1. Vambe va gu dzipwa kharini tepo khiyo hi va tshumayelago? (Wona fotu.)

 KHA nga vathu va Jehovha, ha gu tshumayela vambe kholu hi haladzago Papayi wathu wa ndzadzini, nigu ha gu vbweta gu khethu vathu va muti. Vahuweleyi nya vangi va ngu tsaka ngudzu khu thumo nyo tshumayele. Ganiolu, vambe si ngu va garadzeya gu mana litsako thumoni nyo tshumayele. Khu ginani? Vambe vakone, adzina saye va na ni hwanga mwendro va gu dzipwa na va si kodzi gu hevbudza gwadi. Vambe kha va dzipwi gwadi khu gu hongola gaya ga vane na va sa ranwa. Vambe va ngu thava gu tutumiswa. Nigu vambe va hevbudzidwe gu mba bhula ngudzu ni vathu. Ambari olu va haladzago ngudzu Jehovha, vandriyathu vava si ngu va garadzeya gu hidzimeleya vathu nya mambe mayigo gasi gu va bhuleya mahungu nya yadi. Ambari ulolo, avo va ngu liti lisima li gu na ni thumo nyo tshumayele nigu isoso si ngu va gira va patega tepo yatshavbo thumoni wowu. Nigu Jehovha a ngu tsaka ngudzu khavo!

2. Wa gu hamuga litsako thumoni nyo tshumayele khu ginani u gu mba yela gu vbeya tshivba?

² Ina dzimbe dzitepo u ngu tsuka u hamuga litsako thumoni nyo tshumayele? Sa gu ba si gu giregede, u nga vbeyi tshivba. Isoso sa gu yeyedza gu khiso u ngu dzinogisa, kha wu vbweti gu dzi yeyedza mwendro gu ganedzisana ni muthu. Vbavbandze nya isoso, mwalo a tsakago khu gu mba hakwa gwadi ngudzu-ngudzu abari gu a gu vbweta gu gireya silo nya sadi vambe. Ganiolu,  tiyisega gu khuwe Papayi wago wa ndzadzini a ngu dziti gu khuye isoso si ngu garadza nigu a dzi emisede gu gu phasa. (Isa. 41:13) Avba nya ndrima yeyi, hi na bhula khu 5 silo si na hi phasago gu emisana ni gudzipwa gogu ni edzi hi nga manago khidzo litsako thumoni nyo tshumayele.

DIGA LITO LA NUNGUNGULU LI GU TIYISA

3. Ginani gi phasidego muprofeti Jeremiya gu tshumayela vambe?

³ Gale, lito la Nungungulu li tiyiside sithumi saye tepo si nga vbweta gu gira mithumo nyo garadze. Wona giyeyedzo gya muprofeti Jeremiya. Uye a garadzegide tepo khiyo Jehovha a nga mu ruma gasi guya tshumayela. Jeremiya a di khuye: “Wona nya gukhuwe kha nyi kodzi gu ganela; kholu eni nyi ngari gyanana.” (Jer. 1:6) Ginani gi mu phasidego gu tiya hwambo gasi a si kodza gu tshumayela? Esi Jehovha a nga mu embeya si mu tiyiside. Jeremiya a di khuye: ‘Aholu lito laye li di manega monyoni gwangu kha nga nilo wu dzurago na wu sihade maramboni gwangu; nyi ngu zama gu wu segela.’ (Jer. 20:8, 9) Ambari olu Jeremiya a nga ba a tshumayela wulanga nyo garadze, mahungu a ma hakhidego gasi gu ma tshumayela, ma mu tiyiside hwambo gasi a gira thumo waye.

4. Ginani gi giregago ha gu leri Bhibhiliya hi bwe hi dundrugeya khesi hi si lerigo? (Vakolosi 1:9, 10)

⁴ Muhuno, Makristo nayo ma ngu mana tshivba ma yi vbwetago umo nya Bhibhiliya. Tepo khiyo mupostoli Pawulo a nga loveya lidangaliya libandla la Vakolosi a di va embeya gu khuye, va di yede gu hevbula nya singi khu gugola ga Jehovha, isoso si di hadzi gu va phasa gu “gimbiya khu ndziya yi tsakisago Jehovha” ni gu simama gu “ninga mihandro nya mithumo yatshavbo nya yadi.” (Leri Vakolosi 1:9, 10.) Mithumo yatshavbo nya yadi yi ngu pata gu tshumayela. Khu kharato, tepo khiyo hi lerigo Bhibhiliya hi bwe hi dundrugeya khesi hi si leridego, gukhodwa gwathu khu Jehovha gwa gu engedzeya gu tiya nigu hi na pwisisa lisima li gu na ni thumo nyo tshumayele vambe mahungu nya yadi nya Mufumo.

