Ahihi, gu mwalo matimo ma yeyedzago gu khayo maKristo ma diri ni giolovedzo gyogyo ambari omu nya Bhibhiliya.

Edzi li vbindrugedzedwego khidzo livhesi leli, sa gu gira gu vathu va pimisa gu khavo dziteponi dza Pawulo, gu diri ni giolovedzo nya gu vathu va bhapatiswa khu kotani nya vafi. Khu giyeyedzo, Nova versão internacional yari khiyo: “Abari gu ava va fudego kha va na nga wuswa, va na rini ava va bhapatiswago khu kotani nya ava va fudego?”

Nga wona esi sihevbuli sivili nya sikhongolo nya Bhibhiliya si ganedego. Gregory Lockwood Diretori nya Teologia a di khuye: “Gubhapatiswa khu kotani nya ava va fudego gilo gi si seketedwigo omu nya Bhibhiliya ambari omu nya matimu nyo khaguri.” Khu ndziya nyo fane, Muhevbudzi nya Univerisidhadhe nyo pwani khu Gordon D. Fee lovide khuye: “Ma mwalo matimu ma seketeyago isoso ambari omu nya Bhibhiliya. Novo Testamento kha yi ganeyi gilo maningano ni isoso, gi mwalo gi yeyedzago gu khigyo gubhapatiswa gogu gu di gu girwa khu maKristo nyo pheye ambari khu dzi tshetshe dzi nga wumbwa hwane nya gufe ga vapostoli.”

Bhibhiliya yari khiyo valandreyi va Jesu va di yede gu ‘gimbiya va hevbudza vathu nya mahundzo yatshavbo, va va bhapatisa . . . , va va hevbudza gu landrisa satshavbo’ a nga va hevbudza. (Mat. 28:19, 20) Gasi gu muthu a khala mupizane a bhapatisidwego, yede gu pheya khu gu hevbula khu Jehovha ni Gyanana Gyaye, a khodwa gwawe a bwe ava engisa. Muthu a fudego kha si kodzi gu gira isoso nigu muKristo kha si kodzi gubhapatiswa khu kotani ya oyu a fudego. — Muh. 9:5, 10; Joh. 4:1; 1 Kor. 1:14-16.

Gasi Pawulo a di gu vbweta gu khuye ginani khu malito yaya?

Vambe Vakorinto va di si khodwi gu khavo ava va fudego va na wuswa. (1 Kor. 15:12) Pawulo zamide gu va yeyedza gu khuye mawonelo yoyo ma hosegide. Uye ganede gu khuye: “Matshigu yatshavbo nya gu wona gufa mbeli gwangu.” Khu lisine, uye a di ngo vbanya. Ambari olu a nga ba a emisana ni dzimhango nyo hambanehambane, uye a di gu tiyisega gu khuye a gufa a na wuswa nari ni givili nya liphuvbo gi tadego khu tshivba nya nga esi si giregedego Jesu. — 1 Kor. 15:30-32, 42-44.

Vakorinto va di yede gu pwisisa gu khavo gu khala muthu a todzidwego, si di gu thula gu emisana ni sigaradzo matshigu yatshavbo a bwe afa na si gu wuswi. Gu ‘bhapatiswa khu ga Jesu Kristo’ sa gu pata gu ‘bhapatiswa gufani gwaye.’ (Rom. 6:3) Esi sa gu thula gu khiso gu fana ni Jesu, va di hadzi emisana ni sigaradzo va bwe vafa. Khu hwane va wuswa va ya vbanya dzandzini.

Hwane nya myaga mivili nyo ba Jesu a bhapatisidwe matini a di embeya vapostoli vavili khuye: “Gubhapatiswa nyi na gu hakhago mu na gu hakhani.” (Marko 10:38, 39) Jesu khandri a di gu thula gu bhapatiswa khu mati. Avba a di gu vbweta gu khuye, khu gu simama a tumbega ga Nungungulu a di hadzi gufa. Pawulo lovede maKristo nyo todzwe khuye ma di hadzi ‘tshaniseka ni Kristo, gasi ma hengela naye wudhumoni gwaye.’ (Rom. 8:16, 17; 2 Kor. 4:17) Khu kharato, a navo va di hadzi gufa gasi va wuswa va ya vbanya dzandzini.

Guya khu satshavbo hi si wonidego, malito ya Pawulo ma nga vbindrugedzedwa gwadi khu ndziya yeyi: “Abari kharato, ginani va na girago avo va bhapatiswago ni makungu nya gu va songwa? Abari gu ava va fudego kha va na nga wuswa, khu ginani [vathu] va bhapatiswago ni makungu yoyo?”