1. Hi nga thuma ni Jehovha khu dzindziya muni?

TEPO Jehovha a nga gira vathu, a di gu vbweta gu khuye va khala sithumi sikwawe. Ambari olu vathu muhuno va nga ne vbeleya, vathu nyo tumbege va nga thuma ni Jehovha tshigu ni tshigu. Khu giyeyedzo, ethu hi ‘sithumi si thumago gumogo ni Nungungulu’ tepo hi tshumayelago mahungu nya yadi nya Mufumo ni gu gira vapizane. (1 Vakorinto 3:5-9) Lithomo nya likhongolo ngudzu gu ba hi hathidwe khu Muvangi wathu gu gira thumo wowo nya lisima ngudzu! Ganiolu, gu tshumayela khandriyo yonga ndziya nyo thume ni Jehovha. Omu nya ndrima yeyi, hi na hevbula gambe edzi hi nga thumago khidzo ni Jehovha tepo hi phasago ndranga yathu mwendro vambe libandlani, tepo hi hakhago gwadi vapfhumba, tepo hi phasedzeyago mithumo yi girwago khu hengeledzano mafuni gwatshavbo, ni tepo hi engedzeyago thumo wathu ga Jehovha. — Vakolosi 3:23.

2. Khu ginani hi si yeligo gu fananisa esi hi si kodzago gu gireya Jehovha ni esi vambe va si kodzago gu gira?

² Tepo hi hevbulago ndrima yeyi, gwadi gu dundruga gu khethu hatshavbo hi hambanide. Tanga, womi, siemo, ni makodzelo yathu kha si fani. Khu kharato, hi nga fananisi esi hi  si kodzago gu gireya Jehovha ni esi vambe va si kodzago. Mopostoli Pawulo a di khuye: “Muthu ni muthu a na phele khu gu wona mithumo yaye. Ya gu manega yiri yadi a na ni fanelo nya gu dzi zundze khu mithumo yaye nya yadi, aholu a nga dzi pimanisi khu mithumo ya vakwawe.” — Vagalatiya 6:4.

3. Khu ginani hi nga ganeyago gu khethu ni wevbini a sayisago ndranga yaye a gu thuma gumogo ni Nungungulu?

³ Jehovha a gu vireya gu khuye hi sayisa gwadi dzindranga dzathu. Khu giyeyedzo, adzina gu vbwetega gu u thuma gasi gu mana dzitsapawu nyo sayise ndranga yago. Vamamayi nya vangi gu vbwetega gu va khala gaya gasi gu khathaleya sanana. Nigu tepo vavelegi vathu va tandregago gu dzi sayisa, adzina gu na vbwetega gu hi gira gilogyo. Isoso silo nya lisima. Bhibhiliya yari khiyo: “Oyu a si sayisigo valongo vaye, ngudzungudzu va ndrangani gwaye, bombide gukhodwa guvbindra wule nyamba khodwa.” (1 Thimoti 5:8) Wa gu ba na u khathaleya ndranga, adzina saye khu si kodzi gu gireya Jehovha satshavbo u nga ba u dogoreya gu mu gireya. Ganiolu u nga vbeyi tshivba! Jehovha a ngu tsaka tepo u sayisago ndranga yago. — 1 Vakorinto 10:31.

