1. Khu lizana myaga nya gu pheye vathu va Jehovha va di gu sasamedzidwe khu ndziya muni?

 TEPO yatshavbo Jehovha a ningago thumo vathu vaye, a gu vireya gu khuye va wu gira khu ndziya yi sasamedzidwego gwadi. (1 Kor. 14:33) Khu giyeyedzo, gugola ga Nungungulu gu girisago gu mahungu nya yadi ma tshumayedwa “mafuni gwatshavbo.” (Mat. 24:14) Jehovha, vegide Jesu gasi gu thangeya thumo wowu. Nigu Jesu, a ngu dzi ninga tepo nya gu tiyisege gu khuye thumo wowu wu ngu girwa khu ndziya yi sasamedzidwego gwadi. Khu lizana myaga nya gu pheye, gu manegide mabandla nya mangi, nigu gu emisidwe madhota gasi ma thangeya ni gu ningeya sileletelo. (Mith. 14:23) Ga lizana myaga nya gu pheye, Jerusalema gu diri ni tsawa wu nga ba wu wumbwa khu madhota ni vapostoli va nga ba va hunga sileletelo si na landriswago khu mabandla. (Mith. 15:2; 16:4) Khu kotani nya gu engise sileletelo soso “mabandla ma di gu simama gu tiyiswa gukhodwani nigu ma di gu engedzeya.” — Mith. 16:5.

2. Gukhugeya khu 1919, ginani egi Jehovha a gi thumisago gasi gu ningeya sileletelo ni guhodza ga liphuvboni?

² Jehovha a nga gu simama gu sasamedza vathu vaye kala muhuno. Gukhugeya khu 1919, Jesu a gu thumisa vama va todzidwego gasi gu sasamedza thumo nya gu tshumayele ni gu ninga guhodza ga liphuvboni valandreyi vaye. a (Luka 12:42) Somo guagani gu khiso Jehovha a ngu kategisa thumo wu girwago khu vama vava. — Isa. 60:22; 65:13, 14.

3-4. a) Nga tshamuseya edzi hi wuyedwago khidzo khu gu khala vathu va sasamedzidwego gwadi. b) Ginani hi na bhulago khigyo avba nya ndrima yeyi?

 ³ Nari khatshi kha ha nga ba hi sasamedzidwe gwadi, na si garadza gu gira thumo owu Jesu a hi ningidego. (Mat. 28:19, 20) Khu giyeyedzo, nari khatshi hi diri mwalo dziteritoriyu, muthu ni muthu a di hadzi gu tshumayela omu a gu manago. Khu kharato, dzimbe dziteritoriyu na dzi gu tshumayedwa ngudzu dzimbe dzi tshumayedwa vbadugwana. Ina u ngu dundrugeya khu dzimbe dzindziya hi wuyedwago khidzo khu gu khala vathu va sasamedzidwego gwadi?

⁴ Tepo Jesu a nga ba a romo mafuni, a di gu sasamedza gwadi valandreyi vaye nigu a nga gu simama gu gira isoso kala muhuno. Avba nya ndrima yeyi, hi na wona giyeyedzo hi tshiyedwego khu Jesu hi bwe hi wona edzi hengeledzano yi landrago khidzo giyeyedzo gyaye. Hi na bwe hi bhula gambe khu edzi hi nga yeyedzago khidzo githawo ni gu tumba hengeledzano ya Jehovha.

HENGELEDZANO YATHU YI NGU LANDRA GIYEYEDZO GYA JESU

5. Khu yevbini mweyo nya dzindziya hi nga yi thumisago gasi gu landra giyeyedzo gya Jesu? (Johane 8:28)

⁵ Esi Jesu a nga ganeya ni gu gira a si hevbulede ga Papayi waye wa ndzadzini. Khu gu landra giyeyedzo gya Jesu, hengeledzano ya Jehovha ya gu thumisa Bhibhiliya gasi gu hi hevbudza gu vbanya guya khu gugola ga Nungungulu. (Leri Johane 8:28; 2 Thim. 3:16, 17) Hengeledzano ya Jehovha, tepo yatshavbo yi ngu hi dundrugisa gu hevbula Bhibhiliya ni gu thumisa esi hi si hevbulago. Hi nga wuyedwa kharini khu gu landra wusingalagadzi wowu?

