Papayi wangu, John Mills, bhapatisidwe khu 1913, dhoropani ga Novha Yorki nari ni 25 myaga. Ndriyathu Russell khuye a vegidego ganelo nya gubhapatiswe gwaye. Gitepwana hwane nya isoso, Papayi a di fuluga a hongola Trinidad, iyo a nga ya tshadha ni Constance Farmer, Gihevbuli nya Bhibhiliya nya sighingi. Papayi a di gu phasedzeya pari yaye William R. Brown gu yeyedza “Fotodrama da Criação.” Va giride vatshavbo thumo wowo kala va na Browns va rumedwa gu ya thuma Muhwa-dambo ga Afrika khu 1923. Papayi ni mamayi, va nga ba va todzidwe, va simamide gu thumeya Trinidad.

Vavelegi vangu va diri ni 9 sanana. Egi nya matewula va di riya Ndriyathu Rutherford, oyu a thumidego kha nga muthangeyi nya Sociedade Torre de Vigia de Bíblias e Tratados. Khu 30 nya Dezembro nya 1922, gu di velegwa eni, nyi ridwa lina la Ndriyathu Clayton J. Woodworth, mulovi nya revhista A Idade de Ouro (olu yi ranwago pwani Khendzugani!). Vavelegi vathu va hi hevbudziside xikola kala hi vboha sekundariya, ganiolu va di gu hi kutsa ngudzu gu dzi vegeya misuwo nya liphuvbo. Mamayi a diri ni wugengeyi nyo thumise gwadi Milowo. Papayi a di gu gola gu hi bhuleya khu matimo nya Bhibhiliya. A di gu thumisa givili gyaye gyatshavbo gasi gu vbanyisa matimo.

Gudzigaradza gwaye gu ningide mihandro nya yadi. Avba nya livbandre sikhwathana, siraru si hevbude Xikola ya Gileyadhi. Vahane vathu nya vararu va thumide wupiyonero khu myaga nya yingi Trinidad ni Tobago. Khu kotani nya sihevbudzo sawe ni giyeyedzo gyawe nya gyadi, vavelegi vathu va di hi yala “Nyumbani ga Jehovha, NM.” Sihevbudzo sawe si hi phaside gu dandra “dzindzarini nya Nyumba ya Nungungulu.” — Ndzi. 92:13.

Hi di gu tshangana ndrangani gwathu gasi gu tshumayela. Vapiyonero va di gu tshangana avbo nigu va di gu oloveya gu ganeya ngudzu khu ndriyathu George Young, misiyorariyo wa Canadá a nga ba a endrede Trinidad. Vavelegi vangu va di gu ganeya ngudzu khu dzipari dzawe dza gale, va na Browns, va nga ba vari Muhwa-dambo ga Afrika. Satshavbo soso si di nyi kutsa gu pheya gu tshumayela na nyi ngari ni 10 myaga basi.

Dzirevhista dzathu dzi di si dzulugeyi tepo yoyo, dzi di gu tivegisa wukhongeyi nya malipha, varengisi nya sidambani, ni wufendre nya politika. Kha nga handro wakona, khu 1936, vathangeyi nya wukhongeli wa Trinidad va di kutsedzeya mufumo gu himbedzeya mabhuku yatshavbo ya Torre de Vigia. Hi di siha mabhuku yathu, ganiolu hi simama gu ma thumisa kala hayo bhi. Hi di gu gira dzimarxa, hi thumisa dzibhisikaleta, sidangaliyana, ni simbe. Khu gu thumisa dzimovha nya wutsendze dza dhoropani ga Tunapuna, hi tshumayede kala malanga ya hwindzo ga Trinidad. Si di gu tsakisa ngudzu! Mithumo yoyo yatshavbo nya liphuvbo yi nyi kutside gu bhapatiswa na nyiri ni 16 myaga.

