1-2. a) Bhibhiliya yari khiyo ginani khu Mosi, nigu ginani egi a giridego? b) Gitumbiso muni gi hi kutsago gu haguleya gurula?

BHIBHILIYA yari khiyo Mosi a “diri muthu nya gurule ngudzu, guvbindra vathu vatshavbo va mafuni.” (Mite. 12:3) Ina isoso so thula gu khiso a diri muthu nya mba na tshivba, nyo thave gu hunga esi a na girago, mwendro nyo ndrendremeye dzikhingimidzi a gu wugedwa khu vathu? Vambe va gu mu wona khu ndziya yoyo muthu nya gurule. Ganiolu mapimiselo yoyo khandri lisine. Mosi a diri ni tshivba, a di gu kodza gu hunga silo, nigu a diri githumi gya Nungungulu nyo tiye hwambo. Khu gu phaswa khu Jehovha, emisanide ni pfhumu nya tshivba ya Egipito, a thangeya tanga nya 3000 000 vathu giwulani, a bwe a phasa vaIsrayeli gu pala valala vawe.

² Lisine gu ethu kha hi emisani ni sigaradzo nya nga esi si padwego khu Mosi, ganiolu tshigu ni tshigu hi ngu emisana ni vathu mwendro siemo si lingago gurula gwathu. Ambari ulolo, gyomo gi hi ningago tshivba nyo simame gu haguleya likhalelo leli. Jehovha a gu tumbisa gu khuye “va nya gurula va na fumela litigo.” (Ndzi. 37:11) Uwe ke, ina u ngu dzi wona na uri muthu nya gurule? Ahati vambe ke, va gu gu wona kharini? Na hi si gu hlamuli siwudziso sesi nya lisima, gu vbwetega hiti gu khethu so thula ginani gu khala muthu nya gurule.

3-4. a) Gurula gu nga fananiswa ni ginani? b) Khu yavbini makhalelo nya mararu hi yedego gu manega nawo ho ba hi vbweta gu khala vathu nya gurule, nigu khu ginani?

³ Gurula hi nga gu fananisa ni foya nyo mbure. Khu ndziya muni? Kha nga olu vagiri nya dzifoya va tshanganisago dzikori nya dzingi nyo mbure gasi gu gira foya nyo mbure, anethu gu  vbwetega hi tshanganisa makhalelo nya mangi nya yadi gasi hi khala vathu nya gurule. Mambe nya makhalelo yoyo: gudzinogisa, guengisa, ni gutiya-hwambo. Khu ginani hi yedego gu manega ni makhalelo yaya ho ba hi vbweta gu tsakisa Jehovha? *

⁴ Vathu nyo dzi nogise khavo vonga va kodzago gu dzi pwananisa ni gugola ga Nungungulu. Nigu gurula gu ngu gira gipandre nya gugola ga Nungungulu. (Mat. 5:5; Gal. 5:23) Tepo hi girago gugola ga Nungungulu, Sathane o kurufeya. Khu kharato ha gu khala vathu nya gurule ni gudzinogisa, vathu nya vangi va girago gipandre nya litigo la Sathane va na hi nyenya. (Joh. 15:18, 19) Kha kharato gu vbwetega hi tiya hwambo gasi hi si padwi khu Sathane.

5, 6. a) Khu ginani Sathane a nyenyago vathu nya gurule? b) Siwudziso muni hi na si hlamulago?

⁵ Vathu nya mba na gurula, va ngu dzi embeya, gidugwana basi va gorogide, nigu kha va engisi Jehovha. Uyoyo khu Sathane guvbedza! Kha si hi samadzisi gu ba a nyenya vathu nya gurule! Avo va gu gu vega guagani guvivba gwaye kholu va na ni makhalelo nya yadi a gu mwalo nawo. Gimbe gambe, avo va gu yeyedza gu khavo Sathane muliphi nya khongolo nyagu! Khu ginani? Khu gu, ambari o ganeya mwendro gu gira ni gevbini, kha na nga si kodza gu digisa vathu nya gurule gu thumeya Jehovha! — Joba 2:3-5.

