1. Ethu hatshavbo ha gu tsakeya gu khethu valongo vathu va gira ginani?

NDRIYATHU moyo nya nyamayi nyo pwani khu Pauline a di khuye: “Gu khugeya nyi nga pheya gu hevbula lisine, nyi di gu vbweta gu kheni valongo vangu vatshavbo va manega ni eni paradhesini. * Ngudzungudzu nyi di gu vbweta gu kheni mwama wangu Wayne ni gyanana gyathu nya gidugwana va dzi pata ni eni hi thumeya gumogo Jehovha.” Ina u na ni valongo va gu mba muti ni gu mu haladza Jehovha? Kha nga Pauline khu lisine anuwe u ngu dzina gu khuwe valongo vago va thumeya Jehovha nago.

2. Khu sevbini siwudziso hi na bhulago khiso avba nya ndrima yeyi?

² Ethu kha hi gurumedzi valongo vathu gu dzumeya mahungu nya yadi, ganiolu hi nga va kutsa gu tula mapimo yawe ni myonyo yawe gasi gu hakha mahungu nya Bhibhiliya. (2 Thim. 3:14, 15) Khu ginani hi yedego gu tshumayela valongo vathu? Khu ginani hi yedego gu zama gu pwisisa gudzipwa gwawe? Ginani hi nga girago gasi gu phasa valongo vathu gu haladza Jehovha kha nga ethu? Nigu vandriyathu libandlani va nga hi phasa kharini?

3. Khu guya khu 2 Pedro 3:9, khu ginani hi yedego gu tshumayela valongo vathu?

³ Nugunugu Nungungulu a na fuvisa litigo leli. Ava va dzi emisedego “gu hakha guvbanya nya gupindruge” khavo basi va na vbulugago. (Mith. 13:48) Ethu ha gu vbedza tepo ni tshivba yathu khu gu tshumayela vathu hi si vatigo gipandreni gyathu, khu kharato si ngu pwisisega gu ba hi vbweta gambe gu tshumayela valongo vathu gasi va feya gu thumeya Jehovha nathu. Babe wathu nya lihaladzo Jehovha, kha ‘dzini na moyo wathu a mbemba,  aholu a gu vbweta gukhuye hi vbindrugedze.’ — Leri 2 Pedro 3:9.

4. Ginani hi nga gi phazamago tepo hi tshumayelago valongo vathu?

⁴ Hi yede gu dziti gu khethu gu ni ndziya nya yadi ni ndziya nya mba yadi nyo bhuleye khiyo vathu mahungu nya guvbulugiswe. Khu giyeyedzo, adzina hi nga thumisa maganelelo nya wupari ha gu ba hi tshumayela muthu hi si mu tigo, ganiolu ha gu ba hi tshumayela valongo vathu hi si ma thumisi.

5. Ginani hi yedego gu gi dundruga na hi nga si pheyi gu bhuleya lisine valongo vathu?

⁵ Ha gu dundrugeya khu tepo nyo pheye hi nga zama gu tshumayela valongo vathu, vangi nya ethu adzina hi nga dzipwa nandru khedzi hi nga bhula khidzo navo hi ganeya gu khethu nari khatshi hi di bhude navo khu yimbe ndziya! Mupostoli Pawulo kutside maKristo, khuye: “Mabhuloni gwanu ganelani mahungu nya gusalalegise, mu gu kodza gu ninga phindrulo nya guenele muthu ni muthu.” (Kol. 4:5, 6) Gwadi gu hi dundruga wusingalagadzi wowu tepo hi bhulago ni valongo vathu. Kholu ha gu mba gira isoso, vbavbandze nyo va phase gu engisa mahungu hi gu nawo hi na va khunguvanyisa.

6-7. Ganeya giyeyedzo gi yeyedzago lisima nya gu khathale khu dzipari dzathu nya wugadzi dzi si thumeyigo Jehovha.

⁶ Yeyedza gukhathala. Pauline a khumbugidwego gupheyani wari khuye: “Gupheyani nyi di gu vbweta gu bhula ni mwama wangu khu silo nya liphuvbo basi. Hi di si bhuli khu silo nya litshigu ni litshigu.” Ambari ulolo, mwama wa Pauline a di ngasi guti nya singi khu Bhibhiliya nigu kha nga ba a si pwisisa esi Pauline a nga ba a ganeya. Gwaye si di gira nga khatsi a gu pimisa basi khu wukhongeyi waye. A di gu garadzega khu gu pimisa gu khuye mwangadzi waye  a di dzi patide ni vathu nya mba phasa va nga ba va mu kanganyisa basi.

