1-2. Kha nga si yeyedzidwego avba nya matimo ya Angelito, ginani moyo ni moyo wathu a yedego gu gira?

INA u dandrisidwe khu vavelegi va gu Dzifakazi dza Jehovha? Abari kharato, u yede gu dundruga gu khuwe khu na nga khala pari ya Jehovha khu kotani nya olu avo va gu dzipari dzaye. Gani vavelegi vathu va gu thumeya Nungungulu mwendro ne, moyo ni moyo wathu yede gu tiyisa abune wupari waye ni Jehovha.

² Nga wona giyeyedzo gya ndriyathu moyo nyo pwane khu Angelito. Uye dandrede ndrangani nya Dzifakazi. Ambari ulolo, tepo a nga ba ari gyanana a di si dzipwi vbafuvbi ngudzu ni Jehovha. Uye wari khuye: “Nyi di gu thumeya Jehovha kholu nyi di gu vbweta gu gira esi vandrangani gwangu va nga ba va gira.” Ambari ulolo, Angelito a di hunga gu londrola tepo yaye khu gu leri lito la Nungungulu a bwe a dundrugeya khesi a si hevbulago, khavbovbo a pheya gu gombeya ga Jehovha tepo yatshavbo. Khu wevbini handro wakone? Angelito wari khuye: “Nyi hevbude gu kheni ndziya yamweyo nya gu nyi hidzimeya ga Papayi wangu Jehovha khu gu nyi muti gwadi nyabune.” Matimo ya Angelito ma gu wusa siwudziso nyo khaguri nya lisima: Guhambana muni gu gomogo avba nya guti silo sidugwana khu Jehovha ni gu muti gwadi? Nigu, ginani hi nga girago gasi gu muti gwadi Jehovha?

3. Guhambana muni gu gomogo avba nya guti silo nyo khaguri khu Jehovha ni gu muti gwadi?

³ Adzina hi nga ganeya gu khethu hi ngu muti Jehovha khu guti lina laye mwendro silo a si ganedego ni gu si gira. Ganiolu guti Jehovha ga gu pata nya singi. Gu vbwetega hi dzi ninga tepo nya gu hevbule khu Jehovha ni makhalelo yaye nya yadi.  Isoso khiso si na hi phasago gu pwisisa gu khethu khu ginani a ganedego ni gu gira silo nyo khaguri. Isoso si na hi phasa gu tugula gu khethu ina uye a ngu tsakeya esi hi si dundrugeyago ni esi hi si girago gani. Hatshavbo hi nati esi Jehovha a si vbwetago gu khuye hi gira, nigu hi yede gu vbanya guya khesi hi si hevbudego.

4. Gu hevbula khu siyeyedzo sa omu nya Bhibhiliya si na hi phasa kharini?

⁴ Vathu nyo khaguri adzina va nga hi hega khu kotani nya olu hi vbwetago gu thumeya Jehovha va bwe va hi wugeya tepo hi pheyago gu hongola mitshanganoni. Ambari ulolo, ha gu tumba Jehovha uye gima kha na nga hi diga. Hi na pheya gu tiyisa wupari wathu ni Nungungulu, wu na simamago kala gupindruga. Ina hi nga si kodza gu muti gwadi Nungungulu? Ina, hi nga si kodza! Siyeyedzo hi vegedwego khu vama nya mba vbeleya, nya nga Mosi ni Pfhumu Dhavhidhe sa gu yeyedza gu khiso si ngu kodzega. Tepo hi hevbulago khesi va giridego hi na hlamula siwudziso sivili: Avo va mu tide kharini Jehovha? Nigu sihevbudzo muni hi nga si hevbulago avba nya siyeyedzo sawe?

