NDRIMA NYA GIHEVBULO 34
U na ni lisima hengeledzanoni ya Jehovha
“Kha nga givili gi gu gimwegyo basi aholu gi manega ni sivbango nya singi si wumbago givili gimwegyo basi, khidzo gambe kharato ni ga Kristo.” — 1 KOR. 12:12.
NDZIMO 101 Hongoleni hi thume khu gupwanana
ESI HI NA SI HEVBULAGO AVBA NYA NDRIMA YEYI *
1. Lithomo muni nya likhongolo hi gu nalo?
LITHOMO nya likhongolo gu manega hengeledzanoni ya Jehovha! Hi womo Paradhesini nya liphuvbo kholu hi ngu mana gurula ni gutsaka khu gu khozeya Jehovha. Khu gevbini gipandre gyago hengeledzanoni ya Jehovha?
2. Gipimaniso muni gi thumisidwego khu Pawulo omu nya mabhuku yaye?
2 Gipimaniso gi lovidwego khu mupostoli Pawulo omu nya mabhuku yaye nya mangi gi na hi phasa gu tugula gipandre gyathu hengeledzanoni ya Jehovha. Omu nya mabhuku yoyo, Pawulo a di khuye libandla la gu fana ni givili nya muthu nigu muthu ni muthu a gu fana ni givbango nya givili gyogyo. — Rom. 12:4-8; 1 Kor. 12:12-27; Efes. 4:16.
3. Silo muni nya siraru hi na si wonago avba nya ndrima yeyi?
3 Avba nya ndrima yeyi, hi na hevbula silo siraru nya lisima avba nya gipimaniso gegi gya Pawulo. Gupheya hi nati gu khethu moyo ni moyo wathu na ni wulanga * waye hengeledzanoni ya Jehovha. Nya wuvili, hi na wona esi hi yedego gu gira ho ba hi tandrega gu wona wulanga wathu hengeledzanoni ya Jehovha. Nya wuraru, hi na wona gu khethu khu ginani hi yedego gu dzi garadzeya gu gira thumo hi ningidwego khu Jehovha.
MOYO NI MOYO WATHU NA NI THUMO A YEDEGO GU GIRA HENGELEDZANONI YA JEHOVHA
4. Ginani egi Varoma 12:4, 5, a hi hevbudzago?
4 Gilo nyo pheye hi gi hevbulago avba nya gipimaniso gya Pawulo khu gu moyo ni moyo wathu na ni gipandre nya lisima hengeledzanoni ya Jehovha. Pawulo phede gipimaniso gyaye khu gu ganeya esi: “Kha nga olu hi gu ni sivbango nya singi givilini gimwegyo, gambe givbango ni givbango gi gu na ni thumo waye, Kharato nethu, hi vangi, aholu ha gu khala givili gimwegyo basi ga Kristo, gambe moyo ni moyo givbango gya kwawe.” (Rom. 12:4, 5) Pawulo a di gu vbweta gu khuye ginani khu isoso? A di gu vbweta gu khuye muthu ni muthu na ni gipandre nyo khaguri nyo hambane ni vambe a girago libandlani ganiolu hatshavbo hi na ni lisima.
Moyo ni moyo wathu na ni makodzelo nyo hambane libandlani ganiolu hatshavbo hi na ni lisima ga Jehovha (Wona dzindrimana 5-12) *
5. Siningwa muni esi Jehovha a ningidego libandla?
5 Go ganedwa khu vale va gu ni sipandre nyo khaguri libandlani si nga gira u tutumeya gu pimisa vale va thangeyago libandlani. (1 Tes. 5:12; Hebh. 13:17) Khu kotani ya Kristo, Jehovha a ngu hi ninga vama gasi gu hi thangeya. (Efes. 4:8) Vama vovo vo pata Huwo nyo thangeye, vaphasedzeyi vawe, sivbango nya kometi ya Bheteli, vawoneleyi nya sipandre, vahevbudzi nya dzixikola nya Mufumo, madhota ni vaphasedzeyi nya libandla. Vatshavbo vandriyathu vovo va emisidwe khu liphuvbo nya guage gasi gu khathaleya dzinvuta dza Jehovha ni gu tiyisa libandla. — 1 Ped. 5:2, 3.
6. Guya khu 1 Vatesalonika 2:6-8, ginani egi vandriyathu va hathidwego khu liphuvbo nya guage va dzi garadzeyago gu gira?