⁷ Pauline a ngu dzumeya gu khuye a di gu vbedza tepo nya yingi vbawutshigutunu ni guvbeyani nya semana nari ni vandriyathu, mitshanganoni nya libandla, thumoni nya gu tshumayele ni yimbe mitshangano. Pauline wari khuye: “Dzimbe dzitepo Wayne a di gu vboha ndrangani a ta hamuga muthu.” Si ngu pwisisega gu ba na Wayne a dilede mwangadzi waye ni gyanana gyaye. A di si vati vathu va nga ba vari ni mwangadzi waye, nigu si di gira nga khatshi Pauline a di gu ninga ngudzu lisima dzipari dzaye guvbindra uye. Khavbovbo Wayne a di pheya gu thusedzeya Pauline, gu tshula naye mutshadho. Ina u ngu dundrugeya khesi Pauline a nga ba a yede gu gira gasi gu yeyedza gu khathala?

8. Khu guya khu 1 Pedro 3:1, 2, ginani gi ndrindrago ngudzu gupima ga valongo vathu?

⁸ Ninga giyeyedzo nya gyadi. Gutala nya dzitepo, valongo vathu va gu ndrindrwa gupima khesi hi girago nasiri khesi hi ganeyago. (Leri 1 Pedro 3:1, 2.) Khu gu hegisa Pauline pwisiside sihalo wowu. Wari khuye: “Nyi di gu dziti gu kheni Wayne a ngu hi haladza nigu uye khu lisine kha nga ba a vbweta gu tshula mutshadho. Ganiolu tepo a nga ganeya gu khuye o vbweta gu tshula mutshadho, nyi di wona kheni nyi di yede gu gira esi Jehovha a hi embeyago khu mutshadho. Wulangani nyo ganeleye ngudzu, nyi di yede gu manega ni giyeyedzo nya gyadi khu mithumo.” Pauline a di ema gu gurumedzeya Wayne gu bhula khu Bhibhiliya, a bwe a pheya gu bhula naye khu silo nya litshigu ni litshigu. Wayne a di wona gu khuye mwangadzi waye a di gu khala muthu nya gurule nigu gyanana gyawe gi di pheya gu dzi phara gwadi ni gu engisa. (Mav. 31:18, 27, 28) Tepo Wayne a nga wona edzi mahungu nya Bhibhiliya ma nga ba ma phasa khidzo ndranga yaye, a di tula mapimo ni monyo waye gasi gu hakha mahungu ya omu nya Lito la Nungungulu. — 1 Kor. 7:12-14, 16.

9. Khu ginani hi yedego gu simama?

 ⁹ Simama gu phasa valongo vago, u nga tsukuli. Jehovha hi ningide giyeyedzo. Gambe ni gambe, uye ningide vathu vaye lithomo nya gu dzumeye mahungu nya yadi ni gu mana womi. (Jer. 44:4) Nigu mupostoli Pawulo embede Thimoti gu khuye a di yede gu simama gu phasa vambe. Khu ginani? Kholu khu gu gira isoso a di hadzi vbulugisa womi waye ni wa vale va nga ba va mu engiseya. (1 Thim. 4:16) Ethu hi ngu va haladza valongo vathu, khu kharato ha gu vbweta gu khethu vati lisine li gomogo omu nya Lito la Nungungulu. Khu gu hegisa, malito ni mithumo ya Pauline si reside mihandro nya yadi ndrangani gwaye. Olu o thumeya Jehovha na tsakide gumogo ni mwama waye. Vatshavbo va gu thuma kha nga va piyonero, nigu Wayne a gu thuma kha nga lidhota.

10. Khu ginani hi yedego gutimiseya?

¹⁰ Timiseya. Tepo hi hungago gu engisa Nungungulu ha gu vbindrugedza mavbanyelo yathu ni esi hi si khodwago. Ganiolu valongo vathu si nga va garadzeya gu dzipwananisa ni gu vbindrugedza gogo. Gu tala nya dzitepo va gu pheya khu guti khu khavo kha hi hengeyi gambe navo omu nya mibuzo nyo khaguri nya wukhongeyi nigu kha hi dzi bedzedzeyi omu nya silo nya politika. Gupheyani vambe valongo va nga hi zangareya. (Mat. 10:35, 36) Ganiolu kha hi yeli gu tsukula khu kotani yawe. Ha gu ema gu va phasa gu pwisisa esi hi si khodwago, si na gira nga khatshi ho va lamula, khethu kha va yedwi khu gu mana womi nya pindrugedwa. Jehovha kha hi ninga thumo nyo lamule muthu, uye ningide thumo wowo Jesu. (Joh. 5:22) Ha gu timiseya, khu gu gimbiya nya tepo adzina valongo vathu va nga tsakeya gu engisa mahungu yathu. — Wona kwadru yi gu khiyo “ Thumisa sayiti yathu gasi gu hevbudza.”

