1-2. a) Ginani litshigu nya gutshulege? (Wona kwadru   O que era o jubileu) b) Ginani egi Jesu a gi ganedego ga Luka 4:16-18?

MAYIGONI nyo khaguri, gu ngu dongisedwa simotse mwendro dzifesta nyo hawulege tepo Pfhumu ya tigoni momo yi enedzago 50 myaga na yi gu fuma. Gutala nya dzitepo mwaga nyo hegise nya wu 50, wa gu tidwa kha nga mwaga nya gutshulege. Gimotse gyogyo gi nga girwa khu litshigu limwedo, semana, mwendro guvbindra, ganiolu nya mba hweya gi ngu vbindra, va bwe vathu va divala gutsaka gwatshavbo va gu pwidego.

² Hi na bhulani khu mwaga nya gutshulege nya tshukwana guvbindra ogu nya mwaga rumba wu nga ba wu girwa khu vaIsrayeli va gale tepo va nga ba tshanganisa 50 ni 50 myaga. Litshigu lolo li di gu resa gutshulega ga vaIsrayeli. Khu ginani ethu hi yedego khu hevbula khilo? Khu gu mwaga nya gutshulege wa vaIsrayeli wa gu hi dundrugisa malulamiselo nyo tsakise aya Jehovha a hi giredego. Ayo ma na hi reseya gutshulega nya gupindruge nigu hi nga phasega khugo ambari muhuno. Jesu ganede khu gutshulega gogu nyo samadzise. — Leri Luka 4:16-18.

3. Guya khu Levhi 25:8-12, vaIsrayeli va di gu phasega kharini khu mwaga nya gutshulege?

³ Si na hi vbevbugeya gu pwisisa gwadi esi Jesu a ganedego tepo a nga ganeya khu gutshulega ha gu pheya khu gu bhula khu gutshulega ogu Nungungulu a gu lulamisedego vathu vaye va gale. Jehovha a di embeya vaIsrayeli, khuye: “Mu na agisa mwaga nya livbandre magumi, mu tivisa tigoni gwanu gwatshavbo gutshulega ga vathu vatshavbo va vbanyago umo. Mwaga yoyu, gu na bani guri gunengela nya gukhongolo vbakari gwanu; muthu ni muthu a na bwelela petoni gwaye, gambe muthu ni muthu a na wuya ga valongo vaye.” (Leri Levhi 25:8-12.) Ga ndrima yi vbindridego hi bhude khedzi vaIsrayeli va phasegidego khidzo khu Sabhadho nya semana ni semana. Ahati mwaga  nya gutshulege ke, vaIsrayeli va phasegide kharini khuwo? Nga dundrugeya muIsrayeli nari ni mangava nya mangimangi, khu gighelo gyogyo a gurumedzega gu rengisa gipeto gyaye gasi gu livba mangava yoyo. Ndrani nya mwaga nya gutshulege, a di gu bweledzedwa gipeto gyaye. Khu kharato, muthu a di gu “bwelela petoni gwaye” nigu khu hwane, sanana saye si diri ni lithomo nyo vbahe petoni mule. Mwendro adzina si nga gira gu mwama nyo khaguri nari ni mangava nya mangi, khu kharato si lomba gu a dzi ningeya abune mwendro gyanana gyaye kha nga gumbi gasi gu livba mangava yoyo. Ndrani nya mwaga nya gutshulege gumbi yi di gu ‘wuya ga valongo vayo.’ Khu kharato mwalo a nga hadzi khala gumbi nya mba na gutumba! Malulamiselo yoyo mo yeyedza gu khayo khu lisine Jehovha a ngu khathala khu vathu vaye!

4-5. Khu ginani si gu na ni lisima gwathu gu hevbula khu mwaga nya gutshulege wa vaIsrayeli?

⁴ Giphaso muni gambe gi nga ba gi reswa khu mwaga nya gutshulege? Jehovha a di khuye: “Gasi gu si manegi gisiwana vbakari gwago; [Jehovha] Nungungulu wago, a na gu kategisa u andra tigoni a na gu ningago, gasi gu khala thomba yago, u li fumela.” (Dhet. 15:4) Isoso si hambanide ngudzu ni esi si giregago muhuno! Hi ngu tala gu wona sighanyi na si gu engedzeya gu ghanya, sisiwana na si gu engedzeya gu khala sisiwana.