5. Ginani egi Mosi a hathidego gu gira?

⁵ Mosi hathide gu thumeya Nungungulu. Tepo a nga ba ari ni 40 myaga, Mosi a di hatha gu dzipata ni vathu va Nungungulu vaIsrayeli, vbavbandze nya gu tidwe kha nga “mwamana wa nyamahegyane wa Faro.” (Hebh. 11:24) Mosi a di diga giemo nya gu khugege ngudzu. Tepo a nga phasa vaIsrayeli, a di gu dziti gu khuye Faro a na goroga kamo ngudzu. Faro a diri Pfhumu nya tshivba ngudzu nigu a di gu wonwa khu vathu kha nga nungungulu. Esi so yeyedza gu khiso Mosi a diri ni gukhodwa nyo tiye! Uye tumbide Jehovha. Gutumba khigyo gighelo nya lisima gi giridego Mosi a khala pari ya Jehovha womini waye watshavbo. — Mav. 3:5.

6. Ginani hi nga gi hevbulago avba ga giyeyedzo gya Mosi?

⁶ Gihevbudzo muni hi gi manago? Kha nga Mosi, hatshavbo hi yede gu hunga makungo: Ina hi na hatha gu thumeya Jehovha hi bwe hi dzipata ni vathu vaye? Adzina hi yede gu dzima silo nyo khaguri gasi gu thumeya Nungungulu, nigu adzina hi ngu wugedwa khava va si mutigo Jehovha. Ganiolu ha gu ba hi tumba Jehovha, hi na tiyisega gu khethu uye a na hi phasa!

7-8. Ginani egi Mosi a simamidego gu gi hevbula?

⁷ Mosi simamide gu hevbula khu makhalelo ya Jehovha ni gu gira gugola gwaye. Khu giyeyedzo, tepo Jehovha a nga embeya Mosi gasi guya tshudzisa vaIsrayeli Egipito, uye a di dzi kanakaneya nigu khu dzitepo nya dzingi embede Jehovha gu khuye kha na nga si kodza gu gira isoso. Mihlamulo ya Jehovha yi yeyedzide pweya wusiwana agu nawo, kholu uye pwisiside edzi Mosi a nga ba a dzipwa khidzo a bwe a mu phasa. (Ekiso. 4:10-16) Kha nga handro wakona, Mosi si kodzide guya embeya Faro mahungu nya gulamule nya tshivba. A bwe a wona Jehovha na gu thumisa tshivba yaye gasi gu vbulugisa vaIsrayeli, a vbedza a fuvisa Faro ni mabutho yaye omu nya yiphwa nyo fuviye. — Ekiso. 14:26-31; Ndzi. 136:15.

⁸ Hwane nya gu ba Mosi a duside vaIsrayeli khu Egipito, avo va di gu khaleya gu ngurangura khu gevbini. Ambari ulolo, Mosi wonide gulaphisa-monyo ga Jehovha khu vathu a va tshudzisidego wugumbini. (Ndzi. 78:40-43) Mosi wonide gambe gudzinogisa ga Jehovha tepo a nga ne fuvisa vaIsrayeli hwane nya gu ba Mosi a mu kutside gu mba va fuvisa. — Ekiso. 32:9-14.

9. Guya khu Vahebheru 11:27, gupwanana muni gu nga ba gu romo avba ga Mosi ni Jehovha?

⁹ Hwane nya gu ba vaIsrayeli va dugide khu Egipito, wupari wa Mosi ni Jehovha wu di tiya ngudzu nyo bwe khatshi Mosi a di gu wona  Papayi waye wa ndzadzini. (Leri Vahebheru 11:27.) Gasi gu yeyedza edzi va nga ba va pwana khidzo, Bhibhiliya yari khiyo: “PFHUMU Nungungulu a di gu ganela ni Mosi khovbe ni khovbe gukhwatshi khu muthu a gu bani a gu ganela ni pari yaye.” — Ekiso. 33:11.

10. Gasi gu muti gwadi Jehovha, ginani hi yedego gu gira?

¹⁰ Ginani hi gi hevbulago? Gasi gu muti gwadi Jehovha, kha hi yeli basi gu hevbula khu makhalelo yaye nya yadi ganiolu hi yede gambe gu gira gugola gwaye. Gugola ga Jehovha muhuno khogu, “a gu vbweta gukhuye vathu vatshavbo va vbanye ni guti lisine.” (1 Thim. 2:3, 4) Ndziya mweyo nya gu hi gira gugola ga Nungungulu khu gu hi hevbudza vambe khu Jehovha.

