1. Khu vamani va phasidego gu wumba libandla la Filipi?

TEPO mupostoli Pawulo, Silasi, Luka ni Thimoti va nga vboha Roma, lidhoropa li nga ba li fumedwa khu Filipi, va diya mana vathu nyo tale va nga ba va vbweta guti nya singi khu mahungu nya yadi. Vandriyathu vovo nya vana nya sighingi va phaside guwumbani nya libandla va bwe va phasa vandriyathu nya vaphya gu tshangana gumogo ndrangani ga moyo nya ndriyathu nya nyamayi nyo pwane khu Lidhiya a nga ba a gola ngudzu gu hakha vapfhumba. — Mith. 16:40.

2. Sigaradzo muni li nga dzegeya gu tshangana naso?

² Nya mba hweya libandla lolo nya liphya li tshangana ni gigaradzo. Sathane a di gira gu vathu va nga ba va nyenya lisine va wugeya thumo nyo tshumayele wu nga ba wu girwa khu Pawulo ni vambe vandriyathu. Pawulo ni Silasi va di kuruvisedwa, va kwamudwa va bwe va khothedwa. Khu hwane nyo ba va dugide khu pasoni, avo va diya wuseya vapizane nya vaphya ni gu va tiyisa. Khavbovbo, Pawulo, Silasi ni Thimoti va di duga khu dhoropani mule ganiolu sa gu wonegisa gu khatshi Luka a di tshala. Vandriyathu nya vaphya va di yede gu gira ginani olu? Khu gu phaswa khu liphuvbo la Jehovha, avo va di simama gu mu thumeya khu sighingi. (Filp. 2:12) Khu kharato Pawulo a diri ni sighelo nya singi nyo tsake khavo!

3. Khu guya khu Vafilipi 1:9-11, Pawulo gombede khu ginani?

³ Hwane nya lizana myaga, Pawulo lovede lidangaliya libandla la Filipi. Tepo u lerigo lidangaliya lolo, u na wona edzi Pawulo a nga ba a va haladza khidzo vandriyaye. Uye di lova khuye: “Edzi nyi mi golago khidzo, khu lihaladzo la Jesu Kristo.” (Filp. 1:8) Uye a di va embeya gu khuye a ngu va gombeleya. A di lomba gu khuye Jehovha a va phasa gu andrisa lihaladzo, va si kodza guti esi si gu na ni lisima ngudzu, va aga, va potsa gu tshunganisa vambe,  va bwe va simama gu velega mihandro nya yadi. Muhuno nugo, anethu hi ngu phasega khu malito ya Pawulo ma dugeyago monyoni. Khu kharato, hongoleni hi lerini esi Pawulo a lovedego vaFilipi. (Leri Vafilipi 1:9-11.) Khu gulandreya hi na bhula khesi Pawulo a si khumbugidego hi bwe hi wona dzi hi nga si thumisago khidzo, gimwegyo khu gimwegyo.

4. a) Khu guya khu 1 Johane 4:9, 10, Jehovha yeyedzide kharini lihaladzo laye khethu? b) Hi yede gu haladza Nungungulu khu pimo muni?

⁴ Jehovha yeyedzide lihaladzo laye khethu khu gu rumeya gyanana gyaye mafuni gasi gu tafa khu kotani nya sighoho sathu. (Leri 1 Johane 4:9, 10.) Lihaladzo laye khethu la gu hi kutsa gu mu haladza nethu. (Rom. 5:8) Hi yede gu haladza Nungungulu khu pimo muni? Jesu hlamude giwudziso gegi tepo a nga embeya muFarisi moyo, khuye: “Haladza Pfhumu Nungungulu wago khu monyo wago watshavbo, khu hefemulo wago watshavbo ni mapimo yago yatshavbo.” (Mat. 22:36, 37) Ethu ha gu vbweta gu haladza Jehovha khu monyo wathu watshavbo. Nigu ho vbweta gu khethu lihaladzo lathu khuye li engedzeya tshigu ni tshigu. Pawulo embede vandriyathu va Filipi gu khuye lihaladzo lawe gu vbwetega li “andre.” Ginani hi nga girago gasi gu tiyisa lihaladzo lathu khu Nungungulu?

