1. Ginani egi Jehovha a ningidego vavelegi?

JEHOVHA vangide patwa nyo pheye ni gudogoreya nyo manege ni sanana. Bhibhiliya yari khiyo: “Sanana giningwa hi hakhago khu ga [Jehovha].” (Ndzi. 127:3) So thula ginani isoso? Nga dundrugeya pari yago na yi gu lomba gu khiyo u yi phareya dzitsapawu nya dzingidzingi. U di hadzi gu dzipwa kharini? Kha hi kanakani gu khethu u di hadzi dzipwa matshandza khu gutumbwa gogo. Ganiolu u di hadzi garadzega gambe khedzi u na dzi sayisago khidzo dzitsapawu dzodzo. Jehovha Pari yathu nya yikhongolo, ningide vavelegi gilo nya lisima ngudzu nyo vbindre dzitsapawu gasi gu gi khathaleya. Va ningide thumo nyo tiyisege gu khavo sanana sawe si ngu khathaledwa gwadi nigu si tsakide gani.

2. Hi na bhula khu ginani?

² Khu mani a yedego gu hunga gu khuye patwa wu yede gu velega sanana, nigu lini wu yedego gu velega? Ginani egi vavelegi va nga girago gasi gu phasa sanana sawe gu manega ni gutsaka guvbanyani? Hongoleni hi wonani matshina nyo khaguri nya Lito la Nungungulu ma nga phasago mipatwa nya maKristo gu hunga makungo nya yadi.

3. a) Khu mani a yedego gu hunga gu khuye patwa wu yede gu velega sanana mwendro ne? b) Khu yavbini matshina nya Bhibhiliya aya dzipari ni valongo va yedego gu dundrugeya khayo?

³ Mayigoni nyo khaguri, vathu va gu vireya gu khavo mipatwa yi ngarigo gu tshadha yi dzegeya gu pheya gu velega sanana. Mipatwa yoyo yi nga gurumedzwa khu valongo vawe mwendro vambe vathu gu landreya gihena gyogyo. Jethro, ndriyathu moyo wa Asia, wari khuye: “Libandlani mipatwa yi gu na ni sanana yi ngu gurumedza eyi yi gu mwalo sanana gu pheya gu velega sanana.”  Jeffrey, mumbe ndriyathu wa Asia, wonide esi: “Vambe va ngu oloveya gu embeya mipatwa yi gu mwalo sanana gu khavo tepo va na gumbago kha va na nga mana muthu nyo va sayise.” Ambari ulolo, patwa ni patwa wu yede gu hunga wabune gu khuwo wu na velega sanana mwendro ne. Khavo kamo va yedego gu hunga kholu uwowo i rwalo wawe. (Gal. 6:5) Khu lisine dzipari ni valongo va gu vbweta gu khavo patwa wu ngarigo gu tshadha wu tsaka, ganiolu va yede gu dundruga gu khavo patwa khuwo wu yedego gu hunga esi wu na girago. — 1 Tes. 4:11.

4-5. Mipatwa yi yede gu bhula khu silo muni nya sivili, nigu lini va yedego gu bhula khiso? Tshamuseya.

⁴ Patwa wu hungidego gu velega sanana gu vbwetega wu dundrugeya khu siwudziso sivili nya lisima: Nyo pheye, lini va vbwetago gu velega sanana? Nya wuvili, sanana singani va si vbwetago? Lini patwa wu yedego gu bhula khu siwudziso sesi? Nigu khu ginani siwudziso sesi si gu na ni lisima ngudzu?

