INA u ngu dzi wona kha nga muthu nyo bonge? Egi giwudziso egi moyo ni moyo wathu a yedego gu dundrugeya khigyo. Bhibhiliya yi profetide gu khiyo matshiguni yathu gu di hadzi tala khu vathu nya mba “bonga.” (2 Thim. 3:2) Adzina u ngu tshangana ni vathu va vireyago gu khavo vambe va va gireya silo mwendro gu va ninga silo nyo khaguri. Khu kotani nya isoso, avo vo dzipwa na vari mwalo gighelo nyo bonge khesi va giredwego. Khu lisine, kha si tsakisi gu vbanya nu randredwe khu vathu vovo.

Gu hambana ni vathu vovo, sithumi sa Jehovha sa gu kutswa gu khala “vathu va kodzago gubonga.” Ethu ha gu ‘bonga Nungungulu ga silo satshavbo.’ (Kol. 3:15; 1 Tes. 5:18) Khu lisine, gu haguleya liphuvbo nya gubonge khyadi ngudzu gwathu. Gu na ni sighelo nya singi si hi kutsago gu gira isoso.

Gighelo nya litshina gi hi kutsago gu haguleya liphuvbo nyo bonge khu gu ilo li ngu hi phasa gudzipwa gwadi. Tepo muthu nyo khaguri a bongago vambe a ngu tala gu dzipwa na tsakide, nigu oyu a bongwago nuye a gu tsaka. Khu ginani gubonga gu hi ningago gutsaka gu bwe gu tangadzisa vambe? Nga wona giyeyedzo gegi: O tshuka muthu nyo khaguri a dzi emiseya gu thumisa tepo yaye gasi gu gu gireya gilogyo, ina khandri o yeyedza gu khuye gilo gyogyo gi ngu gu ningana? Uye khu lisine a ngu khathala khuwe. Tepo u tugulago isoso, u na dzipwa na wu tsakide. Rute dzipwide kharato. Bhowazi yeyedzide wuhindzi ga Rute. Kha hi kanakani gu khethu Rute tsakide ngudzu khu wona gu khuye Bowazi a di gu khathala khuye. — Rute 2:10-13.

Si na ni lisima ngudzu gu yeyedza gubonga gwathu Nungungulu. Khu lisine, dzimbe dzitepo u ngu ba u dundrugeya khu siningwa nya singi sa liphuvboni ni nyamani hi ningidwego khu Nungungulu nigu uye a ngo simama gu hi ninga siningwa soso. (Dhet. 8:17, 18; Mith. 14:17) Vbavbandze nyo dundrugeye khu tepo nya yidugwana basi, gasi gu yeyedza gubonga gwago khu wuwadi wa Nungungulu, khu ginani u gu mba dzi tshiyela tepo nyo dundrugeye gwadi khu makategwa aya Nungungulu a gu ningidego mwendro a ningidego vathu u va golago? Gu dundrugeya khu wuhindzi wa Muvangi wathu si na engedzeya gubonga gwago khuye si bwe si engedzeya gu gu yeyedza lihaladzo laye khuwe. — 1 Joh. 4:9.

Hi yede gu dundrugeya khesi Jehovha a hi ningago hi bwe hi mu bonga khu wuwadi waye. (Ndzi. 100:4, 5) Kha nga si khumbugidwego, “gubonga vambe khiyo mweyo nya dzindziya nyo mane khiyo gutsaka.”

Gimbe gighelo gi gu girago u phasega khu gu yeyedza gubonga khu gu ugo gu ngu tiyisa wupari wago ni vambe. Hatshavbo hi ngu dzina gu gubongwa. Tepo u bongago muthu nyo khaguri na si khugeya monyoni khu wuwadi a gu giredego, mwavavili mu na khala dzipari nya dzadi. (Rom. 16:3, 4) Nya lisima ngudzu khu gu vathu va yeyedzago gubonga khavo va talago ngudzu gu phasa vambe. Avo va ngu si wona tepo vambe va va yeyedzago wuwadi va bwe va kutsega navo gu va bweledzeya khu wuwadi. Khu lisine, gu phasa vambe si ngu hi ninga gutsaka. Khiso si giridego Jesu a ganeya khuye: “Kategide ngudzu oyu a ningago guvbindra oyu a hakhago.” — Mith. 20:35.

