1. Vathu nya vangi va gu wu wona kharini thumo?

OMU u vbanyago umo, gutala nya vathu va gu wu wona kharini thumo? Mayigoni nya mangi, vathu nya vangi va gu thuma nya mba tshaya. Vathu nya nga vovo, kha va tshaledwi khu tepo nyo hefemule, nyo vbungadze ni dzindranga dzawe, mwendro nyo dzi khathaleye khu liphuvboni. (Muh. 2:23) Ambari ulolo, vambe kha va pwani ni gu thuma, nyo bwe va vbwetedzeya sighelo nyo tutume mithumo. — Mav. 26:13, 14.

2-3. Jehovha ni Jesu va hi vegede giyeyedzo muni maningano ni thumo?

² Vathu nya vangi va ngu thuma ngudzu, ambari ulolo, vambe migara. Ganiolu nga dundrugeya khedzi Jehovha ni Jesu va wu wonago khidzo thumo. Kha hi kanakani gu khethu Jehovha a ngu si gola gu thuma. Jesu si vegide guagani isoso, tepo a nga khuye: “Babe wangu a gu thuma gikhati gyatshavbo, eni neni nyi ngu thuma.” (Joh. 5:17) Nga dundrugeya khu nyandra nya thumo owu Nungungulu a manegidego nawo tepo a nga gira sivangwa nya singisingi nya liphuvbo, dzinyeledzi ni dziplaneta. Hi ngu wona gambe silo nya singi nyo mbure esi Nungungulu a si giridego omu mafuni. Mulovi nya dzindzimo, a di khuye: “PFHUMU Nungungulu sigiro sago si tade! U si giride satshavbo khu guti ni mapimo, litigo li tade khu sigiro sago.” — Ndzi. 104:24.

³ Jesu pimedzede Papayi waye. Uye phaside Papayi waye gu gira ndzadzi. A diri ni Jehovha kha nga meseri nya mithumo yaye. (Mav. 8:27-31) Myaga yi nga landreya, tepo a nga ba ari mafuni, Jesu giride thumo nya wadi. Thumo wowo wu diri kha nga guhodza ga Jesu, nigu uwo wu yeyedzide gu khuwo uye a di rumedwe khu Nungungulu. — Joh. 4:34; 5:36; 14:10.

4. Ginani hi nga gi hevbulago ga Jehovha ni Jesu khu gu hefemula?

 ⁴ Giyeyedzo hi vegedwego khu Jehovha ni Jesu nyo thume khu gu dzi garadza, ina gyo thula gu khigyo gu vbwetega hi thuma nya mba hefemula? Ahihi. Jehovha gima kha garali, khu kharato kha si lombi gu a hefemula. Ganiolu, Bhibhiliya yari khiyo, tepo Jehovha a nga vbedza gu gira mafu ni ndzadzi “a di vbedza thumo waye, a gu hefemula.” (Ekiso. 31:17) Khu lisine isoso so thula gu khiso, uye a di emanyana gasi gu nengela esi a si giridego. Nigu ambari olu Jesu a thumidego khu gu dzi garadza tepo a nga ba ari mafuni, uye a di gu dzi vegeya gambe tepo nyo hefemule ni gu hodza ni dzipari dzaye.— Mat. 14:13; Luka 7:34.

5. Gigaradzo muni egi sithumi nya singi sa Nungungulu si tshanganago nagyo?

⁵ Bhibhiliya ya gu kutsa vathu va Nungungulu gu khala sithumi nya sadi. Avo va yede gu thuma khu gu dzi garadza wulangani nyo khale migara. (Mav. 15:19) Adzina u ngu thuma gasi gu sayisa ndranga yago. Nigu vatshavbo vapizane va Kristo gu vbwetega va tshumayela mahungu nya yadi. Ganiolu gu hefemula nyadzadi gambe u ngu gu vbweta. Ina dzimbe dzitepo si ngu gu garadzeya gu mana tepo nyo thume, gutshumayela ni gu hefemula? Hi nga wuti kharini pimo nya tepo hi na yi thumisago gasi gu thuma, ni pimo nya tepo hi na yi thumisago gasi gu hefemula?

