipwa kharini khu gu leri gitumbiso gi gomogo omu ga Isaya 65:20-24, nigu khu ginani?

¹² Ethu hi ngu bonga ni gu tsaka ngudzu kholu hi gu na ni wupari ni Jehovha. Dundrugeya khu satshavbo hi na si wonago ni gu gira mafuni nya maphya ya Nungungulu. Bhibhiliya ya gu tumbisa gu khiyo: “Kha gu na manega gambe gwawe sanana nya gu vbanye matshigu madugwana, ambari sikhosane nya gu mba tshanganisa matshigu nya guvbanye gwawe.” Hi na ‘vbaha dzinyumba hi vbanya umo, hi yala misimbo nya dziuvha hi bwe hi hodza mihandro yakona.’ Ethu kha hi na nga ‘thumela mahala’ kholu hi na ‘kategiswa khu Jehovha.’ Uye a gu tumbisa gu hi ninga womi nya lisine, nyo vhikelege. “Na va nga gu ganeya” uye a ngu siti esi moyo ni moyo wathu a si vbwetago. Nigu ‘a na tadzisa gwatshavbo gudogoreya nya sivangwa saye.’ — Isa. 65:20-24; Ndzi. 145:16.

13. Isaya 65:25 a gu tshamuseya kharini guvbindrugedza gu girwago khu vathu tepo va pheyago gu thumeya Jehovha?

¹³ Na va rude ni gu vhikelega. Khu gu phaswa khu liphuvbo nya guage la Jehovha, vathu nya vangi va nga ba vari ni maghilivindra, gu mba kodza gu dziphara ni gu mba tumbega, va giride guvbindrugedza nyo hlamadzise womini gwawe. (Leri Isaya 65:25.) Avo va dzi garadzide gasi gu diga makhalelo nyo vivbe. (Rom. 12:2; Efes. 4:22-24) Lisine gu vathu va Nungungulu kha va vbeleya, khu kharato hi na gira sihoso. Ambari ulolo, Jehovha a ngu tshanganisa “vathu vatshavbo” va mu haladzago ni gu haladzana khu gyawe. Nigu kha nga handro wakone ethu hi na ni gurula nya lisine ni gu pwanana. (Tit. 2:11) Esi silo nya gu samadzise ngudzu nya gu khu Nungungulu basi a gu na ni tshivba nya gu si gire!

14. Giyeyedzo gya muphya nyo khaguri gya gu yeyedza kharini lisine nya malito ma gomogo omu ga Isaya 65:25?

¹⁴ Ina muthu a nga vbindrugedza mavbanyelo yaye khu lisine? Dundrugeya khu giyeyedzo gegi: Muphya moyo a nga ba ari ni 20 myaga a di gu khotedwe pasoni, nigu a diri ni womi nya mba handzega ni maghilivindra. Uye a di gu khotedwe khu guba dzimovha, gu dhumeya dzindranga dza vane ni gu gira wumbe wuvivbi. Uye a di gu dzi emisede gu dwana ni wevbini muthu. Tepo a nga pheya gupwa lisine nya Bhibhiliya, ni gu pheya gu hongola mitshanganoni nya Dzifakazi dza Jehovha uye a di tiyisega gu khuye a di gu manide gilo nya lisima womini gwaye, a gu paradhesi ya liphuvboni. Hwane nya gu ba a bhabhatisidwe, tepo yatshavbo a di gu dundrugeya khedzi libhuku la Isaya 65:25 li tadzisegidego khidzo avbo gwaye. Uye a di gu digide gigaha gi gu na ni ngala a bwe a khala muthu nyo rule nga ginvhutana.

15. Khu ginani hi vbwetago gu rana vambe gasi vata patana ni ethu paradhesini ya liphuvboni, nigu hi nga gira kharini isoso?

¹⁵ Isaya 65:13 a gu pheya khu malito ma gu khayo: “Pfhumu [Jehovha] a gu ganeya kharati khuye.” Livhesi 25 la hegisa khu malito ma gu khayo: “kheni [Jehovha] nyi ganelago.” Satshavbo situmbiso saye si ngu tadzisega. (Isa. 55:10, 11) Paradhesi ya liphuvboni yomo muhuno watshigu. Jehovha giride ndranga nya wukhozeyi yi gu mba fananiswa. Khu kotani nya olu hi girago gipandre nya ndranga yeyi, ethu hi ngupwa gurula nya gungi nga khatshi ho vbanya wumbe wulanga wu gu mba gira gipandre nya litigo leli nyo vivbe. (Ndzi. 72:7) Khigyo gighelo gi hi girago hi phasa vathu nya vangi gasi va ta dzi pata ni ethu ga ndranga yeyi nya Wukristo. Ha gu gira isoso khu gu vega gupima avbo nya gu gire vapizane. — Mat. 28:19, 20.