5. U nga wuyedwa kharini khu gu hevbula ni gu leri Lito la Nungungulu?

⁵ Wa gu ba u vbweta gu wuyedwa khu Lito la Nungungulu, u nga manegi ni givbiredza wa gu ba u leri, u hevbula ni gu dundrugeya khilo. Dzi ninge tepo. Wa gu tshuka u leri gipandre nyo khaguri u si gi pwisisi, u nga gi ndragi. Wulangani nya isoso, thumisa Índice das Publicações da Torre de Vigia mwendro Libhuku nyo peskizari khilo nya Dzifakazi dza Jehovha, gasi u mana tshamuselo nya livhesi u li vbwetago. Wa  gu dzi ninga tepo gasi gu hevbula, u na tiyisa gutumba gwago nya gu khuwe esi Bhibhiliya yi ganeyago lisine. (1 Tes. 5:21) Tepo u yago u tiyisega khesi u si hevbulago, u na tsaka ngudzu ni gu bwe u kutsega gu bhuleya vambe esi u si hevbulago.

DZI DONGISEYE GWADI GASI GU TSHUMAYELA

6. Khu ginani hi yedego gu dzi dongiseya gwadi na hi nga si hongoli thumoni nyo tshumayele?

⁶ Wa gu dzi dongiseya gwadi na wu nga si hongoli thumoni nyo tshumayele, isoso si na gu vbevbugeya gu bhula ni vathu. Jesu a dongisede vapizane vaye na nga si va rumi guya tshumayela. (Luka 10:1-11) Avo va giride satshavbo va nga hevbudzwa khu Jesu. Khu kharato, va tsakide ngudzu khesi va nga si kodza gu gira.— Luka 10:17.

7. Hi nga dzi dongiseya kharini gasi guya tshumayela? (Wona fotu.)

⁷ Hi nga dzi dongiseya kharini gasi guya tshumayela? Hi yede gu dundrugeya khesi hi na ganeyago, hi bwe hi zama gu si ganeya khu malito yathu. Si na ni lisima gambe gu dundrugeya khesi hi na girago ha gu pidwa mabhulo thumoni nyo tshumayele. Khu kharato, ha gu ba hi vbweta gu ganeya ni muthu hi yede gu tshulega, hi mu hegeya hi bwe hi yeyedza wupari.

8. Kha nga a ganedego mupostoli Pawulo, Makristo sombo nya libumba khu ndziya muni?

⁸ Mupostoli Pawulo, a di embeya Makristo gu khuye: “Ethu hi hakhide thomba yeyi khomu nya sombo nya libumba.” (2 Kor. 4:7) Ganiolu, thomba muni a ganedego khiyo? I thumo nya gu tshumayele wu vbanyisago ni gu ganeya khu Mufumo wa Nungungulu. (2 Kor. 4:1) Ginani sombo nya libumba? Sa gu emeya vathu va Nungungulu va bhuleyago mahungu nya yadi vambe. Matshigoni ya Pawulo, varengisi va di gu thumisa sombo nya libumba gasi gu vegedzeya silo nya lisima ngudzu nya nga guhodza, vhinyu ni dzitsapawu. Khu ndziya nyo fane, ethu hi sombo nya libumba hi thumiswago khu Jehovha gasi gu vbohisa mahungo nya yadi nya lisima ngudzu ga vathu. Khu gu phaswa khu Jehovha, ethu hi na ni tshivba hi yi vbwetago gasi gu simama gu tshumayela na hi tumbegide.

GOMBEYA U LOMBA GUTIYA-HWAMBO

9. Hi nga pala kharini hwanga hi gu nawo khu vathu mwendro gu thava gu tutumiswa? (Wona fotu.)

⁹ Dzimbe dzitepo, hi na tshuka hi wugedwa khu vathu mwendro gu tutumiswa. Hi nga emisana kharini ni gigaradzo gegi? Dundrugeya khu nombelo wa vapostoli tepo va nga gurumedzwa  gu mba tshumayela. Vbavbandze nya gu va thava, va di lomba Jehovha gu va phasa gu simama ‘gu huweleya lito laye na va tiyide.’ Jehovha hlamude nombelo wawe khu gu vbiredza. (Mith. 4:18, 29, 31) Wa gu tshuka u thava vathu thumoni nya gu tshumayele, lomba giphaso ga Jehovha khu nombelo. Lomba Jehovha a gu phasa gu tiyisa lihaladzo u gu nalo khu vathu, isoso si na gu phasa gu mba thava vathu.

