1, 2. Khu ginani si gu wugengeyi gu engisa Muvangi wago tepo u hungago esi u na girago khu womi wago? (Wona foto vbatshani.)

WA GU ba uri muphya, adzina u ngu ningwa wusingalagadzi nya wungi khu wumindru wago. Vahevbudzi, vasingalagadzi va xikwatunu, mwendro vambe adzina va ngu gu kutsa gu hevbula univherisidhadhi mwendro gu vbweta thumo wu na gu phasago gu mana dzitsapawu nya dzingi. Ganiolu Jehovha a ngu gu ninga wusingalagadzi nyo hambane. Khu lisine, uye o vbweta gu khuye u hevbula xikola gasi u kodza gu dzi sayisa. (Vakolosi 3:23) Ganiolu uye gambe a ngu dziti gu khuye kha nga olu u gu muphya, gu vbwetega u hunga gu khuwe ginani u na girago khu wumindru wago. Khu kharato, a ngu gu ninga matshina nya milayo gasi gu gu thangeya ni gu gu phasa gu vbanya khu ndziya yi na mu tsakisago matshiguni yaya nya guhegise. — Matewu 24:14.

² Dundruga gu khuwe Jehovha kha hangwi khu gilo. A ngu siti esi si na dugeleyago mindru wa tshigu nigu a ngu yiti gwadi tepo yi tshadego gasi gu litigo leli li vbindra. (Isaya 46:10; Matewu 24:3, 36) Jehovha gambe a ngu guti nuwe. A ngu siti esi si na gu tsakisago ni esi si na gu mba gu tsakisa. Wusingalagadzi nya  vathu adzina wu nga wonega nari wadi, ganiolu wa gu ba wu si seketedwi khu Bhibhiliya, khandri wa gilo. — Mavingu 19:21.

3, 4. Gu ba Adhamu ni Evha va engiside wusingalagadzi nyo vivbe, si va khuhide kharini gomogo ni sanana sawe?

³ Wusingalagadzi nyo vivbe kha wu pheyi muhuno gu manega. Sathane khuye nyo pheye gu ninga vathu wusingalagadzi nyo vivbe. A di embeya Evha ni Adhamu gu khuye va na tsaka ngudzu vo dzi hungeya vabune milayo nya mavbanyelo. (Genesi 3:1-6) Ganiolu Sathane a di gu vbweta gu dzi tsakisa! A di gu vbweta gu khuye Adhamu ni Evha gumogo ni sanana va nga hadzi velega, va mu engisa ni gu mu khozeya, vbavbandze ga Jehovha. Ganiolu, gimwalo nya gyadi Sathane a nga ba a girede vathu. Khu Jehovha a va ningidego satshavbo va nga ba vari naso. A di va gira patwa, a va ninga lithembwe nya gumbure ngudzu gasi va vbanya umo, ni sivili nyo vbeleye si nga hadzi pindruga.

⁴ Egi gi si tsakisigo khu gu, Adhamu ni Evha kha va engisa Nungungulu. Khu kotani nya isoso, va di dzi hambanisa ni Oyu a va ningidego womi. Mihandro yakone kha ya tsakisa. Kha nga sifilori so havwa avba nya simbo wakone si wunago, Adhamu ni Evha navo vbadugwana-vbadugwana va di gumba va bwe vafa. Sanana sawe niso si di tshaniseka, gupata ni ethu hatshavbo. (Varoma 5:12) Vathu nya vangi muhuno va gu si veta khu lisabi esi Nungungulu a ganeyago, va gira esi va si vbwetago. (Vaefeso 2:1-3) Khu yevbini mihandro yakone? Bhibhiliya yari khiyo vathu va gu wugeya Jehovha va ‘mwalo wugengeyi’. — Mavingu 21:30.