11-13. Ginani u gi hevbulago khedzi Alice a pharidego khidzo vavelegi vaye?

¹¹ Khala muthu nya wadi, ganiolu u nga dzumeleyi valongo vago va vbindrugedza esi u si hungidego. (Mav. 15:2) Nga wona giyeyedzo gya Alice. Uye hevbude khu Jehovha tepo a nga ba a khala hwindzo ni vavelegi vaye va nga ba va si khodwi ga Jehovha, va nga ba va dzi bedzedzeya siloni nya Politika. Uye a di gu dziti gu khuye nya mba hweya a di yede gu bhuleya vavelegi vaye silo nya sadi a si hevbudego. Alice wari khuye: “Wa gu hweya gu embeya valongo vago esi u si khodwago ni esi u girago, tepo u na va embeyago si na va vbisa ngudzu.” Uye a di zama gu mana mahungu ma nga hadzi tsakisa vavelegi vaye, nya nga lihaladzo. Khavbovbo a di va loveya madangaliya ni gu khumbuga esi Bhibhiliya yi si ganeyago maningano ni lihaladzo a bwe a vbweta guti mawonelo yawe khu mahungu yoyo. (1 Kor. 13:1-13) Uye a di bonga vavelegi vaye khu gu ba va mu dandriside gwadi ni gu mu khathaleya, a bwe a va rumeleya siningwa nyo khaguri. Tepo a nga ba a va wuseya, a di gu phasedzeya mamayi waye mithumoni nyo khaguri ya ndrangani. Gupheyani vavelegi vaye kha va tsaka tepo a nga va bhuleya khesi a nga ba a si khodwa.

¹² Nari gaya ga vavelegi vaye, Alice a di simama gu leri Bhibhiliya tshigu ni tshigu. Uye wari khuye: “Isoso si phaside mamayi wangu gu pwisisa edzi Bhibhiliya yi nga ba yiri ya lisima khidzo gwangu.” Khu kharato Papayi wa Alice a di hunga gu hevbula silo nyo khaguri sa omu nya Bhibhiliya gasi gu pwisisa gu khuye gasi khu ginani mwanaye a nga vbindrugedza ni gu vbweta gambe sihosohoswana gasi gu tshepeta Bhibhiliya. Alice wari khuye “Nyi di mu ninga Bhibhiliya nyi bwe nyi mu loveya malito nyo khaguri nyo khuhe monyo avba nya Bhibhiliya.” Khu wevbini handro a wu manidego? Vbavbandze nya gu mane sihosohoswana gasi gu tshepeta Lito la Nungungulu, Papayi wa Alice a di khuhwa monyo khesi a si hevbudego omu nya Bhibhiliya.

¹³ Hi yede gu khala vathu nya vadi, hi bwe hi si dzumeleyi muthu a vbindrugedza esi hi si hungidego ambari sa gu ba si thula gu timiseya  sigaradzo. (1 Kor. 4:12b) Alice khu giyeyedzo, timisede tepo a nga wugedwa khu mamayi waye. Wari khuye: “Tepo nyi nga hongola nya bhapatiswa, mamayi a di nyi embeya gu khuye ‘nyi gyanana nya mba phasa.’” Ginani egi Alice a giridego? Wari khuye: “Vbavbandze nyo tsukule gu va bhuleya khesi nyi nga ba nyi si khodwa, khu wuwadi nyi di va tshamuseya gu kheni nyi hungide gu khala moyo nya Dzifakazi dza Jehovha nigu khu kharato kha nyi na nga vbindrugedza esi nyi si hungidego.” Nyi di zama gu tiyisegisa mamayi wangu gu kheni nyi ngu mu haladza khu lisine. Ha vavili hi di liya nyi bwe nyi mu phuleya guhodza nyo tshambe. Khavbovbo, mamayi wangu a di pheya gu wona gu khuye Bhibhiliya yi nyi vbindrugedzide nyi khala muthu nya wadi.

