DZITEPONI nya Bhibhiliya, mwama a gu vbweta gu tshadha a di yede gu livba tengo nyo khaguri ga valongo nya noivha. Avba nya tengo nya noivha adzina si di gu pata sirengo, dzitsapawu mwendro simbe silo nya lisima. Dzimbe dzitepo, avo va di gu livba tengo wowo khu gu gira thumo nyo khaguri, gufana ni esi a giridego Jakobe. Uye dzumede gu thumeya papayi wa Rakeli khu 7 myaga gasi a si kodza gu tshada naye. (Gen. 29:17, 18, 20) Khu yavbini makungo nya giolovedzo gegi?

Muhevbuli moyo nya matimo nya Bhibhiliya Carol Meyers a gu ganeya gu khuye: “Tengo nya noivha wu di gu phasedzeya valongo nya noivha avbo nya thumo wu nga ba wu girwa khu gyanana gyawe gundzugundzu umo nya dzindranga va nga ba va vbanya khu gulima.” Tengo nya noivha adzina wu di gu thumisedwa gambe gasi gu tiyisa wulongo nya dzindranga dza dzimbili. Khu gu ba dzipwanana dzindranga dzedzi dza dzimbili dzi na phasana tepo dzi emisanago ni sigaradzo. Gu diga isoso, tengo wowu wu di gu yeyedza gu khuwo nyamayi a diri noivha nigu gu khugeya avbovbo kha nga hadzi gu khathaledwa ni gu vikhedwa khu papayi waye, ganiolu khu mwama waye.

Gulivba tengo nya noivha kha sa nga ba si vbweta gu ganeya gu khiso nyamayi a diri gyombo nyo khaguri gi nga ba gi rengiswa mwendro gu rengwa. Libhuku O Israel Antigo — a sua vida e a sua Instituição yari khiyo: “Fanelo nyo livbe khu dzitsapawu ndrangani ga noivha, ga Vaisrayeli si di gu gira gu khatshi avo va gu renga noivha. Ganiolu, so gira gu khatshi tengo nya noivha wu di gu yeyedza gubonga ga valongo nya noivha na siri tengo nyo rengi nyamayi.”

Muhuno, ga mayigo nyo khaguri vathu va ngo gu simama gu landra giolovedzo nya gu livbi tengo nya noivha. Tepo vavelegi nya Makristo ma lombago tengo nya noivha, ayo ma gu yeyedza ‘wuwadi wawe ga vatshavbo’ khu gu mba lomba dzitsapawu nya dzingi. (Filp. 4:5; 1 Kor. 10:32, 33) Khu dziya yeyi, avo kha va na nga yeyedza gu khavo va ngu ‘gola dzitsapawu,’ mwendro va nya magundrele. (2 Thim. 3:2) Khu gu engendzeya, tepo vavelegi nya Makristo va gu mba lomba dzitsapawu nya dzingi nya tengo nya noivha, noivho kha yi na nga gurumedzega gu thindregisa mutshado gasi gu mana dzitsapawu nyo eneyi gasi gu livba tengo nya noivha mwendro noivho kha yi na nga dzipwa na yi gu gurumedzega gu diga gu thuma kha nga Piyonero gasi gu vbwetedzeya thumo wu na mu ningago dzitsapawu gasi a si kodza gu livba tengo nya noivha.

Ga mambe mayigo, tengo nya noivha wu vegisidwe khu nayo. Ga siemo sesi, vavelegi nya Makristo va ngu engisa milayo yeyi. Khu ginani? Lito la Nungungulu lo ganeya gu khilo Makristo ma yede gu “yingela vathangeli va vegidwego khu nayo” ni gu engisa milayo yi si dwanisanigo ni milayo ya Nungugulu. — Rom. 13:1; Mith. 5:29.