5. Gutumba muni a nga ba ari nago Nungungulu khu vathu, nigu ina gu tadzisegide gani?

⁵ Jehovha a di gu tumba gu khuye gu na manega vathu, gupata ni vaphya nya vangi, va nga hadzi gu muti ni gu mu thumeya. (Ndzimo 103:17, 18; 110:3) Vaphya vovo va na ni lisima ngudzu ga Jehovha! U moyo wakone? Wo ba uri moyo wawe, kha si kanakanisi gu khiso u ngu dzi buza “khu satshavbo nya sadi” si tago khiyo ga Nungungulu, nigu isoso si ngu engedzeya litsako lago womini. (Leri Ndzimo 103:5; Mavingu 10:22) Hi na ganeya khu 4 nya silo soso nya sadi. Guhodza nya liphuvbo, dzipari nya dzadi, misuwo nya yadi, ni gutshulega nya lisine.

6. Khu ginani u yedego gu khathala khu ndzala yago ya liphuvboni, nigu ginani a gu ningago Jehovha gasi gu gu phasa?

⁶ Sirengo si mwalo ndzala ya liphuvboni, si thulago gu khiso, kha si dileyi guti Muvangi waso. Ganiolu ethu hi ngu dileya. (Matewu 4:4) Khu gu engisa Nungungulu, ha gu mana gupwisisa, guti, ni litsako. Jesu a di khuye: “Va ngu tsaka ava va khathalago khesi si va keneleyago khu liphuvboni, kholu Mufumo wa ndzadzini khwawe.” (Matewu 5:3, NM) Nungungulu a ngu hi ninga Bhibhiliya nigu a gu thumisa ‘githumi nya gutumbege, ni nya gugengeye’ gasi gu hi ninga mabhuku ma na hi phasago gu tiyisa gukhodwa gwathu. (Matewu 24:45) Mabhuku yoyo ho ma rana gu khethu guhodza nya liphuvbo kholu ayo ma gu hodzisa gukhodwa gwathu ma bwe ma tiyisa wupari wathu ni Jehovha. Hi ngu tsaka ngudzu khu guhodza gogo nyo hambanehambane nya liphuvbo! — Isaya 65:13, 14.

7. Guhodza ga liphuvboni gutago khiyo ga Nungungulu gu na gu phasa kharini?

 ⁷ Guhodza nya liphuvbo gu ngu kodza gu gu ninga wugengeyi ni makodzelo nya gu pimise gwadi, esi si na gu vhikeyago khu dzindziya nya dzingi. (Leri Mavingu 2:10-14.) Khu giyeyedzo, makhalelo yoyo ma na gu phasa gu tugula malipha, nya nga aya nyo pwani gu mwalo Muvangi mwendro aya nyo pwani dzitsapawu ni dzithomba si na gu ninga gutsaka. Makhalelo yoyo gambe ma na gu phasa gu potsa gudogoreya mwendro mavbanyelo ma na gu reseyago sigaradzo. Khu kharato gira satshavbo u si kodzago gasi u manega ni wugengeyi ni mapimo nya yadi. Khavbovbo u na si wona wabune gu khuwe Jehovha a ngu gu haladza ni gu a gu gu suveya esi nya sadi. — Ndzimo 34:8; Isaya 48:17, 18.

8. Khu ginani u yedego gu hidzimeya ngudzu ga Nungunulu olu, nigu isoso si na gu phasa kharini mindru wa tshigu?

⁸ Nugunugu litigo latshavbo la Sathane li na fuviswa. Khu Jehovha enga a si kodzago gu hi vhikeya ni gu hi ninga esi hi si vbwetago, esi si patago ni guhodza ga litshigu ni litshigu. (Habhakuka 3:2, 12-19) Khu kharato eyi khiyo tepo nyo hidzimeye ga Jehovha ni gu tiyisa gutumba gwago gwaye. (2 Pedro 2:9) Wa gu gira isoso, ambari go dugeleya ginani, u na dzipwa nga Dhavhidhe, a nga khuye: “Gikhati gyatshavbo nya gu vega PFHUMU Nungungulu mbeli gwangu, khu guralo, uye khade nyamudye gwangu, gima kha nyi na thava gilo.” — Ndzimo 16:8.

9. a) Khu guya khu Johane 6:44, ginani Jehovha a girago? b) Ginani gi tsakisago tepo hi mananago ni Dzifakazi-khwathu?

