1. Ginani gi yeyedzago gu khigyo gu Jehovha na ni wuhindzi?

KHU tepo nyo khaguri Jehovha a di gu vbanya enga. Khu gu gimbiya nya tepo uye adi wona nari tshukwana gu ninga giningwa nya womi sivangwa si gu na ni guti ndzadzini ni mafuni. “Nungungulu [nya gutsake, NM]” Jehovha, a gu gola gu hi ninga silo nya sadi. (1 Thimoti 1:11; Jakobe 1:17) Nigu kha nga olu Jehovha a vbwetago gu khuye anethu hi tsaka a gu hi hevbudza gu manega ni wuhindzi. — Varoma 1:20.

2, 3. a) Khu ginani hi tsakago tepo hi yeyedzago wuhindzi? b) Ginani hi na gi hevbulago avba nya ndrima yeyi?

² Nungungulu a di vanga vathu khu mufananiso waye. (Genesi 1:27) Isoso so thula gu khiso Jehovha hi vangide na hiri ni makhalelo nya nga yaye. Gasi gu hi tsaka khu lisine hi bwe hi mana makategwa ya Jehovha, gu vbwetega gu hi landreya giyeyedzo gyaye. Gu vbwetega gu hi khathaleya vambe vathu hi bwe hi va gireya wuhindzi. (Vafilipi 2:3, 4; Jakobe 1:5) Khu ginani? Kholu Jehovha hi wumbide kharato. Ambari olu hi nga mba vbeleya, hi nga pimedzeya Jehovha hi bwe hi manega ni wuhindzi nethu.

 ³ Hi na ganeya khu sihevbudzo nyo khaguri sa omu nya Bhibhiliya maningano ni wuhindzi. Hi na hevbula gu khethu khu ginani Jehovha a tsakago tepo hi yeyedzago wuhidzi. Hi na hevbula gambe khedzi wuhindzi wu hi phasago khidzo gu gira thumo hi ningidwego khu Jehovha ni gighelo gi hi girago hi tsaka khu gu gira wuhindzi. Nigu hi na ganeya khu gu khethu khu ginani hi yedego gu simama gu manega ni wuhindzi.

4, 5. Jehovha ni Jesu va gu yeyedza kharini wuhindzi, nigu khu ginani hi yedego gu va pimedzeya?

⁴ Jehovha o vbweta gu khuye hi mu pimedzeya, khu kharato a ngu tsaka tepo hi girago wuhindzi. (Vaefeso 5:1) Jehovha o vbweta gambe gu khuye vathu va tsaka. Hi ngu siti isoso kholu a hi vangide khu ndziya nyo samadzise, nigu giride mafu nyo mbure ni satshavbo si gomogo mafuni gasi gu hi dzi buza khiso. (Ndzimo 104:24; 139:13-16, NM) Khu kharato tepo hi zamago gu tsakisa vambe ha gu rungudza Jehovha.

⁵ Ha gu pimedzeya gambe Jesu, oyu a ningidego giyeyedzo nyo vbeleye nya edzi vathu va nga yeyedzago khidzo wuhindzi. Uye a di khuye: “Mwamana wa Muthu nuye kha tela guta thumedwa, aholu guta thumela ni gu ningela womi waye gasi gu dzegisa va nya gutala.” (Matewu 20:28) Nigu mupostoli Pawulo kutside maKristo khuye: “Gu vbwetega mavbanyelo yanu ma fanana ni mavbanyelo ya Kristo Jesu . . . A di diga wufumu waye a gu dzi gira khumbi.” (Vafilipi 2:5, 7) Khu kharato hi nga dzi wudzisa gu khethu: ‘Ina nyi nga landreya giyeyedzo gya Jesu khu vbafuvbi?’ — Leri 1 Pedro 2:21.

6. Ginani egi Jesu a hi hevbudzago khu matimo nya muSamariya wule nya wuhindzi? (Wona foto gupheyani nya ndrima.)

⁶ Jehovha a ngu tsaka tepo hi landreyago giyeyedzo nyo vbeleye hi ningidwego khuye ni Jesu. Ha gu gira isoso tepo hi khathalago khu vathu hi bwe hi vbwetedzeya dzindziya nyo va phase. Jesu yeyedzide lisima nya isoso tepo a nga ganeya khu matimo nya muSamariya wule nya wuhindzi. (Leri Luka 10:29-37.) Uye hevbudzide valandreyi vaye gu khuye va di yede gu phasa vambe, ambari vo ba va si vati mwendro guti omu va tago khumo. U ngu gi dundruga gighelo gi giridego Jesu a ganeya khu matimo yoyo? Kholu mwama moyo nya muJudha a mu wudzisidego khuye: “Gasi khu mani muthu khwathu?” Hlamulo wa Jesu wo hi hevbudza gu khuwo ho ba hi vbweta gu tsakisa Jehovha hi yede gu yeyedza wuhindzi nga mwama wule nya muSamariya.