4. Vavelegi va nga thangisa kharini silo nya Mufumo guvbanyani, nigu ginani gi giregago va gu gira isoso?

⁴ Vavelegi nya maKristo va nga thuma ni Jehovha khu gu phasa sanana sawe gu dzi vegeya misuwo nyo thumeye Jehovha. Vavelegi nya vangi va giride isoso. Kha nga handro wakone, khu gu gimbiya nya tepo sanana sawe si hungide gu thumeya Jehovha thumoni nya tepo yatshavbo, ambari go ba guri hwindzo ni gaya. Vambe va gu thuma kha nga vamisiyonariyo, vambe kha nga vapiyonero umo gu vbwetegago ngudzu vahuweleyi, vambe va gu thumeya Bheteli. Lisine gu sanana sa gu thumeya hwindzo ni gaya, vavelegi kha va na nga mana gu vbungadza ngudzu naso nga edzi va nga ba va dzina khidzo. Ganiolu, khu gudzina avo va gu kutsa sanana sawe gu simama gu thumeya Jehovha ni hayini si gomogo. Khu ginani? Kholu va ngu tsaka ngudzu khu gu wona sanana sawe na si gu thangisa Jehovha guvbanyani gwaso. (3 Johane 4) Gu tala nya vavelegi vovo va gu dzipwa nga Ana, a nga khuye a gu “resa” gyanana gyaye Samuweli ga Jehovha. Va gu li wona na liri lithomo nya likhongolo ngudzu gu thuma gumogo ni Jehovha khu ndziya yoyo. — 1 Samuweli 1:28.

5. U nga phasa kharini vandriyago libandlani gwago? (Wona foto gupheyani nya ndrima.)

⁵ Wa gu ba uri mwalo silo si lombago gu khathaledwa khu givbiredza ndrangani gwago, ina u nga phasa vandriyathu va dwalago mwendro va dandridego khu tanga mwendro va vbwetago gimbe giphaso? Mwendro u nga phasa ava va va sayisago? Libandlani gwago khedza ava adzina va vbwetago giphaso nya nga igyogyo. Khu giyeyedzo, adzina womo ndriyathu nya nyamayi a khathaleyago muvelegi waye a gumbidego. Ina u nga ya tshala ni muvelegi waye gasi gu a kodza gu khathaleya simbe silo? Mwendro saye gu phasa muthu khu gu dzi ningedza gu hongola naye mitshanganoni, gu ya rengarenga silo, mwendro gu ya wuseya muthu xipitali. Tepo u girago isoso, u na ba u thuma ni Jehovha gasi gu hlamula nombelo nyo khaguri. — Leri 1 Vakorinto 10:24.

6. Hi nga yeyedza kharini gu hakha gwadi vapfhumba?

⁶ Sithumi sikwawe sa Nungungulu so tidwa khu gu hakha gwadi vapfhumba. (Vahebheru 13:2) Omu nya Lito la Nungungulu, hi ngu mana siyeyedzo si hi hevbudzago edzi hi nga yeyedzago khidzo wuwadi wowu. (Genesi 18:1-5) Hi yede gu phasa vambe ni yevbini tepo hi tulegedwago khu ndziya nyo gire isoso, gani “vandriyathu gukhodwani” mwendro ne. — Vagalatiya 6:10.

7. Khu yevbini mihandro hi yi manago khu gu hakha gwadi vapfhumba?

⁷ U nga thuma ni Jehovha khu gu hakha gwadi vandriyathu va gomogo thumoni nya tepo yatshavbo va vbwetago wulanga nyo khale? (Leri 3 Johane 5, 8.) Tepo hi girago isoso, va gu phasega avo gumogo ni ethu. Bhibhiliya ya gu si rana khiyo ‘gutiyiselana hatshavbo.’ (Varoma 1:11, 12) Nga dundrugeya khu Olaf. Na ngari muphya, moyo nya muwoneleyi nya gipandre nya gikwendra a di endreya libandla laye nigu a di gu vbweta wulanga nyo khale, ganiolu mwalo libandlani a nga kodza gu mu hakha. Olaf a di wudzisa vavelegi vaye, va nga ba va siri Dzifakazi gu khuye muwoneleyi nya gipandre a nga ya khala gaya gwawe gani. Va di dzumeya, ganiolu va mu embeya khavo a gu khuye u na lala vbasofatunu. Khiso kamo a giridego Olaf, nigu kha dzi laya khisoso. A dzi buzide khu semana nyo tsakise ni muwoneleyi nya gipandre! Tshigu ni tshigu dzimindru dzile va di gu dzi buza khu mabhulo nyo tsakise na va gu seya tsaya. Muwoneleyi nya gipandre a di tiyisa ngudzu Olaf nyo kala a hunga gu thumeya Jehovha thumoni nya tepo yatshavbo. Gu ngu vbindra 40 myaga Olaf na gu thuma kha nga misiyonariyo mayigoni nyo hambanehambane.