Thomba nya liphuvbo nyi yi manidego ndrangani gwathu ni mithumo nya liphuvbo nyi pategidego gwayo si nyi giride nyi dogoreya gu khala misiyonariyo. Godugoreya gogo gu di ngo vbanya tepo nyi nga hongola Aruba nyi ya thuma ni Ndriyathu Edmund W. Cummings khu 1944. Hi tsakide ngudzu khu gu ba hi kodzide gu tshanganisa 10 vathu gasi gu gira Gidundrugiso khu 1945. Khu mwaga wu nga landreya, gu di tudwa libandla nyo pheye omu nya gidwani gyogyo.

Gitepwana hwane nya isoso, nyi di ningeya wufakazi nya githugedza ga githumi gikwanu nyo pwani khu Oris Williams. Oris a di nyi tadzeya silo nyo phare na gu emeleya sihevbudzo saye. Ambari ulolo, tepo a nga pheya gu hevbula Bhibhiliya, a di tugula esi Lito la Nungungulu li si ganeyago khu lisine a bwe a bhapatiswa khu 5 nya Janeiro nya 1947. Khu gu gimbiya nya tepo, hi di pheya gu haladzana hi hegisa khu gu tshadha. A di pheya wupiyonero khu Novembro nya 1950. Hwane nyo tshadhe ni Oris, nyi di pheya wumbe womi nyo tsakise.

Khu 1955, hi di ranedwa gu ya hevbula Xikola ya Gileyadhi. Kha nga ndziya nyo dzi dongiseye gu hongola, eni ni Oris hi di diga mithumo yathu, hi rengisa ndranga yathu ni simbe hi nga ba hiri naso, hi tshadzisa Aruba. Khu 29 nya Julho nya 1956, hi di pasa Gileyadhi, ga turma nya wu 27, hi rumedwa Nigeria.

Ha gu khedza hwane, Oris wari khuye: “Liphuvbo nya guage la Jehovha li ngu kodza gu phasa muthu gu emisana ni gevbini thumoni nya wumisiyonariyo. Guhambana ni mwama wangu, eni nyi di si vbweti gu khala misiyonariyo. Nyi di gu vbweta gu dzi khaleyana ndrangani gwangu, nyi dzi sayiseyana sanana sangu. Nyi vbindrugedzide mapimo yangu tepo nyi nga tugula givbiredza nya thumo nyo tshumayele mahungu nya yadi. Tepo khiyo hi nga pasa Gileyadhi, nyi di dongisedwe gu ya thuma kha nga misiyonariyo. Tepo hi nga beya omu nya navhiyu nyo pwani i Queen Mary, Ndriyathu Worth Thornton, a nga ba a thuma omu nya xikritori ya Ndriyathu Knorr a di hi vbangana a hi suveya liendro nya ladi. A hi embeya gu khuye ho ya thumeya Bheteli. Eni kheni: ‘Eh, ahihi!’ Ganiolu nyi di dzegeya gu vbindrugedza mapimo yangu, nyi pheya gu wu gola thumo wa Bheteli. Nyi giride mithumo nyo hambanehambane Bheteli. Moyo wakona nyi wu tsakedego ngudzu khwa gu hakha vapfhumba. Nyi ngu va gola ngudzu vathu, nigu thumo wowo wu nyi giride nyi tivana gwadi ni vandriyathu va Nigeria. Nya vangi va di gu vboha na va kunede, na va garade, na vapwa lidora, ni ndzala. Si di gu tsakisa gu va khathaleya ni gu va thaveleya. Satshavbo soso si di gu gira gipandre nya thumo nya guage wa Jehovha, nigu isoso si di gu nyi gira nyi tsaka.” Khu lisine, ni wevbini thumo wu di gu hi gira hi tsaka.

Omu nya moyo nya mihagano yathu kha nga ndranga Trinidad khu 1961, Ndriyathu Brown a di tshamuseya matshango nyo khaguri nyo tsakise ya Afrika. Khavbovbo, aneni nyi di ganeya khu gu andra nya thumo Nigeria. Ndriyathu Brown a di nyi gumbareya, a embeya Papayi gu khuye: “Johnny, u si gu hongoli Afrika uwe, ganiolu Woodworth a ngu guti!” Papayi a di hlamula khuye: “Simama, Worth! Simama!” Malito yoyo nyo tiyise ma ganedwego khu vathu vovo va gomogo gale lisineni, ma engedzede gudogoreya gwangu nyo gire thumo wangu khu guvbeleya.