10. Jehovha a gu hi phasa kharini gu simama gu khala Dzifakazi dzaye? (Isaya 43:10-12)

¹⁰ Jehovha a hi hathide gu khala Dzifakazi dzaye ni gu a hi tumbiside gu hi tiyisa hwambo. (Leri Isaya 43:10-12.) Hongoleni hi wona 4 dzindziya a hi phasago khidzo. Nyo pheye, Jesu na ni ethu tepo yatshavbo hi tshumayelago mahungu nya yadi. (Mat. 28:18-20) Nya wuvili, Jehovha a ngu thumisa dzingilozi gasi gu hi phasa avba nya thumo wowu. (Gutu. 14:6) Nya wuraru, Jehovha a ngu hi ninga liphuvbo laye nya guage gasi li hi phasa gu dundruga esi hi si hevbudego. (Joh. 14:25, 26) Nya wu 4, hi na ni giphaso gya vandriyathu ha gu ba hi tshumayela. Khu gu phaswa khu Jehovha ni gu seketedwa khu vandriyathu, hi na ni satshavbo hi si vbwetago gasi gutiya-hwambo hi simama gu tshumayela.

DZI PWANANISE NI GIEMO U BWE U MANEGA NI MAWONELO NYA YADI

11. U nga mana kharini vathu nya vangi wa gu ba u romo gutshumayelani? (Wona fotu.)

¹¹ Ina u ngu vbeya tshivba khu gu mana vathu nya vadugwana thumoni nyo tshumayele? Khu ginani u gu mba dzi wudzisa gu khuwe: ‘Vathu va gipandreni gwangu vomo hayini khu ora yeyi?’ (Mith. 16:13) Ina avo vomo thumotuno mwendro merkadhu? Abari gu ina, u nga mana vathu nya vangi wa gu tshumayela ruwani? Ndriyathu nyo pwani khu Joshua wari, khuye: “Nyi manide mathomo nya gu tshumayele vathu merkadhu ni mambe malanga gu talago vathu.” Uye ni mwangadzi waye Bridget, va manide vathu nya vangi khu gu va endreya magaya gwawe vbawutshigutuno ni gu va yela khu Dzidhomingu, siyambo. — Efes. 5:15, 16.

12. Hi nga tugula kharini esi muthu a si khodwago ni esi si mu garadzago?

¹² Wa gu tugula gu khuwe muthu u ganeyago naye kha yeyedzi gu tsakeya, zama gu tugula esi a si khodwago ni egi gi mu garadzago. Joshua ni Bridget, va di gu thumisa giwudziso gi  gomogo avbo nya gidangaliyana gasi gu pheya khigyo mabhulo. Khu giyeyedzo, va gu thumisa gidangaliyana gi gu khigyo Wa gu yi wona kharini Bhibhiliya? Avo va di gu khavo: “Vambe vathu va gu pimisa gu khavo Bhibhiliya libhuku la Nungungulu, ganiolu vambe kha va pimisi khu ndziya yoyo. Khu yavbini mawonelo yago?” Khu lisine, siwudziso nya nga esi si ngu hi gira hi manega ni mabhulo nya yadi.

13. Khu ginani hi tsakago khu thumo wathu nya gu tshumayele ambari vathu va gu mba ma dzumeya mahungu yathu? (Mavingu 27:11)

¹³ Litsako lathu khu thumo nyo tshumayele, kha li manegi khu gu vathu va dzumeya mwendro gu bomba mahungu yathu. Khu ginani? Kholu ethu ha gu gira esi Jehovha ni Gyanana gyaye Jesu va vbwetago gu khavo hi gira, a gu gu tshumayela mahungu nya yadi. (Mith. 10:42) Ambari ha gu hamuga vathu nya gu va bhuleye mwendro hi va mana, ganiolu va ma bomba, ethu hi ngu tsaka kholu hi ngu dziti gu khethu ha gu tsakisa Papayi wathu wa ndzadzini. — Leri Mavingu 27:11.