⁵ Na wu si gu tshadhi, patwa wu na gira gwadi wo dzegeya gu hunga gu khuwo wu na velega sanana mwendro ne. Khu ginani? Khu gu si na ni lisima ngudzu gu avo vavavili va pwana ga mahungu yaya. Gimbe gambe khu gu, gu vbwetega va tiyisega gu khavo va dongide gu velega sanana gani. Yimbe mipatwa yi ngu hunga gu vireya mwaga moyo mwendro mivili gasi gu velega sanana kholu gu khathaleya sanana si ngu vbweta tshivba nya yingi ni tepo nya yingi ya vavelegi. Khu gighelo gyogyo, va gu vireyanyana si na va dzumeleya gu thumisa tepo yoyo gasi va dzi pwananisa gwadi ni womi nya vathu vavili va tshadhidego nigu isoso si na va phasa gambe gu tiyisa wupari wawe kha nga vadzegani.— Efes. 5:33.

6. Yimbe mipatwa yo khuhwa kharini khu dzitepo hi vbanyago ga idzo?

⁶ Mambe maKristo ma ngu hunga gu pimedzeya giyeyedzo gya sanana sa Nowa ni vagadzi vaso. Mipatwa yoyo nya yiraru kha ya velega sanana. (Gen. 6:18; 9:18, 19; 10:1; 2 Ped. 2:5) Jesu fananiside matshigu yathu ni ‘matshigu ya Nowa,’ nigu kha hi kanakani gu khethu ha gu vbanya ‘dziteponi nya sigaradzo.’ (Mat. 24:37; 2 Thim. 3:1) Khu gighelo gyogyo, yimbe mipatwa yi ngu hunga gu mba velega sanana gasi va feya gu gira nya singi thumoni wa Jehovha.

7. Matshina ma gomogo omu ga Luka 14:28, 29 ni Mavingu 21:5, ma gu phasa kharini mipatwa?

⁷ Tepo va hungago gu khavo va na velega sanana gani, mwendro tengo nya sanana va si vbwetago, mipatwa yi gengedego ya gu landreya wusingalagadzi wu gomogo omu ga Luka 14:28, 29 (Leri.) Vavelegi va ngu dziti gu khavo  gu dandrisa sanana kha gu gastari basi dzitsapawu, gu ngu vbweta gambe tshivba ni tepo. Khu kharato, si na ni lisima ngudzu gu mipatwa yi dundrugeya khu siwudziso nya nga esi: ‘Ina si na hunga gu hatshavbo havavili hi thuma gasi hi khathaleya esi si na vbwetegago ndrangani? Ina hi ngu pwana ga esi moyo ni moyo wathu a na si vbwetago ndrangani? So hunga gu khiso hatshavbo hi thuma, khu mani a na khathaleyago sanana sathu? Khu mani a na kutsedzeyago esi si pimisago ni esi si girago?’ Tepo mipatwa yi bhulago gwadi khu siwudziso sesi, ya gu gira esi si ganedwago khu Mavingu 21:5. — Leri.

8. Mipatwa yi yede gu vireya sigaradzo muni, nigu ginani egi mwama nya lihaladzo a girago?

⁸ Papayi ni mamayi gu vbwetega va thumisa tshivba yawe ni tepo yawe gasi va khathaleya gyanana gyawe. Khu kharato, abari gu patwa nyo khaguri wu na ni sanana nya singi si nga handzamedzana khu tepo yayimweyo, si nga va garadzeya gu si khathaleya gwadi gimwegyo khu gimwegyo. Mipatwa nyo khaguri yi gomogo giemoni gyogyo, yi ngu ganeya gu khiyo dzi ngu wuya nya mba ghudwa. Mamayi a nga dzipwa na vbede tshivba tepo yatshavbo. Nigu isoso si di hadzi gu khuha longoloko waye nya gihevbulo, gu gombeya ni thumo waye nyo tshumayele. Adzina si di hadzi mu gira gambe a si vegi gwadi gupima mitshanganoni ni gu phasega gwadi khiyo. Khu lisine, mwama a gu ni lihaladzo a na gira esi a si kodzago gasi gu phasa mwangadzi waye tepo a khathaleyago gyanana mitshanganoni ni gaya. Khu giyeyedzo, a di hadzi phasa mwangadzi waye khu mithumo ya ndrangani. A na dzi garadzeya gambe gu tiyisega gu khuye, ina vatshavbo va ngu phasega gwadi khu wukhozeyi nya ndranga gani. Nigu vapapayi nya maKristo gu vbwetega va hongola gutshumayelani ni dzingamo dzawe.