6. Khu yevbini mweyo nya dzindziya hi wuyedwago khiyo khu gu hevbula Bhibhiliya?

⁶ Ethu hi ngu wuyedwa ngudzu ha gu hevbula Bhibhiliya khu gu thumisa mabhuku yathu. Khu giyeyedzo, nga dundrugeya khesi Bhibhiliya yi si hevbudzago ni sileletelo hi ningwago khu hengeledzano. Tepo hi tugulago gu khethu sileletelo hi ningwago sa gu seketedwa omu nya Bhibhiliya, ha gu engedzeya gu tumba hengeledzano ya Jehovha. — Rom. 12:2.

7. Mahungu muni Jesu a nga ba a tshumayela, nigu hengeledzano ya gu landra kharini giyeyedzo gyaye?

⁷ Jesu a di gu tshumayela “mahungu nya yadi nya Mufumo wa Nungungulu.” (Luka 4:43, 44) Vbavbandze nya isoso, Jesu embede vapizane vaye gu tshumayela mahungu nya Mufumo. (Luka 9:1, 2; 10:8, 9) Muhuno, hatshavbo hi landrago sileletelo hi ningwago khu hengeledzano ya Jehovha hi ngu tshumayela mahungu nya Mufumo na si si khathadzisegi omu hi vbanyago umo mwendro mithumo hi gu nayo.

8. Khu levbini lithomo hi gu nalo?

⁸ Lithomo nya likhongolo ngudzu gu bhuleya vambe maningano khu Mufumo wa Nungungulu. Nigu khandri vatshavbo va li manago lithomo leli. Khu giyeyedzo, tepo Jesu a nga ba a romo mafuni kha dzumeleya gu madhemoni ma ningeya wufakazi maningano khuye. (Luka 4:41) Muhuno watshigu, muthu na nga si pheyi gu tshumayela, gu vbwetega gu a ninganedwa gasi gu gira thumo wowu. Ni gu ethu hi ngu yeyedza lisima lithomo nya gu tshumayele, khu gu tshumayela tepo yatshavbo hi si kodzago. Gu fana ni Jesu, makungo yathu khu gu tshumayela ni gu hevbudza lisine vathu.— Mat. 13:3, 23; 1 Kor. 3:6.

9. Lina la Nungungulu li ngu tivegiswa khu hengeledzano khu ndziya muni?

⁹ Jesu hevbudzide vambe lina la Nungungulu. Na gu gombeya ga Papayi waye wa ndzadzini Jesu, a di khuye: “Eni nyi va tiviside lina lago.” (Joh. 17:26) Khu gu landra giyeyedzo gya Jesu, hengeledzano ya Jehovha yi ngu gira satshavbo yi si kodzago gasi gu phasa vambe guti lina la Nungungulu. Mweyo nya dzindziya yi girago khiyo isoso khu gu thumisa  Wuvbindrugedzeyi nya mafu nya maphya nya Milowo nya guage. Olu wuvbindrugedzeyi wowu womo khu gipimo nya 270 malimi. Umo nya dziapêndice A4 ni A5 u na wona sighelo si giridego gu lina la Nungungulu li lovedzwa umo nya Bhibhiliya. Apêndice C, yi manegago umo nya Bíblia de Estudo yi ngu yeyedza gu khiyo khu ginani lina la Nungungulu li yedego gu lowa 237 dzitepo umo nya Milowo nya Gigreki.

10. Ginani u gi hevbulago khu matimo ya nyamayi nyo khaguri a vbanyago Myanmar?

¹⁰ Gu fana ni Jesu, ethu ha gu vbweta gu phasa vathu nya vangi khavbo hi si kodzago khavbo guti lina la Nungungulu. Tepo khiyo nyamayi nyo khaguri wa Myanmar a gu na ni 67 myaga a ngati lina la Nungungulu, a di pheya gu liya a ganeya, khuye: “Eyi tepo nyo pheye womini wangu nyi pwago gu pwani lina la Nungungulu khu Jehovha . . . Uwe u nyi hevbudzide gilo nya lisima ngudzu gu vbindra satshavbo.” Kha nga hi si wonidego ga matimo yaya, tepo vathu va hevbulago lina la Nungungulu isoso si nga vbindrugedza womi wawe.