5. Lihadzo lathu li nga dandra kharini?

⁵ Gu vbwetega hiti Nungungulu gasi gu mu haladza. Bhibhiliya yari khiyo: “Oyu a si haladzigo, kha muti Nungungulu, kholu Nungungulu lihaladzo.” (1 Joh. 4:8) Mupostoli Pawulo tshamusede gu khuye lihaladzo lathu khu Nungungulu li na dandra ha guti lisine khuye hi bwe hi pwisisa mawonelo yaye nya silo. (Filp. 1:9) Tepo hi pheyago gu hevbula Bhibhiliya, ho pheya gu haladza Jehovha ambari olu hi gu mbati silo nya singi khuye. Khavbovbo, tepo hi yago hi hevbula khu Jehovha, lihaladzo lathu khuye la gu engedzeya gu dandra. Khu gighelo gyogyo si na ni lisima gu hi hevbula Bhibhiliya tshigu ni tshigu hi bwe hi dundrugeya khesi si gu na ni lisma womini gwathu. — Filp. 2:16.

6. Ginani hi gi hevbulago avba ga 1 Johane 4:11, 20, 21, maningano ni gu andrisa lihaladzo?

⁶ Lihaladzo la Jehovha khethu la gu hi kutsa gu haladza vandriyathu. (Leri 1 Johane 4:11, 20, 21.) Adzina hi nga pimisa gu khethu si ngu vbevbuga ngudzu gu haladza vandriyathu. Kholu hatshavbo ha gu khozeya Jehovha nigu ha gu zama gu pimedzeya makhalelo yaye nya yadi. Ha gu pimedzeya giyeyedzo gya Jesu, oyu lihaladzo laye li nga ba liri likhongolo nyo kala a ningeya womi waye khu kotani yathu. Ambari ulolo, dzimbe dzitepo si ngu tshuka si garadza gu landrisa gileletelo gegi nya gu haladzane khu gyathu. Wona giyeyedzo nya libandla la Filipi.

7. Ginani hi gi hevbulago avba nya wusingalagadzi wa Pawulo ga Evhodhiya ni Sintiki?

⁷ Evhodhiya ni Sintiki va diri vandriyathu nya sighingi va thumidego gumogo ni mupostoli Pawulo. Ambari ulolo, avo va dzumelede mayunga nyo khaguri ma va hambanisa. Avba nya lidangaliya laye ga libandla eli va nga ba va thuma vandriyathu vava, Pawulo khumbugide malina yawe khu gu kongoma a bwe a va gengedza gu khuye “va vbanye khu gupwanana.” (Filp. 4:2, 3) Pawulo a di kutsega gu ninga wusingalagadzi libandla latshavbo, khuye: “Girani silo satshavbo nyamba ngurangura mwendro gu ganedzisana.” (Filp. 2:14) Nya mba kanakana, wusingaladzi wowu kha wa phasa basi vandriyathu vava nyo tumbege, ganiolu wu phaside gambe libandla latshavbo gasi va haladzana khu gyawe.

