1. Jehovha dzumelede gu khuye gimwegyo ni gimwegyo nya sithumi saye gi manega ni ginani?

JEHOVHA khu gu hi haladza dzumelede gu khuye gimwegyo ni gimwegyo nya sithumi saye gi gira gipandre nya libandla. Ambari olu moyo ni moyo wathu a gu ni wulanga waye libandlani, hatshavbo hi na ni lisima nigu hi ngu vbweta giphaso gya vambe libandlani. Mupostoli Pawulo hi phaside gu pwisisa gihevbudzo gegi nya lisima. Khu ndziya muni?

2. Guya khu Vaefeso 4:16, khu ginani hi yedego gu ninga lisima moyo ni moyo libandlani hi bwe hi thuma gumogo?

² Omu ga 1 Vakorinto 12:21, Pawulo ganede gu khuye mwalo ni moyo wathu a yedego gu embeya githumi-kwawe gu khuye: “Kha hi gu vbweti.” (1 Kor. 12:21) Ho ba hi vbweta gu vbanya khu gurula libandlani gu vbwetega hi ninga lisima moyo ni moyo wathu hi bwe hi thuma gumogo. (Leri Vaefeso 4:16.) Tepo hi thumago gumogo khu gupwanana, libandla la gu pwana hi bwe hi andrisa lihaladzo libandlani.

3. Ginani hi na gi wonago avba nya ndrima yeyi?

³ Hi nga yeyedza githawo vambe vandriyathu libandlani ga siemo muni? Avba nya ndrima yeyi hi na wona edzi madhota ma nga yeyedzago khidzo githawo mambe madhota. Khu gulandreya hi na wona edzi hi nga ningago khidzo lisima vandriyathu va nga si tshadhigo. Khu gu hegisa, hi na wona edzi hi nga ningago khidzo lisima vale va si kodzigo gu ganeya gwadi lidimi lathu.

4. Wusingalagadzi muni wu gomogo omu ga Varoma 12:10, owu madhota ma yedego gu wu landreya?

⁴ Yatshavbo madhota libandlani ma emisidwe khu liphuvbo nya guage la Jehovha. Ambari ulolo, ayo ma mwalo makodzelo nyo fane. (1 Kor. 12:17, 18) Si nga gira mambe na ma ngari gu emiswa kha nga madhota khu kharato kha mati silo nya singi nga aya mambe ma gu na ni tepo nyo laphe na ma gu thuma kha nga madhota. Mambe kha ma si kodzi gu gira silo nya singi khu kotani nya tanga ni mawugelo. Khu kharato, limwalo lidhota li yedego gu khedza limbe li ganeya khilo: ‘Khu vbwetegi.’ Wulangani nya isoso, lidhota limwedo ni limwedo gu vbwetega li landreya wusingalagadzi wu lovidwego khu Pawulo omu ga Varoma 12:10. — Leri.

5. Madhota ma nga yeyedza kharini gu khayo ma ngu ninga lisima mambe madhota nigu khu ginani isoso si na gu na ni lisima?

⁵ Madhota ma nga yeyedza gu khayo ma ngu ninga lisima mambe madhota khedzi ma ma engiseyago khidzo. Isoso si na ni lisima ngudzu tepo madhota ma tshanganago gasi gu bhula khu mahungu nyo khaguri nya lisima. Khu ginani? Nga wona esi si ganedwego khu Mukhedziseyi nya 1 nya Outubro nya 1988: “Madhota gu vbwetega ma dundruga gu khayo Kristo a nga thumisa liphuvbo nya guage gasi gu gimbidzisa mapimo nya lidhota limwedo gasi gu dundruga litshina nya Bhibhiliya va nga li thumisago gasi gu lulamisa gigaradzo va bhulago khigyo mwendro gasi gu hunga esi va na girago. (Mith. 15:6-15) Liphuvbo nya guage li nga thumisa ni levbini lidhota.”