9-10. Ginani egi vavelegi va yedego gu gira gasi gu phasa sanana sawe?

⁹ Khu sevbini silo nyo khaguri esi vavelegi va nga girago gasi gu phasa sanana sawe gu hevbula gu haladza Jehovha? Va nga vhikeya kharini sanana sawe ga dzimhango dzi gomogo mafuni momu? Hongoleni hi wonani silo nyo khaguri esi vavelegi va nga girago.

¹⁰ Gombeya u lomba gu phaswa khu Jehovha. Nga wona giyeyedzo hi ningidwego khu Manowa ni mwangadzi waye, avo va khadego vavelegi va Samisoni. Tepo Manowa a nga tugula gu khuye uye ni mwangadzi waye va na velega gyanana, avo va di lomba gu khavo Jehovha a va phasa gu dandrisa gyanana gyawe.

11. Vavelegi va nga pimedzeya kharini giyeyedzo gya Manowa, kha nga si lovidwego ga Valamuli 13:8?

¹¹ Nihad ni Alma, vatago khu Bósnia-Herzegovina, va hevbude khu giyeyedzo gya Manowa.  Va gu tshamuseya esi: “Kha nga Manowa, hi di lomba gu kethu Jehovha a hi hevbudza edzi hi nga khalago khidzo vavelegi nya vadi. Nigu Jehovha hlamude milombelo yathu khu dzindziya nya dzingi, khu gu thumisa milowo, mabhuku ma seketedwago omu nya Bhibhiliya, mitshangano yathu nya libandla ni mitshangano nya yikhongolo.” — Leri Valamuli 13:8.

12. Siyeyedzo muni esi Mariya ni Josefa va vegedego sanana sawe?

¹² Hevbudza khu giyeyedzo gyago. Esi u si ganeyago si na ni lisima, ganiolu esi u si girago khiso si khuhago ngudzu sanana sago. Kha hi kanakani gu khethu Josefa ni Mariya va vegede giyeyedzo nya gyadi sanana sawe, gupata ni Jesu. Josefa a di gu thuma khu gu dzi garadza gasi gu sayisa ndranga yaye. Gimbe gambe khu gu, Josefa kutside vandrangani gwaye gu ninga lisima silo nya liphuvbo. (Dhet. 4:9, 10) Josefa a di gu hongola ni ngamo yaye Jerusalema mwaga ni mwaga gasi guya gira phasika, ambari olu nayo wu nga ba wu si rumi isoso. (Luka 2:41, 42) Vambe vapapayi dziteponi dzile, si nga gira na va pimiside gu khavo gu gira liendro lile ni ngamo yawe yatshavbo si di hadzi garadza ngudzu si bwe si vbweta dzitsapawu nya dzingi ni gu dzega matshigu nya mangi. Ambari ulolo, Josefa a di gu ninga ngudzu lisima silo nya liphuvbo a bwe a hevbudza sasimweso sanana saye. Mariya nuye a di gu yiti gwadi milowo. Khu malito ni sigiro saye, uye a hevbudzide sanana saye gu haladza Lito la Nungungulu.

13. Patwa moyo wu pimedzede kharini giyeyedzo gya Josefa ni Mariya?

¹³ Nihad ni Alma, va khumbugidwego gupheyani, va di gu vbweta gu landreya giyeyedzo gya Josefa ni Mariya. Isoso si va phaside kharini gu phasa gyanana gyawe gu haladza ni gu thumeya Nungungulu? Vari khavo: “Khu mavbanyelo yathu, hi zamide gu yeyedza gyanana gyathu edzi si gu na ni lisima khidzo guvbanya khu guya khu matshina nya milayo ya Jehovha.” Nihad a gu engedzeya esi: “Khala muthu u vbwetago gu khuwe gyanana gyago nigyo gi khala.”

