Khu ginani si gu mba dzumeledwa gu ne muthu moyo a theya mabhuku nya Dzifakazi dza Jehovha omu nya dzimbe dzisayiti mwendro omu nya dzisayiti nya mabhulo?

Vambe vathu vo pimisa gu khavo kha nga olu hi ningeyago mabhuku yathu nya mba livbisa gilo, va nga ma kopiyari mwendro gu theya omu nya dzimbe dzisayiti mwendro omu nya dzisayiti nya mabhulo. Ganiolu isoso si nga wusa sigaradzo nya sikhongolo ngudzu nigu kha si yelani ni Milayo nya Mathumiselo * (wona tshamuselo wa vbavbatshi) nya dzisayiti dzathu. Milayo yoyo yo dzegeya gu ganeya khiyo mwalo a dzumeledwago gu “theya sithombe, mabhuku, dzisimbulu, dzindzimo, dzifoto, dzivhidhiyu, mwendro dzindrima dzi gomogo omu nya sayiti yeyi omu nya interneti (ni yevbi sayiti, dzisayiti nyo rumeleyani khidzo dzivhidhiyu ni simbe, mwendro dzisayiti nya mabhulo).” Khu ginani milayo yeyi yi gu ya lisima?

Satshavbo si gomgo omu nya sayiti yathu sa gu vhikedwa khu milayo. Isoso si na ni lisima kholu si ngu vhikeya gu si si thumiswi khu ndziya nya mba yela. Vawugeyi ni vambe vathu va vbwetago gu wugeya thumo wathu dzimbe dzitepo va gu thedzeya mabhuku yathu omu nya dzisayiti dzawe gasi gu ndrindra Dzifakazi dza Jehovha ni vambe vathu. Ganiolu omu nya dzisayiti dzodzo va gu thedzeya gambe mahungu ma wusago gukanana mihungoni nya vathu. (Ndzimo 26:4; Mavingu 22:5) Vambe va ngu thumisa mabhuku yathu mwendro simbulu yathu nya jw.org omu nya dzipubhilisidhadhi, omu nya dziaplikativhu nya dzitelefone, ni simbe silo va rengisago. Ganiolu khu kotani nya olu mabhuku yathu ni simbulu yathu jw.org yi vhikedwego khu milayo, hi nga hongola hi ya va thuledza tribhunali gasi gu va diga gu gira isoso. (Mavingu 27:12) Ganiolu dzitribhunali kha dzi na nga ema ni ethu ha gu dzumeleya vambe vathu, ambari vandriyathu kamo va thedzeya mabhuku yathu omu nya dzimbe dzisayiti mwendro gu thumisa simbulu yathu nya jw.org gasi gu rengisa khiyo silo.

Mhango gu tshisa mabhuku omu nya dzimbe dzisayiti vbavbandze nya jw.org. Jehovha a gu hi ninga guhodza nya liphuvbo khu gu thumisa ‘githumi nya gutumbege ni nya gugengeye’ basi. (Matewu 24:45) “Githumi” gyogyo gyo thumisa sayiti yagyo gasi gu hi ninga guhodza nya liphuvbo basi — www.pr418.com/toh, tv.pr418.com, ni wol.pr418.com. Nigu dziaplikativhu dziraru basi hi gu nadzo gasi gu theya omu nya mitshini — JW Language^®, JW Library^®, ni JW Library Sign Language^®. Omu nya dzisayiti dzodzo ni dziaplikativhu dzakona, kha hi na nga mana ne mweyo pubhilisidhadhi mwendro simbe silo nya litigo la Sathane. Ganiolu ha gu tshisa mabhuku yathu omu dzimbe dzisayiti mwendro aplikativhu, yomo mhango nya gu ba va ma vbindrugedzidwe khu ndziya nyo khaguri. — Ndzimo 18:26; 19:8.

Nigu, ha gu thedzeya mabhuku yathu ni simbe silo omu nya dzisayiti edzi vathu va tshulegidego gu ninga mawonelo yawe, isoso sa gu tuleya ndziya vawugeyi gasi gu va solasola hengeledzano ya Jehovha. Vandriyathu nya vangi va ngu ba va ganedzisana ni vathu vovo, isoso so nyenyezisa lina la Jehovha. Gu manega ni mabhulo nya nga ayoyo ni muthu khomu nya interneti khandriyo ndziya nya yadi nyo vbindrugedze mapimo yaye ni gu mu phasa gu pwisisa lisine. (1 Thimoti 6:3-5; 2 Thimoti 2:23-25) Vambe vathu va ngu gira dzisayiti va bwe va tula dzikonta nya dzisayiti nya mabhulo dzi wonega nga khatshi khya hengeledzano mwendro khya sivbango nya Huwo nya guthangeye. Ganiolu ayoyo malipha. Gimwalo givbango nya Huwo nya guthangeye gi gu na ni sayiti yagyo mwendro konta omu nya dzisayiti nya mabhulo.

Tepo hi leleteyago vathu gu beya omu nya jw.org, ha gu seketeya thumo nyo tshumayele ‘mahungu nya yadi.’ (Matewu 24:14) Dzisayiti dzathu ni dziaplikativhu dzakona dza guya dzi tshukwadziswa ni gu tshukwadziswa. Ha gu vbweta gu khethu vatshavbo va phasega khidzo. Khu kharato hi ngu dzumeledwa gu rumeleya vambe libhuku nyo khaguri khu e-mail mwendro gu rumeya link nya sayiti yathu. Khu ndziya yoyo ha gu yisa vathu omu nya gibuga gya gimwegyo egi Jehovha a hi ningago khigyo guhodza nya liphuvbo, gu gu ‘githumi nya gutumbege ni nya gugengeye.’