DIANA a na ni 80 myaga ni guvbindra nigu tshanisekide ngudzu myaga nyo khaguri yi vbindridego. Mwama waye, a nga ba ari ni madwali nya mapimo nyo pwane Alzheimer a nga ba a bhaxaride xipitali gu sayiswago vadwali va dandridego khu tanga, a difa. A bwe a fedwa khu sanana saye sivili nya sikhwathana, nigu uye a na ni cancro de mama. Ganiolu tepo vandriyathu va wonago Diana mitshanganoni ni thumoni nya gutshumayele, uye tsakide tepo yatshavbo.

John thumide nga muwoneleyi nya gipandre khu 43 myaga ni guvbindra. Uye a di gu wu gola ngudzu thumo waye nigu kha nga ba a dzi dundrugeya na gu gira wumbe thumo. Ambari ulolo, si lombide gu a ema gu thuma nga muwoneleyi nya gipandre gasi a ya khathaleya nongo waye a nga ba a dwala. Tepo vandriyathu va mu tigo John khu gale va mananago naye mitshanganoni nya yikhongolo, va gu wona gu khavo uye kha vbindrugedza gilo. Uye a ngari muthu nya gu tsake.

So kodzega kharini gu Diana ni John va mana gutsaka? So kodzega kharini gu muthu a tshanisekago a tsaka? Muthu a nga simama kharini gutsaka ambari sa gu lomba gu a diga gu gira thumo a wu golago ngudzu? Bhibhiliya yi ngu hi hlamula. Yari khiyo: “Muthu nya gululame a gu nengela ga PFHUMU Nungungulu.” (Ndzimo 64:10) Gasi gu pwisisa gwadi lisine leli gu vbwetega gu hiti egi gi na hi ningago gutsaka nya pindrugedwa ni egi gi na gu mba hi ninga gutsaka.

Simbe silo gutala nya dzitepo si ngu ninga gutsaka. Khu giyeyedzo, nga dundrugeya khu patwa wu haladzanago wu tshadhidego. Nga dundrugeya gambe khu muthu a ngarigo gu manega ni gyanana mwendro a ngarigo gu mana malungelo nyo khaguri thumoni wa Jehovha. Silo sesi si ngu resa gutsaka kholu satshavbo siningwa si tago khiyo ga Jehovha. Uye a hi ningide mutshadho, makodzelo nyo velege sanana, ni thumo nyo gire hengeledzanoni yaye. — Genesi 2:18, 22; Ndzimo 127:3; 1 Thimoti 3:1.

Ambari ulolo, simbe silo si hi ningago gutsaka kha si pfodzisi lidambo. Ya walo khiyo nya gu dzimbe dzitepo pari nya wugadzi yi ngu ba yi si tumbegi mwendro gufa. (Ezekiyeli 24:18; Hoseya 3:1) Sanana si ngu tshuka si si engisi vavelegi ni Nungungulu, ambari gu tshuka si duswa libandlani  kamo. Khu giyeyedzo sanana sa Samuweli kha sa nga ba si khozeya Jehovha khu ndziya nya yadi, Dhavhidhe manegide ni sigaradzo nya singi ndrangani gwaye khu kotani nya gu ghohe ni Bheti-Sebha. (1 Samuweli 8:1-3; 2 Samuweli 12:11) Tepo gu dugeleyago silo nya nga isoso, kha si hi ningi gutsaka, ganiolu sa gu hi reseya gililo ni guvbisa nya gukhongolo ngudzu.

Khu ndziya nyo fane, si ngu tshuka si si kodzegi gu hi simama thumoni nyo khaguri hengeledzanoni ya Jehovha khu kotani nya madwali mwendro so lomba guya sayisa nongo a dwalago, mwendro khu gu ba gu vbindrugedza silo nyo khaguri hengeledzanoni. Vambe si lombidego gu va ema gu gira thumo nyo khaguri vari khavo va ngu suva gutsaka va nga ba va gu mana khu thumo wowo.