8. Khu ginani hi yedego gu yeyedza wuwadi ambari vambe va gu mba hi bonga gupheyani? Ninga giyeyedzo.

⁸ Hi nga yeyedza lihaladzo ga vathu hi gu mba vati khu dzindziya nya dzingi, ambari va gu mba yeyedza gubonga gupheyani. Khu giyeyedzo, ndriyathu moyo nya nyamayi wa Espanya a di gu hevbula Bhibhiliya ni Yesica, wa Ekwadhori. Litshigu limwedo na va gu hevbula, Yesika a di pheya gu liya. Ndriyathu a di mu wudzisa khuye khu ginani a liyago. Yesica a di khuye na si guti Espanya, a diri gisiwana ngudzu. Litshigu limwedo a diri mwalo guhodza nyo ninge gyanana gyaye, a diri ni mati basi. Yesica a di gombeya na gu zama gu ladzisa gyanana gyaye. Gitepwana hwane nya isoso, Dzifakazi dzimbili dzi di endreya Yesica dzi ya mu ninga revhista nyo khaguri. Ganiolu a di dzi hakha khu ndziya nyo vivbe a bwe a pferula revhista, khuye: “Khugo ogu guhodza mu vbwetago gu khenu nyi ninga gyanana gyangu?” Vandriyathu va di zama gu mu thaveleya, ganiolu Yesica kha nga ba a vbweta gupwa gilo. Khu hwane nya tepo, vandriyathu va di ya vega rava nya guhodza vbamwanya gwaye. Olu, vbakari nya gihevbulo, a di gu liya kholu a tugudego gu khuye bombide hlamulo nya nombelo waye ga  Nungungulu. Ganiolu Yesica a di dzi emisede gu thumeya Jehovha. Somo guagani gu khiso mihandro yoyo nya yadi yi manegide khu kotani nya wuhindzi wa vandriyathu vale. — Muhevbudzi 11:1, 6.

9, 10. a) Khu yavbini mathomo nyo khaguri nyo dzi ningedzeye va nga ba vari nawo vaIsrayeli? b) Vandriyathu nya vama va nga phasedzeya kharini libandlani muhuno?

⁹ Gale, vaIsrayeli va diri ni mathomo nya mangi nyo dzi ningedzeye gu gira mithumo nyo khaguri. (Ekisodha 36:2; 1 Dzikoronika 29:5; Nehemiya 11:2) Muhuno, anuwe u na ni mathomo nya mangi nyo dzi ningedzeye gu thumisa tepo yago, dzithomba dzago, ni makodzelo yago gasi gu phasa vandriyathu. Wo gira isoso, u na tsaka ngudzu nigu Jehovha a na gu kategisa.

¹⁰ Lito la Nungungulu li ngu kutsa vama mabandlani gu thuma ni Jehovha khu gu thumeya vambe kha nga vaphasedzeyi nya libandla mwendro madhota. (1 Thimoti 3:1, 8, 9; 1 Pedro 5:2, 3) Ava va girago isoso va gu vbweta gu phasa vambe khu silo si va keneleyago ni gu va phasa khu liphuvboni. (Mithumo 6:1-4) Ina madhota ma di nga gu lomba gu thuma kha nga muyeyedzeyi mwendro gu khathaleya mabhuku, gu khathaleya sipandre nya thumo nya gutshumayele, gu lungisalungisa esi si nga ghoheka, mwendro simbe silo? Vandriyathu va phasedzeyago omu nya mithumo yoyo vari khavo va ngu tsaka ngudzu khu gu gira isoso.

