Siwudziso sa valeri

WOMBISA

Siwudziso sa valeri

Bhibhiliya yari khiyo gu vbwetega vathu vavili khu wudugwana wakone gasi gu fakaza mahungu nyo khaguri. (Mite. 35:30; Dhet. 17:6; 19:15; Mat. 18:16; 1 Thim. 5:19) Ganiolu khu guya khu nayo, o tshuka mwama nyo khaguri a pfinya gyagadzyana gi tumbisidwego “khabini” khavbovbo gi womba huwa, igyo gi diri mwalo nandru nya wubhayi, mwama khuye a nga ba a rwala nandru wowo. Go ba isoso sa sa vbanyedwa khu muthu, khu ginani nandru wu nga ba wu thegeya mwama basi?

Malito ma gomogo omu ga Dhewuteronome 22:25-27, kha ma nga ba ma thumisedwa ngudzungudzu gasi gu ninga nandru mwama kholu khuye a nga ba a wonega nari ni nandru. Khu kharato, nayo wowu wu di gu thumisedwa gu yeyedza gu mba na nandru ga gyagadzyana. Hongoleni hi si wonani kamo gwadi.

Mavhesi nyo pheye ma gu ganeya khu mwama a giridego wubhayi ni nyamayi a tumbisidwego “dhoropani.” Khu kotani nya olu a gu mwama a kutsedzedego nyamayi gu gira wubhayi, nandru wu di gu thegeya uye, kholu nyamayi wule a di gu wonwa kha nga muthu a tshadhidego. Ahati nyamayi ke? “Uye kha womba huwa dhoropani.” Nari khatshi a di giride isoso, adzina vambe na va si pwide va bwe va mu vhikeya. Ganiolu kha womba huwa. Anuye dzumede gu gira wubhayi, khu kharato vatshavbo vavavili va diri ni nandru. — Dhet. 22:23, 24.

Nayo wu landreyago wu di gu ganeya khu gimbe giemo: “Khu guralo, a gu manega mwama nya gukari a mana mbiri na yi wutidwe a yi pfinya khu tshivba a lala nayo, avbovbo a na songwa basi mwama a nga lala naye; ga mbiri u nga giri gilo; uye mwalo nandru nya lufu, mahungu yaya ma nga fanana ni mwama a wugelago ndriyaye a mu songa. Kholu mwama wule a di mana nyamahegyane a tumbisidwego nari khabini a mu manide khabini; mbiri yi wombide huwa, aholu kha ga manega muthu nya gute mu lamulela.” — Dhet. 22:25-27.

Ga giemo gegi, valamuli va di gu khodwa esi si ganedwago khu nyamayi. Khu gighelo muni? Kholu ganede gu khuye “wombide huwa, aholu kha ga manega muthu nya gute mu lamulela.” Khu kharato, khandruye a giridego wubhayi. Ganiolu, mwama khuye a nga ba a rwala nandru nya wubhayi kholu a di “pfinya khu tshivba” nyamayi a tumbisidwego, “a lala nayo.”

Ambari olu nayo wowu wu nga ba wu thumisedwa ngudzungudzu gasi gu yeyedza gu mba na nandru ga nyamayi, uwo wu di gu thumisedwa gambe gasi gu yeyedza gukhuwo ina nandru watshavbo nya gupfinye ni wubhayi wo rwadwa khu mwama basi gani. Hi nga tiyisega gu khethu valamuli va di gu “wudzisela gwadi” va bwe va si hunga khu guya khu milayo yi gomogo guagani ya Nungungulu, yi wuyedzedwego gunganigungani. — Dhet. 13:14; 17:4; Ekiso. 20:14.