Avba nya ndrima yeyi, hi hevbude gu khethu gyomo gilo nya lisima ngudzu gi kuhago vathu ni dzingilozi, a gu gu agiswa nya lina la Jehovha. Mafumelo ya Jehovha, ma gu gimbeleyana ni gu agiswa nya lina laye. Khu ndziya nyo fane, gutumbega nya vathu gimbe gipandre gi gimbeleyanago ni gu agiswa nya lina la Jehovha.

Khu ginani olu hi vbwetago gu tshingisa mahungu ma ganeyago khu gu agiswa nya lina la Jehovha? Hongoleni hi wona sighelo siraru.

Nyo pheye, Sathane a di tshunzisa lina la Jehovha thembweni ga Edheni. Giwudziso Sathane a nga gira Evha, gi di gu gira gu khatshi Jehovha a mwalo wuwadi nigu sileletelo a ningedego Adhamu ni Evha kha sa nga ba si lulamide. Esi Sathane a ganedego si di gu ganedza esi Jehovha a nga ganeya. Khu kharato, uye a a di gu vbweta gu ganeya gu khuye Nungungulu a gu lipha. Nigu uye a di tshundzisa lina la Jehovha. Uye a di khala “Dhiyabhulosi” si thulago “muliphi.” (Joh. 8:44) Khu kotani nya olu Evha a nga khodwa ga malipha ya Sathane, uye kha engisa Nungungulu, iso si nga ba si yeyedza gu khiso kha nga ba a vbweta gu fumwa Khuye. (Gen. 3:1-6) Kala muhuno, Sathane a ngo tshundzisa lina la Nungungulu, a phalalegiseya malipha maningano khu Jehovha. Vale va khodwago malipha ya Sathane, kha va engise Jehovha. Khiso si girisago gu, gu manega wuvivbi mafuni. Ganiolu, ga vathu va Nungungulu gu tshundzisa lina la Jehovha gilo nya mba gyadi.

Nya wuvili, gasi gu satshavbo sivangwa si wuyedwa, Jehovha a dzi emisede gu agisa lina laye khu gu vbeleya. Isoso si na ni lisima ngudzu ga Jehovha. Wari khuye: “[Nyi na agisa] lina langu nya likhongolo.” (Ezek. 36:23) Jesu a si vegide guagani, esi si yedego gu khala nya lisima omu nya milombelo nya sithumi nyo tumbege sa Jehovha, tepo a nga khuye: “Lina lago li na agiswe.” (Mat. 6:9) Bhibhiliya dzitepo nya dzingi yi ngu tshingisa lisima nya gu agise lina la Jehovha. Wona siyeyedzo nyo khaguri: “Ningelani [Jehovha] wudhumo wu [fanekeyago] lina laye.” (1 Dzik. 16:29; Ndzi. 96:8) “Embani dzindzimo nya gukhusedze lina laye.” (Ndzi. 66:2) “Nyi na dhumisa lina lago kala gupindruga.” (Ndzi. 86:12) Khu tepo nyo khaguri, Jesu na romo tempeleni Jerusalema, a di embeya Jehovha gu khuye: “Papayi, dhumisa lina lago.” Jehovha a di mu hlamula khuye: “Eni nyi li dhumiside nigu nyi nga na gu li dhumisa.” — Joh. 12:28. a

Nya wuraru, makungu ya Jehovha tepo yatshavbo ma gu gimbeleyana ni lina laye. Wona lisima nya lina la Jehovha, hwane nya gu lingwe nyo hegise ni gu vbeya nya Mil myaga nya Mufumo wa Kristo. Dzingilozi ni vathu va na dzipwa kharini khu lina la Jehovha ga tepo yoyo? Gasi hi mana hlamulo, hongoleni hi wona silo sivili, gutumbega nya vathu ni Wufumu wa Nungungulu. Ina vathu va nga yeyedza gutumbega si na va garadzeya gu simama na va tumbegide? Ahihi. Kholu gutumbega  gwawe gu na ba gu hegisidwe gu lingwa nigu va na ba va vbelede. Avo va na hakha womi nya mba vbeya. Ina vathu va na simama gu ganedzisana, gu hambana khu gyawe khu kotani nya Wufumo wa Nungungulu? Ahihi. Kholu khu tepo yoyo, kha si na nga vbwetega gu yeyedza gu khethu Jehovha a ngu fuma khu ndziya nya yadi. Vatshavbo, dzandzini ni mafuni va na pwanana nigu va na dzumeya gu fumwa khu Jehovha. Ganiolu, ga tepo yoyo lina la Jehovha li na khala gilo nya lisima ngudzu ga vathu vaye.

Ga tepo yoyo, vatshavbo va nati lisine maningano khu Jehovha, nigu lina laye li na agiswa khu gu vbeleya. Khu kharato, lina la Jehovha li na simama na liri ni lisima ga satshavbo sithumi saye. Khu ginani? Kholu iso si na wona Jehovha na gu simama gu gira silo nyo hlamadzise. Dundrugeya khesi: Kha nga olu Jesu a na bweledzeyago mufumu Jehovha, Nungungulu “a na khala silo satshavbo ga vatshavbo.” (1 Kor. 15:28) Hwane nya isoso, vathu omu mafuni va na tsaka khu gu “hengeya wudhumoni nya gutshulege nya sanana sa Nungungulu.” (Rom. 8:21) Jehovha a na tadzisa makungo yaye nya gu manege ni ndranga yi pwananago, yi wumbwago khu sanana saye dzandzini ni mafuni. — Efes. 1:10.

Hwane nya gu ba satshavbo sesi si giregide, ndranga ya Jehovha ya dzandzini ni mafuni yi na dzipwa kharini? Khu lisine, yi na ba yiri ni gudogoreya nya gukhongolo nya gu dhumise lina la Jehovha. Muembi nya dzindzimo lovide gu khuye: “A na dhumisiwe Jehovha Nungungulu . . . Lina laye nya wudhumo, li na simame kala gupindruga.” (Ndzi. 72:18, 19, NM.) Ethu hi na simama gu vbwetedzeya sighelo nya siphya gasi gu dhumisa Jehovha kala gupindruga.

Lina la Jehovha la gu tshamuseya satshavbo maningano khuye. Tepo hi pimisago khu lina la Jehovha, ethu hi na dundrugeya khu lihaladzo laye. (1 Joh. 4:8) Tepo yatshavbo hi na dundruga lihaladzo la Jehovha a hi yeyedzidego tepo a nga hi vanga ni tepo a nga gira malulamiselo nya dzegiso. Ni gu gambe tepo yatshavbo hi na dundruga gu khethu a gu fuma khu ndziya nyo lulame ni lihaladzo. Ethu hi na simama gu wona edzi Jehovha a hi yeyedzago khidzo lihaladzo kala gupindruga. Hi na simama gu hidzimeya vbafuvbi gwaye kha nga Papayi wathu, hi bwe hi emba dzindzimo nya gu dhumise lina laye kala gupindruga. — Ndzi. 73:28.