Robert Emmons moyo nya muthangeyi nya projecto nyo khaguri nya gu hevbule gubonga wa Universidhadhe ya California, ganede khuye: “Gasi gu khala vathu nyo bonge hi yede gu pwisisa gu khethu gu na vbwetega mumbe muthu gasi hi mu yeyedza  gubonga. Dzimbe dzitepo ethu khethu hi bongago vambe, ganiolu dzimbe dzitepo ethu khethu hi bongwago.” Ho si kodza gu simama guvbanya ni gu simama na hi tsakide womini kholu hi phaswago khu vambe vathu. Khu giyeyedzo, avo va nga hi ninga guhodza mwendro gu hi khathaleya tepo hi dwalago. (1 Kor. 12:21) Muthu a gu ni liphuvbo nyo bonge a ngu yeyedza gubonga khesi vambe va mu gireyago. Khu kharato, ina u ngu dzi olovedza gu yeyedza gubonga khesi vambe va gu gireyago?

Gimbe gighelo gi hi girago hi haguleya gubonga khu gu gubonga gu ngu hi phasa gu vega gupima avba nya esi nya sadi wulangani ga esi nyo vivbe. Wongo wathu wa gu thuma kha nga sefo. Uwo wo gu gu phasa gu vega gupima avba nya esi nya sadi u veta khu lisabi esi nyo vivbe. Khavbovbo u na wegeleya gu wona silo nya sadi wulangani nya sigaradzo. Tepo u simamago gu yeyedza gubonga, si na gu vbevbugeya gu wona silo nya sadi, u bwe u kutsega gu yeyedza gubonga gwago khiso. Wa gu vega gupima gwago avba nyo vbwete gu yeyedza gu bonga khu silo u giredwago, si na gu phasa gu gira esi hi kutsidwego khu mupostoli Pawulo: “Nengelani ga Pfhumu.” — Filp. 4:4.

Gu yeyedza gubonga si na hi phasa gu mba pimisa khu ndziya nyo vivbe. Si ngu garadza gu yeyedza gubonga nigu khu tepo yayimweyo upwa lidiwo, gu goroga mwendro likhulo. Vathu nyo bonge va mwalo guwegeleya nyo gole dzithomba. Va gu vega gupima gwawe ga esi va gu naso wulangani nyo zame gu mana simbe. — Filp. 4:12.

Kha nga muKristo, u ngu si tugula gu khuwe Sathane a gu vbweta gukhuye u vbeya tshivba mwendro gughodhodziswa khu gutshaniseka u vhikisanago nago matshiguni yaya nyo hegise. Uye a gu ghiya tepo u wonago silo khu ndziya nyo vivbe ni tepo u ngurangurago khu gevbini. Wa gu ba u dzipwa kharato, si na gu garadzeya gu dugeleya thumoni nyo tshumayele. Gu yeyedza gubonga ni mihandro nya liphuvbo tapa ni likandarinya. Khu giyeyedzo, ethu hi ngu tsaka tepo hi wonago silo esi Nungungulu a hi ningago hi bwe hi yeyedza gukhodwa avba nya situmbiso saye khu wumindru.— Gal. 5:22, 23.

Wa gu ba uri moyo nya Dzifakazi dza Jehovha adzina u nga seketeya esi si ganedwago avba nya ndrima yeyi maningano ni gubonga. Ambari ulolo, u ngu si tugula gu khuwe kha si vbevbugi gu bonga ni gu manega ni mawonelo nya yadi tepo yatshavbo. Ganiolu u nga vbeyi tshivba. U nga andrisa ni gu simama ni liphuvbo nyo bonge. Khu ndziya muni? Dzi tshiyele tepo tshigu ni tshigu gasi gu dundrugeya khu silo nyo khaguri guvbanyani gwago esi u nga yeyedzago gubonga khiso. Tepo u yago u gira isoso, guwegeleya gwago nyo yeyedze gubonga gu na engedzeya nugo. U na dzipwa na wu tsakide ngudzu guvbindra ava va vegago gupima avba nya sigaradzo nya guvbanya. Dundrugeya khu silo nya sadi si gu tsakisago u giredwego khu Nungungulu mwendro khu vambe vathu. Adzina u nga gira khu gu si lova wulangawo. U nga lova silo sivili mwendro siraru u bongago khiso tshigu ni tshigu.

Vagevisisi va tugude gu khavo “tepo hi bongago vambe tshigu ni tshigu, si nga vbindrugedza edzi hi pimisago khidzo, khavbovbo hi tshambedwa khu gu vbanya gwathu.” Muthu nyo bonge o khala na tsakide. Dundrugeya khu makategwa u gu nawo, dzi buze khu silo nya sadi si gu dugeleyago nigu tepo yatshavbo yeyedza gubonga khiso. Vbavbandze nyo khuwe esi nyi gu naso nyi na si mana tepo yatshavbo, “bonga Jehovha khiso.” “Yeyedza gubonga khu satshavbo.” — 1 Dzik. 16:34; 1 Tes. 5:18.