NDRIMA NYA GIHEVBULO 49
NDZIMO 147 Hi tumbisidwe womi nya gu pindruge
Ginani u yedego gu gira gasi u vbanya kala gupindruga?
“Watshavbo wule a hakhago Gyanana a bwe a khodwa gwagyo a na mana womi nya gupindruge.” — JOH. 6:40.
MAKUNGO NYA GIHEVBULO GEGI
Hi na wona edzi ava vatodzidwego ni dzimbe dzinvuta va wuyedwago khidzo khu dzegiso wa Jesu Kristo.
1. Vathu va gu pimisa ginani khu gu vbanya kala gupindruga?
VATHU nya vangi va gu zama gu hodza gwadi ni gu gira dziexersisiyu gasi va manega ni womi nya wadi. Ambari ulolo, avo kha va vireyi gu vbanya kala gupindruga. Avo adzina saye, va gu pimisa gu khavo kha si kodzegi gu vbanya kala gupindruga. Omu ga Johane 3:16 ni 5:24, Jesu a di ganeya gu khuye si ngu kodzega gu vathu va “mana womi nya gupindruge.”
2. Ginani Johane gipimo 6 a ganeyago khu womi nya gupindruge? (Johane 6:39, 40)
2 Litshigu limwedo, Jesu a di gira gilewugiso nya pawu ni sindzandzyana si nga hodzisa vathu nya vangi. a Isoso si hlamadziside, ganiolu esi Jesu a ganedego ga litshigu li nga landreya si hlamadziside ngudzu. Vathu va di landra Jesu Kafarinawume, vbafuvbi ni tshatugo wa Galileya, nigu iyoyo a di va embeya gu khuye vathu va nga wuswa va vbanya gambe va bwe va mana womi nya mba vbeya. (Leri Johane 6:39, 40.) Dundrugeya edzi isoso si gu na ni lisima khidzo ga dzipari dzago ni sivbango nya ndranga yago si fudego. Malito ya Jesu, ma gu yeyedza gu khayo vathu nya vangi va fudego va nga wuswa va vbanya gambe, nigu uwe ni ava u va haladzago mu nga vbanya kala gupindruga. Ganiolu, esi Jesu a ganedego omu nya mavhesi ma landreyago omu ga Johane gipimo 6, si garadzede vathu gu si pwisisa. Ginani egi Jesu a ganedego?
3. Ginani egi Jesu a ganedego omu ga Johane 6:51?
3 Hwane nya gu ba Jesu a hodziside vathu nya vangi, avo va pimiside khu mana aya Jehovha a ningidego Vaisrayeli tepo khiyo va nga ba va romo giwulani. Milowo ya gu rana “mana” kha nga “pawu ya dzandzini.” (Ndzi. 105:40; Joh. 6:31) Jesu thumiside mana gasi gu va hevbudza gilo nya lisima. Ambari olu mana gu nga ba guri guhodza va nga ba va ningwa khu Nungungulu khu gilewugiso, ava va nga hodza mana, khu gu gimbiya nya tepo va difa. (Joh. 6:49) Khu yimbe ndziya, Jesu ganede gu khuye uye a diri “pawu ya dzandzini,” “pawu ya Nungungulu” ni “pawu nya womi.” (Joh. 6:32, 33, 35) Jesu ganede khu gu hambana gu nga ba gu romo avba nya mana ni uye mune. Uye a di khuye: “Eni nyi pawu nyo vbanye yi tshigidego khu ndzadzini. Uye a hodzago pawu yeyi a na vbanya kala gupindruga.” (Leri Johane 6:51.) Vajudha vale kha va si pwisisa. Avo kha va si pwisisa gu khavo khu ginani Jesu a nga ba a ganeya gu khuye uye a diri “pawu” yi tshigidego khu dzandzini, nigu pawu yoyo yi diri tshukwana gu vbindra mana aya Jehovha a ningidego vakokwe vawe. Khu gu landreya, Jesu a di va embeya gu khuye: “Khu lisine pawu nyi na mu ningago givili gyangu.” Ginani egi a nga ba a vbweta gu ganeya? Si na ni lisima gu hi pwisisa esi a nga ba a vbweta gu ganeya, kholu gu pwisisa hlamulo wakone si na hi phasa gu wona edzi ethu gumogo ni sigodwa sathu, hi na si kodzago khidzo gu mana womi nya gupindruge. Hongoleni hi wona tshamuselo wakone.
