KHA nga olu womi wu engedzeyago gu garadza ‘matshiguni yaya nya guhegise,’ hi yede gu timiseya ngudzu guvbindra gale. (2 Thimoti 3:1-5) Vathu nya vangi mafuni va mwalo gutimiseya. Va na ni makolo, va gu gola mayunga, nigu kha va kodzi gu dzi phara. Khu kharato hi yede gu dzi wudzisa gu khethu: ‘Ina nyi ngu diga gu laphisa monyo kha nga vathu va nyi randredego? Sa gu thula ginani gulaphisa-monyo khu lisine? Nyi nga gira kharini gasi gu gulaphisa-monyo gu gira gipandre nya mavbanyelo yangu?’

Lito “gulaphisa-monyo” li thumiswago omu nya Bhibhiliya la gu thula silo nya singi nyo vbindre gu timiseya gigaradzo nyo khaguri basi. Muthu nyo laphise monyo a gu timiseya na gu tumba gu khuye litshigu limwedo silo si na tshukwata. Kha dundrugeyi khu gudzipwa gwaye basi, ganiolu khogu ga vambe navo, ambari ava va mu gorosidego mwendro gu mu tshanisa. A gu simama gu tumba gu khuye wupari wawe wu na bwe wu tiya. Kha si samadzisi gu ba Bhibhiliya yi ganeya khiyo gulaphisa-monyo handro nya lihaladzo. * (Wona tshamuselo wa vbavbatshi.) (1 Vakorinto 13:4) Gulaphisa-monyo gipandre nya “mithumo ya Liphuvbo.” (Vagalatiya 5:22, 23) Khu kharato, ginani hi yedego gu gira gasi gu hi laphisa monyo khu lisine?

Gasi gu hi laphisa monyo gu vbwetega gu hi gombeya hi lomba liphuvbo nya guage la Jehovha, eli a ningago ava va mu tumbago khu lisine. (Luka 11:13) Liphuvbo lolo li na ni tshivba nya yikhongolo, ganiolu gu vbwetega gu hi vbanya maningano ni milombelo yathu. (Ndzimo 86:10, 11) Isoso so thula gu khiso hi yede gu gira satshavbo hi si kodzago gasi gu yeyedza gulaphisa-monyo tshigu ni tshigu hi bwe hi gu gira gipandre nya mavbanyelo yathu. Ganiolu hi na tshuka hi phazama. Ginani gi nga hi phasago?

Gu vbwetega gu hi hevbula ni gu pimedzeya giyeyedzo nyo vbeleye gya Jesu. Tepo mupostoli Pawulo a nga ganeya khu “muthu muphya,” a patago gulaphisa-monyo, a di hi kutsa gu khuye: “Myonyoni gwanu gu na fume gurula gwa Kristo.” (Vakolosi 3:10, 12, 15) Gasi gu gira isoso, hi yede gu landreya giyeyedzo gya Jesu hi bwe hi tumba khu gu vbeleya gu khethu Nungungulu a na si lulamisa khu tepo yakona. Ha gu ba hiri ni gutumba gogo, kha hi na nga vbeledwa khu gulaphisa-monyo, ambari go dugeleya ginani. — Johane 14:27; 16:33.

Hatshavbo hi ma lambede mafu nya maphya. Ganiolu hi ngu hevbula gu laphisa ngudzu monyo tepo hi wonago edzi Jehovha a hi laphiseyago khidzo monyo. Bhibhiliya yi ngu hi tiyisa khu gu khiyo: “Pfhumu kha yi hweli gu gira esi yi nga tumbisago, kha nga edzi va hingigedzago khidzo vambe vathu. Aholu iyo yi na ni gutimisela khu enu, kholu kha yi dzini na moyo wanu a mbemba, aholu ya gu vbweta gukhiyo mu vbindrugedze.” (2 Pedro 3:9) Khu kharato ha gu dundrugeya khu gulaphisa monyo ga Jehovha khethu, anethu hi na laphiseya ngudzu monyo vambe. (Varoma 2:4) Khu sevbini siemo nyo khaguri si lombago gu hi laphisa monyo?

