• “Eni nyi di dzipwa nga khatshi mwama wangu a nyi ghohede dzitepo nya dzingi.”

• “Nyi di dzipwa na nyi vivbide, nigu na nyi si phase gilo.”

• “Kha nya nga ba nyi yede gu ganeya khu mahungu yoyo ni mumbe muthu. Nyi di gu tshaniseka nyonga.”

• “Nyi di dzipwa nga khatshi Jehovha kha nyi khathaleyi.”

Malito yaya ma gu yeyedza gu khayo nyamayi a ngu tshaniseka ngudzu tepo mwama waye a sixitirigo pornografia. Nigu abari gu mwama waye a gu gira isoso khu migima nya yingi mwendro myaga nya yingi, adzina saye mwangadzi waye a nga pimisa gu khuye i tshukwana gu mba khodwa gwaye. Nyamayi nyo khaguri a gu ganeya gu khuye: “Eni nyi di gu dzi wudzisa gu kheni: ‘Ina kamo khuye mwama nyi tshadhidego naye oyu? Ina kha nyi siheli simbe silo?’”

Ndrima yeyi, yi di giredwa vagadzi, vama vawe va sixitirigo pornografia. a Hi na wona matshina nyo khaguri nya Bhibhiliya, ma nga phasago vagadzi. Matshina yoyo ma gu yeyedza gu khayo, vagadzi va na ni lisima mahoni ga Jehovha, nigu matshina yoyo ma na va phasa gu manega ni gurula ni wupari nyo tiye ni Jehovha. b

Khu lisine, kha wu na nga si kodza gu woneleya satshavbo esi mwama wago a girago, ganiolu somo silo nyo khaguri u nga girago gasi u mana gurula. Wona siyeyedzo si landreyago.

U nga dzipwi nandru. Mwangadzi a nga pimisa gu khuye khu kotani nya olu mwama waye a sixitirigo pornografia, nandru kwaye. Alice c a di gu pimisa gu khuye kha nga ba a mburide ngudzu mahoni ga mwama waye. A di gu dzi wudzisa gu khuye: ‘Khu ginani mwama wangu a hathago gu khedziseya vambe vanyamayi wulangani nyo khedzi eni?’ Vambe vanyamayi va gu pimisa gu khavo va gu engedzeya gu garadzisa giemo khu kotani nya esi va girago. Danielle wari khuye: “Eni nyi di tala gisakwana ni metadi nyi bwe nyi vega giviti. Eni nyi di dzipwa nga khatshi nyo engedzeya gu garadzisa giemo.”

Wa gu ba u dzipwa kharato, dundruga gu khuwe Jehovha kha gu ningi nandru khesi mwama wago a gireteyago. Jakobe 1:14 wari khuye: “Muthu ni muthu a gu lingwa tepo a ndrindrwago ni gu sengwa khu  gudogoreya gwaye.” (Rom. 14:12; Filp. 2:12) Wulangani nya gu gu ninge nandru, Jehovha a ngu gu ninga ngudzu lisima olu u tumbegago gwaye. — 2 Dzik. 16:9.

Nigu gambe si ngu phasa guti gu khethu, mwama a gu wona pornografia kha si thuli gu khiso mwangadzi waye kha mbura. Vadhotori vatigo gwadi mahungu yoyo va gu ganeya gu khavo pornografia yi ngu gira gu muthu a manega ni gudogoreya nya gukhongolo nya gu hengeye madahu, nigu ni wevbini nyamayi kha si kodzi gu vbungula gudogoreya gogo.

Potsa gu garadzega ngudzu. Catherine wari khuye a di gu dundrugeya basi mwama waye na gu sixitiri pornografia. Frances wari khuye: “Nyi ngu garadzega ngudzu nya mba guti omu mwama wangu a gu romo. Eni nyo lutuga khu gu garadzega litshigu latshavbo.” Vambe vagadzi va ganede gu khavo va ngupwa ngudzu dzitshoni, tepo va mananago ni vambe vandriyathu va gitigo gigaradzo gya vama vawe. Vambe va gu ganeya gu khavo va gu dzipwa vonga nigu mwalo muthu a pwisisago giemo gyawe.