⁵ Kha nga maKristo ethu hi mwalo vbavbatshi nya nayo wa Mosi. Isoso so thula gu khiso ethu kha hi landrisi nayo wu ganeyago khu mwaga nya gutshulege, a gu malulamiselo nya gu tshudzise dzigumbi, gu mba livbiswa mangava yadzo, ni gu dzumeleya vathu va bweleya sipetoni sa valongo vawe. (Rom. 7:4; 10:4; Efes. 2:15) Ganiolu khya lisima gwathu gu hevbula khu mwaga nya gutshulege. Khu ginani? Kholu hi nga dzi buza khu gu tshulega ogu gu hi dundrugisago malulamiselo aya Jehovha a giredego vaIsrayeli.

6. Vathu va gu vbweta gu tshudziswa ga ginani?

⁶ Hatshavbo hi ngu vbweta gutshulega kholu hi dzigumbi khu ndziya nya litsoro ngudzu — dzigumbi nya gighoho. Kha nga handro wakona, hi ngu gumba, hi ngu dwala hi bwe hifa. Nya vangi va ngu li wona lisine nya isoso  tepo va dzi khedzago avba nya libona mwendro tepo va hongolago ga dhogodheya khu kotani nya madwali. Ethu hi ngu vbeya tshivba gambe tepo hi girago sighoho. Mupostoli Pawulo ganede khuye a diri ‘gumbi nya nayo nya gighoho gi guromo givilini [gwaye].’ A di bwe khuye: “Libango langu likhongolo! Ina khu mani a na gu nyi vbulugisago wugumbini nya givili gegi gi nyi yisago gufani?” — Rom. 7:23, 24.

7. Ginani egi Isaya a gi profetidego maningano ni gu tshudziswa?

⁷ Egi gi tsakisago khu gu, Jehovha giride malulamiselo nyo hi vbulugise mwendro gu hi tshudzisa avba nya gighoho. Jesu khuye khamba nya gutshulega gogo. Guvbindra 700 myaga Jesu nasi guti mafuni, muprofeti Isaya profetide khuye mindru ga tshigu vathu va di hadzi manega ni gutshulega guvbindra ogu gu manegidego ni vaIsrayeli khu mwaga nya gutshulege. A di lova khuye: ‘Liphuvbo la Mune, PFHUMU Nungungulu lomo avbo gwangu, kholu [Jehovha] a nyi todzide khu mafura, a nyi wumbela gasi nyi huwelela mahungu maphya ga avo va vbedego tshivba; a nyi rumide guya hawulugisa avo va gu ni myonyo yi khuvekidego, ni gu huwelela gutshulega ga dzigumbi.’ (Isa. 61:1) Giprofeto gegi gya gu thuma ga mani?

8. Giprofeto gya Isaya maningano ni gu tshudziswa gya gu thuma ga mani?

⁸ Giprofeto nya lisma maningano ni gutshulega gi phede gu tadzisega hwane nya gu ba Jesu a phede thumo waye nya gu tshumayele. Tepo a nga hongola sinagoga ga lidhoropa a velegedwego iyo Nazareta, Jesu a di lereya maJudha ma nga ba ma tshanganide vbale giprofeto gegi gya Isaya. Jesu thumisede uye malito yaya: ‘Liphuvbo la Pfhumu li nyi tshigede, kholu li nyi phasede gasi guya hevbudza sisiwana Mahungu nya Yadi; li nyi rumede guya tivisa dzigumbi gutshulega gwawe, guya tivisa sikhumu guwoniswa gwawe, ni ga vasaniseki gutshulega gwawe; ni gu tivisa mwaga nya wuhigo wa Pfhumu.’ (Luka 4:16-19) Jesu gi tadziside kharini giprofeto gyogyo?

9. Vathu nya vangi teponi ya Jesu va diri ni gutumba nya gutshulega muni?

⁹ Gutshulega gu profetidwego khu Isaya, a gu ogu gu leridwego khu Jesu gu phede gu manwa khu vathu nyo khaguri lizana myaga nyo pheye. Jesu tiyiside isoso, khu gu khuye: “Ma tadzisegide muhuno magana yaya mu ngari gu ma pwago.” (Luka 4:21) Gutala nya ava va pwidego Jesu na gu leri, adzina saye va dzipwide na va gu tshulegide avba nya politika nya mufumo wa Roma. Si nga gira na va dzipwide nga edzi va dzipwidego khidzo vama vavili, va nga khavo:  “Hi di khethu mwendro khuye a natago ata vbanyisa Israyeli.” (Luka 24:13, 21) Hi ngu dziti gu khethu Jesu kha kutsa valandreyi vaye gu mba engisa nayo wa Roma. Wulangani nya isoso, uye va kutside gu ningeya “ga Sezari iso si gu sa Sezari.” (Mat. 22:21) Ina ka, Jesu resede kharini vathu gutshulega khu tepo yoyo?