11. Tepo hi hevbudzago vathu, ha gu engedzeya kharini gu muti gwadi Jehovha?

¹¹ Tepo hi hevbudzago vambe khu Jehovha, ha gu engedzeya gu muti gwadi. Khu giyeyedzo, ethu ha gu wona pweya wusiwana wa Jehovha khu vathu tepo a hi phasago gu mana vathu va vbwetago gu khala dzipari dzaye. (Joh. 6:44; Mith. 13:48) Hi ngu wona tshivba nya Lito la Nungungulu, kholu ilo li ngu phasa sihevbuli sathu nya Bhibhiliya gu diga gu gira silo nya guvivbe si bwe si vbindrugedza mavbanyelo yaso. (Kol. 3:9, 10) Nigu hi ngu wona gulaphisa-monyo ga Jehovha khu vathu va gipandreni gwathu kholu a gu hi ninga tepo nyo laphe gasi hi va phasa gu hevbula khuye va bwe va vbuluga. — Rom. 10:13-15.

12. Kha nga si yeyedzidwego omu ga Ekisodha 33:13, ginani egi Mosi a gi lombidego nigu khu ginani?

¹² Mosi a di gu ninga lisima wupari waye ni Jehovha. Ambari hwane nya gu gire mithumo nya tshivba khu lina la Nungungulu, Mosi lombide gu Jehovha a mu phasa gu muti gwadi. (Leri Ekisodha 33:13.) Mosi a diri ni 80 myaga tepo a nga gira gilombo gyogyo, ganiolu uye a di gu dziti gu khuye na ni silo nya singi a yedego gu hevbula maningano ni Papayi waye nya lihaladzo wa ndzadzini.

13. Khu yevbini mweyo nya dzindziya nya gu hi yeyedza gu khethu hi ngu ninga lisima wupari wathu ni Nungungulu?

¹³ Ginani hi gi hevbulago? Ambari ha gu ba hiri ni myaga mingani na hi gu thumeya Jehovha, kha hi yeli gu wu woneya vbavbatshi wupari wathu naye. Mweyo nya dzindziya nya gu hi yeyedza gu khethu hi ngu ninga lisima wupari wathu ni Nungungulu khu gu hi ganeya naye khu nombelo.

14. Khu ginani nombelo wu gu na ni lisima gasi gu hi phasa gu hevbula nya singi khu Nungungulu?

¹⁴ Wa gu ba u vbweta gu manega ni wupari nyo tiye ni muthu nyo khaguri, u yede gu bhula naye tepo yatshavbo. Khu kharato, gasi gu manega ni wupari nyo tiye ni Nungungulu, gombeya gwaye tepo yatshavbo, nigu u nga thavi gu mu embeya esi u si pimisago ni edzi u dzipwago khidzo. (Efes. 6:18) Krista wa Turquia wari khuye: “Lihaladzo langu khu Jehovha la gu engedzeya gu dandra tepo nyi mu embeyago esi nyi si pimisago khu nombelo, khavbovbo nyi wona giphaso gyaye. Gu wona edzi Jehovha a hlamulago khidzo milombelo yangu so nyi gira nyi wona Jehovha kha nga Papayi wangu ni Pari.”

15. Jehovha a di gu mu wona kharini Dhavhidhe?

¹⁵ Tepo Pfhumu Dhavhidhe a nga velegwa, vavelegi vaye ni vambe va di gu khozeya Jehovha Nungungulu. Ganiolu, Dhavhidhe giride nya singi vbavbandze nyo landriseye basi mavbanyelo ya ndrangani gwawe. Uye hagulede abune wupari waye ni Nungungulu nigu a di gu haladzwa ngudzu khu Jehovha. Jehovha wonide Dhavhidhe kha nga “mwamana a tsakisago monyo [waye].” (Mith. 13:22) Dhavhidhe si kodzide kharini gu hidzimeleya Jehovha?

