MWAGA wu nga vbindra, vandriyathu nya vangi mafuni gwatshavbo va emisidwe kha nga madhota ni vaphasedzeyi nya libandla. Wo ba uri moyo wakone, kha si kanakanisi gu khiso u tsakide khu gu thumeya Jehovha ni vandriyago khu ndziya yoyo nya yiphya.

Wo ba u garadzega gambe, si olovelegide. Jason, lidhota li ngarigo lidzaha, wari khuye: “Tepo nyi nga ningwa malungelo yaya nya maphya, nyi garadzegide vbadugwana.” Mosi ni Jeremiya va dzi pwide na va si ninganedwi khu gu ningwa malungelo nya maphya khu Jehovha. (Ekisodha 4:10; Jeremiya 1:6) Wo ba u dzipwa kharato, u nga gira ginani gasi gu u haguleya gutumba u bwe u simama gu dandra khu liphuvboni? U nga hevbula nya singi khu giyeyedzo gya Thimoti. — Mithumo 16:1-3.

Thimoti adzina a diri omu nya 20 myaga tepo a nga pheya gu endreya mabandla ni mupostoli Pawulo. Tepo nyo pheye a nga ranedwa thumo wowo, Thimoti adzina dzi pwide na si ninganedwi khu gu hevbudza ni gu ninga wusingalagadzi vambe kholu a di ngari muphya. (1 Thimoti 4:11, 12; 2 Thimoti 1:1, 2, 7) Ganiolu a di simama gu dandra khu liphuvboni, nigu hwane nya 10 myaga Pawulo a di embeya Vafilipi gu khuye: “Nyi ngu tumba ga Pfhumu [Jesu] gukheni nyi na mi rumela nyamba hwela Thimoti.” Khu ginani Pawulo a nga ganeya kharato? A di tshamuseya khuye: “Mwalo mumbe muthu . . . kha nga uye.” — Vafilipi 2:19, 20.

Khu ginani Thimoti a gu giyeyezo nya gyadi ga madhota? Wona 6 sighelo.

1. A di gu khathala ngudzu khu vathu. Pawulo a di embeya vandriyaye va Filipi khuye Thimoti a na va “khathalela” gwadi. (Vafilipi 2:20) Thimoti a di gu vbweta gu khuye vandriyaye va simama gupwanana ni Jehovha, nigu a di dzi emisede gu thumisa tepo yaye ni tshivba yaye gasi gu va phasa.

William, a gu lidhota khu 20 myaga ni guvbindra, tepo yatshavbo a gu embeya ava va ngarigo gu emiswa kha nga madhota khuye: “Haladzani vandriyathu. Khathaleyani esi si vbwetegago gwawe vbavbandze nya wuhavisi basi.” Mu nga fani ni mugimbidzisi nya xapa oyu a dwaneyago gu vboha parajitunu khu tepo basi vbavbandze nyo dige vathu va beya xapani.

2. A di gu thangisa thumo wa Jehovha. Pawulo a di khuye Thimoti a di hambanide ni ava va nga ba va “gudwanela basi gu gira guhaladza gwawe, nasiri ogu ga Kristo.” (Vafilipi 2:21) Pawulo a di wona gu khuye vandriyaye va di gu vega ngudzu gupima avba nya silo nya guvbanya gwawe. Dzimbe dzitepo va di gu thangisa silo sawe wulangani nyo thumeye Jehovha. Ganiolu Thimoti a di hambanide! Tepo a nga mana lithomo nyo engedzeye thumo waye ga Nungungulu, a di gira nga Isaya, a nga khuye: “Nyi womo avba. Nyi rume.” — Isaya 6:8.

U nga ninganiseya kharini gukhathaleyani gwago silo nya guvbanya gwago ni silo nya libandla? Gupheya, landreya wusingalagadzi wa Pawulo wu gu khuwo: ‘Hathani iso si gu sadi’ mwendro si gu na ni lisima. (Vafilipi 1:10) Thangisa thumo wa Jehovha. Nya wuvili, potsa mithumo yi na gu beyago ngudzu tepo ni tshivba. Pawulo embede Thimoti khuye: “U nga hengeli ni madzaha u dogorela esi nyamba yela. Vbweta lisine, ni gukhodwa ni lihaladzo ni gurula.” — 2 Thimoti 2:22.