10. Jesu tude ndziya nya gu vathu va tshulega ga ginani?

¹⁰ Gyanana gya Nungungulu gi dzude gasi guta phasa vathu gu mana gutshulega khu dzindziya dzimbili. Nyo pheye, Jesu tude ndziya nya gu vathu va tshulega ga sihevbudzo nya malipha sa vathangeyi nya wukhongeyi. Gutala nya vaJudha dzitepo dzile, va di gu gurumedzwa gu landrisa sihevbudzo nya vathu ni gu khodwa silo nya malipha. (Mat. 5:31-37; 15:1-11) Vathu va nga ba va dzi embeya gu khavo va gu phasa vambe gu thumeya Jehovha, avo vamune va di si thumeyi Jehovha khu ndziya nya yadi, khu kharato avo va diri sikhumu khu ndziya nyo khaguri. Khu gu ba va bombide Mesiya ni gu wonegeya ga liphuvboni a va yeyedzidego, avo va simamide gidemani ni gighohoni. (Joh. 9:1, 14-16, 35-41) Khu sihevbudzo saye ni giyeyedzo gyaye nya gyadi, Jesu yeyedzide edzi vathu va nga hadzi tshulega khidzo ga sihevbudzo nya malipha. — Marko 1:22; 2:23–3:5.

11. Khu yevbini ndziya nya wuvili eyi Jesu a tshudzisidego khiyo vathu?

¹¹ Nya wuvili, Jesu tshudziside vathu ga wugumbi nya gighoho nya mavelego. Khu gu thumisa muphaso wa Jesu, Nungungulu a na divaleya sighoho sa vatshavbo vale va yeyedzago gukhodwa ga muphaso wowo va bwe va yeyedza gukhodwa gwawe khesi va si girago. (Hebh. 10:12-18) Jesu a di khuye: “Mwa gu tshudwa khu gyanana, mu na bani mu tshulegide khu lisine.” (Joh. 8:36) Gutshulega gogo gukhongolo ngudzu guvbindra ogu gu nga ba gu manwa khu vaIsrayeli mwagani nya gutshulege. Khu giyeyedzo, mwama a nga ba a tshulega wugumbini ndrani nya mwaga nya gutshulege si di gu kodzega gu bweleya a khala gambe gumbi, nigu khu mahegiso afa.

12. Khu vamani va phedego khavo gu phasega khu gutshulega gu huweledwego khu Jesu?

¹² Khu Pentekosta nya 33 E.C., Jehovha todzide khu liphuvbo laye nya guage vapostoli ni vambe vama ni vanyamayi nyo tumbege. Uye a di va phara kha nga sanana saye nigu mindru ga tshigu va na wuswa va hongola ndzadzini gasi vaya fuma ni Jesu. (Rom. 8:2, 15-17) Avo khavo va phedego khavo gu phasega khu gutshulega gu huweledwego khu Jesu sinagogani ya Nazareta. Vama ni vanyamayi vovo kha vari dzigumbi gambe nya sihevbudzo nya malipha sa vathangeyi nya wukhongeyi nya giJudha ni  sihena sawe si si seketedwigo omu nya lito la Nungungulu. Nungungulu va tshudziside gambe ga gighoho gi yisago gufani. Malulamiselo ya Jehovha nya gu hi reseye gutshulega ma phede tepo a todzidego valandreyi va Kristo khu 33 E.C. nigu ma na hegisa tepo wu na vbeyago Mufumo nya 1000 Myaga wa Jesu. Silo muni nya sadi si na gu ba si giregide guhegisani nya Mufumo wa Jesu nya 1000 myaga?

13-14. Gu diga maKristo matodzidwego, khu vamani gambe va nga manago gutshulega ogu gu huweledwego khu Jesu?