Khu 1962, nyi di mana lithomo nyo ya engedzeye sihevbulo Gileyadhi ga turma nya wu 37. Yi diri kurso nya 10 migima. Ndriyathu Wilfred Gooch, a nga ba a thuma kha nga muwoneleyi nya Bheteli ya Nigeria, a di ya hevbula turma nya wu 38, khu hwane a rumedwa Inglaterra. Khavbovbo thumo nyo woneleye Bheteli ya Nigeria wu tshala mandzani gwangu. Kha nga Ndriyathu Brown, nyi di gira maendro nya mangi, nyiti gwadi vandriyathu va Nigeria. Ambari olu va nga ba vari mwalo silo nya singi khu nyamani esi si olovelegidego ga vathu va vbanyago mayigoni ma ghanyidego,  litsako lawe li di gu yeyedza gwadi gu khilo gutsaka nya lisine kha gu manwi khu dzitsapwu mwendro dzithomba edzi muthu a gu nadzo. Ha gu dundrugeya khu giemo gyawe, si di gu hi tsakisa gu va wona na va agide, na va mburide, ni gu khedzega mitshanganoni. Mitshanganoni nya mughanga, vangi vawe va di guta khu dzikamiyawu ni bolekajas * (sibhomba nya mba segwa mudzibambe si girwago Nigeria). Sibhomba soso si di gu oloveya gu lowa malito nyo tsakise. Nya nga aya: “Gighotana nya mati gi ngu kodza gu khala yiphwa.”

Malito yoyo mo ganeya lisine. Eni ni Oris hi di handzega gyandza gyathu hi phasa vandriyathu vovo. Khu 1974, Nigeria li di khala litigo nyo pheye vbavbandze ga Estados Unidos na li gu enedza tengo nya 100 000 vahuweleyi. Thumo wu di dandride ngudzu!

Tepo wu nga ba wu dandra thumo, yi di kudzuga Nyimbi ya va na mani Nigeria gukhugeya 1967 kala 1970. Khu migima nyo khaguri, vandriyathu va nga ba vari Biafran, tshatugo nya Tsongo wa Nigeria va di segedwa ndziya nyo rumeye ni gu hakha silo khu Bheteli. Hi di yede gu va vbwegedzeya guhodza nya liphuvbo. Kha nga nyi ganedego gupheyani, hi di gombeya hi bwe hi tumba Jehovha, hi tshatuga tsongo gunganigungani.

Nyi ngu ma dundruga kamo gwadi maendro hi nga ba hi gira na hi gu tshatuga tsongo wa Nigeria, na hiri mhangoni nyo songwe khu masotshwa nya sikelemo, madwali, ni dzimbe dzimhango. Si di gu thavisa gu vbindra khu vbakari nya masotshwa nya mufumo, ganiolu si di gu thavisa ngudzu tepo hi nga ba hi vboha gumbe tshatugo nyo thise nya tsongo. Litshigu limwedo, nyi di tshatuga khu mombo Tsongo wule wa Nigeria nyo tutume ngudzu gukhugeya Asaba kala Onitsha, nyi bhi nyi hongola Enugu nyi ya tiyisa vandriyathu va nga ba va woneleya mabandla. Limbe liendro nyi giridego li tiyiside madhota ya Aba, omu vavbanyi vakona va nga ba va si dzumeledwi gu thumisa maghezi ni wutshigu khu kotani nya nyimbi. Litshigu limwedo, na hiri Port Harcourt, hi di vbiredza gu sega tshangano wathu khu nombelo kholu vbafuvbyana mule gu di sasedwe khu masotshwa nya mufumo.