14. Khu ginani hi tsakago tepo ndriyathu a manago muthu a yeyedzago gutsakeya thumoni nyo tshumayele?

¹⁴ Hi ngu tsaka ngudzu khu gu ndriyathu a mana muthu a tsakeyago thumoni nyo tshumayele. Mukhedziseyi wu fananiside thumo nyo tshumayele ni gu vbwetedzeya gyanana gi nga dzimeya. Vangi va pategago avbo nya gu gi vbwetedzeye nigu va gu vbwetedzeya malanga yatshavbo. Khavbovbo, tepo khiyo gyanana gi manwago vatshavbo va ngu tsaka na siri basi oyu a nga gi mana. Khu ndziya nyo fane, hatshavbo libandlani hi ngu patega thumoni nyo tshumayele, nigu hatshavbo hi ngu tsaka tepo muthu nyo khaguri a pheyago guta mitshanganoni yathu.

VEGA GUPIMA AVBO NYA LIHALADZO U GU NALO KHU JEHOVHA NI VATHU

15. Libhuku la Matewu 22:37-39 li nga hi phasa kharini gu mana litsako thumoni nyo tshumayele? (Wona kapa.)

¹⁵ Ethu hi nga engedzeya litsako lathu thumoni nyo tshumayele khu gu vega gupima avbo nya lihaladzo hi gu nalo khu Jehovha ni vathu. (Leri Matewu 22:37-39.) Nga dundrugeya khedzi Jehovha a tsakago khidzo tepo a hi wonago na hi gu gira thumo nyo tshumayele ni edzi vathu va tsakago khidzo tepo va pheyago gu hevbula Bhibhiliya! Dundruga gu khuwe vale va nga engisa mahungu yathu va bwe va hunga gu thumeya Jehovha, va na vbanya  kala gupindruga. — Joh. 6:40; 1 Thim. 4:16.

16. Hi nga li mana kharini litsako thumoni nyo tshumayele ambari ha gu ba hi si si kodzi gu duga khu ndrangani? Ninga siyeyedzo.

¹⁶ Ahati sa ba si si kodzegi gu duga khu ndrangani, ginani u na girago? Abari kharato, dundrugeya khedzi u na yeyedzago khidzo lihaladzo lago khu Jehovha ni vathu. Ndrani nya tungo nya COVID-19, Samuel ni Dania kha va nga ba va yede gu duga khu ndrangani. Ndrani nya tepo yoyo, avo va di gu tshumayela khu gu thumisa telefoni, gu lova malangaliya ni gu bwe va gimbidzisa sihevbulo nya Bhibhiliya khu gu thumisa Zoom. Ga tepo yoyo, Samuel a di gu thumwa madwali nya cancêr. Khu kharato, uye a di gu londrola tepo a nga ba a hongola ospitali gasi gu tshumayela ni wevbini. Uye wari, khuye: “Sigaradzo, si nga hi gira hi garala khu mapimoni, khu nyamani ni liphuvboni. Khu kharato, si na ni lisima ngudzu gu tsaka thumoni wa Jehovha.” Khu tepo yoyo gambe, Dania a di thega a dzi bayisa, a vbedza migima miraru na si kodzi gu gira gilo. Hwane nya migima miraru, a vbedzide 6 migima na gu gimbiya khu kadera nya marodha. Uye wari, khuye: “Nyi giride satshavbo nyi nga si kodza guya khedzi nyi nga ba nyi romo khidzo. Nyi di gu tshumayela dhogodheya a nga ba ata a ta hi wuseya ni ava va nga ba va hi reseya silo nyo hodze. Nyi manegide ni mabhulo nya yadi khu telefoni ni nyamayi nyo khaguri a nga ba a nyi khathaleya.” Khu kotani nya giemo va nga ba tshangana nagyo, Samuel ni Dania kha va si khodza gu gira satshavbo va nga ba va gira gale, ambari ulolo va giride satshavbo va nga si kodza gasi gu mana litsako.

17. Hi nga wuyedwa kharini khu gu thumisa mawonelo hi ma hevbudego avba nya ndrima yeyi?

¹⁷ Zama gu thumisa 5 mawonelo hi ma hevbudego avba nya ndrima yeyi. Liwonelo ni liwonelo la gu fana ni tempero hi yi thumisago gasi gu tshambisa guhodza. Ha gu pimeledza gwadi dzitempero dzatshavbo, guhodza gu na tshamba ngudzu. Ha gu thumisa 5 mawonelo hi ma hevbudego avba nya ndrima yeyi, hi na ba hi dongide gasi gu emisana ni sigaradzo hi bwe hi mana litsako thumoni nya gu tshumayele.