Ina u leride gwadi dzindrima nya Revhista nya Mukhedziseyi nya mwaga wowu? Abari kharato, zama gu hlamula siwudziso si landreyago:

Giyeyedzo muni Jehovha a hi ningago nya edzi hi nga pharago khidzo vanyamayi?

Uye a gu va phara gwadi, a mwalo gihatheya nigu kha ningi ngudzu lisima vama guvbindra vanyamayi. Nungungulu a ngu engiseya vanyamayi, a ninga lisima edzi va dzipwago khidzo ni sigaradzo sawe. Nigu a ngu va tumba gasi gu gira thumo waye. — Mukhedziseyi 01.24, dzipaj. 15-16.

Hi nga thumisa kharini libhuku la Vaefeso 5:7 li gu khilo: “Mu nga hengeyi ni vathu nya nga vovo”?

Mupostoli Pawulo a di hi gengedza gasi hi si vbungadzi ni vathu va nga hadzi gu hi gira si hi garadzeya gu landra milayo ya Nungungulu. Gu vbungadza gogo, gu nga pata gu vbedza tepo navo ni gu bhula navo khu gu thumisa dziredhi-sociais. — Mukhedziseyi 03.24, dzipaj. 22-23.

Hi nga dzi woneya kharini ga mahungu nya malipha?

Hi yede gu dzi woneya ni mahungu hi rumedwago khu dzipari dzathu hi gu mba tiyisega gu khethu ma gu ganeya lisine mwendro ne ni dziemaili hi rumedwago khu vathu hi gu mba vati mwendro vathu va dzi girago gu khatshi vo tsakeya lisine nari gu vawugeyi. — Mukhedziseyi 04.24, paj. 12.

Ginani hi gitigo ni egi hi gu mba giti maningano ni edzi Jehovha a na lamulago khidzo Pfhumu Solomoni ni ava va fudego Sodhoma ni Ghomora ni avba nya Ndrambi ya Nowa?

Ethu kha hi dziti gu khethu Jehovha a di va fuvisa kala gupindruga. Ambari ulolo, hi ngu dziti gu khethu uye a ngu siti satshavbo si giregidego nigu a na ni wuhindzi nya wukhongolo. — Mukhedziseyi 05.24, dzipaj. 3-4.

Nungungulu oyu a gu “Giwindri” a gu hi tiyisegisa ginani? (Dhet. 32:4)

Ethu hi nga thaveya ga Jehovha. Uye a ngu tumbega, nigu tepo yatshavbo a ngu tadzisa esi a si tumbisago. Uye kha vbindrugedzi, nigu makhalelo ni makungo yaye gima kha ma vbindrugedzi. — Mukhedziseyi 06.24, dzipaj. 26-28.

Ginani gi na gu phasago gu dzi pwananisa ni libandla nya liphya?

Tumba gu khuye Jehovha a na gu phasa nga edzi a phasidego khidzo sithumi saye gale. Potsa gu fananisa libandla lago nya liphya ni eli la gale. Khala nu pharegide libandlani nya liphya u bwe u gira dzipari nya dziphya. — Mukhedziseyi 07.24, dzipaj. 26-28.

Ginani hi gi hevbulago khu sipimaniso siraru hi si manago omu ga Matewu gipimo 25?

Gipimaniso nya dzinvuta ni dziphongo gya gu tshingisa lisima nya gu tumbege. Gipimaniso nya sagadzyana nya gugengeye ni esi nya sipumbu gya gu tshingisa lisima nya gu khale na hi dongide nigu na hi gengede. Nigu gipimaniso nya dzitalenta, gya gu tshingisa lisima nya gu manegi ni guti ni gu thuma khu gu dzi garadza. — Mukhedziseyi 09.24, dzipaj. 20-24.

Likupakupa nya tempele ya Solomoni li di gu khugegide kharini?

Omu ga 2 Dzikoronika 3:4, yimbe milowo nya mandza ya gale yi di lowa gu pwani “120 mikono,” gu gira gu gu manega 53 dzimetru (175 pés) khu gu khugega. Ganiolu, omu nya yimbe milowo nyo tumbege gu di lowa gupwani “20 mikono,” gu gira gu gu manega 9 dzimetru (30 pés) khu gu lapha. Tshamuselo wowu nyo hegise wu ngu pwanana ni edzi likupakupa nya tempele li nga ba li khade khidzo. — Mukhedziseyi 10.24, paj. 31.

So thula ginani gu ‘muphasedzeyi nya libandla a manega ni nyamayi moyo basi?’ (1 Thim. 3:12)

Isoso so thula gu khiso a yede gu tshadha ni nyamayi moyo basi, nigu kha yeli gu gira wubhayi. Wulangani nya isoso, kha yeli gu khedziseya vambe vanyamayi. — Mukhedziseyi 11.24, paj. 19.

Khu ginani hi nga ganeyago gu khethu esi si lovidwego omu ga Johane 6:53 kha sa nga ba si thula esi si nga hadzi girega ga Gilalelo gya Pfhumu?

Johane 6:53 a gu ganeya khu gu hodza givili ni gu seya novba. Jesu embede malito yaya Vajudha va nga ba va yede gukhodwa avbo gwaye, khu 32 matshigoni yathu na romo Galileya. Khu kharato, Gilalelo gya Pfhumu gi giridwe ga mwaga wu nga landreya, Jerusalema. Avbovbo, Jesu a di ganeya ni vale va nga hadzi gu fuma naye ndzadzini. — Mukhedziseyi 12.24, dzipaj. 10-11.