1-2. Khu ginani gu pwisisa edzi womi wu na gu ba wu khade khidzo ndzadzini si gu na ni lisima ga hatshavbo?

GUTALA nya sithumi sa Jehovha muhuno si na ni gutumba nyo vbanye mafuni kala gupindruga. Tsawa nya wudugwana nya maKristo wu na ni gutumba nya gu wuswe wuya vbanya ndzadzini. Makristo yaya nyo todzwe ma ngu dzina ngudzu guti edzi womi wawe wu na gu ba wu khade khidzo ndzadzini. Ganiolu, khu ginani ava va gu na ni gutumba nyo vbanye mafuni va vbwetago navo guti isoso? Kha nga hi na si wonago avba nya ndrima yeyi, gu wuswa ga ava va hongolago ndzadzini gu na va reseya makategwa. Khu kharato, gani hi na ni gutumba nyo vbanye ndzadzini gani mafuni, gu pwisisa edzi womi wu na gu ba wu khade khidzo ndzadzini si na ni lisima ga hatshavbo.

² Nungungulu thumiside vapizane nyo khaguri va Jesu va lizana myaga nyo pheye gu lova maningano ni gutumba nyo vbanye ndzadzini. Mupostoli Johane tshamusede khuye: “Ethu olu hi sanana sa Nungungulu, aholu, hi si gu dziti gukhethu hi na bani hiri ginani. Ethu ha guti esi nya gukhethu, gikhati Kristo a na dzi wonegisago, hi na fanana naye.” (1 Joh. 3:2) Khu kharato, maKristo nyo todzwe kha ma dziti edzi womi wawe wu na gu ba wu khade khidzo tepo ma na wuswago kha nga vathu nya liphuvbo. Esi va sitigo khu gu, tepo va na hakhago tshatshazelo wawe, avo va naya wona Jehovha. Bhibhiliya kha yi ganeyi satshavbo maningano ni edzi womi wu na gu ba wu khade khidzo ndzadzini, ganiolu, mupostoli Pawulo a ngu hi embeya silo nyo  khaguri maningano ni isoso. Ava va todzidwego va na ba vari ni Kristo tepo a ‘na fuvisago mufumo, ni dzitshivba ni valala vatshavbo.’ Isoso sa gu pata “nala nya guhegise”, a gu gufa. Khavbovbo, Jesu ni ava va todzidwego va na dzivega vbavbatshi va ningeya satshavbo ga Jehovha. (1 Kor. 15:24-28) Khu lisine, iyoyo yi na ba yiri tepo nyo tsakise ngudzu! *

3. Guya khu 1 Vakorinto 15:30-32, gukhodwa ga Pawulo avba nya guwuga ga ava va fudego gu mu phaside kharini?

³ Gukhodwa ga Pawulo maningano ni guwuga ga ava va fudego gu mu phaside gu timiseya sigaradzo. (Leri 1 Vakorinto 15:30-32.) Uye lovede vandriyathu Vakorinto khuye: “Matshigu yatshavbo nya gu wona gufa mbeli gwangu.” Pawulo lovide gambe khuye: “Nyi di dwana ni sirengo dhoropani ga Efeso.” Adzina Pawulo a di gu ganeya khu gu dwana kamo ni sirengo ga gipandre nyo khaguri Efeso. (2 Kor. 1:8; 4:10; 11:23) Mwendro adzina a di gu ganeya khu vaJudha ni vambe va nga ba va mu wugeya nga khatshi sirengo. (Mith. 19:26-34; 1 Kor. 16:9) Ni ga gevbini giemo lisine khu gu, Pawulo emisanide ni dzimhango nya dzikhongolo ngudzu. Ambari ulolo, uye kha diga gu vega gupima avba nya wumindru nyo tsakise. — 2 Kor. 4:16-18.

4. Gutumba nya guwuge ga ava va fudego ga gu tiyisa kharini maKristo muhuno? (Wona foto yi gomogo avba nya kapa.)

⁴ Ha gu vbanya ga dzitepo nyo garadze. Vambe vandriyathu va ngu emisana ni dzimhango. Vambe va gu vbanya ga malanga gu giregago dzinyimbi, khu kharato, kha va dzipwi na va vhikhelegide. Omu nya mambe mayigo vathu va Jehovha kha va tshumayeli na va tshulegide nigu ambari olu va khotedwago mwendro gu songwa, vandriyathu vava va ngu simama gu thumeya Jehovha ni gu mu khozeya. Avo giyeyedzo nya gyadi gwathu. Avo kha va thavi kholu va ngu dziti gu khavo ambari va gufa olu, Jehovha a na ta va wusa gasi va vbanya womi nyo tsakise mindru wa tshigu.

