NDRIMA NYA GIHEVBULO 7
Hi ngu mu haladza ngudzu Papayi wathu Jehovha
“Hi ngu haladza Nungungulu, kholu Uye khuye a nga phela khuye gu hi haladza.” — 1 JOH. 4:19.
NDZIMO 3 Tshivba yathu ni gutumba gwathu
ESI HI NA SI HEVBULAGO AVBA NYA NDRIMA YEYI *
1-2. Jehovha hi tulede kharini ndziya nyo khale sivbango nya ndranga yaye, nigu khu ginani?
JEHOVHA a ngu hi raneya gu gira gipandre nya ndranga yaye nya vakhozeyi. Ilolo lithomo nya likhongolo ngudzu. Ndranga yathu ya gu wumbwa khu vathu va dzi hendzeledzidego ga Nungungulu va bwe va yeyedza gukhodwa ga muphaso nya dzegiso wa Gyanana gyaye. Hi ndranga yi tsakidego ngudzu. Hi ngu dzi buza khu womi nyo tsakise olu nigu hi ngu tsaka gambe kholu hi na ni gutumba nyo vbanye kala gupindruga ndzadzini mwendro Paradhesini mafuni.
2 Jehovha a hi giride sivbango nya ndranga yaye kholu a hi haladzago ngudzu. Ganiolu gasi gu gira isoso si lombegide gu Jehovha a gira gilo nya gikhongolo ngudzu. (Joh. 3:16) Ethu hi ‘rengidwe khu tengo nya wungi.’ (1 Kor. 6:20) Khu gu thumisa muphaso wa Jesu, Jehovha hi dzumelede gu hi manega ni wupari wa vbafuvbi naye. Hi na ni lithomo nyo rane Papayi muthu a khugegidego ngudzu ga vatshavbo mafuni ni ndzadzini. Nigu kha nga hi si wonidego ga ndrima yi vbindridego, Jehovha khuye Papayi nya wadi ga vatshavbo.
3. Siwudziso muni hi nga dzi girago? (Wona kwadru “ Ina Jehovha a ngu nyi wona?”)
3 Gu fana ni mulovi moyo nya Bhibhiliya, si nga gira hi wudzisa esi: “Nyi na bongisa guwani PFHUMU Nungungulu, khu wuwadi watshavbo a nyi giredego?” (Ndzi. 116:12) Hlamulo khowu, gima kha hi na nga si kodza gu bweledzeya Papayi wathu wa ndzadzini satshavbo a hi giredego. Ambari ulolo, isoso sa gu hi kutsa gu mu haladza. Mupostoli Johane lovide khuye: “Hi ngu haladza Nungungulu, kholu Uye khuye a nga phela khuye gu hi haladza.” (1 Joh. 4:19) Hi nga yeyedza khu dzindziya muni gu khethu hi ngu haladza Papayi wathu wa ndzadzini?
HIDZIMEYA VBAFUVBI GA JEHOVHA
Ha gu yeyedza gu khethu hi ngu mu haladza ngudzu Papayi wathu, Jehovha, khu gu hidzimeya gwaye khu nombelo, hi mu engisa hi bwe hi phasa vambe gu mu haladza (Wona dzindrimana 4-14)
4. Guya khu Jakobe 4:8, khu ginani hi yedego gu dzi garadza gasi gu hidzimeya ga Jehovha?
4 Jehovha a gu vbweta gu khuye hi khala dzipari dzaye hi bwe hi bhula naye. (Leri Jakobe 4:8.) A gu hi kutsa gu simama gu gombeya, nigu a dzi emisede gu hi engiseya tepo yatshavbo. (Rom. 12:12) Uye gima kha pharega mwendro gu garala nyo bwe a si si kodzi gu hi engiseya. Nigu ethu ha gu mu engiseya khu gu leri Lito laye, Bhibhiliya, gumogo ni mabhuku ma hi phasago gu yi pwisisa. Ha gu mu engiseya gambe khu gu vega gwadi gupima mitshanganoni nya libandla. Gu fana ni gyanana gi tiyisago wupari wagyo ni vavelegi vagyo khu gu bhula navo tepo yatshavbo, anethu hi nga si kodza gu hidzimeya ga Jehovha khu gu bhula naye tepo yatshavbo.