14. Khu ginani hi si yeligo gu dzumeleya valongo vathu va vbindrugedza makungo yathu nyo thumeye Jehovha?

¹⁴ Adzina si nga dzega tepo nya yingi gasi valongo vathu va pwisisa edzi si gu sa lisima khidzo gwathu gu thumeya Jehovha. Khu giyeyedzo, tepo Alice a nga hunga gu khala Piyonero vbavbandze nyo beleye thumo a nga ba a hathedwe khu vavalegi vaye, mamayi waye a di liya gambe. Ganiolu Alice a di simama gu tiya. Alice wari khuye: “Wa gu dzumeleya valongo vago va vbindrugedza gilo nyo khaguri u gi hungidego, khu lisine avo va na zama gambe gu vbindrugedza simbe u si hungidego khu dzimbe dzindziya. Ganiolu wa gu khala muthu nga wadi u bwe u simama na wu tiyide ga valongo vago, adzina vambe va nga engisa mahungu yago.” Isoso khiso si dugeledego Alice. Vavelegi vaye olu vapiyonero, nigu papayi waye lidhota.

15. Khu guya khu Matewu 5:14-16; ni 1 Pedro 2:12, ‘mithumo nya yadi’ ya vambe yi nga phasa kharini valongo vathu?

¹⁵ Jehovha a gu rana vathu vata gwaye khu gu thumisa ‘mithumo nya yadi’ nya maKristo libandlani.  (Leri Matewu 5:14-16; 1 Pedro 2:12.) Abari gu pari yago nya wugadzi khandri Fakazi ya Jehovha, ina yi di nga tivana ni vandriyathu va libandlani gwago? Pauline a khumbugidwego gupheyani a di rana vandriyathu gaya gwaye gasi mwama waye Wayne a feya gu vati. Wayne a gu dundruga edzi ndriyathu moyo a mu phasidego khidzo gu pwisisa edzi Dzifakazi dzi gu idzo khu lisine, uye wari khuye: “Uye a di lomba litshigu limwedo nya folga thumotunu gasi guta sixitiri bhola ni eni. Nyi di wona gu kheni ‘uye muthu nyo olovelege!’”

16. Khu ginani hi yedego gu rana valongo vathu gasi guta wona mitshangano yathu?

¹⁶ Ndziya nya yadi nyo phase khiyo valongo vathu, khu gu va rana gasi guta beya mitshangano nathu. (1 Kor. 14:24, 25) Tshangano nyo pheye a wu wonidego Wayne gu diri gidundrugiso, kholu gu diri hwane nya thumo nigu wu diri tshangano nya wudugwana. Uye wari khuye: “Kha nyi ngo si dundruga gwadi esi si ganedwego, ganiolu igyo gi nga nyi samadzisa vathu vakone. Avo va di nyi hidzimeleya, va nyi hoyozeya, ni gu phara limadza langu. Khu lisine nyi nga ganeya gu kheni avo vathu nya vadi.” Gu diri ni patwa moyo wu nga ba wu khathala ngudzu khu Pauline, wu nga ba wu mu phasa gu khala ni gyanana gyaye mitshanganoni, ni thumoni nyo tshumayele. Khu kharato, tepo Wayne khu gu hegisa a nga hunga gu pwisisa silo nya singi maningano ni esi Pauline a si khodwago, a di ganeya ni mwama wakone gasi gu hevbula naye Bhibhiliya.

17. Khu ginani hi si yeligo gu dzipwa nandru, ganiolu khu ginani hi si yeligo gu pimisa gu khethu kha va na nga vbindrugedza?

¹⁷ Ethu hi ngu tumba gu khethu vatshavbo valongo vathu va na ta dzi pata nathu hi thumeya gumogo Jehovha. Ganiolu, adzina hi nga gira satshavbo hi si kodzago gasi gu phasa valongo vathu gu khala sithumi sa Nungungulu ambari ulolo avo va bomba. Ga giemo gyogyo, kha hi yeli gu dzi ninga nandru khu kotani nya esi va hungidego gu gira. Nigu, kha hi gurumedzi muthu gu dzumeya esi hi si khodwago. Ganiolu adzina valongo vago va nga khuhwa ngudzu khu gu wona edzi u tsakidego khidzo kholu u thumeyago Jehovha. Va gombeleye. Bhula navo khu ndruda. U nga vbeyi tshivba u va diga! (Mith. 20:20) Tiyisega gu khuwe Jehovha a na kategisa mizamo yago. Nigu valongo vago va gu hatha gu gu engisa, avo va na vbuluga!