8. Ginani gi nga girago gu si hi garadzeya gu haladza vandriyathu, nigu ginani gi nga hi phasago?

⁸ Dzimbe dzitepo si ngu hi garadzeya gu haladza vandriyathu kholu ha gu gira esi Evhodhiya  ni Sintiki va giridego, gu vega gupima avba nya sihoso sawe. Hatshavbo hi ngu hosisa tshigu ni tshigu. Ha gu vega gupima avba nya sihoso sa vambe lihaladzo lathu khavo li na vbola. Khu giyeyedzo ndriyathu nyo khaguri a gu divala gu hi phasa gu agisa Salawu nya Mufumo, adzina hi nga goroga khu isoso. Ha gu pheya gu dundrugeya khu satshavbo sihoso si giridwego khu ndriyathu yoyo, hi na engedzeya gu goroga nigu lihaladzo lathu khuye li na pheya gu vbunguga vbadugwanavbadugwana. Wa gu ba uri ga giemo nyo fane, gwadi gu dundrugeya khesi: Jehovha a ngu wona sihoso sathu ambari ni esi sa vandriyathu. Ambari olu hi khaleyago gu hosisa, uye a ngu haladza vandriyathu nya nga edzi a hi haladzago khidzo. Khu gighelo gyogyo, gu vbwetega hi pimedzeya lihaladzo la Jehovha hi bwe hi simama gu vega gupima avba nya makhalelo nya yadi ya vandriyathu. Tepo hi dzi garadzeyago gu haladza vandriyathu ha gu tiyisa gupwanana gwathu navo. — Filp. 2:1, 2.

9. Khu sevbini silo nyo khaguri ‘nya lisima ngudzu’ esi Pawulo a si khumbugidego avba nya lidangaliya laye ga vaFilipi?

⁹ Jehovha leletede Pawulo gu embeya maKristo ya Filipi gu khuye ‘vati silo si gu na ni lisima ngudzu,’ nigu anethu hi yede gu gira sasimweso muhuno. (Filp. 1:10) Silo soso nya lisima sa gu pata gu agiswa nya lina la Jehovha, gutadzisega nya situmbiso saye, gurula, ni pwanano libandlani. (Mat. 6:9, 10; Joh. 13:35) Ha gu ninga ngudzu lisima silo sesi womini gwathu, hi na yeyedza gu khethu hi ngu mu haladza Jehovha.

10. Ginani hi yedego gu gira gasi hi wonwa kha nga vathu nyo age?

¹⁰ Pawulo ganede gambe gu khuye gu vbwetega hi “aga.” Isoso kha si thuli gu khiso gu vbwetega hi vbeleya. Ethu kha hi na nga aga kha nga edzi Jehovha a agidego khidzo. Ganiolu, Jehovha a na hi wona kha nga vathu nya guage ha gu gira esi si gomogo tshivbani gwathu gasi gu andrisa lihaladzo ni gu thangisa esi si gu ni lisima. Mweyo nya dzindziya edzi hi nga yeyedzago khidzo lihaladzo, khu gu hi gira satshavbo hi si kodzago gasi hi si tshunganisi vambe.

11. Khu ginani hi yedego gu potsa gu tshunganisa vambe?

¹¹ Gileletelo nya gu potse gu tshunganisa vambe khya lisima ngudzu. Hi nga tshunganisa kharini vambe? Adzina khu sivbungadzo hi si hathago, sombo hi ambalago ni thumo hi wu hathago. Esi hi girago si nga gira na sa sa vivba mahoni ga Jehovha. Ganiolu abari gu esi hi si hathago si ngu khunguvanyisa livhalo la mumbe mwendro gu gira vambe va tshunganeya, isoso gighoho. Jesu a di khuye ha gu gira moyo nya ndriyathu a diga gu thumeya Jehovha, i tshukwana hi hungwa thamoni giwindri nya gikhongolo nya gitshindro, hi rinywa nondrwani nya yiphwa! — Mat. 18:6.