7. Ha gu yeyedza kharini gu khethu hi ngu khodwa gu khethu magirelo nya silo nya Jehovha khyadi gu vbindra yatshavbo? Tshamuseya.

⁷ Gimbe gighelo hi gu nagyo nyo yeyedze wuhindzi gyo yelana ni esi si dugeledego thembweni ga Edheni. Sathane ganede gu khuye Adhamu ni Evha va di hadzi mana gutsaka va gu khathala khu silo sawe basi wulangani nyo engise Jehovha. Evha a di gu khathala khuye basi nigu a di gu vbweta gu fana ni Nungungulu. Adhamu nuye a di gu khathala khuye basi nigu a di gu vbweta gu tsakisa Evha guvbindra Nungungulu. (Genesi 3:4-6) Mihandro yakona kha ya tsakisa. Somo guagani gu khiso mwalo a nga manago gutsaka a gu khathala khuye basi. Ganiolu ha gu khathala khu vambe hi bwe hi yeyedza wuhindzi, ho yeyedza gu khethu hi ngu khodwa gu khethu magirelo nya  silo ya Jehovha khyadi guvbindra yatshavbo.

8. Khu ginani Adhamu ni Evha va nga ba va yede gu dundrugeya khu vambe?

⁸ Ambari olu Adhamu ni Evha va nga ba vari vonga thembweni ga Edheni, va di yede gu dundrugeya khu vambe. Khu ginani? Kholu Jehovha a di va ningide thumo gasi gu wu gira. A di va ruma gu tadza mafu khu sanana sawe va bwe va ma gira paradhesi. (Genesi 1:28) Adhamu ni Evha va di yede gu khathala khu gutsaka ga sanana sawe si nga hadzi velegwa, kha nga olu Jehovha a nga ba a vbweta gu khuye vatshavbo va tsaka. Vatshavbo va di hadzi thuma gumogo gasi gu gira mafu ma khala paradhesi. Uwowo wu diri thumo nya wu khongolo!

9. Khu ginani vathu va nga hadzi tsaka khu gu gira mafu ma khala paradhesi?

⁹ Vathu nyo vbeleye va di hadzi thuma gambe gumogo ni Jehovha gasi gu gira mafu ma khala paradhesi ni gu tadzisa gugola gwaye. Khu ndziya yoyo, va di hadzi beya guhefemulani gwaye. (Vahebheru 4:11) Nga dundrugeya edzi thumo wowo wu nga hadzi tsakisa khidzo ni gu tangadzisa! Jehovha na va kategiside ngudzu nari khatshi va di gu khathade khu vambe vathu ni gu va sayisa.

10, 11. Ginani gi na hi phasago gu tshumayela ni gu gira vapizane?

¹⁰ Muhuno, Jehovha a ngu hi ninga thumo nyo hathege gasi gu wu gira. O vbweta gu khuye hi tshumayela ni gu gira vapizane.  Gasi gu gira thumo wowo, gu vbwetega gu hi khathala ngudzu khu vathu. Gasi gu ganeya lisine, hi nga simama gu gira thumo wowu basi ho ba hiri ni gighelo nyo pwale: Lihaladzo khu Jehovha ni lihaladzo khu vathu.

¹¹ Pawulo ganede gu khuye uye gumogo ni mambe maKristo ya lizana myaga nyo pheye va diri “sithumi [si] thumago gumogo ni Nungungulu” kholu va tshumayede va bwe va hevbudza lisine vathu. (1 Vakorinto 3:6, 9) Muhuno, anethu hi nga khala “sithumi [si] thumago gumogo ni Nungungulu” khu gu ningeya tepo yathu, tshivba yathu ni dzithomba dzathu gasi gu gira thumo nya gutshumayele hi ningidwego khu Nungungulu. Ilolo lithomo nya likhongolo!

12, 13. Khu mawonelo yago, ha gu wuyedwa khu ginani ha gu gira vapizane?