6. Madhota ma nga thuma kharini khu gupwanana nigu isoso si nga phasa kharini libandla?

⁶ Lidhota li ningago githawo mambe madhota kha li na nga dwaneya gu pheya khilo li ganeya tepo yatshavbo ma girago mitshangano. Ilo kha li na nga ganeya ngudzu guvbindra mambe nigu kha li na nga ganeya khu ndziya yi yeyedzago gu khatshi mawonelo yaye khayo ma gu yadi. Wulangani nya isoso, gu vbwetega li ninga mawonelo yaye khu ndziya nyo dzi nogise. Li engiseya gwadi tepo mambe madhota ma ningago mawonelo yawe. Nigu nya lisima ngudzu gu vbwetega li thumisa matshina nya Bhibhiliya tepo li ningago mawonelo yaye li bwe li landreya sileletelo hi ningwago khu ‘githumi nya gutumbege ni nya gu  gengeye.’ (Mat. 24:45-47) Tepo madhota ma yeyedzanago lihaladzo ni githawo tepo ma bhulago khu silo nyo khaguri, liphuvbo nya guage li na thangeya mabhulo yawe li bwe li va phasa gu hunga silo si na tiyisago libandla. — Jak. 3:17, 18.

7. Jesu a di gu si wona kharini sikwendra?

⁷ Libandla gutala nya dzitepo la gu wumbwa khu mipatwa ni dzindranga. Ganiolu ilo li ngu wumbwa gambe khu vandriyathu nya vangi va si gu tshadhigo. Ina ka, hi yede gu va wona kharini vandriyathu va si gu tshadhigo? Nga wona edzi Jesu a nga ba a wona khidzo sikwendra. Tepo a nga ba ari mafuni Jesu kha tshadha. Uye simamide nari gikwendra a bwe a vega gupima gwawe gwatshavbo thumoni gwaye. Jesu kha hevbudza gu khuye muKristo gu vbwetega a tshadha mwendro gu vbwetega a khala gikwendra. Ambari ulolo, uye ganede gu khuye mambe maKristo ma ngu hatha gu mba tshadha. (Mat. 19:11, 12) Jesu a di gu ninga lisima sikwendra. Uye kha nga ba a wona sikwendra nga vathu va gu mwalo lisima mwendro gu va wona na va si londroli gwadi womi.

8. Guya khu 1 Vakorinto 7:7-9, Pawulo kutside maKristo gu gira ginani?

⁸ Gufana ni Jesu, mupostoli Pawulo nuye kha tshadha. Ganiolu, Pawulo gima kha hevbudza gu khuye kha hi yeli gu tshadha. Uye a di gu dziti gu khuye esi silo muthu ni muthu a yedego gu dzi hungeya. Ambari ulolo, uye kutside maKristo gu dzi hungeya yabune gu khayo ma na si kodza gu thumeya Jehovha kha nga sikwendra mwendro ne. (Leri 1 Vakorinto 7:7-9.) Pawulo kha nga ba a woneya vbavbatshi maKristo ma si gu tshadhigo. Khu kharato, uye hathide lidzaha nya gikwendra Thimoti gasi gu gira mithumo nya lisima ngudzu. * (Filp. 2:19-22) Isoso so yeyedza gu khiso si vivbide gu ganeya gu khethu ndriyathu nyo khaguri kha ninganedwi khu gu gira silo nyo khaguri khu gu ba a tshadhide mwendro khu gu ba ari gikwendra. — 1 Kor. 7:32-35, 38.

9. Mahegiso muni hi ma vboheyago maningano ni wukwendra ni gu tshadha?

⁹ Jesu ni Pawulo kha va hevbudza gu khavo muKristo yede gu tshadha mwendro gu khala gikwendra. Ina ka, mahegiso muni hi ma vboheyago khu mahungu yaya? Mukhedziseyi nya 1 nya Outubro nya 2012, wu ganede esi: “Khu lisine vandriyathu va [tshadhidego ni vale va si gu tshadhigo] vatshavbo va gu wonwa kha nga siningwa si tago khiyo ga Nungungulu. . . . Khu kharato, Jehovha kha vbweti gu khuye sikwendra sipwa  dzitshoni mwendro gugaradzega khu gu ba sa sa tshadha.” Khu gighelo gyogyo gu vbwetega hi ninga lisima vandriyathu va si gu tshadhigo.