6 Liphuvbo nya guage li ngu hatha vandriyathu gasi gu khathaleya silo nyo hambanehambane. Gu fana ni sivbango nya givili, nya nga mawogo ni migondro si thumisanago gasi gu phasa givili gyatshavbo, vandriyathu va hathidwego khu liphuvbo nya guage anavo va ngu thuma khu gu dzi garadza gasi gu phasa libandla. Kha va dwaneyi gu zundzwa. Wulangani nya isoso, vo dzi garadzeya gu tiyisa vandriyawe. (Leri 1 Vatesalonika 2:6-8.) Hi ngu mu bonga Jehovha kholu a hi ningidego vandriyathu vava va dzi garadzeyago gu thumeya vambe.
7. Jehovha a gu tshatshazeya kharini vandriyathu va gomogo thumoni nya tepo yatshavbo?
7 Vandriyathu nyo khaguri libandlani va ngu thuma kha nga vamisiyonariyo, vapiyonero nyo hathege mwendro vapiyonero nya tepo yatshavbo. Khu lisine, mafuni gwatshavbo vandriyathu nya vangi va ngu beleya thumo nya tepo yatshavbo gasi gu phasa vathu nya vangi gu khala vapizani va Kristo. Ambari olu vandriyathu vovo va gu mwalo dzitsapawu nya dzingi, Jehovha a ngu va ninga esi si vbwetegago gasi va simama gu vbanya. (Marko 10:29, 30) Hi ngu va haladza ngudzu vandriyathu vovo nigu hi ngu bonga ngudzu kholu va girago gipandre nya hengeledzano ya Jehovha.
8. Khu ginani vahuweleyi vatshavbo va gu na ni lisima ga Jehovha?
8 Ina vandriyathu va thangeyago libandlani ni vandriyathu va gomogo thumoni nya tepo yatshavbo khavo basi va gu na ni lisima hengeledzanoni ya Jehovha? Ahihi! Watshavbo muhuweleyi a tshumayelago mahungu nya yadi na ni lisima ngudzu ga Nungungulu. (Rom. 10:15; 1 Kor. 3:6-9) Khu lisine, limwedo nya makungo nya hengeledzano gu phasa vathu nya vangi gu khala vapizani va Pfhumu yathu Jesu Kristo. (Mat. 28:19, 20; 1 Thim. 2:4) Khu kharato, vatshavbo vahuweleyi va tshumayelago, gani va bhapatisidwe mwendro ne, va ngu dzi garadza gasi gu gira thumo wowu. — Mat. 24:14.
9. Khu ginani hi ningago lisima vandriyathu nya vanyamayi?
9 Jehovha a ngu yeyedza gu khuye a ngu ninga lisima vandriyathu nya vanyamayi khu gu va ninga mithumo nya lisima ngudzu hengeledzanoni. A ngu tsaka ngudzu tepo a wonago vagadzi, vamamayi, dzinoni ni vandriyathu nya vanyamayi va si gu tshadhigo na va gu mu thumeya khu gutumbega. Bhibhiliya yi ngu ganeya khu vanyamayi nya vangi va tsakisidego Nungungulu. Avo va ngu zundzwa khu giyeyedzo gyawe nya guti, gukhodwa, sighingi, gutiya--hwambo, wuhindzi ni yimbe mithumo nya yadi. (Luka 8:2, 3; Mith. 16:14, 15; Rom. 16:3, 6; Filp. 4:3; Hebh. 11:11, 31, 35) Hi ngu mu bonga ngudzu Jehovha khu gu ba hengeledzano yaye yiri ni vandriyathu nya vanyamayi va gu na ni makhalelo nyo mbure nga aya.
10. Khu ginani hi ningago lisima vandriyathu va dandridego khu tanga?
10 Hi ngu tsaka ngudzu gambe kholu hi gu na ni vandriyathu nya vangi nyo dandre khu tanga hengeledzanoni ya Jehovha. Omu nya mabandla nyo khaguri gu na ni vandriyathu va dandridego khu tanga va thumedego Jehovha khu gutumbega womini wawe watshavbo. Ganiolu vambe vandriyathu va dandridego khu tanga va ngari gu hevbula lisine. Gani va na ni tepo nyo laphe lisineni, gani va ngari vaphya, vandriyathu va dandridego khu tanga va ngu tshangana ni sigaradzo nya singi khu kotani nya mawugelo yawe. Isoso si nga va gira va tandrega gu gira mithumo nyo khaguri libandlani ni gutshumayela. Ambari ulolo, vandriyathu vovo va ngu gira esi va si kodzago thumoni nyo tshumayele va bwe va dzi garadzeya gu tiyisa vambe ni gu va trenari. Nigu hi ngu phasega ngudzu khesi va hi hevbudzago. Jehovha a ngu va ninga ngudzu lisima nigu anethu. — Mav. 16:31.