Wona ndrimana 5
5. Hi nga tshukwadzisa kharini milombelo yathu?
5 Nga dundrugeya khu makhalelo nya milombelo yago. Jehovha a gu vbweta gu khuye hi mu tuleya myonyo yathu milombeloni yathu. (Ndzi. 62:8) Hi yede gu dzi gira giwudziso gegi: ‘Ina milombelo yangu nyo yi veteya vbatshani basi, nyi ngu wuyedzeya gu ganeya silo sasimweso mwendro milombelo yi khugeyago monyoni gu fana ni lidangaliya li lovidwego khu mandza?’ Kha si kanakanisi gu khiso u ngu mu haladza ngudzu Jehovha nigu wa gu vbweta gu tiyisa wupari wago naye. Gasi gu gira isoso, u yede gu bhula naye tepo yatshavbo. Mu embeye esi si sihadego monyoni gwago. Mu bhuleye esi si gu tsakisago ni esi si gu vbisisago monyo. Tiyisega gu khuwe u nga hidzimeya gwaye gasi gu lomba giphaso.
6. Ginani hi nga girago gasi hi hidzimeya ga Papayi wathu wa ndzadzini?
6 Gasi gu hidzimeya ga Papayi wathu wa ndzadzini, hi yede gu mu bonga tepo yatshavbo. Hi ngu ema ni mulovi nya dzindzimo a nga khuye: “U hi girede siliwugiso nya singi, Uwe PFHUMU Nungungulu wangu, mwalo muthu a fananago ni uwe, khu makungo u giridego nya guphasedzele ethu; eni nya gu gola gu ma pwadza nyi ma tivisa, aholu ma tade ngudzu nyamba kodza ni gu sayedwa.” (Ndzi. 40:5) Ethu kha hipwi basi gu bonga khu monyoni, ganiolu ha gu yeyedza gubonga gwathu ga Jehovha khu malito ni sigiro. Isoso so yeyedza gu khiso ethu hi hambanide ni vathu nya vangi muhuno. Ha gu vbanya tigoni vathu va si bongigo khu satshavbo esi Nungungulu a va giredego. Khu lisine, gimwegyo nya siyeyedzo nyo khigyo ha gu vbanya ‘matshiguni nya guhegise’ khu gu vathu nya vangi kha va yeyedzi gubonga. (2 Thim. 3:1, 2) Ethu kha hi yeli gu ma dzegeleya mavbanyelo yoyo.
7. Ginani egi Jehovha a vbwetago gu khuye hi gira nigu khu ginani?
7 Vavelegi kha va vbweti gu khavo sanana sawe si dwanisana ganiolu vo vbweta gu khavo si khala dzipari. Khu ndziya nyo fane, Jehovha a gu vbweta gu khuye satshavbo sanana saye si pwana. Khu lisine, lihaladzo eli hi gu nalo khu vambe la gu hi tivegisa kha nga maKristo nya lisine. (Joh. 13:35) Hi ngu ema ni mulovi nya dzindzimo a nga khuye: “Nga pwani gutshamba ni gutsakisa, valongo va gu vbanya dangamwedo khu gupwanana!” (Ndzi. 133:1) Tepo hi haladzago vandriyathu ha gu yeyedza gu khethu hi ngu haladza Jehovha. (1 Joh. 4:20) Si ngu hi tsakisa ngudzu gu gira gipandre nya vandriyathu va gu na ni ‘ndruda, va pweyanago wusiwana, ni gu tsetselelana.’ — Efes. 4:32.
