INA womo thumo nyo khaguri libandlani u tsakeyago gu gira, ganiolu si si kodzegigo gu wu vboheya? Si nga gira nari thumo nyo khaguri wu girwago khu mumbe muthu. Mwendro adzina malungelo, mwendro thumo nyo khaguri u giridego gale yoyo. Ambari ulolo olu khu kotani nya tanga, mawugelo, sigaradzo nya dzitsapawu mwendro ndranga si ngu gu tandregisa gu gira esi u nga ba u si vbweta. Nigu khu kotani nya guvbindrugedze nya silo hengeledzanoni, adzina si lombegide gu u ema gu gira thumo u giridego khu tepo nyo laphe. Ambari sa gu ba si pwala sighelo si gu digisidego gu gira thumo wago, adzina u nga dzipwa na wu si giri satshavbo esi u nga hadzi gira thumoni wa Nungungulu. Ga siemo soso, si ngu pwisisega gu u khunguvanyega ga dzimbe dzitepo. Ambari ulolo, u nga potsa kharini gudzipwa nyo vivbe, nya nga gu vbeya tshivba, wuvi mwendro giviti? U nga simama kharini ni gu gutsaka?

Hi nga hevbula gilo nyo khaguri nya lisima maningano ni edzi hi nga simamago khidzo ni gu tsaka ga giyeyedzo gya Johane Mubhapatisi. Johane a di gu tsakiswa khu thumo waye, ambari ulolo, si nga gira na sa si vireya esi si nga hadzi mu dugeleya guvbanyani gwaye. Uye kha nga tshuka a pimiside gu khuye a di hadzi vbedza tepo nya yingi pasoni wulangani nya thumoni waye nyo tshumayele. Ambari ulolo, Johane a di simama gu tsaka, a bwe a simama ni likhalelo leli guvbanyani gwaye gwatshavbo. Ginani gu mu phasidego? Nigu hi nga simama kharini na hi tsakide ambari ha gu ba hi emisana ni sikhunguvanyiso?

Khu 29 matshiguni yathu, Johane phede thumo waye khu gu huweleya guta ga Mesiya, khuye: “Vbindrugedzani mavbanyelo, kholu Mufumo wa Ndzadzini womo vbafuvbi gwanu.” (Mat. 3:2; Luka 1:12-17) Nya vangi va ma hakhide gwadi mahungo yaya. Khu lisine, gidzemo nya gikhongolo nya vathu gi di gimbiya pfhuka nyo laphe gasi gu tapwa mahungu yaye, va bwe va kutsega gu dzi laya va bhapatiswa. Johane tiyide gambe hwambo a gengedza vathangeyi nya wukhongeyi nyo dzi khusedze maningano ni gulamudwa gu nga ba gu va vireya va gu mba vbindrugedza. (Mat. 3:5-12) Johane giride gilo nyo samadzide ngudzu thumoni gwaye nyo tshumayele tepo a nga bhapatisa Jesu ndrani nya mwaga nya 29 matshiguni yathu. Khavbovbo, Johane a di kutsa vambe gu landreya Jesu, a gu Mesiya a tumbisidwego. — Joh. 1:32-37.

Na gu thula thumo wa Johane, Jesu ganede khuye: “Vbakari nya vathu vatshavbo va velegidwego khu nyamayi, mwalo a gu khongolo guvbindra Johane  mubhapatisi.” (Mat. 11:11) Nya mba kanakana Johane a di gu tsakiswa khu yatshavbo makategwa a ma hakhidego. Kha nga Johane, nya vangi muhuno va ngu hakha makategwa nyo samadzide khu ga Nungungulu. Nga wona giyeyedzo gya ndriyathu moyo nyo pwani khuye Terry. Uye ni mwangadzi waye Sandra va na ni 50 myaga ni guvbindra thumoni nya tepo yatshavbo. Terry wari khuye: “Nyi hakhide makategwa nya mangi nyo samadzise. Nyi thumide kha nga piyonero, Bhetelita, piyonero nyo hathege, muwoneleyi nya gipandre, muwoneleyi nya distritu, nigu olu nyo thuma gambe kha nga piyonero nyo hathege.” Si ngu tsakisa ngudzu gu ningwa malungelo khu Nungungulu, ganiolu kha nga olu hi na si hevbulago ga giyeyedzo gya Johane si ngu vbweta gu dzigaradza gasi gu manega ni gutsaka ambari tepo siemo sathu si vbindrugedzago.