6. Marko 6:30-34, a gu yeyedza kharini gu khuye Jesu a di gu ninganiseya thumo ni gu hefemula?

⁶ Si na ni lisima ngudzu gu ninganiseya thumo wathu. Pfhumu Solomoni, ningidwe tshivba nyo love khuye: “Gyomo gikhati nya satshavbo.” Uye khumbugide gu yala, gu vbaha, gu liya, gu hega, gu hana, ni yimbe mithumo. (Muh. 3:1-8) Khu lisine gu thuma ni gu hefemula khiso silo sasivili nya lisima ngudzu womini wathu. Jesu a di gu ninganiseya thumo ni gu hefemula. Litshigu limwedo, vapostoli va di wuya khu gutshumayelani. Va di gu pharegide ngudzu nyo bwe va si tshaledwi khu “gikhati nya guhodze.” Jesu a di khuye: “Hongoleni giwulani mu ya hefemula vbadugwana.” (Leri Marko 6:30-34.) Ambari olu dzimbe dzitepo Jesu ni vapizane vaye va nga ba va si hefemule khedzi va nga ba va si vbweta khidzo, Jesu a di gu dziti gu khuye gu vbwetega va hefemula.

7. Esi hi na si hevbulago maningano ni Sabhadho si nga hi phasa gu gira ginani?

⁷ Dzimbe dzitepo hatshavbo hi ngu vbweta gu hefemula mwendro gu vbindrugedza silo nyo khaguri avba nya mithumo yathu ya litshigu ni litshigu. Hi nga wona lisine nya isoso avba nya malulamiselo nya lisima ngudzu aya Nungungulu a giredego vathu vaye dziteponi dza gale. Gu gu malulamiselo nyo vegedze Sabhadho, semana ni semana. Ethu kha hi thangedwi khu nayo wa Mosi; ambari ulolo hi ngu phasega ngudzu khu gu hevbula esi uwo wu si ganeyago maningano ni Sabhadho. Esi hi si hevbulago si nga hi phasa gu ninganiseya thumo wathu ni gu hefemula.

8. Khu guya khu Ekisodha 31:12-15, Sabhadho li diri litshigu nya ginani?

⁸ Lito la Nungungulu lari khilo hwane nya 6 “matshigu”, Nungungulu a di ema gu vanga silo mafuni. (Gen. 2:2) Ambari ulolo, Jehovha a ngu si gola gu thuma, nigu khu yimbe ndziya uye a ngo gu thuma. (Joh. 5:17) VaIsrayeli va di gu hefemula navo khu litshigu nya wu 7, kha nga edzi Jehovha a giridego khidzo. Nungungulu a di khuye Sabhadho gi diri gifungo vbakari gwaye ni vaIsrayeli. Gu diri litshigu nya guhefemule khu gu vbeleya, gilo gi nga ba gi agide ngudzu ga Jehovha. (Leri Ekisodha 31:12-15.) Mwalo ni moyo a nga ba a dzumeledwa gu thuma, ambari sanana, dzigumbi, mwendro sirengo. (Ekiso. 20: 10) Litshigu lolo li di gu phasa vathu gu vega gupima gwawe gwatshavbo ga silo nya liphuvbo.

9. Mawonelo muni nyo hosege maningano ni Sabhadho ma nga ba mari ni vathu nyo khaguri matshiguni ya Jesu?

⁹ Litshigu nya Sabhadho li di gu phasa ngudzu vathu va Nungungulu, ganiolu matshiguni ya Jesu, vathangeyi nya vangi nya wukhongeyi va di vegedzeya milayo nyo vbindrise maningano ni litshigu lolo. Avo va di gu khavo khu Sabhadho si vivbide gu vbweta gilogyo nyo hodze mwendro gu hawulugisa muthu a dwalago. (Marko 2:23-27; 3:2-5) Khandriso a nga ba a si vbweta Nungungulu isoso, nigu Jesu yeyedzide isoso ga vale va nga ba va mu engisa.