⁹ Tepo nyo pheye u mananago ni muthu a gu mwalo lisineni, ina u nga khuwe u ngu muti gwadi? Si nga gira na wuti lina laye ni edzi a khadego khidzo, ganiolu adzina esi u si tigo khandri sa doni. Si hambanide ngudzu ni tepo u mananago khiyo ni muthu a gomogo lisineni. U ngu dziti gu khuwe a ngu haladza Jehovha. U ngu dziti gu khuwe gyomo nya gyadi a gi wonidego Jehovha gwaye a kala a mu rana gu ta gira gipandre nya ndranga yaye nya vakhozeyi. (Leri Johane 6:44.) Gani a guta khu hayi muthu yoyo mwendro  edzi a nga dandriswa khidzo, u nguti nya singi khuye, anuye a nguti nya singi khuwe!

10, 11. Ginani egi vathu vatshavbo va Jehovha va gu nagyo, nigu isoso so gu khuha kharini?

¹⁰ Tepo u mananago ni Fakazi-khwathu, u ngu dziti gu khuwe mwavavili mu na ni silo nya lisima ngudzu nyo fane. U ngu dziti gu khuwe ambari mo ba mu ganeya malimi nyo hambane, mwatshavbo mo ganeya “lidimi li agidego” nya lisine. (Sofoniya 3:9, NM) Isoso so thula gu khiso mwatshavbo mu ngu khodwa ga Nungungulu, mo vbanya khu milayo yayimweyo nya mavbanyelo, nigu mu na ni gutumba nyo fane khu wumindru. Silo soso sa gu mi phasa gu tumbana ni gu vbaha wupari nyo tiye wu na simamago kala gupindruga.

¹¹ Khu kharato, wa gu ba u khozeya Jehovha, u ngu kodza gu ganeya nu tshulegide gu khuwe u na ni dzipari nya dzadi. U na ni dzipari nya dzadi mafuni gwatshavbo, ambari wo ba u si gu manani nadzo! Ina u nguti vambe vathu va dzi buzago khu giningwa gyogyo nya lisima ngudzu vbavbandze nya vathu va Jehovha?

12. Misuwo muni nya yadi u kodzago gu dzi vegeya?

¹² Leri Muhevbudzi 11:9–12:1. Ina u na ni misuwo nyo khaguri u zamago gu yi vboheya? Adzina u dzi vegede misuwo nyo leri Bhibhiliya tshigu ni tshigu, gu ningeya mihlamulo nya yadi mwendro gu gira gwadi sipandre sago mitshanganoni. Adzina wo zama gu thumisa gwadi Bhibhiliya thumoni nyo tshumayele. Wa gu dzipwa kharini tepo u wonago gu khuwe u ngu tshukwadzisa mwendro wa gupwa vambe na va ganeya gwadi khuwe? Adzina u ngu tsaka, nigu u na ni gighelo! Khu ginani? Kholu wa gu gira esi Jehovha a vbwetago gu khuye u gira, nga edzi Jesu a giridego khidzo. — Ndzimo 40:8; Mavingu 27:11.

13. Khu ginani gu thumeya Nungungulu si gu sadi ngudzu guvbindra gu vega gupima avba nya misuwo nya litigo leli?

¹³ Wo ba u vega gupima thumoni wago ga Jehovha, wo gira thumo wu na gu ningago gutsaka wu bwe wu gu gira u vbanyeya gilo nyo giti. Pawulo gengedzide gu khuye: “Simamani mu khala na mu tiyide mu thuma gikhati gyatshavbo khu gunengela esi Nungungulu a si vbwetago, Kholu mahoni ga Pfhumu, thumo wanu khandri wa mahala.” (1 Vakorinto 15:58) Ganiolu tepo vathu va vegago gupima avba nya misuwo nya litigo leli, nya nga gu mana dzitsapawu nya dzingi mwendro ndruma, kha va tsaki ne vbadugwana. Ambari va gu ba va ghanyide, gutala nya dzitepo va ngu dzipwa na va keneledwa khu gilogyo. (Luka 9:25) Khiso hi si hevbulago ga Pfhumu Solomoni. — Varoma 15:4.