11-12. Wo khuhwa kharini khu giyeyedzo nya gyadi gya vaphya va libandlani gwago?
11 Nga dundrugeya gambe khu vaphya. Avo va ngu tshangana ni sigaradzo nya singi khu kotani nya olu va dandrago tigoni momu gu andriswago ngudzu dzifilozofiya dza Sathane. (1 Joh. 5:19) Ambari ulolo, hi ngu tsaka ngudzu tepo hi wonago vaphya na va gu hlamula mitshanganoni, na va gutshumayela ni tepo va emeyago esi va si khodwago. Khu lisine, vaphya va na ni lisima ngudzu hengeledzanoni ya Jehovha. — Ndzi. 8:2.
12 Ganiolu, vambe vandriyathu si ngu va garadzeya gu khodwa gu khavo va ni lisima hengeledzanoni ya Jehovha. Ginani gi nga va phasago gu wona gu khavo va na ni lisima hengeledzanoni ya Jehovha? Hongoleni hi si wona.
TUGULA WULANGA WAGO HENGELEDZANONI YA JEHOVHA
13-14. Khu ginani vambe va dzi wonago na va si phasi libandlani?
13 Gihevbudzo nya wuvili hi gi manago avba nya gipimaniso gya Pawulo gyo hi gira hi dundrugeya khu gigaradzo egi vathu nya vangi va tshanganago nagyo hengeledzanoni. Vathu nya vangi si ngu va garadzeya gu khodwa gu khavo va na ni lisima hengeledzanoni ya Jehovha. Pawulo lovide khuye: “Ngondro wa gu ganela, khuwo: ‘Olu eni nyi si gu mandza kha nyiri wa givili’ malipha, wa gu lumba giviIi. Ndzeve ya gu, khiyo: ‘Olu eni nyi si gu liso kha nyiri wa givili,’ malipha, ya gu lumba givili.” (1 Kor. 12:15, 16) Pawulo a di gu vbweta gu hi hevbudza ginani khu malito yaya?
14 Wo dzi fananisa ni vambe libandlani, u na pheya gu pimisa gu khuwe u mwalo lisima hengeledzanoni ya Jehovha. Si nga gira vambe libandlani na vari vahevbudzi nya vadi, na va kodza gu sasamedza gwadi silo khu ndziya nya gu si gimbiya gwadi mwendro na vari vahavisi nya vadi. Adzina u nga pheya gu pimisa gu khuwe u mwalo makodzelo nyo gire silo nga edzi va girago khidzo. Isoso so yeyedza gu khiso u ngu dzi nogisa. (Filp. 2:3) Ganiolu dzi woneye ni mapimiselo yoyo. Wo khaleya gu dzi fananisa ni vambe, u na khaleya gu dzi wona na wu si phasi gilo. Si nga gira u dzipwa nga khatshi khu giri gipandre nya libandla kha nga edzi Pawulo a ganedego khidzo. Ginani gi nga gu phasago gu emisana ni gudzipwa gogo?
15. Guya khu 1 Vakorinto 12:4-11, ginani hi yedego gu giti maningano ni makodzelo hi gu nawo?
15 Nga dundrugeya khesi: khandri yatshavbo maKristo ya matshiguni ya vapostoli ma ningidwego liphuvbo nya guage khu Jehovha. (Leri 1 Vakorinto 12:4-11.) Ambari olu Jehovha a va ningidego siningwa mwendro makodzelo nyo hambane, yatshavbo maKristo teponi yile ma diri ni lisima mahoni gwaye. Muhuno, ethu kha hi hakhi liphuvbo nya guage khu ndziya nya giliwugiso nga edzi si giregidego khidzo matshiguni ya vapostoli. Ambari ulolo hi ngo simama gu thumisa litshina leli nya nayo li gu khilo: Ethu hi mwalo makodzelo nyo fane ganiolu hatshavbo hi na ni lisima mahoni ga Jehovha.