16. Khu gu ba Dhavhidhe a khedzide sivangwa sa Jehovha, ginani egi a gi hevbudego khuye?

 ¹⁶ Dhavhidhe a di gu hevbula khu sigiro sa Jehovha. Tepo Dhavhidhe a nga ba ari gyanana, a di gu vbedza tepo nya yingi khabini na gu havisa dzinvuta dza papayi waye. Adzina khiyo a phedego gu dundrugeya khu silo esi Jehovha a si vangidego. Khu giyeyedzo, tepo Dhavhidhe a nga khedza vbatshani ni wutshigu, uye a di wona dzimiliyoni nya dzinyeledzi. Ganiolu uye wonide nya singi guvbindra dzinyeledzi dzodzo, uye adzina tide makhalelo ya Oyu a dzi vangidego. Dhavhidhe kutsegide gu lova khuye: “Ndzadzini gu ngu tivisa wudhumo wa Nungungulu, ndrengelenge wu ngu tivisa sigiro nya mandza yaye.” (Ndzi. 19:1, 2) Tepo Dhavhidhe a nga dundrugeya khedzi va vangidwego khidzo vathu, uye wonide guti ga Jehovha nyo samadzise. (Ndzi. 139:14) Tepo a nga ba a zama gu pwisisa mithumo ya Jehovha, a di gu wona edzi a nga ba ari dugwana khidzo mahoni ga Jehovha. — Ndzi. 139:6.

17. Ginani hi nga gi hevbulago ha gu dundrugeya khu sivangwa?

¹⁷ Ginani hi gi hevbulago? Khathala khu sivangwa sa Jehovha. Dzi ninge tepo nyo khedziseye litigo leli nyo mbure li vangidwego khu Jehovha; dzi buze khilo! Matshigu yatshavbo womini wago, dundrugeya khesi sivangwa si gu randredego si gu hevbudzago khu Jehovha, nya nga misimbo, sirengo ni vathu. Khavbovbo, tshigu ni tshigu u na hevbula nya singi khu Papayi wago nya lihaladzo. (Rom. 1:20) Nigu tshigu ni tshigu u na wona lihaladzo lago khuye na li gu engedzeya gu dandra.

18. Kha nga si yeyedzidwego omu ga Ndzimo 18, ginani egi Dhavhidhe a gi wonidego?

¹⁸ Dhavhidhe wonide gu khuye Jehovha a di gu mu phasa. Khu giyeyedzo, tepo Dhavhidhe a nga vbulugisa dzinvuta dza papayi waye ga ngala ni urso, uye si wonide gu khuye khu Jehovha a mu phasidego gu pala sirengo sile nya tshivba. Tepo a nga pala Gholiya, wule mwama nya gingodzomo, Dhavhidhe si wonide guagani gu khuye khu Jehovha a nga ba a mu thangeya. (1 Sam. 17:37) Nigu tepo a nga vbuluga ga Pfhumu nya lidiwo Sawule, Dhavhidhe wonide gu khuye khu Jehovha a mu vbulugisidego. (Ndzi. 18, malito ma gomogo khu vbatshani) Nari khatshi Dhavhidhe a diri muthu nyo dzikhusedze, adzina na pimiside gu khuye a di gu si kodza satshavbo sile khu tshivba yaye. Ganiolu Dhavhidhe a diri muthu nyo dzinogise, khu kharato uye wonide giphaso gya Jehovha womini gwaye. — Ndzi. 138:6.