Gu na ni siemo nya singi guvbanyani gwathu si lombago gu hi yeyedza gulaphisa-monyo. Khu  giyeyedzo, gu vbwetega gu hi laphisa monyo gasi gu mba piya vambe ho ba hiri ni gilogyo nya lisima gasi gu ganeya. (Jakobe 1:19) Gu vbwetega gambe gu hi laphisa monyo ha gu tshuka hi goroswa khu muthu. Wulangani nyo vbiredzeye gu goroga, gwadi gu hi dundruga edzi Jehovha ni Jesu va si wonago khidzo sihoso sathu. Avo kha va vegi gupima avba nya sihosohoswana nya singi hi girago. Vbavbandze nya isoso, va gu khedza makhalelo nya yadi hi gu nawo va bwe va hi laphiseya monyo khu gu hi ninga tepo gasi gu hi tshukwadzisa. — 1 Thimoti 1:16; 1 Pedro 3:12.

Hi yede gu laphisa monyo gambe tepo muthu nyo khaguri a hi embeyago gu khuye hi ganede mwendro gu gira gilo nyo vivbe. Adzina hi nga tutumeya gu goroga ni gu dzi emeleya. Ganiolu Lito la Nungungulu la gu hi kutsa gu gira silo khu yimbe ndziya. Lari khilo: “U nga vbiredzeli gu goroga, kholu, likhulo lomo myonyoni nya sipumbu.” (Muhevbudzi 7:8, 9) Khu kharato ambari ha gu singedzwa, gu vbwetega gu hi laphisa monyo hi bwe hi pimisa gwadi na hi si giri gilo. Khiso kamo a giridego Jesu tepo a nga singedzwa. — Matewu 11:19.

Vavelegi gu vbwetega gu va laphisa monyo ngudzungudzu tepo va phasago sanana sawe gu vbindrugedza mavbanyelo yaso ni gu potsa gudogoreya nyo vivbe. Nga dundrugeya khu giyeyedzo gya Mattias, a thumago Bheteli ya Escandinávia. Tepo Mattias a nga ba ari lidzaha, sihevbuli sikwawe si di gu mu hega khu kotani nya gukhodwa gwaye. Gupheyani, vavelegi vaye va di siti gilo. Ganiolu hwane nya tepo va di wona gu khavo Mattias a di gu pheya gu kanakaneya gukhodwa gwaye. Gillis, papayi wa Mattias, wari khuye gu vbwetegide gu uye ni mwangadzi waye va laphisa ngudzu monyo gigaradzoni gyogyo. Mattias a di gu gira siwudziso nya nga esi: “Khu mani Nungungulu? Ahati Bhibhiliya yo ba yi siri Lito la Nungungulu ke? Ha gu dziti kharini gu khethu khu lisine Nungungulu a gu vbweta gu khuye hi gira esi mwendro sile?” Uye a di gu wudzisa gambe papayi waye gu khuye: “Khu ginani nyi yedego gu lamudwa kholu basi nyi si dzi pwigo ni gu mba khodwa nga enu?”

Gillis a gu tshamuseya khuye: “Dzimbe dzitepo gyanana gyathu gi di gu gira siwudziso na gi gorogide, gi di si gorogeyi eni mwendro mamayi wagyo, gi di gu gorogeya lisine, gi di gu li wona na li gu lemedza guvbanya gwagyo.” Gillis phaside kharini gyanana gyaye? “Eni ni gyanana gyangu hi di gu oloveya gu khala hi bhula khu dziora nyo khaguri.” Tepo yatshavbo, Gillis a di gu engiseya Mattias basi na gu mu gira siwudziso gasi gu pwisisa gudzipwa gwaye ni mawonelo yaye. Dzimbe dzitepo Gillis a di gu tshamuseya gilo nyo khaguri gyanana gyaye a bwe a gi lomba gu dundrugeya khiso khu litshigu limwedo mwendro  guvbindra na va si gu bhuli gambe khiso. Dzimbe dzitepo, gu di gu vbwetega matshigu nyo khaguri gasi gu Gillis nuye a dundrugeya khu silo si nga ganedwa khu gyanana gyaye. Khu kotani nya mabhulo va nga ba va oloveya gu manega nawo, Mattias a di pheya gu pwisisa tshamuselo nya gudzegiswe ni gu pwisisa edzi Jehovha a hi haladzago khidzo nigu khuye khu Jehovha basi a ninganedwago khu gu khala Mufumeli wathu. Papayi waye wari khuye: “Si dzegide tepo, nigu gutala nya dzitepo si di gu garadza, ganiolu vbadugwana-vbadugwana, lihaladzo laye khu Jehovha li di dandra monyoni gwaye. Eni ni mwangadzi wangu hi tsakide ngudzu, kholu gudzigaradza gwathu nyo laphise monyo gasi gu phasa gyanana gyathu na gi ngo guya gu tshatshazedwe nigu gu kuhide monyo wagyo.”