10. Hi nga yeyedza kharini githawo khu vandriyathu nya sikwendra?

¹⁰ Hi nga yeyedza kharini githawo khu giemo ni gudzipwa ga vandriyathu nya sikwendra? Gu vbwetega hi dundruga gu khethu maKristo nyo khaguri ma di hunga gu mba tshadha. Mambe sikwendra kholu ma nga si mu mani muthu va mu vbwetago. Nigu vambe sikwendra kholu va di fedwa khu dzipari dzawe nya wugadzi. Ni ga gevbini giemo, ina si lulamide gu vambe vandriyathu libandlani va khaleya gu va wudziseya gu khavo kha va tshadhi khu ginani? Mwendro gu dzi emiseya gu va phasa gu vbweta muthu nyo tshadhe naye? Khu lisine, si nga gira gikwendra gimwegyo gi hi lomba giphaso, ganiolu gyo mba hi lomba kha hi yeli gu gi beleya borisani. (1 Tes. 4:11; 1 Thim. 5:13) Hongoleni hi wonani esi si ganedwego khu vandriyathu nyo khaguri va gu sikwendra.

11-12. Hi nga vbedza kharini tshivba vandriyathu va gu sikwendra?

¹¹ Muwoneleyi moyo nya gipandre a gu gikwendra ganede gu khuye hi ngu manega ni makategwa nya mangi khu gu thumeya Jehovha na hiri sikwendra. Ganiolu ganede gambe gu khuye si ngu vbedzana tshivba tepo vandriyathu va mu wudzisago gu khavo: “Khu ginani u gu mba tshadha?” Ndriyathu nya gikwendra a thumago Bheteli nyo khaguri a di khuye: “Dzimbe dzitepo vambe vandriyathu va ngu ba va gira gu khatshi vale va gu sikwendra va yede gu pwedwa wusiwana. Isoso si nga va gira va wona wukwendra kha nga gigaradzo wulangani nyo wu wone kha nga giningwa.”

¹² Ndriyathu moyo nya nyamayi a gu gikwendra a thumeyago Bheteli, a di khuye: “Vambe vandriyathu va gu pimisa gu khavo vandriyathu nya sikwendra tepo yatshavbo vomo gusotani nya muthu nyo tshadhe naye mwendro vo londrola tepo va vbungadzago ni vambe vandriyathu gasi gu mana muthu va na tshadhago naye. Litshigu limwedo nyi di rumedwa khu Bheteli gasi guya gira thumo nyo khaguri ga gimbe gipandre nya litigo gi lumbago Bheteli nyi thumeyago umo. Nyi vbohide iyoyo ni wutshigu nigu va di gu dongiseya gu hongola mitshanganoni. Ndriyathu nya nyamayi wa ndrangani nyi nga ba nyi endrede avbo a di nyi embeya gu khuye libandlani gwaye gu diri ni vama vavili nya tanga yangu va nga ba vari sikwendra. Uye a di khuye khandri nyo zama gu gu vbweteya lidzaha. Ganiolu neti hi nga vboha Salawuni nya Mufumo a di nyi yisa ga vandriyathu vale vavavili gasi nyi ya bhula navo. Isoso kha sa hi phara gwadi hatshavbo ha vararu.”

13. Siyeyedzo muni si tiyisidego ndriyathu moyo nya gikwendra?

¹³ Mumbe ndriyathu nya nyamayi a thumeyago nuye Bheteli ganede khuye: “Nyi nguti vapiyonero nya vangi nya sikwendra va thumeyago Jehovha khu tepo nyo laphe, va simamago gu vega gupima avba nya thumo wawe va bwe va thuma khu sighingi na va tsakide. Avo va ngu phasedzeya ngudzu gu tiyisa libandla. Nigu avo vo wona wukwendra khu ndziya nya yadi, kha va dzipwi va vari va lisima guvbindra vambe mwendro gu dzipwa na vari mwalo lisima khu kotani nya olu va gu sikwendra.” Isoso so gira gu libandlani guri wulanga nyo tsakise. Hatshavbo hi ngu ningana lisima, mwalo a dzipwago na si phasi gilo nigu mwalo a dzipwago nari ni lisima guvbindra vambe. Khu kharato moyo ni moyo na ni wulanga waye libandlani.