19. Ginani hi nga gi hevbulago ga giyeyedzo gya Dhavhidhe?

¹⁹ Ginani hi gi hevbulago? Gu vbwetega hi gira nya singi guvbindra gu lomba basi giphaso ga Jehovha. Hi yede gu zama gu tugula tepo Jehovha a hi phasago khiyo ni edzi a hi phasago khidzo. Ha gu ba hiri vathu nyo dzinogise, hi nati guhegedwa gwathu hi bwe hi tugula esi Jehovha a hi phasago gu gira. Nigu tepo yatshavbo hi wonago giphaso gya Jehovha, wupari wathu naye wu na engedzeya gu tiya. Isaac, ndriyathu moyo wa tigoni ga Fiji, uye a thumedego Jehovha khu myaga nya yingi, wonide lisine nya isoso. Uye wari khuye: “Nya gu khedza hwane, nyi ngu wona edzi Jehovha a nyi phasidego khidzo, gukhugeya tepo nyi nga pheya gu hevbula Bhibhiliya kala muhuno. Kha nga handro wakone, Jehovha muthu nya lisine gwangu.”

20. Ginani hi gi hevbulago ga wupari wa Dhavhidhe ni Nungungulu?

²⁰ Dhavhidhe pimedzede makhalelo ya Jehovha. Jehovha hi giride na hiri ni makodzelo nya gu pimedzeye makhalelo yaye. (Gen. 1:26) Tepo hi simamago gu hevbula khu makhalelo ya Jehovha, si na hi vbevbugeya gu mu pimedzeya. Dhavhidhe mutide gwadi Papayi  waye wa ndzadzini, khu kharato si kodzide gu Mu pimedzeya tepo a nga ba a thumisana ni vambe. Nga wona giyeyedzo nyo khaguri. Dhavhidhe ghohede Jehovha tepo a nga gira wubhayi ni Bheti-Sebha a bwe a songisa mwama waye. (2 Sam. 11:1-4, 15) Ganiolu Jehovha a di hatha gu yeyedza wuhindzi ga Dhavhidhe, mwama a yeyedzidego nuye wuhindzi ga vambe. Khu kotani nya olu Dhavhidhe a nga ba ari ni wupari nya wadi ni Jehovha, vaIsrayeli va di gu mu gola ngudzu nigu Jehovha mu thumiside kha nga giyeyedzo ga dzimbe dzipfhumu dza Israyeli. — 1 Dzipf. 15:11; 2 Dzipf. 14:1-3.

21. Guya khu Vaefeso 4:24; 5:1, khu wevbini handro hi na wu manago ha gu “fanana ni Nungungulu”?

²¹ Ginani hi gi hevbulago? Hi yede gu “fanana ni Nungungulu.” Tepo hi pimedzeyago Nungungulu, ha gu phasega ethu habune hi bwe hi hevbula nya singi khuye. Tepo hi pimedzeyago makhalelo ya Nungungulu, ha gu yeyedza gu khethu hi sanana saye. — Leri Vaefeso 4:24; 5:1.

22-23. Ginani gi na giregago ha gu vbanya khesi hi si hevbulago khu Jehovha?

²² Kha nga hi si wonidego, Jehovha a gu dzi tivegisa gwathu khu gu thumisa sivangwa ni Lito laye a gu Bhibhiliya. Libhuku lolo longa, li tade khu siyeyedzo nya sithumi nyo tumbege sa Nungungulu esi hi nga si pimedzeyago, nya nga Mosi ni Dhavhidhe. Jehovha giride gipandre gyaye. Khu kharato, anethu hi yede gu gira gipandre gyathu hi bwe hi dzigaradzeya gu hevbula nya singi khuye.

²³ Ethu gima kha hi na nga ema gu hevbula khu Jehovha. (Muh. 3:11) Nya lisima khandri esi hi si tigo khuye, ganiolu khesi hi girago khesi hi si tigo. Ha gu vbanya khesi hi si hevbulago hi bwe hi zama gu pimedzeya Papayi wathu nya lihaladzo wa ndzadzini, uye a na simama gu hi hidzimeleya. (Jak. 4:8) Khu gu thumisa Lito laye, uye a ngu hi tiyisegisa gu khuye gima kha na nga diga ava va dzi garadzeyago gu muti gwadi.