11. Moyo nya ndriyathu phasegide kharini khu gu phasedzeya thumo nyo vbahe?

¹¹ Ava va dzi ningedzago gu phasedzeya thumoni nya guvbahe, gutala nya dzitepo va ngu mana dzipari nya dziphya. Moyo nya ndriyathu nya nyamayi nyo pwani khu Margie a gu thuma omu nyo vhahe dziSalawu nya Mufumo khu 18 myaga. Thumoni momo, a ngu vega gupima avba nya vandriyathu  nya sagadzyana ni gu phasedzeya gu va hevbudza thumo. Wari khuye isoso si ngu ninga lithomo ava va dzi ningedzago gwayo gasi gu tiyisana khu gyawe. (Varoma 1:12) Khu lisine, tepo a tshanganidego ni sigaradzo guvbanyani gwaye, dzipari a dzi manago omu nya thumo wowu dzi mu tiyiside. Ina u di nga dzi ningedzeya gu phasedzeya thumoni nya guvbahe? U nga patega nuwe omu nya mithumo yoyo ambari wo ba uri mwalo wumeseri nyo khaguri.

12. U nga phasa kharini go dugeleya dzimhango?

¹² Hi nga thuma ni Jehovha gambe khu gu phasa vandriyathu va thegedwego khu dzimhango. Khu giyeyedzo, hi nga va phasa khu dzitsapawu. (Johane 13:34, 35; Mithumo 11:27-30) Hi nga va phasa gambe khu gu agisa ni gu lungisalungisa esi si ghohekedego. Moyo nya ndriyathu wa Poloniya nyo pwani khu Gabriela tsakide ngudzu tepo a nga wona vandriyathu va mabandlani ya vbafuvbi na va ta mu phasa tepo nyumba yaye yi ghohetedwego khu ndrambi. Tepo a dundrugeyago khisoso, wari khuye kha garadzegi khu silo satshavbo a si luzidego, ganiolu a gu vega gupima avba nya esi a si manidego. Wari khuye: “Isoso si nyi giride nyi tiyisega gu kheni gu gira gipandre nya libandla nya wuKristo lithomo nya likhongolo ngudzu nigu gibuga nya gutsaka ni gu tangala.” Nya vangi va phaswago hwane nyo thegedwe khu mhango vari khavo va gu dzipwa khu ndziya yamweyo. Nigu ava va thumago ni Jehovha gasi gu phasa vandriyathu vovo va ngu tsaka ni gu tangala. — Leri Mithumo 20:35; 2 Vakorinto 9:6, 7.

13. Ha gu tiyisa kharini lihaladzo lathu khu Jehovha tepo hi dzi ningedzeyago? Ninga giyeyedzo.

¹³ Moyo nya ndriyathu nya nyamayi nyo pwani khu Stephanie ni vambe vahuweleyi va gipandreni gwaye va thumide ni Jehovha khu gu phasa Dzifakazi dzi tutumidego nyimbi tigoni gwadzo dzi hongola Estados Unidos. Avo va phaside valulevi vovo gu mana wulanga nyo khale, dzimeza ni dzikadera. Wari khuye: “Hi tiyisidwe ngudzu khu gutsaka ni gubonga va gu yeyedzidego khu kotani nya lihaladzo nya wundruye wa mafuni gwatshavbo va li wonidego. Dzindranga dzodzo dzo pimisa gu khidzo hi dzi phaside ngudzu, narigu khu lisine, avo khavo va hi phasidego ngudzu. Lihaladzo, gupwanana, gukhodwa, ni gutumba gwawe Jehovha hi gu wonidego gu tiyiside ngudzu lihaladzo lathu khu Jehovha, nigu isoso sa gu hi ninga sighelo nyo bonge ngudzu khu satshavbo hi ningwago khu hengeledzano yaye.”

14, 15. a) Mapimo muni a nga ba ari nawo muprofeti Isaya? b) Makristo ma nga pimedzeya kharini Isaya?