14. Ginani u gi hevbulago ga esi a yedzidego gu gira Solomoni?

¹⁴ Solomoni, a nga ba ari moyo nya vama nyo ghanye ni wufumo yedzide gu gira isoso. Uye a di dzi embeya abune khuye: “Nya gu vbweta gu gu pwisa gutsaka; dzi buze khu gunengela.” (Muhevbudzi 2:1-10) Khu kharato Solomoni a di vbaha dzinyumba nyo mbure ngudzu, a gira dzi jardim mwendro mathembwe nya sifilori ni misimbo a bwe a gira ni gyevbini a nga ba a gi vbweta. Ina a dzipwide na gu eneledwa ni gu tsaka khiso? Tepo solomoni a nga khedza hwane a wona satshavbo esi a nga ba a giride a di khuye: “Nyi di wona gukheni gu diri gu dzi pfhadza.” A bwe khuye: “Gi mwalo nyi phasegidego khigyo.” (Muhevbudzi 2:11) Gyomo u gi hevbulago ga esi a yedzidego gu gira Solomoni?

15. Khu ginani u yedego gu manega ni gukhodwa, nigu gu na gu phasa kharini, kha nga hi hevbudego umo ga Ndzimo 32:8?

 ¹⁵ Vambe vathu va gu hevbula gilogyo guvbanyani tepo va girago sihoso va vbedza va tshaniseka khu mihandro yakone nya mba yadi. Jehovha kha vbweti gu khuye u dugeledwa khu silo nya nga isoso. A gu vbweta gu khuye u mu engisa. Isoso so vbweta gukhodwa, ganiolu gima khu na nga dzi laya khesi u si hathidego gu gira womini khu gukhodwa gwago. Nigu Jehovha gima kha na nga divala ‘lihaladzo u li yeyedzidego’ khu lina laye. (Vahebheru 6:10) Khu kharato dzi garadzeye gu tiyisa gukhodwa gwago. Khavbovbo u na hunga silo khu wugengeyi guvbanyani nigu u na wona khu wabune gu khuwe Babe wago wa ndzadzini o gu suveya silo nya sadi. — Leri Ndzimo 32:8.

16. Khu ginani hi yedego gu ninga lisima gutshulega hi bwe hi gu thumisa khu ndziya nya wugengeyi?

¹⁶ Pawulo lovide esi: “Avbo li guromo Liphuvbo la Pfhumu, gomo gutshulega.” (2 Vakorinto 3:17) Jehovha a ngu gu gola gutshulega, nigu a gu vangide na gu vbweta gu khuye anuwe u gu gola. Ganiolu o vbweta gu khuye u thumisa gutshulega gwago khu ndziya nya wugengeyi yi na gu vhikeyago. Si nga gira dzimbe nya dzipari dzago na dzi gu sixitiri pornografiya, dzi gira wubhayi, dzi gira mihagano yi vegago womi wavo mhangoni mwendro gu daha ni gu leva. Gupheyani, silo sesi si nga wonega na si tsakisa, ganiolu gutala nya dzitepo so hi reseya mihandro nyo vivbe nya nga madwali, dzivhisiyu mwendro kamo gufa. (Vagalatiya 6:7, 8) Vaphya va dzi bedzedzeyago omu nya silo soso si nga gira va pimisa gu khavo va tshulegide, ganiolu kha va tshulega. — Tito 3:3.

17, 18. a) Gu engisa Nungungulu go hi ninga gutshulega khu ndziya muni? b) Adhamu ni Evha va di tshulegide guvbindra vatshavbo muhuno khu ndziya muni?

¹⁷ Gimbe gambe khu gu, gu engisa Jehovha gilo nya gyadi gwathu. Gu ngu hi phasa gu manega ni womi nya wadi ni gu tshulega nya lisine. (Ndzimo 19:7-11) Nigu wa gu thumisa gutshulega gwago khu wugengeyi, si thulago gu hatha gu engisa matshina nya milayo ni milayo nyo vbeleye ya Nungungulu, wa gu yeyedza Nungungulu ni vavelegi vago gu khuwe u muthu u vidzidwego. Vavelegi vago va na gu tumba ngudzu va bwe va gu ninga gutshulega. Nigu Jehovha tumbiside gu khuye nugunugu a na ninga sithumi saye satshavbo gutshulega nyo vbeleye, ogu Bhibhiliya yi gu ranago gu khiyo ‘wudhumo nya gutshulege nya sanana sa Nungungulu.’ — Varoma 8:21.