3. A diri ni sighingi thumoni wa Jehovha. Pawulo ganede esi khu Thimoti: “A dzi garadzide gumogo ni eni thumoni nya gutivise Mahungu nya Yadi, kha nga gyanana gi phasedzelago babe waye.” (Vafilipi 2:22)  Thimoti kha nga ba ari ngara. A di gu thuma khu sighingi ni Pawulo, ni gu isoso si tiyiside wupari wawe.

Muhuno gu na ni thumo nya wungi hengeledzanoni ya Jehovha. Thumo wowo wu ngu tsakisa ngudzu nigu wu na gu phasa gupwanana ni vandriyago. Khu kharato simamani gu “thuma gikhati gyatshavbo khu gunengela esi Nungungulu a si vbwetago.” — 1 Vakorinto 15:58.

4. A di gu vbanya khesi a nga ba a si hevbula. Pawulo lovede Thimoti khuye: “Uwe u landrede gwadi sihevbudzo sangu, mavbanyelo, maalakanyo, gukhodwa, guhunisela, lihaladzo, gutiya.” (2 Thimoti 3:10) Thimoti a di gu vbanya khesi a nga ba a si hevbula, khigyo gi giridego gu a engedzedwa malungelo. — 1 Vakorinto 4:17.

Khu ginani u gu mba vbweta lidhota nyo vidzwe khu liphuvboni gasi u dzi bona gwalo? Tom, a gu lidhota khu myaga nya yingi, a gu dundruga tepo lidhota nyo khaguri nyo vidzwe li nga pheya gu mu phasa gu dandra khu liphuvboni. Wari khuye: “Tepo yatshavbo nyi di gu lomba wusingalagadzi waye nyi bwe nyi wu landreya. Isoso si vbahide gutumba gwangu khu guvbiredza.”

5. A di gu dzi hevbudza. Pawulo a di gengedza Thimoti khuye: “U dzi garadza khu gu vbanya gukhodwani.” (1 Thimoti 4:7) Mututumi ambari a gu ba ari ni trenadhori, gu ngo vbwetega gu a simama gu dzi garadza. Pawulo kutside Thimoti khuye: “Simamisa gu hevbulela . . . Milowo nya Guage, u va tiyisela ni gu va hevbudza . . . Vegisa silo sesi, u si gimbidzisa khu ndzila ni lisine, gasi vatshavbo va wone mihandro nya gu dzi garadze gwago.” — 1 Thimoti 4:13-15.

Anenu gu vbwetega gu mu simama gu tshukwadzisa makodzelo yanu. Mu hevbula Bhibhiliya khu monyo watshavbo, mu bwe mu dzi pwananisa ni sileletelo nya siphya nya hengeledzano. Mu nga dzi tumbi ngudzu. Wupumbu nya wukhongolo gu pimisa gu khethu hi nguti ngudzu avba nya gu hi nga emisana ni gevbini giemo nya mba pheya khu gu gevisisa. Kha nga Thimoti, “dzi wonele uwe wurumba wago, ni esi u hevbudzago.” — 1 Thimoti 4:16.

6. A di gu tumba liphuvbo la Jehovha. Na gu ganeya khu thumo nya gutshumayele wa Thimoti, Pawulo a di mu dundrugisa khuye: “Vegisa sihevbudzo nya sadi u ningidwego, u phasedzedwa khu Liphuvbo nya Guage li vbahidego myonyoni gwathu.” (2 Thimoti 1:14) Thimoti a di yede gu tumba liphuvbo nya guage la Nungungulu.

Donald, a gu lidhota khu myaga nya yingi, wari khuye: “Madhota ni vaphasedzeyi nya libandla gu vbwetega gu va ninga lisima wupari wawe ni Nungungulu. Ava va girago isoso va na ‘engedzeya gu tiya.’ Va gu lombeleya liphuvbo nya guage la Nungungulu va bwe va haguleya mihandro yalo, va na ba vari makategwa nya makhongolo ga vandriyawe.” — Ndzimo 84:7; 1 Pedro 4:11.

Si ngu tiyisa hwambo gu wona vaphasedzeyi nya libandla ni madhota nya nga uwe na va gu simama gu dandra thumoni wa Jehovha. Jason, a khumbugidwego gupheyani, wari khuye: “Gukhugeya nyi khala lidhota, nyi ngu hevbula silo nya singi nigu gutumba gwangu gu ngu engedzeya. Olu nyi ngu tsaka ngudzu khu thumo wangu nigu nyo wu wona nga lithomo nyo tsakise!”

U na simama gu dandra khu liphuvboni? Wa gu landreya nuwe giyeyedzo gya Thimoti, u na ba uri makategwa ga vandriyathu libandlani.