Sihalo wu phasidego Johane Mubhapatisi gu timiseya khu gutsaka kholu a nga ba a simama gu bonga Jehovha khu yatshavbo malungelo yale a nga ba ari nawo. Nga wona giyeyedzo gegi. Hwane nyo bhapatise Jesu, thumo nyo tshumayele wa Johane wu di pheya gu bweleleya hwane nari gu wa Jesu wu di guya mbeli. Na va gu garadzega, vapizane va Johane va di mu hidzimelaya va ya ganeya khavo: “Wule u nga mu fakazelago, womo a bhapatisa, vathu vatshavbo va guya gwaye.” (Joh. 3:26) Johane a di va hlamula khuye: “Buzoni nya dzegano mudzegi khuye a gu ni mwangadzi gasi phelegedzi ya mudzegi, a gu iyo yi mu bangaladzago ni gu mu yingisa, ya gupwa lito la mudzegi ya gu tsaka ngudzu. Khilo eli litsako langu nya guvbelele.” (Joh. 3:29) Johane kha nga ba a gira mapalisana ni Jesu, nigu uye gima kha pimisa gu khuye thumo waye wu diri mwalo gambe lisima khu kotani nya thumo wu nga ba wu girwa khu Jesu. Wulangani nya isoso, Johane a di simama gutsaka kholu a nga ba a simama gu ninga lisima thumo waye kha nga “phelegedzi ya mudzegi.”

Gudziemiseya ga Johane gu mu phaside gu simama na tsakide ambari olu thumo waye wu nga ba wu garadza. Khu giyeyedzo, Johane a diri mu Nazira nya mavelego, ni gu khu kotani nya isoso uye kha nga ba a yede gu seya wadwa. (Luka 1:15) Na gu thula womi nyo vbevbuge wa Johane, Jesu a di khuye: “Johane Mubhapatisi, a si hodzigo giIo ni gu seIa wadwa.” Ganiolu Jesu ni vapizane vaye va diri mwalo gilo gi nga ba gi va himbedzeya gu gira esi va nga ba va si vbweta, avo va di gu vbanya kha nga vathu nyo olovelege. (Mat. 11:18, 19) Nigu, Johane kha nga tshuka a giride giliwugiso, ganiolu a di gu dziti gu khuye vapizane va Jesu gumogo ni vambe vapizane va mu landredego gupheyani va diri ni tshivba nyo gire siliwugiso. (Mat. 10:1; Joh. 10:41) Vbavbandze nyo dige silo soso si mu tsolopeteya, Johane a di simama gu thumeya Jehovha khu sighingi.

Khu ndziya nyo fane, anethu ha gu ninga lisima thumo hi gireyago Jehovha hi na simama na hi tsakide. Terry a khumbugidwego gupheyani wari khuye: “Nyi di gu vega gupima ga thumo moyo ni moyo nyi nga ba nyi wu hakhide.” A gu khedza hwane, a dundrugeya khu womi waye thumoni nya tepo yatshavbo, o ganeya esi: “Kha nyi dzi layi khu gilo, ganiolu egi nyi gi dundrugago silo nyo samadzise nyi si vbanyidego.”

Hi nga etisa gutsaka gwathu thumoni wa Nungungulu khu gu dundrugeya khesi si giridego thumo moyo ni moyo hi giredego Jehovha wuri wa lisima gwathu. Lithomo gu khala “sithumi [si] thumago gumogo ni Nungungulu.” (1 Kor. 3:9) Gyombo nya lisima ngudzu gya gu simama na gi mburide ha gu gi khathaleya tepo yatshavbo. Khu ndziya nyo fane, hi na simama na hi tsakide ha gu simama gu dundrugeya khu lithomo hi gu nalo nyo thume ni Jehovha. Hi na potsa gu fananisa esi hi girago nesi vambe va girago. Kha hi na nga pimisa gu khethu thumo owu Jehovha a hi ningidego wu mwalo lisima ngudzu gu fana ni owu a ningidego vambe. — Gal. 6:4.