¹⁸ Ugogo khugo gutshulegao ogu Adhamu ni Evha va nga ba vari nago. Thembweni ga Edeni, Nungungulu a di va embede gu mba gira gilo gimwegyo basi. Va di yede gu mba hodza handro nya simbo nyo khaguri. (Genesi 2:9, 17) Wo si wona kharini, ina Nungungulu a di gu va garadzeya mwedro gu va himbedzeya gilogyo khu gu va ninga nayo wowo? Khu lisine ne! Nga dundrugeya khu milayo nya yingi eyi vathu va vegago va bwe va gurumedza vambe gu yi landreya. Ganiolu  Jehovha a di ninga Adhamu ni Evha nayo moyo basi.

19. Ginani egi Jehovha ni Jesu va hi hevbudzago gi na hi phasago gu mana gutshulega?

¹⁹ Jehovha a ngu hi phara khu ndziya nya wugengeyi. Vbavbandze nyo hi ninge milayo nya yingi, a gu laphisa monyo a hi hevbudza gu engisa nayo nya lihaladzo. A gu hi hevbudza gu vbanya khu matshina yaye nya milayo ni gu nyenya silo nyo vivbe. (Varoma 12:9) Avba nya Ganelo ya Gigomoni, Gyanana gyaye Jesu, gi hi phaside gu pwisisa gu khethu khu ginani vathu va girago silo nyo vivbe. (Matewu 5:27, 28) Nigu mafuni nya maphya, kha nga Pfhumu nya Mufumo wa Nungungulu, Jesu a na simama gu hi hevbudza gu wona esi nya sadi ni esi nyo vivbe nga edzi uye a si wonago khidzo. (Vahebheru 1:9) Jesu gambe a na hi gira hi vbeleya mapimoni ni givilini. Nga dundrugeya edzi si na tsakisago khidzo tepo hi na vbanyago nya mba lingwa gu gira silo nyo vivbe hi bwe hi si tshaniseki khu kotani nya gumba vbeleya. Khavbovbo khu gu hegisa hi na dzi buza khu ‘wudhumo nya gutshulege’ ogu Jehovha a hi tumbisago.

20. a) Jehovha a gu thumisa kharini gutshulega gwaye? b) U nga mu pimedzeya kharini?

²⁰ Mafuni nya maphya, gutshulega gwathu gu na simama gu manega ni mivbingano. Khu ndziya muni? Gu na vbwetega gu tepo yatshavbo hi kutswa khu lihaladzo hi gu nalo khu Nungungulu ni vambe vathu. Ha gu dzumeya gu thangedwa khu lihaladzo, ha gu pimedzeya Jehovha. Ambari olu Jehovha a gu na ni gutshulega gwatsavbo, uye a gu dzumeleya lihaladzo li thangeya satshavbo esi a girago, gu pata ni edzi a hi pharago khidzo. (1 Johane 4:7, 8) Khu kharato si ngu pwisisega gu khiso hi na tshulega khu lisine basi ha gu pimedzeya Nungungulu.

21. a) Dhavhidhe a di gu dzipwa kharini khu Jehovha? b) Omu nya ndrima yi landreyago hi na ganeya khu ginani?

²¹ Ina u ngu bonga khu satshavbo silo nya sadi esi Jehovha a gu ningago? A ngu gu ninga guhodza nya liphuvbo, dzipari nya dzadi, misuwo nya yadi, ni gitumbiso nyo mane gutshulega nyo vbeleye, ni simbe siningwa nya sadi. (Ndzimo 103:5) Adzina u ngu dzipwa nga Dhavhidhe tepo a nga gombeya a ganeya malito ma gomogo omu ga Ndzimo 16:11, khuye: “U na nyi yeyedza ndzila nya guvbanye, nyi na tala khu gutsaka mbeli gwago, nyi napwa gutshamba nyamudye gwago kala gupindruga.” Omu nya ndrima yi landreyago, hi na ganeya khu limbe lisine nya lisima li gomogo omu ga Ndzimo 16. Ilo li na gu phasa gu wona edzi u nga manegago khidzo ni womi nya wadi ngudzu!