¹² Gu gira wuhindzi khu gu thumisa tepo ni tshivba yathu thumoni nya gutshumayele si ngu resa gutsaka nya gukhongolo. Isoso khiso si ganedwago khu vandriyathu nya vangi va gu na ni lithomo nyo gimbidzise sihevbulo nya Bhibhiliya. Hi ngu tsaka ngudzu khu gu wona sihevbulo sathu nya Bhibhiliya na si gu tsaka tepo si pwisisago esi Bhibhiliya yi nga hi hevbudzago, si engedzeya gukhodwa, si vbindrugedza mavbanyelo, si bwe si pheya gu bhuleya vambe esi si si hevbulago. Jesu nuye tsakide ngudzu tepo 70 nya vatshumayeli a va rumedego va nga “wuya na va tade khu gunengela” khu kotani nya matshango nya yadi va ma manidego. — Luka 10:17-21.

¹³ Vandriyathu mafuni gwatshavbo va ngu tsaka tepo va wonago edzi mahungu nya Bhibhiliya ma phasago khidzo vathu gu tshukwadzisa womi. Khu giyeyedzo, moyo nya ndriyathu nya nyamayi nyo pwani khu Anna a gu gifurugadzi a di gu vbweta gu engedzeya thumo waye ga Jehovha. * (Wona tshamuselo wa vbavbatshi.) Khu kharato a di fuluga a ya khala marandzi ga Ewuropa gu nga ba gu vbwetega vatshumayeli nya vangi. Uye lovide esi: “Gu na ni mathomo nya mangi nyo gimbidzise sihevbulo nya Bhibhiliya, nigu nyi ngu si gola ngudzu gu gira isoso. Thumo wangu wu ngu nyi ninga gutsaka. Tepo nyi vbohago gaya, kha nyi mani tepo nyo vege gupima avbo nya sigaradzo sangu. Nya gu pimisa khava nyi hevbulago navo — sigaradzo sawe ni gugaradzega gwavo. Nya gu vbwetedzeya dzindziya nyo va tiyise ni gu va phasa khesi si vbwetegago gwavo. Nigu nyi ngu tiyisega gu kheni ‘kategide ngudzu oyu a ningago guvbindra oyu a hakhago.’” — Mithumo 20:35.

14. U nga tsakiswa kharini khu gutshumayela ambari vathu va gu mba tsakeya?

¹⁴ Ambari vathu vo ba va si hi engiseyi tepo hi tshumayelago, hi nga mana gutsaka kholu ha gu va ninga lithomo nya gupwe mahungu nya yadi. Jehovha o vireya gu khuye hi gira sasimweso a rumidego Ezekiyeli khuye: “U  na va embela magana yangu, ambari va gu dzumela gu yingisa, mwendro gumba dzumela gu yingisa.” (Ezekiyeli 2:7; Isaya 43:10) Khu kharato ambari vathu vo hi hakha khu ndziya muni, Jehovha a ngu ninga lisima gudzigaradza gwathu. (Leri Vahebheru 6:10.) Moyo nya ndriyathu ganede esi khu gutshumayela: “Ethu ha gu yala, hi thedzeya mati, hi bwe hi gombeya na hi gu vireya gu khethu Jehovha a na gira gutsakeya gwawe gu dandra.” — 1 Vakorinto 3:6.

15. Ina hi yede gu yeyedza wuhindzi basi vathu va gu hi bonga? Tshamuseya.

¹⁵ Jesu o vbweta gu khuye hi gira wuhindzi kholu isoso si na hi gira tsaka. Ha gu gira wuhindzi, vathu nya vangi va na hi gireya wuhindzi nethu. Khu kharato a gu hi kutsa khuye: “Ningani, mu na ningwani nenu; mu na ningwa gipimo nya gyadi, nya gutale, gi gonyeledwa, bwelo khavbo gi phathamela. Kholu Nungungulu a na mi pimela khu gipimo mu na pimago khigyo vakwanu.” (Luka 6:38) Khu lisine, khandri vatshavbo va na bongago khu gu hi va gireya wuhindzi. Ambari vathu va gu mba bonga, simama gu gira wuhindzi. Gima kha wu wuti pimo nya wuwadi u nga girago khu gigiro gimwegyo basi nya wuhindzi.

