GUYA khu nayo, si di gu dzumedziswa gu ningeya matuva ni sipomba kha nga muphaso ga Jehovha. Sinyoni sesi, tepo yatshavbo sa gu khumbugwa sa sivili umo nya nayo nya gu ningeye muphaso nigu muthu a gu hamuga ginyoni gimwegyo a di gu si kodza gu tshikedza khu gimbe. (Levhi 1:14; 12:8; 14:30) Khu ginani isoso si nga ba si phasa? Gimwegyo nya sighelo khu gu si di gu garadza gu mana matuva. Khu ginani hi ganeyago isoso?

Matuva sinyoni si gu mba khala wulanga wumowo si vbanyago tigoni gwatshavbo ga Israyeli umo nya migima nya gu vbise. Ga migima yatshavbo nya Outubro, iso sa gu vbuvba si hongola sul ga mambe mayigo ma vbisago, si bweleya Israyeli tepo gu pheyago gu vbisa. (Giz. 2:11, 12; Jer. 8:7) Dziteponi nya Bhibhiliya, tepo nya girame si di gu garadzeya Vaisrayeli gu mana matuva gasi gu ningeya kha nga muphaso.

Gu hambana ni matuva, sipomba kha si oloveyi gu hongola hwindzo, khu kharato iso si di gu manega mwaga watshavbo Israyeli. Gu diga isoso, sipomba si di gu fuywa. (Fananisa ni Joh. 2:14, 16) Guya khu libhuku Plantas da Biblia e animais, “dzatshavbo dzialdeya ni madhoropa ya Palestina va di gu fuya sipomba. Ndranga ni ndranga yi diri ni gifi mwendro wulanga nyo khaguri gasi si vbanya sinyoni.” — Fananisa ni Isaya 60:8.

Jehovha yeyedzide gu khuye a ni lihaladzo nigu a ngu vbevbugisa silo khu gu dzumeya miphaso nya sinyoni si nga ba si manega mwaga watshavbo Israyeli.