16. Wusingalagadzi muni wa Pawulo hi yedego gu wu landreya?
16 Wulangani nyo dzi fananise ni vambe gu vbwetega hi landreya wusingalagadzi wa Pawulo wu gu khuwo: “Muthu ni muthu a na phele khu gu wona mithumo yaye. Ya gu manega yiri yadi a na ni fanelo nya gu dzi zundze khu mithumo yaye nya yadi, aholu a nga dzi pimanisi khu mithumo ya vakwawe.” — Gal. 6:4.
17. Hi na phasega kharini ha gu landreya wusingalagadzi wa Pawulo?
17 Ho landreya wusingalagadzi wa Pawulo hi na tugula gu khethu hi ngu kodza gu gira silo esi vambe va si tandrago. Khu giyeyedzo, si nga gira lidhota nyo khaguri na liri mwalo makodzelo nyo vege gwadi dziganelo ganiolu na liri ni makodzelo nyo gire vapizane. Mwendro si nga gira lidhota nyo khaguri na li si kodzi gu sasamedza gwadi silo nga mambe madhota libandlani ganiolu si nga gira na li gu tidwa kha nga muhavisi nya lihaladzo oyu vahuweleyi va dzipwago na va tshulegide gu mu lomba wusingalagadzi nyo khaguri nya Bhibhiliya. Mwendro adzina nari lidhota li tidwago khu gu hakha gwadi vapfhumba. (Hebh. 13:2, 16) Tepo hi wonago makodzelo hi gu nawo, hi na si kodza gu phasedzeya gu tiyisa libandla nya mba na gigaradzo. Nigu hi na potsa gu pweya lidiwo vandriyathu va gu na ni makodzelo nyo hambane ni aya yathu.
18. Hi nga khala kharini vahevbudzi nya vadi?
18 Ambari ho ba hi gira mithumo muni libandlani, hatshavbo gu vbwetega hi tshukwadzisa magirelo yathu nya silo. Gasi gu hi phasa gu tshukwadzisa, Jehovha a ngu hi hevbudza khu gu thumisa hengeledzano yaye. Khu giyeyedzo, avba nya mitshangano ya vbakari nya semana hi ngu hevbudzwa edzi hi yedego gutshumayela khidzo. Ina u ngu thumisa esi hi hevbudzwago avba nya gipandre gegi?
19. U nga si kodza kharini gu vboheya misuwo nyo hevbule Xikola nya vavhangeli nya Mufumo?
19 Xikola nya vavhangeli nya Mufumo niyo yi ngu hi hevbudza gu tshukwadzisa mahevbudzelo yathu. Vandriyathu va gomogo umo nya thumo nya tepo yatshavbo na vari ni 23 kala 65 myaga va nga hevbula xikola yeyi. Adzina u nga ganeya gu khuwe khu na nga si kodza gu hevbula xikola yeyi. Ganiolu wulangani nyo dzipwe nu si fanedwi khu gu hevbula xikola yeyi, zama gu gira esi si vbwetegago gasi u ninganedwa khu gu hevbula xikola yeyi. Khu gudzigaradza gwago ni gu phaswa khu Jehovha, sile si nga ba si wonega na si si kodzegi si nga kodzega.
THUMISA MAKODZELO YAGO GASI GU TIYISA LIBANDLA
20. Ginani hi gi hevbulago omu ga Varoma 12:6-8?
20 Gilo nya wuraru hi gi hevbulago avba nya gipimaniso gya Pawulo khegi gi gomogo omu Varoma 12:6-8. (Leri.) Omu nya mavhesi yaya gambe Pawulo o yeyedza gu khuye muthu ni muthu libandlani na ni makodzelo nyo hambane. Ganiolu a vbedza a tshingisa gu khuye gu vbwetega hi thumisa ni yavbini makodzelo hi gu nawo gasi gu phasa ni gu tiyisa libandla.
21-22. Ginani hi gi hevbulago ga Robert ni Felice?
21 Nga wona giyeyedzo gya ndriyathu moyo nyo pwani khu Robert. * Hwane nyo thumeye ga limbe litigo, a di rumedwa gasi gu ya thumeya Bheteli ya tigoni gwaye. Vandriyathu nya vangi va mu phaside gu wona gu khuye gimwalo a nga gi ghodhosa, ganiolu wari khuye: “Nyi vbedzide migima nya yingi na nya sa tsaka kholu nyi di gu pimisa gu kheni gyomo gilo nyo khaguri nyi nga mba gi gira gwadi. Dzimbe dzitepo isoso si di gu nyi gira nyi dundrugeya gu ema gu thuma Bheteli.” Ndriyathu Robert gi pade kharini gigaradzo gyogyo? Lidhota limwedo li mu dundrugiside gu khilo Jehovha a gu thumisa mithumo yathu nyo pheye gasi gu hi dongiseya gu gira gwadi eyi yi landreyago. Robert a di si wona gu khuye yede gu ema gu dundrugeya khesi si dugeledego ganiolu a vega gupima ga esi si na dugeleyago.