⁶ Siemo muni si nga lingago gurula gwathu? Nigu khu ginani hi yedego gu simama gu haguleya gurula? Gasi gu hlamula siwudziso sesi, hi na ganeya khu giyeyedzo gya Mosi, gya vaHebheru nya vararu va nga ba vari dzigumbi Bhabhiloni ni giyeyedzo gya Jesu.

7, 8. Ginani a giridego Mosi tepo a nga pharwa khu ndziya nya mba na githawo?

⁷ Ha gu ba hi thangeya: Adzina si nga garadza ga ava va thangeyago gu simama vari vathu nya gurule, ngudzungudzu go dugeleya moyo nya ava va thangeyago a si va yeyedzi githawo mwendro gu kanakaneya mathumelo yawe. Ina u di nga dugeledwa khu silo nya nga isoso? Ahati gyo tshuka givbango nya ndranga  yago gi gira silo nya nga isoso? U di hadzi rini? Dundrugeya khesi Mosi a giridego tepo a tshanganidego ni gigaradzo nya nga igyogyo.

⁸ Jehovha emiside Mosi kha nga muthangeyi wa vaIsrayeli a bwe a mu ninga lithomo nyo love milayo yi nga hadzi thangeya vathu vaye. Kha hi kanakani gu khethu Jehovha a di gu phasa Mosi. Ambari ulolo, hane waye Miriyamu ni koma waye Aroni, va di mu solasola va bwe va mu wugeya khu kotani nya nyamayi a nga ba a dzegide. Nari khatshi vambe va nga ba vari ga giemo gya Mosi, na va gorogide va bwe va vbweta gu phodza, ganiolu Mosi kha gira isoso. Uye kha goroga khu guvbevbuga. A di bwe a lomba gu khuye Jehovha a ema gu tsayisa Miriyamu. (Mite. 12:1-13) Khu ginani Mosi a giridego isoso?

9-10. a) Ginani egi Jehovha a phasidego Mosi gu gi pwisisa? b) Ginani egi mihungo nya dzindranga ni madhota va gi hevbulago ga Mosi?

⁹ Mosi a di dzumeya gu hevbudzwa khu Jehovha. Tanga nya 40 myaga hwane, na ngari givbango nya ndranga nya wufumu ya Egipito, Mosi kha nga ba ari muthu nyo rule. A diri ni gizangazangani nyo kala a songa mwama nyo khaguri khu gu khuye giride silo nyo vivbe. Mosi a di pimisa gu khuye Jehovha a na dzumeleyana ni mithumo yaye. Jehovha vbedzide 40 myaga na mu phasa gu pwisisa gu khuye kha si eneyi gu manega ni gutiya-hwambo basi gasi gu thangeya vaIsrayeli, ganiolu a di yede gambe gu khala muthu nya gurule. Nigu gasi a khala muthu nya gurule, a di yede gu dzi nogisa, ni gu engisa. Uye gi pwisiside gwadi gihevbudzo gyogyo, khu guhegisa a khala muthangeyi nya wadi. — Ekiso. 2:11, 12, Mith. 7:21-30, 36.

¹⁰ Muhuno, mihungo nya dzindranga ni madhota nya libandla va yede gu pimedzeya Mosi. Va gu pharwa khu ndziya nya mba na githawo, gu vbwetega va si vbiredzi gu goroga. Dzi nogiseni mu bwe mu dzumeya sihoso sanu. (Muh. 7:9, 20) Engisani wusingalagadzi wa Jehovha nya edzi mu yedego gu lamula khidzo sigaradzo. Nigu tepo yatshavbo, hlamulani khu ndziya nya yadi. (Mav. 15:1) Mihungo nya dzindranga ni vathangeyi va girago isoso va gu tsakisa Jehovha, va andrisa gurula, va bwe va khala giyeyedzo nya gyadi ga vambe.

11-13. Giyeyedzo muni hi vegedwego khu vaHebheru vale nya vararu?

