U ngu dundruga?
Ina u nga hlamula siwudziso sesi khu guya khu dzirevhista Mukhedziseyi nya 2019?
Gyo thula ginani gitumbiso gya Nungungulu gi gu khigyo: “Matshari yatshavbo ma giridwego gasi gu gu sasela, kha ma na gu gira gilo”? (Isa 54:17)
Hi nga tumba gu khethu Nungungulu a na hi vhikeya ga matshari nya tshivba ma fanago ni phuvbo nyo thise yi furugedzwago khu vathu nyo vivbe. (Isa 25:4, 5) Valala vathu gima kha va na nga si kodza gu hi gireya guvivba kala gupindruga. — w19.01, dzipaji. 6-7.
Edzi Nungungulu a pharidego khidzo Vakhanani ni vaIsrayeli nya mba engisa si yeyedzide kharini gululama gwaye?
Nungungulu a di gu gira malulamiselo nya gu va lamudwa vale va nga ba va nyenyezisa sigiro nya malawu mwendro vale va nga ba va havisa vanyamayi ni sanana. Uye a di gu kategisa ava va nga ba va mu engisa ni gu phara vambe khu ndziya nyo lulame. — w19.02, dzipaji. 22-23.
Ginani hi yedego gu gira ha gu ba hiri wulangani nyo khaguri khavbovbo muthu nyo khaguri a sirigo Fakazi a pheya gu gira nombelo?
Hi nga simama gu degula ni gu yeyedza githawo ganiolu hi si ganeyi gu khethu “amen” mwendro gu pharana mandza ni vambe vathu. Hi nga dzi gireya nombelo wathu khu monyoni. — w19.03, paj. 31.
Gu pfinya sanana gighoho nya gikhongolo khu ndziya muni?
Gu pfinya sanana gighoho ga igyo sanana, ga libandla, ga mifumu nya mafu, ni ga Nungungulu gambe. Omu nayo wu lumbago gu khuwo mahungu maningano ni gu sagaredwa nya sanana ma yiswa wufumutunu madhota ma gu gira isoso kamo. — w19.05, dzipaji. 9-10.
U nga vbindrugedza kharini mwendro gu tshukwadzisa kharini mapimiselo yago?
Sihalo wakone khowu: Si bhuleye ga Jehovha khu nombelo. Dundrugeya khesi u si hevbulago na wuri ni makungo nyo dzi gevisise. U bwe u hatha khu wugengeyi dzipari dzago. — w19.06, paj. 11.
Ginani hi nga girago gasi gu dzi dongiseya gutshaniswa?
Hi yede gu tiyisa wupari wathu ni Jehovha. Tumba gu khuwe uye a ngu hi haladza nigu gima kha na nga hi diga. Leri Bhibhiliya tshigu ni tshigu u bwe u gombeya tepo yatshavbo. Tiyisega gu khuwe makategwa nya Mufumo ma na tadzisega. Vegisa mavhesi ni dzindzimo u dzi golago mapimoni gwago. — w19.07, paj. 2-4.
Ginani hi nga girago gasi gu phasa valongo vathu gu vbuluga?
Si na ni lisima ngudzu gu hi yeyedza pweya wusiwana valongo vathu, hi diga mithumo yathu nya yadi yi ninga wufakazi hi bwe hi laphisa-monyo ni gu va yeyedza wuwadi. — w19.08, dzipaji. 15-17.
Ethu ha gu hefemudzwa kharini, kha nga gutumbisa ga Jesu omu ga Matewu 11:28?
Ethu hi na ni vathangeyi nya maKristo nya lihaladzo, sithumi-khwathu nya sadi ni thumo nya wadi. — w19.09, paj. 23.
Nungungulu a gu hi ninga kharini gu dogoreya ni tshivba nyo gire gilogyo?
Tepo hi lerigo Lito la Nungungulu ni gu dundrugeya khesi hi si hevbulago, Nungungulu a na hi ninga gu dogoreya ni tshivba nyo gire gugola gwaye. Liphuvbo laye li nga tshukwadzisa makodzelo yathu. — w19.10, paj. 21.
Silo muni hi yedego gu gira na hi nga si hungi makungo nya lisima ngudzu?
Livbandre silo hi nga girago: Gira wugevisi nyo vbeleye. Gombeya gasi gu mana guti. Pimisa gwadi khu gighelo nya makungo yago. Manega ni misuwo nyo kongome. Wona silo khedzi si gu idzo. — w19.11, dzipaji. 27-29.
Ina malipha nyo khayo hefemulo kha wufi ma phelede avba nya esi Sathane a embedego Evha?
So wonegisa gu khatshi ne. Sathane a di embeya Evha gu khuye kha na ngafa, kha ganeya gu khuye a na gira nga khatshi fude. Yatshavbo mawonelo nya wukhongeyi nya malipha ma vbindride ni ndrambi ya Nowa. Gukhodwa nya hefemulo wu si figo si nga gira na gu phede Nungungulu na si phalalegisi vathu va nga ba va vbaha predhiyu ya Bhabheli. — w19.12, paj. 15.