22 Ndriyathu Felice Episcopo tshanganide ni gigaradzo nyo fane. Uye ni mwangadzi waye va gradhuwaride xikola ya Gileyadhi khu 1956 khavbovbo va rumedwa guya woneleya gipandre gya Bolivia. Khu 1964 va di velega gyanana. Felice a di khuye: “Si hi garadzede ngudzu gu diga thumo wathu hi nga ba hi wu gola. Khu lisine nyi vbedzide mwaga na nyi ngo dzipwa nandru. Ganiolu khu gu phaswa khu Jehovha nyi vbindrugedzide mapimiselo yangu nyi bwe nyi vega gupima avba nya thumo wangu nya wuphya kha nga muvelegi.” Ina u ngu dzipwa kha nga Robert mwendro Felice? Ina u ngu garadzega khu gu ba u si giri gambe mithumo u nga ba u gira gale yoyo? Wa gu ba u dzipwa kharato, u na tsaka ngudzu wo vbindrugedza mapimiselo yago u vega gupima avba nya esi u nga girago olu gasi gu thumeya Jehovha ni gu phasa vandriyago. Wo thumisa makodzelo u gu nawo gasi gu phasa vambe libandlani u na mana gutsaka nya gukhongolo.
23. Gu vbwetega hi dzi ninga tepo nyo rini nigu ginani hi na bhulago khigyo omu nya ndrima yi landreyago?
23 Moyo ni moyo wathu na ni lisima ga Jehovha. Uye o vbweta gu khuye hatshavbo hi gira gipandre nya ndranga yaye. Ho dzi ninga tepo nyo dundrugeye khesi hi nga girago gasi gu tiyisa vandriyathu hi vbedza hi dzi garadzeya gu gira esi hi si hungidego si na hi phasa gu mba dzipwa na hiri mwalo lisima hengeledzanoni ya Jehovha. Ganiolu, ha gu va wona kharini vambe vandriyathu libandlani? Hi nga yeyedza kharini gu khethu hi ngu va haladza ni gu va ninga githawo? Hi na bhula khiso ga ndrima yi landreyago.
NDZIMO 24 Deluni gigomoni gya Jehovha
^ ndri. 5 Hatshavbo hi ngu dzina gu haladzwa ni gu ningwa lisima khu Jehovha. Ganiolu adzina hi nga dzi wudzisa gu khethu hi nga phasedzeya kharini hengeledzano ya Jehovha. Ndrima yeyi yi na hi phasa gu wona gu khethu moyo ni moyo wathu na ni lisima hengeledzanoni ya Jehovha.
^ ndri. 3 MITSHAMUSELO NYA MALITO NYO KHAGURI: Wulanga wathu hengeledzanoni ya Jehovha so thula gipandre mwendro thumo hi girago gasi gu tiyisa vambe libandlani. Isoso kha siyi khu lifumbo lathu, omu hi dugeyago umo, dzitsapawu hi gu nadzo, edzi hi nga dandriswa khidzo mwendro sihevbulo hi gu naso.
^ ndri. 21 Mambe malina ma vbindrugedzidwe.
^ ndri. 63 TSHAMUSELO NYA FOTO: Dzifoto dzi yeyedzago vandriyathu va phasedzeyago gu tiyisa libandla na yi nga si pheyi mitshangano, vbakari nya mitshangano ni hwane nya mitshangano. Foto 1: Lidhota li hoyozeyago muthu a pheyago guta mitshanganoni, ndriyathu nya lidzaha a lingedzeyago mitshini na yi si gu pheyi mitshangano ni ndriyathu nya nyamayi a bhulago ni mumbe ndriyathu nya nyamayi a dandridego khu tanga. Foto 2: Vaphya ni vakhongolo va ningeyago mihlamulo avba nya gihevbulo nya Mukhedziseyi. Foto 3: Patwa wu agisago salawu nya Mufumo. Mamayi a phasago gyanana gyaye gu theya ningelo wagyo kaxani. Ndriyathu a vegedzeyago gwadi mabhuku ni ndriyathu a tiyisago ndriyathu nya nyamayi a dandridego khu tanga.