YEYEDZA LIHALADZO LAGO KHU GU ENGISA
Wona ndrimana 8
8. Guya khu 1 Johane 5:3, khu gevbini gighelo nya litshina gi hi girago hi engisa Jehovha?
8 Jehovha a gu vireya gu khuye sanana si engisa vavelegi vaso nigu a gu vireya gu khuye anethu hi mu engisa. (Efes. 6:1) Hi yede gu mu engisa kholu khuye Muvangi wathu, khuye musayisi nya womi wathu nigu khuye a tigo ngudzu guvbindra vatshavbo vavelegi. Ganiolu gighelo nya litshina gi hi girago hi engisa Jehovha khu gu hi ngu mu haladza. (Leri 1 Johane 5:3.) Ambari olu hi gu na ni sighelo nya singi nyo engise Jehovha, uye gima kha hi gurumedzi gu mu engisa. Jehovha hi ningide giningwa nya gu hi dzi hatheya habune esi hi si vbwetago, khu kharato si ngu mu tsakisa tepo hi hathago gu engisa uye khu kotani nya olu hi mu haladzago.
9-10. Khu ginani si gu na ni lisima guti milayo ya Nungungulu ni gu vbanya khiyo?
9 Vavelegi vo vbweta gu khavo sanana sawe si dzipwa na si vhikelegide. Khu gighelo gyogyo, avo va gu vega milayo nya mavbanyelo yi phasago sanana sawe. Tepo sanana si engisago milayo yoyo, sa gu yeyedza gu khiso si ngu tumba vavelegi vaso ni gu si ngu va ninga githawo. Khu kharato, si na ni lisima ngudzu gu hiti ni gu engisa milayo hi ningidwego khu Papayi wathu wa ndzadzini. Tepo hi girago isoso, ha gu yeyedza Jehovha gu khethu hi ngu mu haladza ni gu mu ninga githawo nigu anethu hi ngu phasega khisoso. (Isa. 48:17, 18) Ganiolu, ava va kanyisago Jehovha ni milayo yaye va gu hegisa khu gu thegeya mhangoni. — Gal. 6:7, 8.
10 Ha gu vbanya khu ndziya yi tsakisago Jehovha, ha gu dzi vhikeya khu nyamani, khu mapimoni ni liphuvboni. Jehovha a ngu siti esi si gu sadi gwathu. Aurora, a vbanyago Estados Unidos, wari khuye: “Nyi ngu dziti gu kheni gu engisa Jehovha tepo yatshavbo si ngu hi gira hi manega ni womi nya wadi.” Hatshavbo hi ngu fakaza lisine lolo. Ina u nga si phasegi khu gu engisa milayo nya lihaladzo ya Jehovha?
11. Nombelo wa gu hi phasa kharini?
11 Nombelo wu ngu hi phasa gu engisa ambari sa gu ba si garadza. Dzimbe dzitepo si na garadza gu engisa Jehovha ganiolu gu vbwetega tepo yatshavbo hi dzi garadza gasi hi kodza gu pala guwegeleya gwathu nya gighoho. Muembi nya dzindzimo a lombide ga Nungungulu, khuye: “Nyi ninge mapimo, gasi nyi vegisa gwadi nayo wago, nyi na wu landrisa khu monyo wangu watshavbo.” (Ndzi. 119:34) Denise a gu piyonero nya tepo yatshavbo wari khuye: “Tepo nyi wonago na si nyi garadzeya gu engisa nayo nyo khaguri wa Jehovha, nya gu gombeya gasi a nyi ninga tshivba nya gu gire esi nya sadi.” Hi nga tiyisega gu khethu tepo yatshavbo Jehovha a na engisa milombelo nya nga yoyo. — Luka 11:9-13.
PHASA VAMBE GU HALADZA PAPAYI WATHU
12. Guya khu Vaefeso 5:1, ginani hi yedego gu gira?
12 Leri Vaefeso 5:1. Kha nga “sanana nya sigodwa” sa Jehovha ha gu gira satshavbo hi si kodzago gasi gu mu pimedzeya. Ha gu pimedzeya makhalelo yaye tepo hi yeyedzago lihaladzo, wuwadi ni gu divaleya vambe. Tepo vale va gu mba muti Nungungulu va wonago makhalelo yathu si nga gira va vbweta gu hevbula maningano ni uye. (1 Ped. 2:12) Vavelegi nya maKristo gu vbwetega va dzi garadzeya gu pimedzeya Jehovha khu ndziya eyi va pharago khiyo sanana sawe. Tepo vavelegi va pimedzeyago Jehovha, si nga gira sanana sawe niso si vbweta gu khala dzipari dza Jehovha.