5. Khu yavbini mawonelo nyo hosege ma nga girago gu, gukhodwa gwathu nya guwuga ga ava va fudego gu dzidziya?

⁵ Pawulo gengedzide vandriyaye khu mawonelo nyo hosege aya vambe va nga ba vari navo: “A gu bani ari lisine gupwani ava va fudego khava wugi hi na gira nga esi si nga ganedwago pwani, ‘hi na hodze hi sela, kholu mindru hi nafa.’” Mawonelo yoyo khandri ma di gu pheya matshiguni ya Pawulo. Adzina Pawulo a di gu thula esi Isaya a ganedego maningano ni vaIsrayeli omu ga Isaya 22:13. Vbavbandze nyo dzi garadzeye gu tiyisa lihaladzo lawe khu Nungungulu, avo va di gu dwaneya gu dzi tsakisa basi. Vaisrayeli va di gu pimisa basi khavo: “Hi na hodze ni gu sela, kholu mindru hi nafa.” Mipimiso yeyi yi olovelegide gambe ni muhuno. Ganiolu, esi si dugeledego vaIsrayeli si ngu hi hevbudza gilogyo. — 2 Dzik. 36:15-20.

6. Khu ginani gutumba nya guwuge ga ava va fudego gu yedego gu khuha edzi hi hathago khidzo dzipari?

⁶ Gukhodwa gwathu nya guwuga ga ava va fudego gu yede gu khuha edzi hi hathago khidzo dzipari. Vandriyathu Vakorinto va di yede gu dzi woneya gasi va si giri wupari ni vathu va nga ba va si khodwi avba nya guwuga ga ava va fudego. Isoso, gi gengedzo gwathu nethu muhuno. Ha gu thanga wupari ni vathu va si dundrugeyigo khu wumindru, si na hi reseya mihandro nya mba yadi. Wupari wowo wu nga ghoha mawonelo ni mavbanyelo nya yadi nya muKristo nya lisine wu bwe wu mu gira a hatha gu gira silo si nyenywago khu Jehovha. Khiso si giridego Pawulo a hi gengedza khuye: “Digani mavbanyelo nya guvivbe.” — 1 Kor. 15:33, 34.

7. Khu gevbini giwudziso gi gomogo omu ga 1 Vakorinto 15:35-38 adzina vambe va nga gi girago?

⁷ Leri 1 Vakorinto 15:35-38. Muthu a vbwetago gu vambe va kanakaneya guwuga ga ava va fudego, adzina a nga wudzisa khuye: “Va guwuga kharini ava va fudego?” Gwadi gu dundrugeya khu hlamulo wa Pawulo kholu vathu nya vangi muhuno va na ni mawonelo nyo hambanehambane maningano ni esi si dugeleyago hwane nyo ba muthu a fude. Ganiolu, ginani esi Bhibhiliya yi si hevbudzago?

8. Khu gevbini giyeyedzo gi hi phasago gu pwisisa gu wuswa ga ava va na hongolago vaya vbanya ndzadzini?

⁸ Muthu a gufa, givili gyaye gya gu hina. Muvangi nya ndzadzi ni mafu a nga wusa muthu yoyo a bwe a mu ninga givili nya gyadi. (Gen. 1:1; 2:7) Pawulo ningide giyeyedzo gasi gu yeyedza gu khuye Nungungulu kha si lombi gu a wusa muthu khu givili gya gimwegyo. Uye thumiside giyeyedzo nya “nyingi” nya simbo nyo khaguri. Tepo nyingi yi yadwago mafuni ya gu buga yi dandra yi khala simbo. Simbo wowo wu dandrago, wu ngu hambana ngudzu ni nyingyana yile. Pawulo giride gifananiso gegi gasi gu yeyedza gu khuye Muvangi wathu a nga ninga oyu a wusidwego khu gufani ‘givili a gi wonago gu khuye gi ngu mu yela.’