Si olovelegide gu dzipwa kharato. Ganiolu, wa gu simama gu pimisa khu gigaradzo gyogyo, u na engedzeya gu garadzega. Wulangani nya isoso, zama gu vega gupima avba nya wupari wago ni Jehovha. Wa gu gira isoso, khu gu gimbiya nya tepo u na si kodza gu dzi phara nigu u na manega ni gurula. — Ndzi. 62:2; Efes. 6:10.

Gimbe gilo gi na gu phasago, khu gu hevbula ni gu dundrugeya khu siyeyedzo nya Bhibhiliya sa vambe vanyamayi va nga dzipwa na va garadzega, ganiolu khu gu ba va gombede ga Jehovha va dzipwa na va thaveledwe. Jehovha kha dusa sigaradzo sa vatshavbo, ganiolu a va ningide gurula va nga ba va gu vbweta. Khu giyeyedzo Ana, a di gu ‘garadzegide ngudzu’ khu giemo gyaye. Ambari ulolo, hwane nya gu ba Ana a giride “nombelo ga [Jehovha]” khu tepo nyo laphe, uye a di mana gurula, ganiolu na si dziti edzi a na lulamisago khidzo gigaradzo gyaye. — 1 Sam. 1:10, 12, 18; 2 Kor. 1:3, 4.

Khu kharato, lomba giphaso madhota libandlani. Avo va nga khala “wulanga nya wuthavelo gikhatini nya phuvbo ni gingulu.” (Isa. 32:2) Adzina saye madhota ma nga gu yeyedza ndriyathu nyo khaguri nya nyamayi gasi u ganeya naye khedzi u dzipwago khidzo. — Mav. 17:17.

Ina gyomo gilo nyo khaguri u nga girago gasi gu phasa mwama wago gu mba sixitiri gambe pornografia? Adzina saye. Bhibhiliya yari khiyo gasi gu lulamisa gigaradzo nya gikhongolo mwendro gupala nala nya tshivba “I tshukwana . . .  na muri vavili.”  (Muh. 4:9-12) Wugevesisi nyo khaguri wu ngu yeyedza gu khuwo, mwama ni ngadzi va gu dzi garadza gu gira soso vatshavbo va na si kodza gu pala gigaradzo nya gu sixitiri pornografia va bwe va tumbana ndrani nya mutshadhu wawe.

Ganiolu, somo mandzani ga mwama wago gu hunga gu khuye a na diga gu sixitiri pornografia mwendro ne. Ina a ngu gombeya ga Jehovha gasi a mu ninga tshivba. A vbwetide giphaso gya madhota? (2 Kor. 4:7; Jak. 5:14, 15) Ina mwama wago a ngu gira satshavbo a si kodzago gasi a si wone gambe pornografia? Khu giyeyedzo, a ngu potsa gu khaleya gu thumisa mitshini mwendro gu manega ga malanga si na mu vbevbugeyago gu sixitiri pornografia? (Mav. 27:12) Ina a dzi emisede gu dzumeya giphaso gyago a bwe a tumbega gwago khu gu vbeleya? A gu gira satshavbo sesi, adzina u nga si kodza gu mu phasa.

Khu ndziya muni? Wona giyeyedzo gegi. Felicia a di tshadha ni Ethan, a nga ba a gola gu sixitiri pornografia gukhugeya wanani waye. Felicia a gu gira satshavbo a si kodzago gasi gu gira Ethan a bhula naye tepo a manegago ni gu dogoreya nya gu sixitiri pornografia. Ethan wari khuye: “Eni nyi ngu mu embeya satshavbo mwangadzi wangu. Khu gwadi, uye a gu nyi phasa gu potsa gilingo gegi nigu tshigu ni tshigu a gu nyi wudzisa gu khuye sa gu gimbiya kharini. Uye a ngu nyi phasa gu woneleya tepo nyi yi vbedzago na nyi gu thumisa interneti.” Khu lisine, kha si mu vbevbugeyi Felicia gu wona mwama waye na gu dwana ni gigaradzo gegi nya gu sixitiri pornografia. Ganiolu, uye wari khuye: “Nya gu goroga, nyi bwe nyi vega giviti, isoso kha si na nga phasa mwama wangu gu pala gigaradzo gegi. Tepo yatshavbo hi ganeyago khu gigaradzo gyaye, uye a gu engedzeya gu dzi emiseya gu vbweta gu nyi phasa gu vbodzisa gilondra a gi vangidego.”