12. Ginani hi gi hevbulago avba nya giyeyedzo gya patwa wowu nya vapiyonero?

¹² Nga wona edzi patwa go khaguri nya va vapiyonero wu ma thumisidego khidzo malito ya Jesu. Avo va thumide libandlani limwedo ni patwa nyo khaguri wu nga ba wu ngari gu bhapatiswa, owu wu ndandrego gipandreni omu silo nya singi si nga ba si himbedzedwa. Patwa wowu nya wuphya wu di gu khodwa gu khuwo maKristo kha ma yeli gu hongola (cinema) wulanga gu sixitirwigo dzifilimi, ambari ni gu sixitiri dzifilimi nya dzadi. Avo va di khunguvanyega tepo va nga tugula gu khavo patwa wule nya vapiyonero wu di gu sixitiri dzifilimi. Tepo patwa nya vapiyonero wu ngati isoso, wu di ema gu hongola cinema kala tepo patwa nya wuphya wu nga hevbudza mavhalo yawe, vati gu ninganiseya silo. (Hebh. 5:14) Esi patwa nya vapiyonero wu giridego si yeyedzide gu khiso  avo va di gu haladza vandriyawe vava nya vaphya nasiri basi khu malito ganiolu khu mithumo gambe. — Rom. 14:19-21; 1 Joh. 3:18.

13. Hi nga tshunganisa kharini vambe va thegeya gighohoni?

¹³ Yimbe ndziya hi nga tshunganisago khiyo muKristo nyo khaguri khu gu mu gira a ghoha. Si nga girega kharini isoso? Nga dundrugeya khu giyeyedzo gegi. Hwane nyo ba gihevbulo gimwegyo nya Bhibhiliya yi lutugide khu tepo nyo laphe gasi gu diga gu seya wadwa, khu gu hegisa gi di si kodza. Gi di tugula gu khigyo gi di yede gu diga gu seya khu guvbeleya. Khavbovbo igyo gi di dzegeya gu vbindrugedza silo nya singi womini gwagyo gi bwe gi bhapatiswa. Khu gu gimbiya nya tepo, ndriyathu nyo khaguri a di gi rana gasi guya vbungadza nagyo a bwe a ya gi ninga liboteri nya wadwa, khuye: “Olu uwe u muKristo; u na ni liphuvbo la Jehovha. Limwedo nya makhalelo nya liphuvbo nyo age gudziphara. Gasi gu yeyedza gu khuwe u ngu dzi phara, u na seya ganiolu khu na nga dzumeya gu seya guvbindra pimo.” Si di hadzi vbisisa monyo nari khatshi ndriyathu wule nya muphya a di engiside wusingalagadzi wule nya mba phasa, a pheledza gambe gu khala maleveni.

14. Mitshangano yathu ya gu hi phasa kharini gu thumisa sileletelo si gomogo omu ga Vafilipi 1:10?

¹⁴ Mitshangano yathu nya wuKristo yi ngu hi phasa gu thumisa khu dzindziya nyo hambane sileletelo hi ningidwego si gomogo omu ga Vafilipi 1:10. Nyo pheye, esi hi hevbulago mitshanganoni so hi dundrugisa esi Jehovha a si ningago ngudzu lisima. Nya wuvili, ha gu hevbula edzi hi nga thumisago khidzo esi hi si hevbulago gasi hi khala vathu nyo age. Nigu nya wuraru, ha gu kutswa gu haladza  vambe ni gu gira mithumo nya yadi. (Hebh. 10:24, 25) Tepo hi yago hi engedzeya gu tiyisa vandriyathu, lihaladzo lathu khavo ni Nungungulu la gu engedzeya gu dandra. Tepo hi haladzago Nungungulu ni vandriyathu khu monyo wathu watshavbo, hi na gira ni gevbini hi gi kodzago gasi hi potsa gu tshunganisa vandriyathu.