¹⁴ U ngu dogoreya gu engedzeya thumo  wago ga Jehovha? Ina u dzi emisede gu ya khala malangani gu vbwetegago vahuweleyi nya vangi? Lisine gu kha si hungi gu kala hi hongola hwidzo gasi gu gira wuhindzi. Ganiolu gu na ni vandriyathu nyo khaguri va si kodzago. Avo va na ni mapimo nga ya muprofeti Isaya. Tepo Jehovha a nga khuye: “Nyi na ruma mani, khu mani a na hongolago khu lina lathu?” Uye a di khuye: “Nyi womo avba. Nyi rume.” (Isaya 6:8) U na ni makodzelo nyo phase hengelezano ya Jehovha nigu u dzi emisede gu gira isoso? U nga phasa khu dzindziya muni?

¹⁵ Jesu ganede esi maningano ni gu tshumayela ni gu gira vapizane: “Guvbwera gukhongolo! Aholu, sithumi sidugwana. Khu kharato, lombani ga mune lithembwe a rumele vavbweri nya dzimbewu dzaye.” (Matewu 9:37, 38) Ina u nga thuma nga piyonero malangani gu vbwetegago vahuweleyi nya vangi? Mwendro u nga phasa muthu nyo khaguri gu gira isoso? Vandriyathu nya vangi vari khavo ndziya nya yadi ngudzu nyo yeyedze lihaladzo lawe khu Nungungulu ni vathu vakwawe, gu thuma kha nga vapiyonero omu gu vbwetegago vahuweleyi nya vangi. Ina u nga dundrugeya khu dzimbe dzindziya u nga engedzeyago khidzo thumo gwago? Wa gu gira isoso, u na tsaka ngudzu.

16, 17. Khu dzevbini dzimbe dzindziya u nga engedzeyago khidzo thumo wago ga Jehovha?

¹⁶ Ina u dzi emisede gu ya thuma Bheteli mwendro gu phasedzeya thumoni nyo vbahe, ambari nari gu ya thuma khu tepo nyo khaguri mwendro litshigu limwedo mwendro guvbindra khu semana? Tepo yatshavbo hengeledzano ya Jehovha yi ngu vbweta vathu va dzi emisedego guya thuma ni hayini gu vbwetegago, na va dzi emisede gu gira ni gyevbini va na lombwago ambari va gu ba va hevbude gu gira wumbe thumo nyo hambane ni wowo. Jehovha a ngu ninga lisima vatshavbo va dzi emisedego gu dzi hiya simbe va bwe va ya thumeya ni hayini gu vbwetegago. — Ndzimo 110:3.

¹⁷ U ngu dzina gu mana sihevbulo si na gu phasago gu thumeya Jehovha khu guvbeleya? Adzina u nga tadzisa petisawu gasi gu hongola Xikwatunu nya Vavhangeli nya Mufumo. Xikola yoyo ya gu hevbudza vandriyathu va vidzidwego va thumeyago Jehovha thumoni nya tepo yatshavbo gasi gu va thumiswa gwadi khu hengeledzano ya Jehovha. Ava va hevbulago xikola yoyo va yede gu dzi emiseya gu ya thumeya ni hayini va na rumedwago. Ina u dzi emisede gu engedzeya thumo wago ga Jehovha khu ndziya yoyo? — 1 Vakorinto 9:23.

18. Hi na wuyedwa khu ginani khu gu thuma ni Jehovha tshigu ni tshigu?

¹⁸ Kha nga olu hi gu vathu va Jehovha hi na ni wuhindzi, hi vathu nya vadi, hi ngu yeyedza wuwadi, ni lihaladzo. Hi ngu khathala khu vambe vathu tshigu ni tshigu. Isoso si ngu hi ninga gutsaka, gurula, ni gutangala. (Vagalatiya 5:22, 23) Ambari wo ba uri ga giemo muni, u na mana gutsaka wo pimedzeya wuhindzi wa Jehovha u bwe u simama nuri gimwegyo nya sithumi nya lisima si thumago gumogo naye! — Mavingu 3:9, 10.