Gu manega ni mabhulo ni mwama wago, si na mu phasa gu mba sixitiri pornografia nigu uwe u na si kodza gu mu tumba gambe. Mwama a gu dzi emiseya gu embeya mwangadzi waye khesi a tshanganago naso, avbo a hongolago ni esi a hongolago a gira, si na vbevbugeya mwangadzi waye gu mu tumba, kholu a ngu dziti gu khuye mwama waye kha mu siheli gilo.

Ina u nga phasa mwama wago khu gira silo sesi? Mu nga hevbula mwatshavbo ndrima yeyi. Uye a yede gu ema gu sixitiri pornografia a bwe a zama gu gu gira u mu tumba gambe. Wulangani nyo goroge khu gu ba u vbweta gu bhula naye khu gigaradzo gyogyo, uye a yede gu zama gu pwisisa edzi gigaradzo gyogyo gi gu kuhago khidzo. Gwago, thumo u gu nawo, gu seketeya mizamo mwama wago a girago gasi gu pala gigaradzo gegi, u bwe u mu ninga lithomo nya gu a gu gira u mu tumba gambe. Khya lisima ngudzu mwavavili mu dziti gu khenu, ginani gi girago muthu nyo khaguri a vbweta gu sixitiri pornografia nigu khu wevbini rendre nya gigaradzo gegi. d

 Abari gu uwe ni mwama wago kha mu na nga simama na mu rude tepo mu bhulago khu mahungu yoyo, ranani lidhota nyo khaguri gasi li ta patega umo nya mabhulo yanu. Dundruga gu khuwe, ambari hwane nya gu mwama wago a pade gigaradzo nya gu sixitiri pornografia, si na dzega tepo gasi u mu tumba gambe. Ganiolu, u nga vbeyi tshivba. Zama gu wona silo nyo khaguri si nga tshukwata ndrani nya wupari wanu. Vireya gu khuwe khu gu gimbiya nya tepo, mutshadhu wanu wu na tiya gambe. — Muh. 7:8; 1 Kor. 13:4.

Ahati mwama wago a gu tshuka a sixitiri gambe pornografia, ina so thula gu khiso kha dzi laya nigu a mwalo gambe rendre? Adzina ahihi. Abari gu mwama wago a na ni vhisiyu nya gu sixitiri pornografia, adzina si nga gira gu a dwana ni gigarado gegi womini gwaye gwatshavbo. Ambari na vbedzide myaga nyo khaguri na si sixitiri pornografia, a nga tshuka a thega gambe. Ganiolu, gasi gu silo soso si si girege, a yede gu simama gu dzi woneya, ambari sa gu gira gu khatshi a pade gigaradzo gegi. (Mav. 28:14; Mat. 5:29; 1 Kor. 10:12) Si na lomba gu ‘vbindrugedza mapimiselo yaye’ a bwe a hevbuleya gu ‘nyenya . . . guvivba.’ Si patago gu sixitiri pornografia ni simbe silo nya mba handzega nya nga masturbação. (Efes. 4:23; Ndzi. 97:10; Rom. 12:9.) Ina uye a dzi emisede gu vbindrugedza? A gu gira isoso, khu gu gimbiya nya tepo a na si kodza gu ndraga gighodho gegi. e

Ganiolu, ahati mwama wago a gu mba dzina gu ema gu sixitiri pornografia? Adzina saye u nga garadzega u bwe u dzipwa na wu si ningwi lisima. Ga giemo gegi, diga satshavbo mandzani ga Jehovha nigu u na si kodza gu mana gurula. (1 Ped. 5:7) Simama gu hidzimeya ga Jehovha khu gu gombeya, gu hevbula ni gu dundrugeya khesi u hevbudego. Tiyisega gu khuwe wa gu gira esi, Jehovha nuye a na gu hidzimeleya. Kha nga a ganeyago Isaya 57:15, Jehovha womo vbafuvbi ga ava va “khuvekidego ni vale va vbedego tshivba” nigu o vbweta gu khuye u tsaka gambe. Gira satshavbo u si kodzago gasi u thumeya Jehovha u bwe u vbwetedzeya giphaso gya madhota. Nigu u nga vbeledwi khu gutumba nya gu khuwe mwama wago, a na tshuka a vbindrugedza. — Rom. 2:4; 2 Ped. 3:9.