14. Hi nga yeyedza kharini githawo vandriyathu nya sikwendra?

¹⁴ Egi vandriyathu nya sikwendra va gi vbwetago khu gu libandla li ninga lisima makhalelo yawe nya yadi nasiri giemo gyawe. Wulangani nya gu hi va pweya, gu vbwetega hi ninga lisima gutumbega gwawe. Ho gira isoso, vandriyathu nya sikwendra kha va na nga dzipwa nga khatshi ho va  embeya gu khethu: ‘Kha mu vbwetegi.’ (1 Kor. 12:21) Wulangani nya isoso, va na si wona gu khavo hi ngu va ninga githawo nigu hi ngu ninga lisima esi va girago libandlani.

15. Silo muni vambe vandriyathu va vbindrugedzago gasi gu engedzeya thumo waye ga Jehovha?

¹⁵ Matshigwanaya vahuweleyi nya vangi va ngu hunga gu hevbula limbe lidimi gasi va si kodza gu tshumayela mambe malanga. Gasi gu gira isoso va yede gu vbindrugedza silo nyo khaguri guvbanyani gwawe. Vandriyathu vovo va ngu diga libandla va dandredego umo ni lidimi lawe nya mavelego gasi guya thumeya ga limbe libandla li vbwetago giphaso. (Mith. 16:9) Esi silo moyo ni moyo wathu a yedego gu dzi hungeya gasi a engedzeya thumo waye ga Jehovha. Ambari olu si tshukago dzi dzega myaga nya mingi gasi gu ganeya gwadi lidimi nya liphya, vandriyathu vovo va ngu phasedzeya ngudzu libandla. Libandla li ngu tiyiswa khu makhalelo yawe nya yadi ni thumo va wu girago. Khu lisine, vandriyathu vovo va na ni lisima ngudzu.

16. Ginani gi na yeyedzago gu khigyo ndriyathu nyo khaguri a ngu ninganedwa khu gu khala lidhota mwendro muphasedzeyi nya libandla?

¹⁶ Madhota kha ma yeli gu hunga gu khayo ndriyathu nyo khaguri kha yeli gu khala lidhota mwendro muphasedzeyi nya libandla khu gu ba a si kodzi gu ganeya gwadi lidimi li thumiswago libandlani. Ayo ma yede gu thumisa matshina nya Bhibhiliya ma ganeyago khu dzifanelo edzi madhota ni vaphasedzeyi nya libandla va yedego gu dzi tadzisa gasi gu hunga gu khayo ndriyathu nyo khaguri a ngu ninganedwa khu gu khala lidhota mwendro muphasedzeyi nya libandla gani. — 1 Thim. 3:1-10, 12, 13; Tit. 1:5-9.

17. Ndranga yo hunga gu hongola ga limbe litigo, siwudziso muni va nga dzi girago?

¹⁷ Dzimbe dzindranga nya maKristo dzi ngu hongola ga mambe mayigo khu gu tutuma sigaradzo tigoni gwawe mwendro khu guya vbweta thumo. Ga siemo sesi, sanana sawe gu vbwetega si hevbula omu nya dzixikola gu thumiswago lidimi nya oficial la tigoni mule. Nigu si nga gira vavelegi navo va gurumedzega gu hevbula lidimi nya oficial la tigoni mule gasi va mana mithumo. Ganiolu, ahati go ba guri ni libandla mwendro grupu yi thumisago lidimi lawe nya mavelego tigoni mule? Ndranga yoyo yi yede gu wona mitshangano khu lidimi muni? Va na hongola libandlani gu thumiswago lidimi lawe nya mavelego mwendro libandlani gu thumiswago lidimi nya oficial la tigoni mule?