Mitshangano yoyo yi di gu gira gipandre nya lisima ngudzu gasi gu tiyisegisa vandriyathu gu khavo Jehovha a ngu va haladza ni gu khathala khavo, yi bwe yi va kutsa gu mba beleya silo nya politika ni gupwanana khu gyawe. Vandriyathu Nigeria va simamide gu timiseya sigaradzo soso kala va dugeleya. Va yeyedzide lihaladzo li gu mba padwa khu livengo nya mahundzu, va bwe sayisa gupwanana nya wuKristo. Li diri lithomo nya likhongolo ngudzu gu manega navo teponi yoyo nyo garadze!

Khu 1969, Ndriyathu Milton G. Henschel a diri muphari nya Tshangano nya Mayigo nya Mangi, “Paz na Terra” wu giridwego Kampuni ya Yankee, Novha Yorki. Nyi hevbude nya singi gwaye kha nga muphasedzeyi waye. Giphaso gyaye gi vbohide khu tepo nyi nga ba nyi gi vbweta kholu khu 1970 hi di gira nethu Tshangano nya Mayigo nya Mangi, “Homens de Boa Vontade” dhoropani ga Lagos, Nigeria. Kha nga olu hi nga ba hi ngari gu duga khomu nya nyimbi ya va na mani, hi kodzide gu gira gigiro gegi khu gu phaswa khu Jehovha. Gigiro gegi gi samadziside ngudzu kholu gi giridwe khu 17 malimi, avbo gi nga engisedwa khu 121 128 vathu. Vandriyathu Knorr ni Henschel ni vambe vapfhumba va Estados Unidos ni Inglaterra va dzude va ta wona gubhapatiswa nya gukhongolo ngudzu matimoni nya wuKristo gukhugeya khu Pentekosta, kholu gu bhapatisidwe 3775 vapizane nya vaphya. Khatshi gu phasedzeya gu dongiseya gigiro gyogyo si nyi giride nyi pharega ngudzu khu ndziya nya gu gima nyi di si pharegi khiyo guvbanyani gwangu. Nigu vahuweleyi va di ya khu gu vbalageya!

Ndrani nya 30 myaga ni guvbindra nyi thumidego Nigeria, nyi si tsakede gu thuma kha nga muwoneleyi nya gipandre ni mwoneleyi nya zona Muhwa-dambo ga Afrika. Vamisiyonariyo va di gu tsaka ngudzu khedzi hi nga ba hi va khathaleya ni gu va tiyisa khidzo! Si di gu tsakisa ngudzu gu va tiyisegisa gu khethu kha va divadwa! Thumo wowu wu nyi hevbudzide gu kheni gu khathaleya esi si vbwetegago ga vambe khiyo ndziya nya litshina nyo va phase gu dandra khu liphuvboni, ni gu va tiyisa, ni gu tiyisa gupwanana nya hengeledzano ya Jehovha.

Hi si kodzide gu emisana ni sigaradzo si vangidwego khu nyimbi ni madwali khu gu phaswa khu Jehovha. Hi di gu wona makategwa ya Jehovha tepo yatshavbo. Oris a di khuye:

 “Hi tshanisidwe ngudzu khu malariya. Litshigu limwedo, Worth a di dzima, a vbwegedzwa xipitali ya Lagos. Nyi di embedwa gu pwani kha na nga vbanya, ganiolu khu gu phaswa khu Jehovha, vbanyide! Tepo a nga wuga, a di ganeya khu Mufumo wa Nungungulu ga dhogodheya a nga ba a mu khathaleya. Khu hwane, nyi di hongola ni Worth hi ya wuseya dhogodheya wule, Baba Nwambiwe, gasi gu haguleya gutsakeya a gu yeyedzidego khu Bhibhiliya. A di dzumeya lisine nigu khu hwane a di khala lidhota nya libandla la Aba. Aneni nyi phaside vathu nya vangi, gupata ni vaSulumano gu khala sithumi sa Jehovha nya sighingi. Ganiolu hi di gu tsakiswa ngudzu khu guti ni gu haladza vathu va Nigeria ni guti gambe mavbanyelo yawe, ni lidimi lawe.”