“PAWU NYA WOMI” NI “GIVILI GYAYE” SA GU TSHAMUSEYA GINANI?
4. Khu ginani vathu va nga hlamadziswa ngudzu khesi Jesu a ganedego?
4 Vathu nyo khaguri, va di hlamala tepo va ngapwa Jesu na gu ganeya gu khuye a na ninga ‘givili gyaye gasi gu vbulugisa litigo.’ Adzina saye, vambe va pimiside gu khavo uye a di gu vbweta gu khuye avo va hodza givili gyaye. (Joh. 6:52) Khu gu landreya, Jesu a di va embeya silo si nga va hlamadzisa ngudzu. Uye a di khuye: “Mwa gu mba hodza givili gya Gyanana nya muthu ni gu seya novba wagyo, mu mwalo womi.” — Joh. 6:53.
5. Khu ginani hi tiyisegago gu khethu Jesu kha nga ba a vbweta gu ganeya gu khuye vathu va di yede gu seya novba waye?
5 Matshigoni ya Nowa, Jehovha a himbedzede vathu gu hodza novba. (Gen. 9:3, 4) Nigu gambe, dziteponi dza Vaisrayeli, Jehovha a va ningide nayo wa wumowo. Ni wevbini a gu hodza novba, a di yede gu ‘songwa.’ (Levhi 7:27) Jesu a di gu landrisa Nayo wowo. (Mat. 5:17-19) Khu kharato, Jesu gima na si lombi Vajudha gu hodza givili gyaye ni gu seya novba waye. Ganiolu, khu gu ganeya malito yaya nya gu hlamadzise, Jesu a di gu hevbudza vathu edzi va nga manago khidzo “womi nya gupindruge.” — Joh. 6:54.
6. Khu ginani hi ganeyago gu khethu malito aya Jesu a ganedego khu gu hodza givili gyaye ni gu seya novba waye gifananiso?
6 Jesu a di gu vbweta gu ganeya ginani? Somo guagani gu khiso, Jesu a di gu ganeya khu ndziya nya gu fananise ni vathu vale, nga edzi a ganedego khidzo ni nyamayi nya Musamariya, tepo a nga khuye: “Oyu a seyago mati nyi na mu ningago, gima kha na ngapwa gambe lidora. Ganiolu, mati nyi na mu ningago, ma na vbindrugedza ma khala gifefe nya mati ma ningago guvbanya nya gupindruge.” (Joh. 4:7, 14) b Jesu kha nga ba a ganeya gu khuye nyamayi wule nya Musamariya a di yede gu seya mati nyo khaguri, khavbovbo a dzegeya gu vbanya kala gupindruga. Khu ndziya nya gu fane, uye kha nga ba a ganeya gu khuye vathu vale nya vangi a ganedego navo Kafarinawume va di hadzi gu mana womi nya mba vbeya va gu hodza givili gyaye ni gu seya novba waye nya lisine.
SIEMO SIVILI NYO HAMBANE
7. Ginani esi vambe vathu va ganeyago khu malito ya Jesu ma gomogo umo ga Johane 6:53?
7 Vathu nya khaguri va gu ganeya gu khavo malito ya Jesu ma gu romo omu ga Johane 6:53, ma gu tshamuseya esi si nga ba si yedwe gu girwa avba nya Gilalelo gya Pfhumu, kholu uye thumiside malito nyo fane. (Mat. 26:26-28) Vathu va gu ganeya gu khavo vatshavbo va pategago avba nya Gilalelo gya Pfhumu, va yede gu hodza pawu ni gu seya vhinyu. Ina isoso lisine? Si na ni lisima guti hlamulo nya giwudziso gyogyo, kholu dzimiliyoni nya vathu mafuni gwatshavbo va ngu patega avba nya gigiro gyogyo nya lisima myaga yatshavbo. Hongoleni hi wona gu hambana nya esi Johane 6:53 a ganedego ni esi Jesu a ganedego khu Gilalelo gya Pfhumu.
