Mupostoli Pawulo a di loveya Thimoti, oyu anuye a nga ba ari lidhota gu khuye: “Nyi ngu gu embeya mbeli ga Nungungulu ni ga Kristo Jesu ni ga dzingilozi dzi hathidwego gu kheni landrisa sileletelo sesi nya mba gira gihatheya.” — 1 Thim. 5:21.

Gupheya, hi na bhula gu khethu dzingilozi dzodzo kha dzi tshamuseyi va mani. Idzo khandri edzi nya 144 000. Tepo mupostoli Pawulo a nga loveya lidangaliya Thimoti, gu wuswa nya Makristo matodzidwego gu di nga si pheyi. Vapostoli ni vambe vatodzidwego va di nga si khali sivangwa nya liphuvbo, khu kharato idzo khandridzo “dzingilozi dzi hathidwego.” — 1 Kor. 15:50-54; 1 Tes. 4:13-17; 1 Joh. 3:2.

Nigu gambe, “dzingilozi dzi hathidwego” kha dzi thuli dzingilozi dzi nga mba engisa teponi nya Ndrambi. Dzingilozi dzodzo, dzi di hatha gu ema ni Sathane ni madhemoni, dzi wugeya Jesu. (Gen. 6:2; Luka 8:30, 31; 2 Ped. 2:4) Mindru watshigu, idzo dzi na rinywa omu nya liphala nya likhongolo khu 1000 myaga, khu gu hegisa dzi fuviswa gumogo ni Sathane. — Judha 6; Gutu. 20:1-3, 10.

Khu kharato, “dzingilozi dzi hathidwego” dzi khumbugidwego khu Pawulo dzi yede nari dzingilozi dzi gomogo dzandzini, dzi thumago gumogo ni “Nungungulu ni Kristo Jesu.”

Dzomo dzingilozi nya dzingi nyo tumbege. (Hebh. 12:22, 23) So yeyedza gu khiso Jehovha kha ningi dzingilozi dzatshavbo thumo wa wumowo. (Gutu. 14:17, 18) Khu giyeyedzo, ga giemo nyo khaguri, Jehovha rumide ngilozi mweyo gasi gu ya songa 185 000 masotshwa ya Asiriya. (2 Dzipf. 19:35) Ganiolu, dzingilozi nya dzingi adzina dzi ningidwe thumo nya gu “hengeledza sitshunganiso satshavbo ni vathu vatshavbo va girago silo nya gu vivbe dzi va dusa Mufumoni [wa Jesu].” (Mat. 13:39-41) Dzimbe adzina dzi ningidwe thumo nya gu ‘tshanganise sihathwa’ gasi si hongola dzandzini. (Mat. 24:31) Nigu dzimbe dzi ningidwe thumo nya gu hi ‘vhikeye dzindziyani gwathu dzatshavbo.’ — Ndzi. 91:11; Mat. 18:10; fananisa ni Matewu 4:11; Luka 22:43.

“Dzingilozi dzi hathidwego” dzi khumbugwago omu ga 1 Thimoti 5:21, adzina saye dzi diri dzingilozi dzi nga ba dzi ningidwe thumo nya gu phasedzeye gu khathaleya mabandla. Mongo nya livhesi leli, wa gu yeyedza gu khuwo Pawulo a di ninga wusingalagadzi madhota nya edzi ma nga ba ma yede gu khathaleya khidzo libandla ni gu khuye libandla li di yede gu va ninga githawo. Pawulo a di ganeya gu khuye madhota ma yede gu khathaleya mithumo yawe “nya mba gira gihatheya,” nigu kha ma nga ba ma yede gu hunga makungo nya mba pheya khu gu pimisa gwadi. Gighelo nya lisima madhota ma nga landrisago wusingalagadzi wa Pawulo, khu gu ayo ma gu gira satshavbo soso “mbeli ga Nungungulu ni ga Kristo Jesu ni ga dzingilozi dzi hathidwego.” Khu kharato, somo guagani gu khiso dzingilozi nyo khaguri dzi na ni thumo nya gu khathaleye mabandla. Nigu gambe idzo dzi ngu vhikeya sithumi sa Nungungulu, gu phasedzeya thumoni nyo tshumayele ni gu embeya Jehovha esi va si khedziseyago. — Mat. 18:10; Gutu. 14:6.