Wona ndrimana 13
13. Ginani hi yedego gu gira gasi hi kodza gu tiya hwambo?
13 Kha nga olu gyanana gi dzi khusedzago khu papayi wagyo gi bwe gi tsakiswa khu gu bhula naye, anethu hi ngu dzi khusedza khu Papayi wathu wa ndzadzini, Jehovha nigu ha gu vbweta gu khethu vambe navo va muti. Khu monyoni hatshavbo ha gu dzipwa nga Pfhumu Dhavhidhe, a nga lova khuye: “Hefemulo wangu wu na dzi zundza khu PFHUMU Nungungulu.” (Ndzi. 34:2) Ahati ha gu ba hi thava gu bhula ni vambe khu Jehovha? Hi nga kodza kharini gu tiya hwambo? Hi na tiya hwambo ha gu dundrugeya khedzi Jehovha a na tsakago khidzo ha gu bhuleya vambe khuye. Jehovha a na hi ninga gutiya-hwambo gu vbwetegago. Uye phaside vandriyathu va lizana myaga nya gupheye gu tiya hwambo nigu anethu a na hi phasa. — 1 Tes. 2:2.
14. Khu sevbi simbe sighelo nya lisima si hi kutsago gu patega thumoni nyo gire vapizane?
14 Jehovha mwalo gihatheya khu kharato uye a ngu tsaka tepo a hi wonago na hi gu yeyedza lihaladzo khu vambe ambari na va khade kharini mwendro na vari va mambe mafumbo. (Mith. 10:34, 35) Mweyo nya dzindziya nya dzadi ngudzu nyo yeyedze lihaladzo khu vambe khu gu va bhuleya mahungu nya yadi. (Mat. 28:19, 20) Handro muni wu na reswago khu thumo wowu? Vale va hi engiseyago va nga tshukwadzisa womi wawe olu ni gu mana gutumba nya womi nya gupindruge mindru wa tshigu. — 1 Thim. 4:16.
HALADZA PAPAYI WATHU GASI U TSAKA
15-16. Sighelo muni hi gu naso nyo tsake?
15 Jehovha Papayi nya lihaladzo khu kharato a gu vbweta gu khuye ndranga yaye yi tsaka. (Isa. 65:14) Hi na ni sighelo nya singi si hi girago hi tsaka olu, ambari olu adzina hi emisanago ni sigaradzo. Khu giyeyedzo, hi ngu tiyisega gu khethu Papayi wathu wa ndzadzini a ngu hi haladza ngudzu. Hi na ni guti nya lisine nya Lito la Nungungulu, Bhibhiliya. (Jer. 15:16) Nigu hi sivbango nya ndranga mweyo nyo hathege yi wumbwago khu vathu va haladzago Jehovha, milayo yaye ni gu haladzana khu gyawe. — Ndzi. 106:4, 5.
16 Hi nga simama na hi tsakide kholu hi na ni gutumba nyo tiye nyo khethu hi na manega ni womi nya wadi ngudzu mindru wa tshigu. Hi ngu dziti gu khethu nugunugu Jehovha a na dusa gwatshavbo guvivba nigu a na thumisa Mufumo waye gasi gu gira mafu yatshavbo ma khala Paradhesi. Nigu hi na ni gutumba nyo khethu vale va fudego va na wuswa va ta manana gambe ni sigodwa sawe. (Joh. 5:28, 29) Isoso si na tsakisa ngudzu! Nigu nya lisima ngudzu, hi ngu tiyisega gu khethu nugunugu satshavbo sivangwa mafuni ni ndzadzini si na rungudza ni gu khozeya Papayi wathu nya lihaladzo khedzi si vbwetegago khidzo.
NDZIMO 12 Jehovha, Nungungulu nya khongolo
^ ndri. 5 Hi ngu dziti gu khethu Papayi wathu, Jehovha, a ngu hi haladza ngudzu nigu a hi giride sivbango nya ndranga yaye nya vakhozeyi. Khu kharato anethu gu vbwetega hi mu haladza. Hi nga yeyedza kharini lihaladzo lathu khu Papayi wathu? Ndrima yeyi yi na ganeya khu silo nyo khaguri hi nga girago.