8. Gu hambana muni gu gomogo avba nya siemo sesi sa sivili? (Wona dzifotu.)
8 Hongoleni hi wona gu hambana nya siemo sesi sa sivili. Nya gu pheye, lini nigu hayini Jesu a ganedego malito ma gu romo ga Johane 6:53-56? Uye embede malito yoyo Vajudha na romo Galileya khu mwaga nya 32 matshigoni yathu. Isoso si giregide na wu tshade mwaga mowo gasi gu gira Gilalelo gya Pfhumu. Nya wuvili, a di embeya vamani malito yaya? A di gu embeya vale va nga ba va ninga lisima guhodza guvbindra gu hevbula khu Jehovha ni Mufumo waye. (Joh. 6:26) Khu lisine, tepo Jesu a nga ganeya silo si nga va garadzeya gu si pwisisa, avo va di dzegeya gu mba khodwa gwaye. Ambari vapizane vaye nyo khaguri va di ema gu mu landreya. (Joh. 6:14, 36, 42, 60, 64, 66) Vathu vava, va di gu hambanide ngudzu ni 11 vapostoli nyo tumbege va nga tshangana ni Jesu avba nya Gilalelo gya Pfhumu, hwane nya mwaga mowo khu 33 matshigoni yathu. Ga giemo gile, 11 vapostoli nyo tumbege va diri naye ambari olu va nga ba va si pwisisi satshavbo a nga a va hevbudza. Gu hambana ni vathu vale va Galileya, vapostoli vaye nyo tumbege va di gu tiyisega gu khavo Jesu a diri Gyanana gya Nungungulu, gi nga ba gi dzude khu ndzadzini. (Mat. 16:16) Uye a di va zundza khu gu va embeya gu khuye: “Enu khenu mu nyi bangaladzidego sigaradzoni sangu.” (Luka 22:28) Gu hambana gogo, gwa gu yeyedza gu khuwo omu ga Johane 6:53, Jesu kha nga ba a zama gu tshamuseya esi si nga hadzi gu girega avba nya Gilalelo gya Pfhumu. Ganiolu, gomo gumbe gu hambana avba nya sigiro soso sa sivili.
Johane gipimo 6, a gu ganeya khesi Jesu a embedego Vajudha Galileya (nyambade). Hwane nya mwaga mowo, a ganede ni tsawa nya wudugwana nya vapizane vaye nyo tumbege, Jerusalema (nyamudye) (Wona paragrafu 8)
MALITO YA JESU MA GU TSHAMUSEYA GINANI GWAGO?
9. Malito aya Jesu a ganedego avba nya Gilalelo gya Pfhumu, ma di gu thula tsawa muni?
9 Avba nya Gilalelo gya Pfhumu, Jesu ningide vapizane vaye pawu nya mba na mela a bwe a va embeya gu khuye yi di gu emeya givili gyaye. Khu gu landreya, a di va ninga vhinyu a bwe a va embeya gu khuye yi di gu emeya ‘novba nya pwanano.’ (Marko 14:22-25; Luka 22:20; 1 Kor. 11:24) Esi Jesu a ganedego khu pwanano si diri ni lisima. Uye a wu ranide kha nga pwanano nya wuphya nigu pwanano wowo wu di gu girwa khu Jehovha ni “ndranga ya Israyeli,” a gu ava va na fumago ni Jesu Mufumoni wa Nungungulu. (Hebh. 8:6, 10; 9:15) Vapostoli kha va nga ba va pwisisa satshavbo maningano ni pwanano wowo ga tepo yile, ganiolu avo va di hadzi gu todzwa khu liphuvbo nya guage ni gu gira gipandre nya pwanano wowo gumogo ni Jesu, ndzadzini. — Joh. 14:2, 3.
