Ina u leride gwadi dzindrima nya Revhista Mukhedziseyi nya mwaga wowu? Abari kharato, zama gu hlamula siwudziso si landreyago:

Hi yede gu va phara kharini ava va todzidwego?

Ethu hi ngu ninga lisima gu khodwa va gu nago. Ganiolu, kha hi khaleyi gu va zundzazundza ngudzu mwendro gu va wona na va hathegide ngudzu gu vbindra vambe. (Judha 16) Kha hi yeli gu va gira siwudziso maningano ni gu tumba gwawe. — w20.01, paj. 29.

Ginani gi nga gu tiyisegisago gu khigyo Jehovha a ngu gu wona?

Bhibhiliya yo yeyedza gu khiyo Jehovha gu wonide ni gu velegwa nu si velegwi. Nigu uye a ngu engiseya milombelo yago. Jehovha a nguti monyo wago ni mipimiso yago nigu esi u girago si ngu mu khuha. (1 Dzik. 28:9; Mav. 27:11) Jehovha khuye a nga gu rana. — w20.02, paj. 12.

Lini hi yedego gu ganeya nigu lini hi yedego gu degula?

Ethu hi ngu tsaka ngudzu gu bhuleya vambe khu Jehovha. Hi ngu ganeya tepo hi wonago muthu nyo khaguri na gira silo si na mu yisago mhangoni. Madhota ma ngu ningeya wusingalagadzi tepo si vbwetegago. Ethu kha hi ganeyi edzi thumo wathu wu khathaledwago khidzo omu ga mayigo thumo wathu wu himbedzedwago. Nigu kha hi ganeyi misihalo yi gimbileyanago ni libandla. — w20.03, dzipaji. 20-21.

Gu hambana muni gu gomogo ga khaba wu khumbugwago omu ga Joyele gipimo 2 ni owu wu khumbugwago omu ga Gutuledwa gipimo 9?

Libhuku la Joyele 2:20-29 lari khilo Nungungulu a di hadzi hongodzisa hwindzo khaba a bwe a bweledzeya esi wu ghohetego. Khu hwane, Nungungulu a di hadzi guhula liphuvbo laye. Isoso si tadzisegide tepo vaBhabhiloni va nga saseya Jerusalema. Khaba wu khumbugwago omu ga Gutuledwa 9:1-11, wa gu thula maKristo nyo todzwe aya ma huweleyago gu lamudwa nya litigo leli nyo vivbe khu Jehovha. Kha nga handru wakone, isoso si ngu garadza ava va seketeyago litigo leli. — w20.04, dzipaji. 3-6.

Khu mani mufumeli wa wuronga muhuno?

Khu Russia ni vaphasedzeyi vaye. Avo va gu kuha sithumi sa Nungungulu khu ndziya nyo wonege, va himbedzeya thumo wathu nyo tshumayele va bwe va yeyedza gu khavo va ngu dzi nyenya Dzifakazi dza Jehovha. Pfhumu ya wuronga ya gu dwana ni Pfhumu ya marandzi. — w20.05, paj. 13.

‘Mihandro nya liphuvbo’, ina ya thula basi eyi yi gomogo omu ga Vagalatiya 5:22, 23?

Ahihi. Liphuvbo nya guage li ngu hi phasa gu haguleya mambe makhalelo nya nga gululama. (Efes. 5:8, 9) — w20.06, paj. 17.

Mhango muni yi gomogo avba nyo thedzeye dzifoto dzago omu nya dzisayiti nya mabhulo?

Esi hi thedzeyago omu nya dzisayiti nya mabhulo si nga gira vambe va pimisa gu khavo ethu kha hi dzi nogisi nigu ha gu ghwira. — w20.07, dzipaji. 6-7.

Ginani egi maKristo ma nga gi hevbulago khu vagogi nya dzindzandzi?

Vagogi nya vadi nya dzindzandzi vo goga khu tepo ni wulanga dzi hodzeyago gwadi dzindzandzi. Avo va gu trenari gu thumisa gwadi dzifarameta nyo goge khidzo va bwe va yeyedza gu tiya-hwambo khu gu simama va thuma ambari va gu tshangana ni sigaradzo. Anethu hi yede gu gira sasimweso thumoni nyo tshumayele. — w20.09, paj. 5.

Khu dzevbini dzindziya nyo khaguri hi nga dzi thumisago gasi gu phasa sihevbulo nya Bhibhiliya gu engedzeya lihaladzo laso khu Nungungulu?

Hi nga si kutsa gu leri Bhibhiliya tshigu ni tshigu si bwe si dundrugeya khesi si hevbulago. Hi bwe hi si hevbudza gu gombeya. — w20.11, paj. 4.

Malito ma gu khayo “khu gu hengela ni Kristo vathu vatshavbo va na bweledzedwa gambe gu vbanya” ma gu thula vamani? — 1 Kor. 15:22.

Pawulo khandri a di ba a vbweta gu khuye vathu vatshavbo va na wuswa. Uye a di gu thula maKristo ma todzidwego ma nga “tshanganiswa gumogo ni Kristo Jesu.” (1 Kor. 1:2; 15:18) — w20.12, dzipaji. 5-6.

Khu wevbini thumo wu na girwago khava va todzidwego, ndzadzini, hwane nya gu ba ‘va vbindrugedzidwe khu gukhwavbila nya maho, gikhati wu na wombago pundru nya mahegiso?’ — 1 Kor. 15:51-53.

Na ma gu thangedwa khu Jesu, maKristo ma todzidwego ma na fumela mayigo khu ndronga nya simbi. (Gutu. 2:26, 27) — w20.12, dzipaji. 12-13.