Johane a di gu dziti gu khuye kha na nga gira thumo wule kala gupindruga, ganiolu kha nga ba a dziti gu khuye wu na vbeya kharini. (Joh. 3:30) Khu 30 matshiguni yathu, hwane nya 6 migima Jesu na bhapatisidwe, Johane a di khothedwa khu Pfhumu Herodhi. Ambari ulolo, uye a di simama gu hevbudza esi nya sadi vathu. (Marko 6:17-20) Ginani gi nga hadzi mu phasa gu simama ni gu tsaka ambari olu silo si nga ba si vbindrugedzide? Uye a di simama gu vega gupima avba nya silo nya liphuvbo.

Tepo Johane a nga khothedwa, a di hakha mahungu maningano ni gu dugeleya nya thumo nyo tshumayele wa Jesu. (Mat. 11:2; Luka 7:18) Johane a  di gu khodwa gu khuye Jesu a diri Mesiya ganiolu adzina dzi wudziside gu khuye, Jesu a na tadzisa kharini satshavbo esi Milowo yi si ganeyago gu khiyo si na tadziswa khu Mesiya! Gu hakha a wu hakhago wufumu Mesiya, ina a na dzegeya gu fuma? Ina a na nyi phasa gu duga khu pasoni? Na gu dogoreya ngudzu gu pwisisa gwadi thumo wa Jesu, Johane a di rumeya vapizane vavili vaye gasi guya wudzisa Jesu esi: “Khuwe wule a vbwetago guta, mwendro hi nga gu lindrela mumbe?” (Luka 7:19) Tepo va nga wuyago, si nga gira Johane na va engisede gwadi tepo va nga ba va mu tshamuseya siliwugiso si girwago khu Jesu, edzi a hawulugisago khidzo madwali, tepo Jesu a nga va rumeya guya embeya Johane khuye: “Sikhumu si ngu wona, sikhurubwa si ngu gimbila, va nya sokono va ngu agiswa, sivbwiri si ngu pwa, vafi va ngu wuga, Mahungu nya Yadi ma ngu hevbudzwa sisiwana.” — Luka 7:20-22.

Kha hi kanakani gu khethu mubiku wowo wu tiyiside Johane. Uye si wonide gwadi gu khuye Jesu a di gu tadzisa siprofeto si nga ba si ganeya khu Mesiya. Ambari olu guta ga Jesu gu nga ba gusi pati gu dusa Johane khu pasoni, Johane a di gu dziti gu khuye thumo waye wu diri wa lisima. Ambari olu a nga ba a emisana ni siemo nyo garadze, uye a diri ni sighelo nyo simame na tsakide.

Gu fana ni Johane, ha gu vega gupima avba nya silo nya liphuvbo, hi na si kodza gu timiseya khu gutsaka. (Kol. 1:9-11) Ha gu leri Bhibhiliya hi bwe hi dundrugeya khesi hi si lerigo si na hi phasa gu dundruga gu khethu thumo wathu ga Nungungulu khandri wa mahala. (1 Kor. 15:58) Sandra wari khuye: “Gu leri gipimo gimwegyo nya Bhibhiliya tshigu ni tshigu si ngu nyi phasa gu hidzimeya ga Jehovha. Si ngu nyi phasa gambe gu vega gupima avbo ga Jehovha vbavbandze gwangu.” Hi nga vega gambe gupima avba nya mibiko nya thumo wu girwago khu vandriyathu, isoso si nga hi phasa gu mba vega gupima avba nya siemo sathu ganiolu hi vega gupima avba nya esi Jehovha a si tadzisago. Sandra wari khuye: “Longoloko nya JW Broadcasting^® wu ngu hi phasa gu dzipwa vbafuvbi ni hengeledzano, wu bwe wu hi phasa gambe gu simama ni gutsaka thumoni gwathu.”

Ga tepo nyo role Johane Mubhapatisi a tshumayedego, uye tshumayede khu ‘liphuvbo nya tshivba nya nga la muprofeti Eliya,’ nigu gu fana ni Eliya, uye “a diri muthu kha nga ethu.” (Luka 1:17; Jak. 5:17) Ha gu pimedzeya giyeyedzo gyaye hi bwe hi simama gu vega gupima avba nyo thumeye Jehovha, anethu hi nga simama na hi tsakide thumoni wathu, ambari go dugeleya ginani.