¹¹ Ha gu ba hi tshaniswa: Gale ni gale, mifumo nya litigo yi ngu tshanisa vathu va Jehovha. Va ngu dzina va hi rwega milandru ni milandru. Satshavbo soso kholu hi hathidego “gu yingela Nungungulu guvbindra gu yingela vathu.” (Mith. 5:29) Adzina va na hi hega, va hi khotheya, ambari gu hi bayisa kamo. Ambari ulolo, khu gu phaswa khu Jehovha, kha hi na nga phodza, ganiolu hi simama gurula.

¹² Nga dundrugeya khu giyeyedzo hi vegedwego khu vaHebheru vava nya vararu va nga  ba vari wugumbini — Hananiya, Misayeli ni Azariya. * Pfhumu ya Bhabhiloni yi di vega nayo nya gu va khozeya githombe nya ndralama. Khu gurula, va di tshamuseya pfhumu gighelo gi va girago va si khozeyi githombe gile. Avo va di simama gu engisa Nungungulu ambari olu pfhumu yi nga tumbisa gu va vbisa niloni wu dzurago khu tshivba. Jehovha a di vbulugisa vama vava khu guvbiredza, ambari olu va nga ba va sa si vireya. Nigu avo va di dzi emisede gu dzumeya ni gevbini Jehovha a nga hadzi gi dzumeleya. (Dhan. 3:1, 8-28) Avo va yeyedzide gu khavo vathu nya gurule va na ni gutiya-hwambo khu lisine — gani pfhumu, gani guthavisedwa, gani gutshaniswa, gimwalo gi na hi digisago gu khozeya Jehovha enga. — Ekisodha 20:4, 5.

¹³ Gutumbega gwathu ga Nungungulu go tshuka gu lingwa, hi nga pimedzeya kharini vaHebheru vava nya vararu? Khu gu dzi nogisa, hi tumba gu khethu Jehovha a na hi khathaleya. (Ndzi. 118:6, 7) Hi na hlamula vatshavbo va hi singedzago silo nyo vivbe khu ndziya nya gurule ni githawo. (1 Ped. 3:15) Nigu hi na bomba khu guvbeleya gu gira ni gevbini gi na songago wupari wathu ni Papayi wathu nya lihaladzo.

14-15. a) Ginani gi nga dugeleyago ha gu ba hi garadzega? b) Khu guya khu Isaya 53:7, 10, khu ginani hi nga ganeyago gu khethu Jesu giyeyedzo nya gikhongolo ngudzu nya muthu nyo rule ambari a gu ba a garadzega ngudzu?

¹⁴ Ha gu ba hi garadzega: Hatshavbo hi ngu garadzega khu sighelo nyo hambanehambane. Adzina hi nga garadzega tepo hi vbwetago gu gira provha nyo khaguri xikwatunu mwendro ho ba hi vbweta gu gira thumo nyo khaguri thumotunu. Adzina hi ngu garadzega gambe khu gu dundruga gu khethu hi na ni madwali nyo khaguri hi vbwetago gu popodwa. Ha gu ba hi garadzegide, si ngu garadza gurula. Silo si gu mba tala gu hi garadza, si nga pheya gu hi gorosa. Hi gira khu gu vbaladzeya malito mwendro gu vbenyavbenya kamo. A bari gu u di nga dzipwa khu ndziya yoyo, dundrugeya khu giyeyedzo gya Jesu.

¹⁵ Ndrani nya migima nyo hegise nya womi waye mafuni, Jesu a di gu garadzega ngudzu. A di gu dziti gu khuye a di hadzi tshaniswa a bwe a songwa. (Joh. 3:14, 15; Gal. 3:13) Na gu tshade migima nyo khaguri gasi afa, ganede gu khuye a di gu garadzega. (Luka 12:50) Nigu ndrani nya matshigu yaye nya guhegise, Jesu a di khuye: “hefemulo wangu womo gutshanisekani.” Ganiolu malito a ma thumisidego gasi gu embeya Nungungulu edzi a nga ba a dzipwa khidzo ma gu yeyedza gu khayo a di gu dzi nogisa ni gu engisa Nungungulu. A di khuye: “Baba, nyi vbulugise ga gikhati gegi nya sitshaniso? Olu a gu iso nyi nga si telago, ke! Baba, dhumisa lina Iago!” (Joh. 12:27, 28) Na yi vbohide tepo, khu gutiya-hwambo, Jesu a di dzi ningeya ga valala va Nungungulu, va nga mu songago khu ndziya nya dzitshoni ni litsoro. Ambari olu a nga ba a garadzega, ni gupwa guvbisa, Jesu a di rula a gira gugola ga Nungungulu. Khu lisine, hi nga ganeya khu gu tiya gu khethu Jesu giyeyedzo nyo samadzise ngudzu nya muthu nyo rule ambari a gu ba a garadzega! — Leri Isaya 53:7, 10.