14. Khu ginani vavelegi va yedego guti ava va gu dzipari dza sanana sawe?

¹⁴ Phasa sanana sago gu hatha dzipari nya dzadi. Papayi ni mamayi gu vbwetega vati ava va gu dzipari dza gyanana gyavo va bwe vati mavbanyelo ya vathu vovo. Isoso so pata gu vavelegi vati ava va bhulago ni sanana sawe omu nya dzisayiti nya mabhulo mwendro omu nya mitshini yaso. Dzipari dzodzo dzi nga kutsedzeya esi si pimiswago ni gu girwa khu sanana sago. — 1 Kor. 15:33.

15. Ginani egi vavelegi va nga gi hevbulago ga giyeyedzo gya Jessie?

¹⁵ Ahati vavelegi va gu ba va si si kodzi gu thumisa dzikomputadhori ni dzitelefone ke? Jessie, papayi moyo wa tigoni ga Filipinas, wari khuye: “Kha hiti nya singi khu mitshini. Ganiolu isoso kha si hi tandregisi gu hevbudza sanana sathu khu dzimhango dzi gu na ni mitshini.” Jessie kha himbedzeyi sanana saye gu thumisa mitshini khu kotani nya olu uye a si yi kodzigo gu yi thumisa. A gu tshamuseya esi: “Nyo kutsa sanana sangu gu thumisa mitshini gasi gu hevbula lidimi nya liphya, gu dongiseya mitshangano ni gu hevbula Bhibhiliya tshigu ni tshigu.” Wa gu ba uri muvelegi, ina u ngu oloveya gu leri ni gu bhula ni sanana sago khu wusingalagadzi nya wadi maningano ni gu thedzeya dzifoto omu nya internet, wu gomogo omu jw.org^®, avba nya gipandre “Vaphya”? Ina u ngu ba u sixitiri navo dzivhidhiyu Uwe ni mitshini, khu mani a rumago mumbe? ni Sê cuidadoso ao Usares Redes Sociais? * Dzivhidhiyu dzodzo dzi nga gu phasa gu hevbudza sanana sago edzi si nga thumisago khidzo mitshini khu wugengeyi.— Mav. 13:20.

16. Ginani egi gi girwago khu vavelegi nya vangi nigu khu yevbini mihandro yakone?

 ¹⁶ Vavelegi nya vangi va ngu dzi garadza gasi gu vbwetedzeya dzindziya nya gu sanana sawe si gira wupari ni vathu nya siyeyedzo nya sadi. Khu giyeyedzo, N’Déni ni Bomine, patwa moyo wa Costa do Marfim, wu ngu tala gu hakha muwoneleyi nya gipandre gaya gwawe. N’Déni wari khuye: “Isoso si kutside ngudzu gyanana gyathu. A di pheya gu thuma kha nga piyonero nigu olu o thuma kha nga mutshikedzi wa muwoneleyi nya gipandre.” Ina u nga vbweteya sanana sago dzipari nya nga edzi?

17-18. Lini vavelegi va yedego gu pheya gu hevbudza sanana sawe?

¹⁷ U nga vireyi gu khuwe sanana sago si dandra gasi gu si hevbudza. Vavelegi hi ganedego khavo gupheyani va hevbudzide sanana sawe khu ndziya nya yadi. (Mav. 22:6) Nga wona giyeyedzo gya Thimoti, oyu khu gu gimbiya nya tepo a thumidego ni mupostoli Pawulo. Mamayi wa Thimoti, Ewunise ni vhovho waye Loyidhe, va phede gu hevbudza Thimoti na ngari likeke. — 2 Thim. 1:5; 3:15.

¹⁸ Jean-Claude ni Peace, wumbe patwa wa Costa do Marfim, wu si kodzide gu hevbudza satshavbo sanana sawe nya livbandre na gimwegyo gu haladza Jehovha. Ginani gi va phasidego gu dugeleya? Avo va di landreya giyeyedzo gya Ewunise ni Loyidhe. Vari khavo: “Guvelegwa si nga velegwago, hi di dzegeya gu pheya gu si hevbudza Lito la Nungungulu.”— Dhet. 6:6, 7.