9. Ginani esi libhuku la 1 Vakorinto 15:39-41 li ganeyago maningano ni gu hambanahambana nya sivili?

⁹ Leri 1 Vakorinto 15:39-41. Pawulo ganede gu khuye Nungungulu vangide sivili nyo hambanehambane. Khu giyeyedzo, givili nya dzimombe, nya sinyoni ni givili nya dzindzandzi si hambanide. Pawulo a di bwe khuye gomo gu hamabana avba nya lidambo ni ngima. Pawulo ganede khuye: ‘nyeledzi mweyo yi hambanide ni yimbe nyeledzi.’ Isoso lisine, ambari olu hi gu mba si kodza gu si wona khu maho yathu. Vasiyentista vari khavo gu na ni dzinyeledzi nya dzingi nyo hambanehambane. Dzomo nya dzikhongolo, dzomo nya dzidugwana, dzomo nya gufivile, dzomo nya guage, dzomo nya kori amarelo nya nga lidambo. Pawulo ganede gambe khuye, “somo gambe sivili sa ndzadzini ni esi sa tigoni.” Khu ndziya muni? Mafuni hi na  ni sivili nya nyama, ganiolu, ndzadzini gu na ni sivili nya liphuvbo nya nga esi sa dzingilozi.

10. Ava va na guya vbanya ndzadzini va na wuswa ni givili nyo khale kharini?

¹⁰ Nga wona esi Pawulo a ganedego khu gu landreya: “Khidzo gambe kharato gu na giregago guwugani ga vafudego. Ha gu kembela givili nya gufe, guwuga givili nyamba fa gambe.” Ethu hi ngu dziti gu khethu muthu a gufa givili gyaye gya gu hina a khala kudzudzwane. (Gen. 3:19) Sa gu kodzega kharini gu muthu a wuswa ni “givili nya mba fa gambe”? Pawulo kha nga ba a ganeya khu muthu a na wuswago gasi gu vbanya mafuni nya nga ava va wusidwego khu Eliya, Elizewu ni Jesu. Khu lisine, Pawulo a di gu ganeya khu muthu a wuswago nari ni givili nya liphuvbo gasi aya vbanya ndzadzini. — 1 Kor. 15:42-44.

11-12. Ginani gi nga vbindrugedza ga Jesu tepo a nga wuswa nigu gu vbindrugedza muni nyo fane gu dugeleyago maKristo nyo todzwe?

¹¹ Tepo Jesu a nga ba a romo mafuni uye a diri ni givili nya nyama, ganiolu, tepo a nga wuswa khu gufani a di khala “liphuvbo li ningago guvbanya” a bwe a bweleya ndzadzini. Khu ndziya nyo fane maKristo ma todzidwego ma na wuswa ni givili nya liphuvbo gasi guya vbanya ndzadzini. Pawulo tshamusede khuye: “Nga olu mafuni momu hi godzago muthu nya mafu, kharato gambe, hi na godzana ni muthu wa Ndzadzini.” — 1 Kor. 15:45-49.

¹² Pawulo a di gu hidzimeya avba nyo tshingise mahungu nya lisima maningano ni guwuga ga ava va fudego. Gwadi gu hi dundruga gu khethu, Jesu kha wuswa ni givili nya nyama. Pawulo tshamusede gighelo gyakona tepo a nga khuye: “Muthu nya mafu kha dzi kodzi uye wurumba waye, gu hakha thomba nya Mufumo wa Nungungulu” ndzadzini. (1 Kor. 15:50) Khu ndziya nyo fane, vapostoli ni mambe maKristo nyo todzwe kha ma na nga wuswa ma hongola ndzadzini na mari ni givili nya nyama gi hinago. Lini va nga hadzi wuswa? Pawulo tshamusede khuye guwuswa gogo gu di hadzi girega khu gu gimbiya nya tepo nasiri ga tepo yile. Ga  tepo Pawulo a nga lova khiyo lidangaliya la 1 Vakorinto vambe vapizane ‘va di fude.’ Khu giyeyedzo, mupostoli Jakobe. (Mith. 12:1, 2) Mambe maKristo ma todzidwego ni vapostoli va di hadzi gufa navo. — 1 Kor. 15:6.