16-17. a) Dzipari dza Jesu dzi lingide kharini gurula gwaye? b) Hi nga mu pimedzeya kharini Jesu?

¹⁶ Wutshiguni waye nyo hegise mafuni, dzipari dzaye nya dzikhongolo dzi lingide gurula gwaye. Nga dundrugeya khedzi a nga ba a garadzega khidzo ga wutshigu wowo! Ina a di hadzi simama gu tumbega kala afa? Dundruga gu khuwe womi nya dzibhiliyoni nya vathu wu diri mhangoni. (Rom. 5:18, 19) Gimbe nya lisima ngudzu khu gu, gu di gu patega gu agiswa nya lina la Papayi waye. (Joba 2:4) Khavbovbo,  wutshiguni wule nya guhegise na gu hodza ni dzipari dzaye, gu gu vapostoli vaye, va di pheya gu “ganedzisana na va vbweta guti khu mani a gu khongolo vbakari gwawe.” Jesu a di va kawukide gunganigungani khisoso, gupata ni siyambo nya litshigu lolo kamo! Egi gi samadzisago khu gu, Jesu kha goroga. Wulangani nya isoso, a di va hakha khu gurula. Khu gwadi, ganiolu na tiyide, Jesu a di va tshamuseya gambe makhalelo va nga ba va yede gu manega nawo. Khavbovbo, a di zundza dzipari dzaye kholu dzi mu seketeyago khu gutumbega. — Luka 22:24-28; Joh. 13:1-5, 12-15.

¹⁷ U di hadzi rini nari khatshi khuwe u gu romo ga giemo nyo fane ni egi? Hi nga pimedzeya Jesu hi bwe hi rula ambari ho ba hi garadzegide ngudzu. Hi engisa gileletelo gya Jehovha nya gu hi timiseyana khu gyathu. (Kol. 3:13) Si na hi vbevbugeya gu engisa gileletelo gegi ha gu dundruga gu khethu hatshavbo hi ngu ganeya ni gu gira silo si gorosago vambe. (Mav. 12:18; Jak. 3:2, 5) Zama gu ganeya khu makhalelo nya yadi u ma wonago ga vambe. — Efes. 4:29.

18. Jehovha a gu phasa kharini vathu nya gurule gu hunga silo khu wugengeyi, ganiolu ginani egi avo va yedego gu gira?

¹⁸ Hi na hunga silo khu wugengeyi. Sa gu ba si hi lelemeya gu hunga silo khu wugengeyi guvbanyani, Jehovha a na hi phasa, ganiolu ho ba hiri vathu nyo rule. Tumbiside gu khuye a na “yingisa nombelo [wa va nya gurula, NM].” (Ndzi. 10:17) Nigu a na gira simbe nyo vbindre gu engiseya milombelo yathu. Bhibhiliya ya gu tumbisa gu khiyo: “A ngu gimbidzisa va nya gusolega mwendro va nya gurula khu nayo, a hevbudza va nya gurula ndzila yaye.” (Ndzi. 25:9) Jehovha a ngu hi thangeya khu gu thumisa Bhibhiliya, mabhuku, * dzivhidhiyu, ni mitshangano yi dongisedwago khu ‘githumi nya gutumbege ni nya gugengeye.’ (Mat. 24:45-47) Gu vbwetega hi dzumeya giphaso gya Jehovha khu gu dzi nogisa hi dzumeya gu khethu hi ngu vbweta giphaso, khu gu hevbula mabhuku hi ningwago khu Jehovha, ni gu thumisa esi hi si hevbulago khu monyo watshavbo.