15. Sa gu thula ginani gu tala khu mihandro nya yadi?

¹⁵ Pawulo a di gombeya khu monyo waye watshavbo a lomba gu khuye vaFilipi va tala “khu mithumo nya gululame mwendro mihandro nya yadi.” (Filp. 1:11) Nya mba kanakana mihandro yoyo nya yadi yi di gu pata lihaladzo lawe khu Jehovha ni vathu vaye. Yi di gu pata gambe gu bhuleya vambe khu gukhodwa gwawe ga Jesu gumogo ni gutumba gwawe nya wumindru nyo samadzise. Omu ga Vafilipi 2:15 gu thumisidwe limbe lito, “myenge ya mafuni.” Isoso si ngu pwala kholu Jesu embede vapizane vaye gu khuye “wenengedzo nya litigo.” (Mat. 5:14-16) Rumide gambe valandreyi vaye gu “gimbila [va] hevbudza” a bwe a ganeya gu khuye va di yede gu ninga ‘wufakazi . . . kala mahegiso nya mafu.’ (Mat. 28:18-20; Mith. 1:8) Ethu ha gu velega mihandro nya yadi tepo hi tshumayelago mahungu yaya nya lisima ngudzu khu sighingi.

16. Vafilipi 1:12-14, a gu yeyedza kharini gu khuye hi nga wenengedza ambari ha gu ba hi emisana ni sigaradzo? (Wona foto yi gomogo avba nya kapa.)

¹⁶ Ni ga gevbini giemo, ethu hi nga wenengedza kha nga myenge. Dzimbe dzitepo esi si wonegago nga khatshi sa gu hi himbedzeya gu tshumayela mahungu nya yadi, si nga khala lithomo gwathu nyo tshumayele. Khu giyeyedzo, mupostoli Pawulo a di khothedwe ndrangani Roma tepo a nga loveya lidangaliya vaFilipi. Ganiolu, ambari olu Pawulo a nga ba ari pasoni kha diga gu tshumayela dzighadhi. Pawulo tshumayede khu sighingi ambari olu a  nga ba ari ga giemo gile, nigu isoso si ningide vandriyathu gutumba va bwe va “tivisa mahungu ya Nungungulu khu tshivba” nyamba thava gilo. — Leri Vafilipi 1:12-14; 4:22.

17. Ninga giyeyedzo gya matshiguni yathu nya gu velege mihandro ambari ha gu ba hi emisana ni sigaradzo?

¹⁷ Vandriyathu nya vangi va na ni lithomo nyo pimedzeye giyeyedzo gya Pawulo nya gu tiya hwambo. Avo vo vbanya mayigoni omu si si kodzegigo gu tshumayela na va tshulegide mwendro gu tshumayela khu ndranga ni dranga, khu kharato avo va gu tshumayela mahungu nya yadi khu gu thumisa dzimbe dzindziya. (Mat. 10:16-20) Ga limwedo nya mayigo yoyo, muwoneleyi moyo nya gipandre a di ninga mawonelo nyo khuye muhuweleyi moyo ni moyo gu vbwetega a tshumayela valongo vaye, vavhizinyo, sihevbuli-khwathu, sithumi-khwathu, ni vathu va va tigo. Ndrani nya myaga mivili, tengo nya mabandla gipandreni gile wu di dandra ngudzu. Adzina ethu kha hi vbanyi tigoni omu thumo wathu wu himbedzedwago. Ambari ulolo, hi nga hevbula silo nya lisima avba nya siyeyedzo sa vandriyathu nyo gengeye: Tepo yatshavbo vbwetedzeya dzindziya nyo dugeleye thumoni nyo tshumayele, na wu gu tumba gu khuwe Jehovha a na gu ninga tshivba yi vbwetegago gasi gu pala ni gevbini gigaradzo. — Filp. 2:13.

18. Hi yede gu dziemiseya gu gira ginani?

¹⁸ Olu guvbindra gale, gu vbwetega hi dzi emiseya gu thumisa wusingalagadzi wu gomogo omu nya lidangaliya la Pawulo ga vaFilipi. Gu vbwetega hi thangisa silo nya lisima, hi aga, hi potsa gu tshunganisa vambe hi bwe hi velega mihandro nya yadi. Khavbovbo hi na andrisa lihaladzo ni gu haladza Babe wathu Jehovha.