10. Khu gwevbini gu hambana gu gomogo avba nya esi Jesu a ganedego Galileya ni esi a ganedego avba nya Gilalelo gya Pfhumu? (Wona fotu.)
10 Malito aya Jesu a ganedego avba nya Gilalelo gya Pfhumu, ma gu thula “tshambi-dugwana.” Vapostoli vaye nyo tumbege va nga ba vari naye, va diri ava nyo pheye na va gu gira gipandre nya tsawa wowo nya wudugwana. (Luka 12:32) Khavo Jesu a nga va lomba gasi gu hodza pawu ni gu seya vhinyu ga wutshigu wule. Nigu vambe va nga hadzi gu gira gipandre nya tsawa wule khu gu gimbiya nya tepo, va di hadzi gu hodza pawu ni gu seya vhinyu tepo va girago Gilalelo gya Pfhumu. Khavo va na hakhago wulanga ndzadzini gumogo ni Jesu. Khu kharato, khugo gu hambana gu gomogo avba nya Gilalelo gya Pfhumu ni esi si giregidego Galileya. Esi Jesu a ganedego avba nya Gilalelo gya Pfhumu, sa gu thuma basi ga tsawa nyo khaguri nigu malito a ganedego na romo vbafuvbi ni Kafarinawume ma gu thuma ga vathu nya vangi.
Ava va hodzago pawu ni gu seya vhinyu va gu gira gipandre nya tsawa nya wudugwana, ganiolu ‘ni wevbini’ a nga khodwa ga Jesu Kristo a bwe a mana womi nya mba vbeya (Wona paragrafu 10)
11. Ginani esi Jesu a ganedego si yeyedzago gu khiso kha nga ba a ganeya khu tsawa nyo khaguri nya wudugwana?
11 Vathu nya vangi ava Jesu a ganedego navo Galileya, va di gu vbweta basi guhodza. Ganiolu, Jesu zamide gu va phasa gu pwisisa gu khavo gyomo gilo nya lisima ngudzu guvbindra guhodza. Gilo gyogyo a nga hadzi gu va ninga wu diri womi nya gupindruge. Nigu Jesu a va embede gu khuye ambari ava vafudego va na wuswa ga litshigu nyo hegise, va vbanya kala gupindruga. Ga Johane gipimo 6, Jesu kha nga ba a ganeya khu makategwa ma na manwago khu vathu nyo khaguri basi, kha nga edzi a ganedego khidzo avba nya Gilalelo gya Pfhumu. Wulangani nya isoso, uye a di ganeya khu makategwa ma nga hadzi gu manwa khu vathu vatshavbo. Uye a di ganeya gu khuye: “Uye a hodzago pawu yeyi a na vbanya kala gupindruga . . . Pawu nyi na mu ningago givili gyangu gasi gu vbulugisa litigo.” — Joh. 6:51. c
12. Ginani gi vbwetegago gasi hi hakha womi nya mba vbeya?
12 Ina Jesu a di gu vbweta gu ganeya gu khuye ni wevbini muthu a vbanyidego a di hadzi gu mana womi nya mba vbeya? Ahihi. Vale basi va ‘hodzago pawu,’ a gu ava va khodwago ga Jesu, khavo va na manago womi. Vathu nya vangi muhuno, va ngu ganeya gu khavo va ngu khodwa ga Jesu nigu va ngu mu rana kha nga muvbulugisi wawe. (Joh. 6:29) Ambari ulolo, vathu nya vangi va nga ba va khodwa ga Jesu gupheyani va emide gu mu landreya. Khu ginani?