SIMAMA GU YEYEDZA GU KHUWE U NGU TUMBA HENGELEDZANO YA JEHOVHA

11. Madhota ma gu yeyedza kharini gu khayo ma ngu tumba hengeledzano ya Jehovha?

¹¹ Khu yevbini ndziya madhota ma nga yeyedzago khiyo gu khayo ma ngu tumba hengeledzano ya Jehovha? Tepo khiyo madhota ma hakhago gileletelo ma gu gi leri, ma vega gwadi gupima ni gu bwe ma dzi emiseya gu gi thumisa. Khu giyeyedzo, wulangani nya gu hakhe basi sileletelo nya edzi ma nga gimbidzisago khidzo mitshangano, edzi ma nga gombeleyago khidzo libandla, ma ngu hakha gambe sileletelo nya edzi ma nga sayisago khidzo tshambi wa Kristo. Tepo khiyo madhota ma landrago sileletelo ma ningwago khu hengeledzano, vandriyathu va gu dzipwa na va gu haladzwa ni gu sayiswa khu Jehovha.

12. a) Khu ginani hi yedego gu seketeya avo va thangeyago? (Vahebheru 13:7, 17) b) Khu ginani hi yedego gu vega gupima avbo nya makhalelo nya yadi ya vale va thangeyago?

¹² Tepo hi hakhago sileletelo sitago khiyo ga madhota, hi yede gu dziemiseya gu si landrisa. Tepo hi girago isoso, si ngu vbevbugeya madhota gu gira thumo wawe nya gu thangeye libandla. Bhibhiliya yi ngu hi kutsa gu engisa ni gu ninga githawo avo va hi thangeyago. (Leri Vahebheru 13:7, 17.) Ganiolu, dzimbe dzitepo dzi ngu wuya. Khu ginani? Kholu vama vovo kha va vbeleya. Ambari ulolo, ha gu vega gupima avbo nya sihoso sawe vbavbandze nya gu vege gupima avbo nya makhalelo yawe nya yadi, hi na ba hi phasa valala vathu. Khu ndziya muni? Valala vathu va gu vbweta gu khavo hi kanakaneya hengeledzano ya Jehovha. Khu kharato, ha gu vega gupima avbo nya sihoso sawe, hi na pheya gu kanakaneya hengeledzano ya Jehovha nigu kha hi na nga yi tumba. Hi nga gira ginani gasi gu tugula ni gu potsa malipha ma ganedwago khu valala vathu?

U NGA DZUMELEYI VAMBE VA GU GIRA U LUZA GUTUMBA U GU NAGO KHU HENGELEDZANO

13. Vawugeyi va Nungungulu va gu zama kharini gu tsundzisa hengeledzano ya Jehovha?

¹³ Vawugeyi va Nungungulu vo gira gu silo nya sadi umo nya hengeledzano ya Jehovha si wonega nga khatshi khandri sadi. Khu giyeyedzo, umo nya Lito la Nungungulu ha gu hevbula gu khethu Jehovha a gu vireya gu vakhozeyi vaye va aga khu givilini, khu liphuvboni ni gu bwe va manega ni mavbanyelo nya guage. Nigu a gu ganeya gu khuye ni wevbini muthu a ghohago a si dzi layi, a yede gu duswa libandlani. (1 Kor. 5:11-13; 6:9, 10) Ethu hi ngu landrisa nayo wowu nya Bhibhiliya. Ganiolu, vawugeyi va ngu thumisa isoso gasi gu hi embeya gu khavo hi mwalo lihaladzo, kha hi laphisi monyo nigu ha gu lamula vambe.

14. Khu mani a swayelago malipha maningano khu hengeledzano ya Jehovha?

 ¹⁴ Zama gu tugula uye a wugeyago hengeledzano. Sathane Dhiyabhulosi khuye a swayelago malipha maningano khu hengeledzano. Uye khuye “Papayi nya malipha.” (Joh. 8:44; Gen. 3:1-5) Khu kharato, kha si hlamadzisi gu Sathane a thumisa vathu gasi gu swayela malipha maningano khu hengeledzano ya Jehovha. Esi khiso si nga girega ga lizana myaga nya gu pheye.