19-21. Gihoso muni gi giridwego khu Mosi Kadhesi, nigu ginani hi nga gi hevbulago?

¹⁹ Hi na potsa gu gira sighoho. Nga dundrugeya gambe khu Mosi. Khu myaga nya yingi, a diri muthu nya gurule a nga ba a tsakisa Jehovha. Khavbovbo, guvbeyani nya 40 myaga nyo garadze giwulani, Mosi tandregide gu yeyedza gurula. Hane waye, oyu adzina a mu vbulugusidego  Egipito, a di ngari gufa a dzingwa Kadhesi. Avba gambe, vaIsrayeli va di gu ngurangura khu gu khavo kha va khathaledwi gwadi. Ga tepo yeyi va di “ganedzisana ni Mosi” khu gu vbweta mati. Ambari olu Jehovha a nga ba a ningide Mosi tshivba nyo gire silewugiso, ni olu Mosi a va thangedego gwadi khu myaga nya yingi, avo va di mu ngurangureya. Avo kha va nga ba va ngurangura khu gu mba na mati basi, ganiolu va di gu ngurangureya Mosi nuye nga khatshi khuye a gu na ni nandru. — Mite. 20:1-5, 9-11.

²⁰ Mosi a di goroga ngudzu, gurula gwatshavbo hu gu bhi. Wulangani nyo ganeye khu gukhodwa ni giwindri gile gasi gi dusa mati, kha nga edzi Jehovha a mu rumidego khidzo, Mosi a di vbenyeya vathu a bwe a dzi ninga wuzundzo wulangani nyo ninge Jehovha. Khu kharato, a di veta giwindri guvili, ma duga mati nya mangi ngudzu. Gudzikhusedza ni zanga si mu yiside gighohoni nya gikhongolo. (Ndzi. 106:32, 33) Khu kotani basi nya olu tshwatshwanyisidego a luza gurula khu gitepwana, Mosi kha dzumeledwa gu beya Tigoni nya Gitumbiso. — Mite. 20:12.

²¹ Hi ngu hevbula silo nya lisima ga giyeyedzo gegi. Nyo pheye, gu vbwetega hi dzi garadza tepo yatshavbo gasi hi simama na hiri vathu nya gurule. Ho pfhala, gudzikhusedza gu nga hi beleya, gu hi gira hi ganeya ni gu gira silo nyo vivbe. Nya wuvili, ha gu ba hi garadzega, si ngu garadza gurula, khu kharato gu vbwetega hi dzi garadza gasi hi simama gurula, ambari ho ba hi tshangana ni sigaradzo.

22-23. a) Khu ginani hi yedego gu simama gu khala vathu nya gurule? b) Malito ma gomogo omu ga Sofoniya 2:3 mo yeyedza ginani?

²² Hi na vhikedwa. Nugunugu, Jehovha a na fuvisa vathu vatshavbo nyo vivbe mafuni, nigu vathu nya gurule khavo basi va na vbanyago mafuni. Khavbovbo, gurula gu naya khu gu vbalageya. (Ndzi. 37:10, 11) Ina u na ba uri moyo nya vathu vovo nya gurule? Wa gu gira esi Jehovha a si ganedego khu gu thumisa muprofeti Sofoniya, u na ba uri moyo wawe. — Leri Sofoniya 2:3.

²³ Khu ginani Sofoniya 2:3 a gu khuye: “A gu dzina saye mu na mana wuthavelo”? Malito yaya kha ma thuli gu khayo Jehovha o wa mwalo tshivba nyo vhikeye ava va mu tsakisago ni gu mu haladza. Wulangani nya isoso, mo yeyedza gu khayo gu vbwetega hi gira gilogyo gasi hi vhikedwa. Hi ngu kodza gu vbuluga “litshigu nya likhulo la PFHUMU Nungungulu” hi bwe hi vbanya kala gupindruga ha gu dzi garadzeya olu gu khala vathu nya gurule ni gu tsakisa Jehovha.