10. Ginani hi nga gi hevbulago ga Matewu 12:9-12, khu mawonelo ya Jesu maningano ni Sabhadho?

¹⁰ Jesu ni valandreyi vaye nya vaJudha va di gu hefemula khu Sabhadho, kholu avo va di gu engisa Nayo owu vaIsrayeli va ningidwego khu Mosi. * Ganiolu Jesu yeyedzide khu malito ni sigiro gu khuye kha sa vivba gu gira silo nya sadi si phasago vambe khu Sabhadho. A di khuye: “Yomo fanelo nya gugire ogu gu gu gwadi khu Sabhadho.” (Leri Matewu 12:9-12.) Uye kha nga ba a pimisa gu khuye gu gira silo nya sadi si phasago vambe khu Sabhadho si di vivbide. Esi si giridwego khu Jesu, si tshingiside gighelo gi giridego Jehovha a ninga vathu vaye nayo nyo vegedze Sabhadho. Khu gu vathu va Nungungulu va di yede gu hefemula ga mithumo yawe ya tshigu ni tshigu gasi va si kodza gu vega gupima gwawe avba nya silo sa liphuvboni. Jesu dandrede ndrangani yi nga ba yi thumisa Sabhadho gasi gu khathaleya silo nya liphuvbo. Isoso si ngu  tshingiswa gwadi avba nya matimo ma ganeyago khu Jesu nari dhoropani gwaye nya mavelego Nazareta: “Kha nga giolovedzo gyaye, [Jesu] a di bela nyumbani nya nombelo khu litshigu nya Sabhadho. A di khuga a ema, gasi gu hevbula libhuku.” — Luka 4:15-19.

11. Khu mani a vegedego giyeyedzo nya gyadi Jesu maningano ni thumo?

¹¹ Josefa a di gu wona thumo kha nga edzi Jehovha a wu wonago khidzo, khu gighelo gyogyo uye a di hevbudza Jesu thumo nya wuvati mwendro wukaripintero. (Mat. 13:55, 56) Nigu tshigu ni tshigu, Jesu a di gu wona Josefa na gu thuma khu gu dzi garadza gasi gu khathaleya ndranga yaye nya yikhongolo. Khu hwane nya tepo, Jesu a di embeya vapizane vaye, khuye: “Githumi gi na ni fanelo nya guhakhiswe.” (Luka 10:7) Khu lisine, Jesu a di gu siti gwadi gu thuma khu gu dzigaradza.

12. Milowo muni yi yeyedzago esi Bhibhiliya yi si ganeyago maningano ni gu thuma khu gu dzi garadza?

¹² Mupostoli Pawulo nuye a di gu siti gu thuma khu gudzigaradza. Thumo waye nya lisima gu diri gu tshumayela vambe khu Jesu ni esi a si hevbudzidego. Ambari ulolo, Pawulo giride yimbe mithumo gasi gu dzi vbanyisa. Vathu va Tesalonika va mu wonide na gu ‘thuma guvbindra pimo, wutshigu ni mihani,’ gasi a “si lemedzi muthu.” (2 Tes. 3:8; Mith. 20:34, 35) Tepo Pawulo a nga lova maningano ni thumo waye adzina a di gu thula thumo waye nyo luge matendra. Tepo a nga ba ari Korinto, khade ndrangani ga Akila ni Prisila “a gu thumela avbo” gu luga matendra navo. Gu ba Pawulo a thumide wutshigu ni mihani kha si thuli gu khiso a di gu thuma nya mba tshaya. Uye a di gu dzi tshiyela tepo nyo hefemule, nya nga khu Sabhadho. A di gu li londrola litshigu lolo gasi gu tshumayela vaJudha va nga ba va si thumi navo khu Sabhadho. — Mith. 13:14-16, 42-44; 16:13; 18:1-4.

13. Ginani hi nga gi hevbulago avba nya giyeyedzo gya Pawulo?

¹³ Mupostoli Pawulo hi vegede giyeyedzo nya gyadi. Uye a diri ni thumo nyo dzi vbanyise, ganiolu a di gu dzi garadzeya gu manega tepo yatshavbo avba nya ‘thumo nya gu tivise Mahungu nya Yadi ya Nungungulu.’ (Rom. 15:16; 2 Kor. 11:23) Uye kutside vambe gu gira sasimweso. Khu kharato Prisila ni Akila va di “hengela navo ndzilani momu nya gu thumele Jesu Kristo.” (Rom. 12:11; 16:3) Pawulo gengedzide vaKorinto gu “thuma gikhati gyatshavbo khu gunengela esi Nungungulu a si vbwetago.” (1 Kor. 15:58; 2 Kor. 9:8) Jehovha ningide tshivba Pawulo, nya gu love esi: “Oyu a si dzinigo gu thuma mwalo fanelo nya guhodze.” — 2 Tes. 3:10.