13. Sigiro muni si nga hadzi tivegisa guta ga Jesu?

¹³ Jesu ni Pawulo va ganede khu tepo nya lisima ngudzu, a gu tepo nya gute ga Kristo. Ndrani nya tepo yoyo nya gute ga Kristo gu di hadzi dugeleya dzinyimbi, sirevareva, madwali ni simbe silo nyo vivbe mafuni. Gu khugeya khu 1914, hi ngu wona giprofeto gegi nya Bhibhiliya na gi gu tadzisega. Ganiolu, gu na ni gimbe gilo gi nga hadzi tivegisa guta ga Jesu. Uye a di khuye, mahungu nya yadi nya Mufumo wa Nungungulu ma di hadzi tshumayedwa “tigoni gwatshavbo gasi gu ninga wufakazi mayigoni gwatshavbo. Khu hwane nya ugo khavbo gu no tago guhegisa.” (Mat. 24:3, 7-14) Pawulo tshamusede gu khuye “guwuyani ga Pfhumu” gu di hadzi wuswa maKristo nyo todzwe ma fudego. — 1 Tes. 4:14-16; 1 Kor. 15:23.

14. Ginani gi dugeleyago maKristo nyo todzwe ma fago olu ndrani nya gute ga Kristo?

¹⁴ Makristo nyo todzwe ma fago olu, ma gu dzegeya guwuswa ma ya vbanya ndzadzini. Pawulo yeyedzide isoso omu ga 1 Vakorinto 15:51, 52. Uye a di khuye: “Khandri ethu hatshavbo hi nafago, aholu hatshavbo hi na vbindrugedza giemo, Isoso si na girega khu gikhati gimwegyo basi, khu gukhwavbila nya maho, gikhati wu na wombago pundru nya mahegiso.” Malito yaya ya Pawulo ma ngu tadzisega muhuno. Tepo maKristo nyo todzwe ma na wuswago ma na dzibuza khu gu tsaka nya gukhongolo ngudzu. Ayo ma na “khala ni Pfhumu kala gupindruga.” — 1 Tes. 4:17.

15. Khu wevbini thumo wu na girwago khu maKristo nyo todzwe ndzadzini?

 ¹⁵ Bhibhiliya yi ngu hi embeya thumo wu na girwago khu maKristo nyo todzwe aya ma na wuswago “khu gukhwavbila nya maho.” Jesu tshamusede esi maningano ni avo: “Ga gikhati gyogyo wule a na palago ni gu landrisa mithumo yangu kala mahegiso, nyi na mu ninga tshivba nya gufumele mayigo. A na ma fuma khu ndronga nya dzisimbi, a na ma pandrelela kha nga edzi gu pandredwago khidzo dzikhali nya libumba.” (Gutu. 2:26, 27) Makristo nyo todzwe na ma gu Thangedwa khu Jesu, ma na fumela mayigo khu dronga nya simbi. — Gutu. 19:11-15.

16. Vathu nya vangi va na pala gufa khu ndziya muni?

¹⁶ Khu lisine, maKristo nyo todzwe ma na pala gufa. (1 Kor. 15:54-57) Khu kharato, ndrani nya nyimbi nya Harmagedhoni avo va na patega avba nya gu fuvise guvivba gwatshavbo. Dzimbe dzimiliyoni nya sithumi sa Nungungulu si na vbuluga avba nya tshanisa nya yikhongolo, si beya omu nya litigo nya liphya. (Gutu. 7:14) Ava va na vbulugago va na manega ni lithomo nya gu wone dzimiliyoni nya vathu na va guwuswa khu gufani. Nga dundrugeya khu gutsaka hi na gupwago tepo isoso si na giregago. (Mith. 24:15) Ava va na simamago gu tumbega ga Jehovha va na pala gufa va gu hakhidego ga Adhamu. Avo va na vbanya kala gupindruga.

17. 1 Vakorinto 15:58 a gu hi kutsa gu gira ginani olu?

¹⁷ Yatshavbo maKristo ma yede gu bonga khu malito nyo thaveleye maningano ni guwuswa ga ava va fudego ma gomogo omu ga 1 Vakorinto. Hi na ni sighelo nya singi nya gu yeyedze gu khethu hi ngu dzumeya wusingalagadzi wa Pawulo nya gu dzigaradzeye gu “thuma gikhati gyatshavbo khu gunengela esi Nungungulu a si vbwetago.” (Leri 1 Vakorinto 15:58.) Ha gu patega khu sighingi ga thumo wowu, hi na dzibuza khu womi nyo tsakise mindru wa tshigu. Womi wathu wu na tsakisa kamo ngudzu, khu ndziya nya gu ne kha ha nga ba hi yi dundrugeya. Gudzigaradza gwathu thumoni wa Pfhumu gu na ba gu siri ga mahala.