18. Guya khu Vagalatiya 6:5, hi nga yeyedza kharini githawo khesi si hungidwego khu hungo nya ndranga?

¹⁸ Hungo nya ndranga gu vbwetega a hunga gu khuye ndranga yaye yi na beya mitshangano khu lidimi muni. Kha nga olu silo sesi si gu silo esi muthu ni muthu a yedego gu dzi hungeya abune, hungo nya ndranga gu vbwetega a hunga esi si na phasago ndranga yaye. (Leri Vagalatiya 6:5.) Gu vbwetega hi ninga githawo esi si hungidwego khu hungo nya ndranga. Gu vbwetega hi ninga githawo ni gevbini egi a na hungago hi bwe hi hakha  ndranga yaye khu mandza mavili libandlani gwathu. — Rom. 15:7.

19. Hungo nya ndraga yi yede gu gombeya ni gu dundrugeya khu ginani?

¹⁹ Ga simbe siemo, si nga gira ndranga nyo khaguri na yi beya mitshangano omu nya libandla li thumisago lidimi laye nya mavelego ganiolu sanana sawe na si si kodzi gu ganeya gwadi lidimi lolo. Abari gu libandla lolo lomo gipandreni gu ganedwago lidimi nya oficial la tigoni momo, sanana sawe si nga va lemeleya gu phasega mitshanganoni ambari gu dandra khu liphuvboni. Khu ginani? Kholu adzina sanana so hevbula xikwatunu gu thumiswago lidimi nya oficial nasiri lidimi nya mavelego la vavelegi. Ga siemo soso, hungo nya ndranga yede gu gombeya a bwe a dundrugeya gwadi khesi si na phasago sanana saye gu tiyisa wupari waso ni Jehovha ni libandla gambe. Hungo nya ndranga a nga hunga gu hevbudza sanana gu ganeya gwadi lidimi nya mavelego mwendro gu hunga gu vbindrugedza libandla va hongola libandlani gu thumiswago lidimi nya oficial gasi sanana sawe si phasega khu mitshangano. Ni gevbini egi hungo nya ndranga a na hungago, libandla gu vbwetega li yeyedza githawo khiso.

20. Hi nga yeyedza kharini githawo khu vandriyathu vale va hevbulago lidimi nya liphya?

²⁰ Mabandlani nya mangi hi na mana vandriyathu va dzi garadzeyago gu hevbula limbe lidimi. Adzina si nga va garadzeya gu hi tshamuseya edzi va dzipwago khidzo. Ambari ulolo, ha gu mba vega gupima avba nya edzi va ganeyago khidzo lidimi lathu, hi na si kodza gu wona lihaladzo lawe khu Jehovha ni gudziemiseya gwawe gu mu thumeya. Ho dzi garadzeya gu vega gupima avba nya makhalelo nya yadi ya vandriyathu vovo, hi na si kodza gu va ninga githawo hi bwe hi ninga lisima esi va girago. Nigu gima kha hi na nga ganeya khethu ‘Kha mu vbwetegi’ khu kotani nya olu va si kodzigo gu ganeya gwadi lidimi lathu.

21-22. Lithomo muni nya lisima hi gu nalo?

²¹ Hi ngu mu bonga ngudzu Jehovha khu lithomo leli a hi ningidego nyo mu thumeye. Gani hi vama mwendro hi vanyamayi, gani hi tshadhide mwendro hi sikwendra, gani hi vaphya mwendro hi dandride khu tanga, gani hi ngu kodza gu ganeya gwadi lidimi nyo khaguri gani kha hi li kodzi, hatshavbo hi na ni lisima ga Jehovha ni ga vandriyathu. — Rom. 12:4, 5; Kol. 3:10, 11.

²² Hongoleni hi simamani gu thumisa sihevbulo hi si manidego avba nya gipimaniso gya Pawulo gi ganeyago khu givili. Ho gira isoso, hi na si kodza guti esi hi nga girago gasi gu tiyisa vambe vandriyathu. Nigu tepo yatshavbo hi na si kodza gu haladza vambe libandlani ni gu va ninga githawo.