14. Jesu a di gu vbweta gu khuye ginani, tepo a nga khumbuga malito ma gomogo omu ga Johane 14:12?

¹⁴ Gu tshumayela ni gu gira vapizane khuwo thumo nya lisima ngudzu matshiguni yaya nyo hegise. Khu lisine, Jesu profetide gu khuye vapizane vaye va di hadzi gu gira mithumo nya yikhongolo guvbindra uye! (Leri Johane 14:12.) Jesu, kha nga ba a vbweta gu khuye hi na gira nethu siliwugiso nga uye. Vbavbandze nya isoso, valandreyi vaye va di hadzi tshumayela ni gu hevbudza malangani nya mangi, ga vathu nya vangi, khu tepo nyo laphe gambe.

15. Siwudziso muni hi yedego gu dzi gira, nigu khu ginani?

¹⁵ Wa gu ba u thuma gasi gu dzi vbanyisa, dzi gire siwudziso sesi: ‘Ina nyi ngu tidwa khu patrawu wangu kha nga githumi nyo dzi garadze? Ina nyi ngu vbedza thumo wangu khu tepo, ni gu thuma khu monyo wangu watshavbo?’ Abari gu hlamulo wago ga siwudziso sesi i ina, patrawu wago a na gu tumba ngudzu. Nigu si nga gira ava va thumago nago va tsakeya mahungo nya yadi. Hi yede gambe gu dzi gira siwudziso sesi khu matshumayelelo yathu ni mahevbudzelo yathu: ‘Ina nyi ngu tidwa kha nga githumi nyo dzi garadze thumoni nyo tshumayele? Ina nyi ngu dzi  dongiseya gwadi gasi gu gira maendro nyo pheye? Ina nyi ngu bweleleya khu gu vbiredza vale va yeyedzidego gutsakeya? Nigu ina nyi ngu oloveya gu tshumayela khu dzindziya nyo hambanehambane?’ Abari gu hlamulo wago ga siwudziso sesi i ina, u na tsakiswa ngudzu khu thumo wago.

16. Guhambana muni gu gomogo ga edzi Jesu ni vapizane vaye va nga ba va gu wona khidzo guhefemula ni edzi vathu nya vangi muhuno va gu wonago khidzo?

¹⁶ Jesu a di gu dziti gu khuye dzimbe dzitepo uye ni vapizane vaye va di yede guhefemula. Ambari ulolo, vathu nya vangi gale yoyo ni olu va nga fana ni mwama wule nyo ghanye nya gifananiso gya Jesu. Mwama yoyo a di dzi embeya khuye: “U nga saniseki; hodza, sela, tangala.” (Luka 12:19; 2 Thim. 3:4) Silo nya lisima ngudzu gwaye gu diri gu hefemula ni gu dzi tsakisa. Gu hambana naye, Jesu ni vapostoli vaye kha va nga ba va thangisa silo soso guvbanyani gwawe.

17. Hi nga yi thumisa kharini tepo yathu ha gu ba hi si giri mithumo nyo dzi vbanyise?

¹⁷ Muhuno, ethu ha gu zama gu pimedzeya Jesu khu gu thumisa tepo hi si girigo mithumo yathu nya gu dzi vbanyise nasiri basi gasi gu hefemula ganiolu gasi gu tshumayela vambe ni gu hongola mitshanganoni yathu nya wuKristo. Gasi gu ganeya lisine, ethu ha gu wona thumo nyo gire vapizane ni gu hongola mitshanganoni yathu kha nga silo nya lisima ngudzu nyo bwe hi dzi garadza ngudzu gasi hi si hamugegi siloni sesi nyo hatege. (Hebh. 10:24, 25) Ambari tepo hi gomogo dziferiyani, ethu ha gu simama ni longoloko wathu wa liphuvboni, nyo hongole mitshanganoni ambari ha gu ba hiri hayini, nigu ha gu vbwetedzeya gambe dzindziya nyo bhule ni ava hi mananago navo. — 2 Thim. 4:2.

18. Pfhumu yathu Jesu Kristo, a gu vbweta gu khuye hi gira ginani?

¹⁸ Hi ngu bonga ngudzu kholu Pfhumu yathu Jesu Kristo a gu muthu nyo ninganiseye a hi phasago gu manega ni mawonelo nya yadi khu thumo ni guhefemula! (Hebh. 4:15) A gu vbweta gu khuye hi hefemula khedzi si vbwetegago khidzo. A gu vbweta gambe gu khuye hi thuma khu gu dzigaradza gasi gu dzi vbanyisa hi bwe hi patega thumoni nyo tsakise nyo gire vapizane. Omu nya ndrima yi landreyago, hi na bhula khesi Jesu a giridego gasi gu hi tshudzisa wugumbini.