¹³ Muhuno dzimiliyoni nya vathu nyo tumbege va dugago khu mayigoni yatshavbo vo gira gipandre nya “dzimbe dzinvuta.” (Joh. 10:16) Avo kha va ranwa khu Nungungulu gasi guya fuma ni Jesu ndzadzini. Vbavbandze nya isoso, Bhibhiliya yi ngu va ninga gutumba nyo vbanye kala gupindruga mafuni. Ina khugo gutumba gwago ugogo?

¹⁴ Ambari olu, u nga phasega khu silo nyo khaguri nya sadi esi si lumbago ava va todzidwego va na fumago Mufumoni wa Nungungulu. Khu gukhodwa gwago ga novba wu vbaladzidwego wa Jesu, u nga lomba gu divaledwa sighoho sago. Khu kharato u na tsakedwa khu Nungungulu u bwe u manega ni livhalo li agidego mahoni gwaye. (Efes. 1:7; Gutu. 7:14, 15) Nga dundrugeya gambe khu makategwa u ma manago kholu u tshudzisidwego ga wugumbi nya sihevbudzo nya malipha. Jesu a di khuye:  “Mu natini lisine, gambe ilo lisine li na mi gira vathu nya gutshulege.” (Joh. 8:32) Ngapwani gutsaka hi gu pwago khu gutshulega gogo!

15. Gutshulega muni ni makategwa muni hi nga ma vireyago mindru ga tshigu?

¹⁵ U nga vireya gutshulega nya gukhongolo mindru ga tshigu. Nugunugu Jesu a na fuvisa khu guvbeleya wukhongeyi nya malipha ni mifumo yeyi nya sidambane. Nungungulu a na vhikeya gitshungu nya gikhongolo nya vathu va mu thumeyago, a bwe a va dzumeleya gu dzi buza khu makategwa paradhesini mafuni. (Gutu. 7:9, 14) Vathu nya vangi ngudzu va na wuswa va bwe va tshudziswa ga sigaradzo satshavbo si vangwago khu gighoho gya Adhamo. — Mith. 24:15.

16. Gutshulega muni nyo tsakise ogu vathu va na gu manago mindru ga tshigu?

¹⁶ Ndrani nya Mufumo nya 1000 Myaga, Jesu gumogo ni vaphasedzeyi vaye va na phasa vathu gu mana womi nyo vbeleye ni wupari nyo vbeleye ni Nungungulu. Tepo yoyo nyo wusedzwe ni gutshudziswa yi na fana kha nga mwaga nya gutshulege wa dziteponi dza vaIsrayeli. Kha nga handro wakone, vatshavbo va thumeyago Jehovha khu gutumbega va na khala vathu nyo vbeleye va tshudzisidwego gighohoni.

17. Ginani egi Isaya 65:21-23 a gu khuye gi na dugeleya vathu va Nungungulu? (Wona foto avba nya kapa.)

¹⁷ Isaya 65:21-23 a gu tshamuseya edzi womi wu na khalago khidzo mafuni mindru ga tshigu. (Leri.) Kha hi na nga khala migara ni gu hamuga gilo nyo thume. Vbavbandze nya isoso, Bhibhiliya yari khiyo vathu va Nungungulu teponi yoyo va na gira mithumo nyo tsakise. Guvbeyani nya tepo yoyo, hi nga tiyisegani gu khethu sivangwa “si na tshudwa wugumbini, ni gumbembani, gasi si guta hengela wudhumoni nya gutshulege nya sanana sa Nungungulu.”— Rom. 8:21.

18. Khu ginani hi nga khodwago gu khethu hi na ba hiri ni wumindru nyo tsakise?

¹⁸ Kha nga olu Jehovha a giridego malulamiselo gasi gu phasa vaIsrayeli gu ninganiseya thumo ni gu hefemula, uye a na gireya sasimweso vathu vaye ndrani nya 1000 Myaga nya Mufumo wa Kristo. Kha hi kanakani gu khethu hi na ba hiri ni tepo nyo khathaleye silo sathu nya liphuvbo. Gukhozeya Jehovha khugu sihalo nyo mane gutsaka muhuno, nigu si na ba siri kharato gambe mafuni nya maphya. Vatshavbo vathu nyo tumbege va na ghiya khu gutsaka ndrani nya Mufumo wa Kristo nya 1000 Myaga kholu hatshavbo hi na ba hiri ni mithumo nyo tsakise hi bwe hi thumeya Nungungulu wathu.