Somo guagani gu khiso sighelo soso nya gutsake khandri dzitepo dzatshavbo si hweyago. Ganiolu ina gomo gutsaka nyo khaguri gu gu mba vbeya ambari tepo womi wu vbindrugedzago? Khatshi gomo, kholu Samuweli, Dhavhidhe, ni vambe kha va vbeledwa khu gutsaka tepo va nga emisana ni sigaradzo.

Jesu a di gu dziti gu khuye gutsaka ginani khu lisine. Na a si guti mafuni, Bhibhiliya yari khiyo “gikhati gyatshavbo [a] di gu tsaka” mbeli ga Jehovha. (Mavingu 8:30) Ganiolu, tepo a ngata mafuni, dzimbe dzitepo a emisanide ni sigaradzo nya sikhongolo ngudzu. Ambari ulolo, Jesu a di gu tsaka khu gu gira gugola ga Papayi waye. (Johane 4:34) Ahati dziora dzile nyo hegise a nga ba a tshaniseka ke? Ha gu leri esi: “Khu gutsaka a nga tumbiswago, kha thela kota khu dzitshoni nya gufe [vbasimbotuno nya tshanisa, NM].” (Vahebheru 12:2) Khu kharato hi ngu hevbula nya singi avba nya silo sivili esi Jesu a si ganedego maningano ni gutsaka nya lisine.

Litshigu limwedo 70 nya vapizane va Jesu va di bweleya ga Jesu hwane nyo ba va giride thumo nyo tshumayele va nga ba va ningidwe. Avo va di gu tsakide ngudzu khu kotani nya silo satshavbo va giridego, gupata ni gu tutumisa madhemoni. Ganiolu Jesu a di va embeya esi: “Mu nga tsakini basi khu gu yingiswa khu maphuvbo. Aholu tsakani kholu malina yanu ma lovidwe Ndzadzini.” (Luka 10:1-9, 17, 20) Lisine kamo, gu tsakedwa khu Jehovha si na ni lisima ngudzu nigu si ngu resa gutsaka guvbindra ni wevbini thumo nyo hathege.

Limbe litshigu gambe, tepo Jesu a nga ba a ganeya ni gidzemo, nyamayi moyo nya muJudha a di samadziswa ngudzu khu sihevbudzo saye nyo bwe a ganeya khuye mamayi waye a ngu tsaka khu gu  manega ni gyanana nya nga gile. Ganiolu Jesu a di hakha khuye: “Indra, khuwe: Va kategide avo va pwago magana ya Nungungulu, va ma landrisa.” (Luka 11:27, 28) Sanana sathu sa gu ba si engisa si ngu hi ninga gutsaka. Ganiolu egi gi hi ningago gutsaka nya pindrugedwa gu engisa Jehovha ni gu manega ni wupari nya wadi naye.

Si ngu tsakisa ngudzu guti gu khethu a ngu tsaka khethu. Ambari olu silingo si gu mba tsakisa, kha si kodzi gu hi duseya gudzipwa gogu. Khu lisine, ha gu simama na hi tumbegide tepo hi emisanago ni silingo, gutsaka gwathu gu ngu engedzeya. (Varoma 5:3-5) Nigu Jehovha a ngu ninga liphuvbo laye vale va mu tumbago, nigu gutsaka moyo nya mihandro nya liphuvbo lolo. (Vagalatiya 5:22) Isoso so hi phasa gu pwisisa gu khethu khu ginani Ndzimo 64:10 yi gu khiyo: “Muthu nya gululame a gu nengela ga PFHUMU Nungungulu.”