19. Ginani gi pategago avba nyo hevbudze sanana sago Lito la Nungungulu?

¹⁹ So thula ginani gu hevbudza sanana sago lito la Nungungulu? Omu ga Dhewuteronome 6:7, lito nya giHebheru li vbindrugedzedwego gupwani “gu hevbudza” lo thula “gu hevbudza na wu gu wuyedzeya dzitepo nya dzingi.” Gasi gu gira isoso, vavelegi gu vbwetega va dzi tshiyela tepo nyo vbungadze ni sanana sawe nya sidugwana tshigu ni tshigu. Dzimbe dzitepo va nga goroga khu gu zama gu wuyedzeya gu hevbudza sasimweso sanana sawe. Ambari ulolo, avo va nga wona magirelo yoyo kha nga lithomo nyo hevbudze sanana sawe gu pwisisa Lito la Nungungulu ni gu vbanya khilo.

20. Tshamuseya edzi Ndzimo 127:4 yi nga thumiswago khidzo guhevbudzani nya sanana?

²⁰ U yede gu siti gwadi sanana sago. Ndzimo 127 ya gu fananisa sanana ni matshari. (Leri  Ndzimo 127:4.) Kha nga olu matshari ma nga girwago khu dziferameta nyo hambanehambane, dzi hambanago gambe khu makhalelo, gi mwalo gyanana gi fanago ni gimbe. Khu kharato, vavelegi gu vbwetega va hunga edzi va na hevbudzago khidzo sanana sawe gimwegyo khu gimwegyo. Patwa moyo wa tigoni ga Israyeli wa matshiguni yathu, wu kutsidego sanana sawe sasivili gu thumeya Jehovha, va ngu hi embeya esi si va phasidego: “Hi di gu gimbidziseya gihevbulo nya Bhibhiliya sanana sathu gimwegyo khu gimwegyo.” Khu lisine hungo ni hungo nya ndranga a na hunga gu khuye ina mahevbudzelo yaya ma ngu lombega ni gu kodzega ndrangani gwaye gani.

21. Vavelegi va nga vireya gu khavo Jehovha a va phasa kharini?

²¹ Dzimbe dzitepo si nga va garadzeya vavelegi gu hevbudza sanana sawe, ganiolu sanana giningwa va ningidwego khu Jehovha. Uye a ngu dzina gu va phasa tepo yatshavbo. Dzi emisede gu engiseya milombelo ya vavelegi. Nigu uye a gu hlamula milombelo yawe khu gu thumisa Bhibhiliya, mabhuku yathu, wusingalagadzi va ningwago khu vavelegi nyo vidzwe libandlani gumogo ni giyeyedzo gyawe nya gyadi.

22. Khu sevbini silo nya lisima ngudzu esi vavelegi va nga ningago sanana sawe?

²² Vathu nyo khaguri vari khavo si ngu dzega tanga 20 myaga gasi gu hevbudza gyanana, ganiolu vavelegi gima kha va digi gu khala vavelegi. Silo nya lisima esi va nga ningago sanana sawe, lihaladzo, tepo, ni gu si hevbudza Bhibhiliya. Ganiolu gyanana ni gyanana gi na dandra khu madandrelo yagyo. Ambari ulolo, sanana nya singi si dandrisidwego khu vavelegi va haladzago Jehovha si ngu dzipwa kha nga ndriyathu moyo wa Asia, nyo pwani khu Joanna Mae, a nga khuye: “Nyo khedza hwane nyi wona edzi vavelegi vangu va nyi khathaledego khidzo, nyi ngu va bonga ngudzu khedzi va nyi dandrisidego khidzo ni gu nyi hevbudza gu haladza Jehovha. Kha va nyi ninga basi womi, ganiolu womi nyo tsakise ngudzu.” (Mav. 23:24, 25) Dzimiliyoni nya vandriyathu va ngu dzipwa khu ndziya yamweyo.