Tepo Gillis ni mwangadzi waye va nga ba va phasa gyanana gyawe khu gulaphisa-monyo, va di gu tumba gu khavo Jehovha a na va phasa. Gillis wari khuye: “Nyi di gu oloveya gu embeya Mattias gu kheni lihaladzo lathu khuye li kutside eni ni mamayi waye gu gombeya ngudzu ga Jehovha gasi a mu phasa gu pwisisa.” Vavelegi vava va tsakide ngudzu kholu va laphisidego monyo va si digi gu timiseya!

Gu ngu vbwetega gambe gu hi laphisa monyo tepo hi sayisago va ndrangani gwathu mwendro dzipari dzathu dzi gu na ni madwali ma gu mba vbindra. Wona giyeyedzo gya Ellen * (wona tshamuselo wa vbavbatshi), a khalago nuye Escandinávia.

Tanga nya 8 myaga yi vbindridego, mwama wa Ellen a di manega ni mwadwali ma nga songa gipandre nya wuluvi waye. Khu kotani nya isoso, kha guti gutsaka, gugaradzega, mwendro gisiro. Giemo gyogyo gi ngu mu garadzeya ngudzu Ellen. Wari khuye: “Sa gu lomba gu nyi laphisa monyo ni gu gira milombelo nya yingi.” A bwe khuye: “Lowo nyi wu golago ngudzu wu nyi thaveleyago khowu wa Vafilipi 4:13, wu gu khuwo: ‘Nyi ngu kodza gupala satshavbo tshivbani ya wule a nyi tiyisago.’” Khu gu phaswa ni gu tiyiswa khu Jehovha, Ellen a ngu emisana ni gigaradzo gyaye khu gulaphisa-monyo. — Ndzimo 62:5, 6.

Khu lisine, giyeyedzo nya gikhongolo ngudzu nya gulaphisa-monyo khu Jehovha. (2 Pedro 3:15) Omu nya Bhibhiliya, hi ngu oloveya gu hevbula khu gulaphisa-monyo nya gukhongolo ga Jehovha. (Nehemiya 9:30; Isaya 30:18) U ngu dundruga esi Jehovha a giridego tepo Abrahama a nga Mu gira siwudziso nya singi maningano ni makungo yaye nyo fuvise Sodhoma? Jehovha kha piya Abrahama. A di engiseya siwudziso ni silombo satshavbo sa Abrahama khu gulaphisa-monyo. Khavbovbo, Jehovha yeyedzide gu khuye a di pwide silombo sa Abrahama a bwe a mu tiyisa gu khuye kha na nga fuvisa Sodhoma ambari go ba guri ni likhume vathu nyo lulame dhoropani mule. (Genesi 18:22-33) Jehovha tepo yatshavbo a gu engiseya khu gulaphisa-monyo, gima kha wugeyi muthu!

Gulaphisa-monyo gipandre nya lisima ngudzu nya muthu muphya oyu maKristo yatshavbo ma yedego gu manega naye. Ha gu dzi garadzeya gu laphisa monyo khu lisine, ha gu zundza Jehovha, Babe wathu nyo khathale ni gulaphisa-monyo nigu hi na ba hiri tsawani wa “vale va khodwego, . . . ni gutimisela, gasi [va] fela gu hakha esi [va] tumbisidwego khu Nungungulu.” — Vahebheru 6:10-12.