Gimbe hi gi hevbudego khegi: Gasi gu simama gu dugeleya thumoni wathu ha gu ba hi romo ga limbe litigo, gu vbwetega hi haladza vandriyathu ambari mavbanyelo yawe mo ba ma hambanide kharini naya yathu.

Hwane nyo thume Bheteli ya Nigeria, khu 1987 hi di ningwa thumo nya wuphya kha nga vamisiyonariyo omu nya gidwani nyo mbure gya Santa Lúcia, Caribe. Wu diri thumo nyo tsakide ngudzu, ganiolu wu hi resede sigaradzo nya siphya. Guhambana ni Afrika, omu vama va dzegago vanyamayi nya vangi, omu Santa Lúcia, mwama ni nyamayi vo vbanya vatshavbo na va sa tshadha khu nayo. Lito nya tshivba la Nungungulu mwendro Bhibhiliya, li kutside sihevbulo sathu nya singi nya Bhibhiliya gu lulamisa giemo gyaso.

Tepo sighingi sathu si nga pheya gu vbunguga khu kotani nya tanga, khu 2005, Huwo nya Guthangeye yi di hi raneya gu ya thuma tshindza nya mafu yatshavbo Brooklyn, Novha Yorki, E.U.A. Nyi ngu mu bonga Jehovha tshigu ni tshigu kholu a nyi ningidego Oris. Nyi wandredwe Oris wangu khu nala yoyu, gufa, khu 2015, nigu wuvi wakone kha wu ganelegi. A diri pari nya wugadzi nyo samadzise, ni lihaladzo, ni makhalelo nya mangi nyo tsakise. Nyi di gu mu haladza ngudzu ndrani nya 68 myaga hi vbanyidego hatshavbo. Hi tugude gu khethu egi gi vbwetegago ngudzu gasi gu hi tsaka pangoni ni libandlani, gu ninga githawo malulamiselo nya wuthangeyi ma vegidwego khu Jehovha, gudivaleyana, gudzinogisa, ni gu yeyedza mihandro nya liphuvbo.

Ha gu tshuka hi gandrana sinyalana mwendro gu vbeya tshivba, hi di gu tumba gu phaswa khu Jehovha gasi gu hi simama gu mu thumeya. Kha nga olu hi nga ba hi nga gu wumbwa khu Jehovha, hi wonide khethu silo si di gu tshukwata tepo yatshavbo — nigu nya sadi ngudzu si ngo hi virede! — Isa. 60:17; 2 Kor. 13:11.

Trinidad ni Tobago, Jehovha kategiside thumo wa vavelegi vangu ni vambe. Khu guya khu mubiko nyo hegise, tanga nya 9892 vathu va bede omu nya wukhozeyi nya lisine. Aruba, gu thumide vathu nya vangi ngudzu gasi gu tiyisa libandla nyo pheye nyi nga ba nyi lumba umo. Olu nyi ganeyago, gidwani gyogyo gi na ni 14 mabandla nyo tiye. Nigeria, tengo nya vahuweleyi wu engedzede ngudzu wu khala gidzemo nya 381 398. Nigu omu nya gidwani gya Santa Lúcia, gu na ni 783 vathu va seketeyago Mufumo wa Jehovha.

Olu nyi na ni 90 myaga. Ndzimo 92:14 yo ganeya esi khava va yadwego dzindzarini nya nyumba ya Jehovha: “Ambari na va gumbide, va na ninga mihandro, gikhati gyatshavbo va na mana tshivba, va tala khu womi.”

Nyi ngu bonga ngudzu khu womi nyi wu vbanyidego thumoni wa Jehovha. Thomba ya liphuvboni nyi yi manidego ga vavelegi vangu yi nyi phaside gu thumeya Jehovha khu guvbeleya. Khu kotani nya lihaladzo laye, Jehovha nyi dzumelede gu “thela matamo mwendro gu rumbuga dzindzarini nya nyumba” ya Nungungulu wangu. — Ndzi. 92:13.