16. Khu mani hi yedego gu mu gireya wuhindzi, nigu khu ginani?

¹⁶ Vathu va gu na ni wuhindzi khu lisine, kha va giri silo na va gu vireya gu bweledzedwa wuhindzi wawe. Jesu a di khuye: “Wa gu dongisela buzo, rana sisiwana, silima, sikhurubwa ni sikhumu. U na bani u kategide, kholu kha va na mana igyo nya gubweledzele khigyo.” (Luka 14:13, 14) Bhibhiliya yari khiyo: “Muthu nya wuhindzi, a na mana makategwa.” Yi bwe gambe khiyo: “Kategide oyu a alakanyago gisiwana.” (Mavingu 22:9; Ndzimo 41:1) Gu vbwetega gu hi gira wuhindzi kholu ha gu vbweta gu phasa vambe khu lisine.

17. Khu dzevbini dzindziya nyo khaguri nyo yeyedze khidzo wuhindzi dzi na hi girago hi tsaka?

 ¹⁷ Tepo Pawulo a nga ganeya malito ya Jesu nya gu khayo “kategide ngudzu oyu a ningago guvbindra oyu a hakhago,” kha nga ba a ganeya basi khu gu ninga giphaso nya dzithomba. Hi nga phasa gambe vathu khu gu va tiyisa, gu va ninga wusingalagadzi wa omu nya Bhibhiliya, ni giphaso va gi vbwetago. (Mithumo 20:31-35) Esi Pawulo a ganedego ni gu gira sa gu hi hevbudza lisima nyo gire wuhindzi khu tepo yathu, tshivba yathu, gupima gwathu, ni lihaladzo lathu.

18. Ginani gi ganedwago khu vagevisisi nya vangi maningano ni wuhindzi?

¹⁸ Vagevisisi va hevbulago mavbanyelo nya vathu va tugude navo gu khavo gu gira wuhindzi gu ngu gira vathu va tsaka. Khu guya khu ndrima nyo khaguri, vathu vari khavo va ngu tsaka ngudzu hwane nyo ba va girede silo nya sadi vambe. Vagevisisi vari khavo tepo hi phasago vambe, ha gu dzipwa na hi gu vbanyeya gilo nyo giti. Khu kharato vagengeyi nyo khaguri vari khavo vathu vo gira thumo nya gudzine gasi gu va mana womi nya wadi ni gutsaka. Khu lisine, esi va si tugudego kha si hi samadzise, kholu muvangi wathu nya lihaladzo, Jehovha, tepo yatshavbo a ngu hi embeya gu khuye gu gira wuhindzi gu ngu resa gutsaka. — 2 Thimoti 3:16, 17.

19, 20. Khu ginani u vbwetago gu yeyedza wuhindzi?

¹⁹ Ho ba hi randredwe khu vathu va khathalago khu silo sawe basi, si nga hi garadzeya gu simama gu gira wuhindzi. Ganiolu Jesu a hi dundrugiside gu khuye milayo mivili nya yikhongolo ga yatshavbo kheyi nya gu haladze Jehovha khu monyo wathu watshavbo, hefemulo, mapimo, ni tshivba ni gu haladza vathu vakhwathu nga edzi hi dzi haladzago khidzo. (Marko 12:28-31) Omu nya ndrima yeyi hi hevbude gu khethu ava va haladzago Jehovha va ngu mu pimedzeya. Jehovha ni Jesu va na ni wuhindzi. Avo va gu hi kutsa gu landreya giyeyedzo gyawe, kholu avo va ngu dziti gu khavo isoso si na hi ninga gutsaka nya lisine. Ha gu yeyedza wuhindzi avba nya esi hi gireyago Nungungulu ni vathu, hi na rungudza Jehovha hi phasega hi bwe hi phasa vambe.

²⁰ Khu lisine u ngu gira satshavbo u si kodzago gasi gu yeyedza wuhindzi ni gu phasa vambe, ngudzungudzu vandriyago. (Vagalatiya 6:10) Wa gu simama gu gira isoso, vathu va na gu bonga va bwe va gu gola, nigu anuwe u na tsaka. Bhibhiliya yari khiyo: ‘Muthu nya wuhindzi a na hodza a eneledwa, ni wule a thawuludzago libogo a ningela, uye nuye a na ningwa.’ (Mavingu 11:25) Thumoni gwathu nyo tshumayele ni guvbanyani gwathu, gu na ni dzindziya nya dzingi hi nga khathaleyago khidzo vambe ni gu gira wuwadi ni wuhindzi. Hi na ganeya khu dzimbe nya dzindziya dzodzo omu nya ndrima yi landreyago.