 HI NGA PHASA KHARINI VAMBE GU BEYA PARADHESINI YA LIPHUVBONI?

16. Hi nga phasa kharini vathu gu beya paradhesini ya liphuvboni?

¹⁶ Moyo ni moyo wathu a nga gira gilo nya lisima gasi gu phasa vambe gu beya paradhesini ya liphuvboni. Ha gu gira isoso khu gu vbweta gu pimedzeya Jehovha. Uye kha gurumedzi muthu gu gira gipandre nya hengeledzano yaye. Wulangani nya isoso, uye a gu ‘rana’ vathu khu ndziya nya yadi. (Joh. 6:44; Jer. 31:3) Khiso si girago gu hwane nya gu ba va hevbude khu makhalelo ya Jehovha, va vbweta gu khala pari yaye. Ganiolu, makhalelo yathu nya yadi ni mavbanyelo yathu ma nga phasa kharini vathu gu beya paradhesini ya liphuvboni?

17. Hi nga gira ginani gasi gu phasa vathu gasi gu beya paradhesini ya liphuvboni?

¹⁷ Mweyo nya dzindziya hi nga yi thumisago gasi gu phasa vathu gu beya paradhesini ya liphuvboni, khu gu phara gwadi vandriyathu khu lihaladzo ni wuwadi. Tepo muthu nyo khaguri a tago mitshanganoni nya libandla khu tepo nyo pheye, ha gu vbweta gu khethu a dzipwa nga edzi va dzipwidego khidzo vale va nga beya mitshangano ga libandla la Korinto wa gale. Avo va di khavo: “Khu lisine Nungungulu womo vbakari gwanu.” (1 Kor. 14:24, 25; Zak. 8:23) Khu kharato, hongoleni hi simama gu engisa wusingalagadzi wu gu khuwo “vbanyani khu gurula vbakari gwanu.” — 1 Tes. 5:13.

18. Ginani gi nga phasago gu ndridredzeya vathu vata hengeledzanoni gwathu?

¹⁸ Tepo yatshavbo hi yede gu wona vandriyathu nya Makristo nga edzi Jehovha a va wonago khidzo. Ethu ha gu gira isoso khu gu vega gupima avbo nya makhalelo yawe nya yadi nasiri avbo nya sihoso sawe, kholu hi ngu dziti gu khethu nya mba hweya va na vbeleya. Hi nga lulamisa sigaradzo hi gu naso ni vandriyathu khu ndziya nya lihaladzo ha gu “gireyana wuwadi, [hi] pweyana wusiwana, [hi bwe hi] divaleyana.”  (Efes. 4:32) Khu ndziya nyo fane, paradhesi ya liphuvboni yi na ndrindredzeya vathu va vbwetago gu pharwa khu ndziya nyo fane. b

SIMAMA PARADHESINI YA LIPHUVBONI

19. a) Guya khu kwadru yi gu khiyo: “ Avo va dugide va bwe va wuya,” ginani vathu nyo khaguri va ganedego hwane nya gu ba va wuyide paradhesini ya liphuvboni? b) Ginani hi yedego gu dzi emiseya gu gira? (Wona fotu.)

¹⁹ Hi ngu bonga ngundzu khu gu gira gipandre nya paradhesi ya liphuvboni. Muhuno watshigu, paradhesi ya liphuvboni yi mburide ngudzu gu vbindra gale ni gu gima yi di nga si manegi ni vathu nya vangi. Ethu ha gu vbweta gu simama gu bonga khu paradhesi yeyi Jehovha a hi giredego. Ni wevbini a vbwetago gurula, gutsaka ni gu vhikelega a na beye paradhesini ya liphuvboni a bwe a si dugi gambe. Ganiolu, hi yede gu dzi woneya kholu Sathane a gu simama gu gira satshavbo a si kodzago gasi gu hi kanganyisa ni gu hi dusa khu paradhesini ya liphuvboni. (1 Ped. 5:8; Gutu. 12:9) Kha hi yeli gu mu dzumeleya gu gira isoso. Hongoleni hi gira satshavbo hi si kodzago gasi gu vhikeya gumbura, gu aga ni gurula hi gu nago paradhesini ya liphuvboni.