13. Ginani gi vbwetegago gasi gu khala mulandreyi nya lisine wa Jesu?
13 Vathu nya vangi va di gu landra Jesu kholu a nga ba a va ninga esi va nga ba va si vbweta. Avo va di gu vbweta gu khavo Jesu a va vbanyisa, a va ninga guhodza ni gu va embeya esi va nga ba va vbweta gu sipwa. Khu kharato, Jesu a si vegide guagani gu khuye khata mafuni gasi gu ta va ninga esi va nga ba va si vbweta, ganiolu a dzude mafuni gasi gu ta va hevbudza esi si vbwetegago gasi gu va khala valandreyi vaye nya lisine. Avo va di yede gu ‘hongola gwaye,’ si thulago gu mu engiseya ni gu engisa satshavbo a va hevbudzidego. — Joh. 5:40; 6:44.
14. Ginani hi yedego gu gira gasi hi wuyedwa khu givili ni novba wa Jesu?
14 Jesu hevbudzide gu khuye khu gu ba a ningede givili gyaye ni novba waye, uye a di hadzi gu gira gu si kodzega gu vathu va mana womi nya mba vbeya. Avo va di yede gu khodwa isoso. Gukhodwa gogo gu diri ni lisima ga Vajudha, nigu gu yede gu khala nya lisima gwathu nethu. (Joh. 6:40) Khu kharato, esi Jesu a ganedego omu ga Johane 6:53, sa gu tshamuseya gu khiso gasi hi mana womi nya gupindruge, hi yede gukhodwa avba nya dzegiso. Nigu makategwa yoyo ma na manwa khu vathu nya vangi. — Efes. 1:7.
15-16. Silo muni nya lisima hi si hevbulago omu ga Johane gipimo 6?
15 Omu ga Johane gipimo 6, hi ngu hevbula silo nya singi nya lisima si tiyisago hatshavbo. Hi hevbude gu khethu Jesu a ngu khathala ngudzu khu vathu. Uye a hawulugiside vadwali, a va hevbudza khu Mufumo wa Nungungulu ni gu va ninga guhodza tepo va nga ba va gu vbweta. (Luka 9:11; Joh. 6:2, 11, 12) Nya lisima ga satshavbo khu gu, a va hevbudzide gu khuye uye i “pawu nya womi.” — Joh. 6:35, 48.
16 Lisine gu ava Jesu a va ranidego gu khuye “dzimbe dzinvuta” kha va yeli gu hodza pawu ni gu seya vhinyu avba nya Gilalelo gya Pfhumu. (Joh. 10:16) Ambari ulolo, va ngu wuyedwa khu givili ni novba wa Jesu Kristo. Avo va gu gira isoso khu yeyedza gu khavo va ngu khodwa avba nya dzegiso wa Jesu ni satshavbo si kodzegago khu kotani nya isoso. (Joh. 6:53) Nigu ava va hodzago pawu ni gu seya vhinyu, va gu yeyedza gu khavo va gu gira gipandre nya pwanano nya wuphya nigu va na ni gutumba nya gu fume ndzadzini. Khu kharato, gani ho gira gipandre nya ava va todzidwego mwendro nya dzimbe dzinvuta, matimo ma gomogo omu ga Johane gipimo 6 ma na ni lisima gwathu. Libhuku leli, la gu hi hevbudza gu khilo hatshavbo hi yede gu manega ni gukhodwa nyo tiye avba nya dzegiso gasi hi si kodza gu vbanya kala gupindruga.
NDZIMO 150 Vbweta Nungungulu gasi u vbulugiswa
a Hi bhude khu libhuku la Johane 6:5-35 ga ndrima yi vbindridego.
b Mati Jesu a ganedego khayo, ma gu emeya malulamiselo ya Jehovha gasi hi mana womi nya gupindruge.
c Omu nya libhuku la Johane gipimo 6, ma ngu thumiswa malito ma nga vbindrugedzedwago gupwani “oyu” mwendro “watshavbo wule,” na ma gu thula vale va na vbanyago kala gupindruga. — Joh. 6:35, 40, 47, 54, 56-58.