15. Ginani egi vathangeyi nya wukhongeyi va nga gira Jesu ni valandreyi vaye?

¹⁵ Ga lizana myaga nya gu pheye, Sathane swayede malipha maningano khu silewugiso si nga ba si girwa khu Gyanana gya Nungungulu. Khu giyeyedzo, vathangeyi nya wukhongeyi va di gu embedzeya vathu gu khavo tshivba ya Jesu nya gu tutumise madhemoni a gu yi mana ga “Pfhumu nya madhimoni.” (Marko 3:22) Tepo Jesu a nga ba a lamudwa, vathangeyi nya wukhongeyi va mu singedzide gu khavo a vade Nungungulu va bwe va kutsedzeya gu khavo a songwa. (Mat. 27:20) Hwane nya gu ba valandreyi va Kristo va tshumayede mahungu nya yadi, vawugeyi “va di kutsedzeya vanyamayigo gu wugeya vandruye.” (Mith. 14:2, 19) Mukhedziseyi nya 1 nya Dezembro nya 1998, na wu gu tshamuseya Mithumo 14:2 wari, khuwo: “U nga tsaki khu gu ba va si engisi mahungu nya yadi, vawugeyi nya Vajudha va swayede malipha na va gu zama gu kutsedzeya vathu gu mba engisa Makristo.”

16. Ginani hi yedego gu gi dundruga ha gu tshuka hipwa malipha maningano khu hengeledzano ya Jehovha?

¹⁶ Sathane a nga gu simama gu swayela malipha kala muhuno. Uye a gu ‘sengedzeya vathu vatshavbo mafuni.’ (Gutu. 12:9) Wa gu tshuka upwa malipha maningano khu hengeledzano ya Jehovha ni vandriyathu va thangeyago,  dundruga esi vawugeyi va Nungungulu va giridego Jesu ni valandreyi vaye ga lizana myaga nya gu pheye. Muhuno, vathu va Jehovha va ngu tshaniswa va singedzwa silo nya gu vivbe kha nga esi Bhibhiliya yi ganedego. (Mat. 5:11, 12) Ethu kha hi na nga khodwa malipha yoyo ni gu hi na gira gilogyo gasi gu dzi vhikeya ha gu tugula oyu a ma swayelago. Ginani hi na girago gasi gu dzi vhikeya?

17. Ginani u na girago gasi u si engiseyi malipha? (2 Thimoti 1:13) (Wona kwadru “ Ginani u na girago wa gupwa malipha.”)

¹⁷ U nga engiseyi malipha. Mupostoli Pawulo, a hi embede esi hi yedego gu gira ha gu tshuka hipwa malipha. Uye embede Thimoti gu “laya vathu nyo khaguri gasi va si engiseyi matimo nya malipha” ni gu “bomba matimo nya malipha.” (1 Thim. 1:3, 4; 4:7) Dundrugeya khesi, gyanana gi nga rola ni gyevbi gi gi manago gi theya kanani, ganiolu muthu a dandridego a ngu dziti dzimhango dzi manwago khu gu gira isoso, nigu kha na nga tshuka na giride. Khu kharato, ethu kha hi engisi malipha yoyo kholu hi ngu guti omu ma dugeyago umo. Ethu ha gu engisa basi “malito nya yadi” nya lisine.— Leri 2 Thimoti 1:13.

18. Hi nga yeyedza kharini gu khethu hi ngu tumba hengeledzano ya Jehovha?

¹⁸ Avba nya ndrima yeyi, hi wonide dzindziya dziraru dzi thumiswago khu hengeledzano ya Jehovha gasi gu pimedzeya Jesu. Tepo u hevbulago Bhibhiliya, vega gupima avbo nya dzimbe dzindziya edzi hengeledzano yi dzi thumisago gasi gu landra giyeyedzo gya Jesu. Phasa vambe libandlani gu ninga githawo ni gu tumba hengeledzano ya Jehovha. Nigu simama gu thumeya Jehovha nu tumbegide khu gu seketeya hengeledzano a yi thumisago gasi gu gira gugola gwaye. (Ndzi. 37:28) Hongoleni hi simama gu ninga lisima lithomo hi gu nalo nya gu thume gumogo ni vathu va Jehovha va gu na ni lihaladzo ni gu tumbega.