Isoso si ngu tshamuseya gambe gu khiso khu ginani Diana ni John va nga kodza gu simama na va tsakide ambari olu va nga ba va emisana ni sigaradzo. Diana a di bwe khuye: “Nyi ngu dzipwa gu kheni a ngu nyi kategisa khu makodzelo nyo simame gu tshumayela khavba nyi si kodzago khavbo na nyi tsakide.” Ginani gi phasidego John gu simama na tsakide ni gu pharega thumoni nya gutshumayele hwane nyo ba a emide thumo a nga ba a gira? Wari khuye: “Gu khugeya khu 1998 tepo nyi nga ningwa thumo nyo hevbudze Xikola nya Vaphasedzeyi nya Libandla, nyi phede gu gira gihevbulo gyangu khu ndziya nya gu gima nyi di si gu giri.” A gu tshamuseya gu khuye uye ni mwangadzi waye kha sa va garadzeya gu vbindrugedza silo kholu tepo yatshavbo va di gu dzi emisede gu gira ni gevbini va nga hadzi rumwa khu Jehovha. A bwe khuye: “Kha hi dzi layi khesi hi giridego.”

Vambe navo nya vangi va ngu wona gu khavo malito yaya ya Ndzimo 64:10 lisine. Khu giyeyedzo, nga wona patwa nyo khaguri wu thumidego Bheteli, Estados Unidos khu 30 myaga ni guvbindra. Va di vbedza va rumedwa kha nga vapiyonero nya guhathege. Avo vari khavo: “Guvbisega gudzipwa nya tumbunugo wa gu vbeledwa khu gilo u gi golago,” Ganiolu va bwe khavo: “Khu na nga vbisega kala gupindruga.” Gu vboha va nga vhoha eyi va nga ba va rumedwe iyo, va di dzegeya gu ya pheya gu tshumayela ni libandla la mule. Va ganeya gambe khavo: “Hi di gombeya khu silo nyo khaguri si nga ba si hi garadza khu tepo yoyo. Khavbovbo, gu wona hlamulo nya milombelo yathu si hi kutside ngudzu nigu si hi ningide gutsaka. Gitepwana hwane nyo ba hi vbohide iyoyo, vambe libandlani va di khala vapiyonero, nigu anethu hi di kategiswa khu sihevbulo sivili si dandrago khu liphuvboni.”

Khu lisine kha si vbevbugi gu tsaka tepo yatshavbo. Gu na manega dzitepo hi na gu dzipwago na ha sa tsaka. Ganiolu Jehovha a ngu hi tiyisa khu malito ma gomogo omu ga Ndzimo 64:10. Ambari ho ba hi vbede tshivba, hi nga tiyisega gu khethu ha gu simama na hi tumbegide ambari ha gu emisana ni gigaradzo muni, hi na “nengela ga PFHUMU Nungungulu.” Hi na khala na hi virede tepo eyi gitumbiso gya Jehovha nya “ndzadzi yiphya ni mafu maphya” gi na tadzisegago khiyo. Khavbovbo vatshavbo va na vbeleya nigu va na “tsaka [va] nengela” khu satshavbo esi Jehovha a na girago. — Isaya 65:17, 18.

Nga dundrugeya khedzi silo si na khalago khidzo. Hi na mana womi nyo vbeleye nigu tshigu ni tshigu hi na wuga na hi tiyide sivbango. Ambari ha gu ba gale hi dugeledwe khu silo si nga hi vbedzeya gutsaka, iso kha si na nga hi vbisa gambe monyo. Jehovha a ngu hi tumbisa gu khuye ‘silo sa gale kha hi na nga si dundruga, ambari gu si alakanyela gambe.’ Hi na hakha sigodwa sathu si fudego nigu hi na dzipwa nga vavelegi va gyanana gile nya 12 myaga gi wusidwego khu gufani khu Jesu: Va “di liwuga mwendro gu tsaka ngudzu.” (Marko 5:42) Nugunugu, vathu vatshavbo mafuni va na ba vari vathu nya vadi khu lisine nigu va na “nengela ga PFHUMU Nungungulu” kala gupindruga.