1-2. Ginani gi hi phasago gu pwisisa edzi Jehovha a dzipwago khidzo khu gu ba lina laye li tsundzisidwe?

 WONA giyeyedzo gegi: Muthu nyo khaguri u mu golago o ganeya silo nyo vivbe khuwe. Uwe u ngu dziti gu khuwe malipha, ganiolu vathu nyo khaguri va ngu si khodwa. Gu diga isoso, avo vo pheya gu ma swayela nigu vambe va ma khodwa. U di hadzi gu dzipwa kharini? Abari gu vathu vovo va na ni lisima gwago nigu u ngu ninga lisima mavbanyelo yago nya yadi u di hadzi gu mba tsaka khu isoso, khandridzo? — Mav. 22:1.

² Giyeyedzo gegi gya gu hi phasa gu pwisisa edzi Jehovha a dzipwidego khidzo tepo lina laye li nga tsundziswa. Gimwegyo nya sivangwa sa Nungungulu sa ndzadzini gi di lipheya nyamayi nyo pheye Evha maningano khu Jehovha. Uye a di khodwa ga malipha yoyo. Khu kotani nya malipha yoyo, vavelegi vathu nyo pheye va di wugeya Jehovha. Kha nga handro wakone, gighoho ni gufa si di thapeya vathu vatshavbo. (Gen. 3:1-6; Rom. 5:12) Satshavbo silo hi si wonago muhuno nya nga gufa, dzinyimbi ni gu tshaniseka, somo khu kotani nya olu Sathane a nga lipha thembweni ga Edheni. Jehovha a gu dzipwa kharini khu sigaradzo si vangidwego khu malipha yoyo? Khu lisine, uye a ngupwa ngudzu guvbisa, ambari ulolo Jehovha kha zangari mwendro gu vega likhulo. Wulangani nya isoso, uye a ngo simama gu khala “Nungungulu nyo tsake.” — 1 Thim. 1:11.

3. Lithomo muni hi gu nalo?

³ Ethu hi na ni lithomo nya gu phasedzeye Jehovha gu yeyedza gu khethu Sathane a gu lipha maningano khesi a ganeyago khu lina laye. Hi nga gira isoso khu gu engisa nayo wu gu khuwo: “Dhumisani lina la Jehovha.” (Ndzi. 113:1, NM) Ethu ha gu dhumisa Jehovha tepo hi bhuleyago vambe khu silo nya sadi maningano khuye. Ina u na dhumisa lina la Jehovha? Hongoleni hi wona sighelo siraru si na hi phasago gu dhumisa Nungungulu khu monyo wathu watshavbo.

 JEHOVHA A NGU TSAKA TEPO HI DHUMISAGO LINA LAYE

4. Khu ginani Jehovha a tsakago khu gu hi mu dhumisa? Ninga giyeyedzo. (Wona fotu.)

⁴ Papayi wathu wa ndzadzini a ngu tsaka tepo hi dhumisago lina laye. (Ndzi. 119:108) Ina so thula gu khiso Nungungulu nya tshivba yatshavbo a ngu fana ni vambe vathu va vbwetago gu zundzwa tepo yatshavbo gasi gu tiyiswa? Ahihi. Wona giyeyedzo gegi. Dundrugeya gyanana nyo khaguri gi tutumago gya wugareya papayi wagyo gi bwe gi mu embeya gu khigyo: “Uwe u papayi nyo golege guvbindra vatshavbo mafuni!” Papayi wakone a gu tsaka ngudzu a bwe kuhwa khesi gyanana gyaye gi giridego. Khu ginani? Kholu kha vireyi gu tiyiswa ni gu zundzwa khu gyanana gyaye gasi gu khala papayi nya wadi. Wulangani nya isoso, uye a ngu dziti gu khuye papayi nya wadi, ganiolu a ngu tsaka khu gu wona gyanana gyaye na gi gu yeyedza lihaladzo ni gubonga. Uye a ngu dziti gu khuye makhalelo yoyo ma na gi phasa gu dandra na gi tsakide. Khu sighelo soso, Jehovha, Papayi wathu nya khongolo, a ngu tsaka tepo hi mu dhumisago.

5. Tepo hi dhumisago Jehovha, ha gu mu phasa gu yeyedza ginani?

⁵ Tepo hi dhumisago Papayi wathu wa ndzadzini, ha gu phasedzeya Jehovha gu yeyedza gu khethu esi Sathane a ganedego maningano khethu malipha. Sathane a di khuye, mwalo muthu a na si kodzago gu dhumisa lina la Nungungulu. Uye ganede gambe gu khuye mwalo muthu a na si kodzago gu simama na tumbegide ga Nungungulu a gu tshangana ni sigaradzo. Nigu ganede gambe gu khuye, hatshavbo hi di hadzi diga Jehovha a gu tshuka muthu nyo khaguri a hi ninga gilo gi wonegago gu khatshi i tshukwana guvbindra esi Jehovha a hi ningago. (Joba 1:9-11; 2:4) Ganiolu, Joba simamide na tumbegide, nigu yeyedzide gu khuye Sathane muliphi. Ethu ke, ina hi na simama na hi tumbegide ga Nungungulu? Moyo ni moyo wathu, a nga dhumisa lina la Papayi wathu khu gu simama gu mu thumeya khu gutumbega ni gu mu gira a tsaka. (Mav. 27:11) Khu lisine, lithomo gu gira isoso.

6. Hi nga pimedzeya kharini giyeyedzo gya Pfhumu Dhavhidhe ni Valevhi? (Nehemiya 9:5)

⁶ Lihaladzo hi gu nalo khu Nungungulu li ngu gira vathu nyo tumbege va vbweta gu dhumisa lina laye khu monyo wawe watshavbo. Pfhumu Dhavhidhe lovide gu khuye: “Uwe hefemulo wangu dhumisa Pfhumu Nungungulu, ni satshavbo si guromo ndrani gwangu, si na bonge lina laye li agidego.” (Ndzi. 103:1) Dhavhidhe pwisiside gu khuye gu dhumisa lina la Jehovha so thula gu dhumisa Jehovha kamo. Tepo hipwago lina la Jehovha, ha gu dundrugeya khedzi a khadego khidzo, makhalelo yaye nya yadi ni silo nya sadi a girago. Dhavhidhe a di gu vbweta gu  dhumisa lina la Papayi waye kholu Jehovha agide. Uye a di gu vbweta gu gira isoso ‘khu gu thumisa satshavbo a nga ba ari naso’ mwendro khu monyo waye watshavbo. Khu ndziya nyo fane, Valevhi va di gu thangisa ngudzu lithomo leli nya gu dhumise Jehovha. Khu gu dzi nogisa, avo va di dzumede gu khavo malito yawe gima ma di hadzi gu mba si kodza gu ninga lina la Jehovha wudhumo wu vbwetegago. (Leri Nehemiya 9:5.) Nya mba kanakana, gudzinogisa gogo gu reside gutsaka monyoni ga Jehovha.

7. Hi nga dhumisa kharini Jehovha thumoni nyo tshumayele ni guvbanyani gwathu ga tshigu ni tshigu?

⁷ Muhuno, hi nga dhumisa Jehovha khu ndziya eyi hi mu yeyedzago khiyo gubonga ni lihaladzo. Tepo hi tshumayelago, makungo yathu nya lisima gu phasa vambe gu hidzimeya ga Jehovha va bwe va dzipwa na va gu haladzwa khu Papayi wathu wa ndzadzini. (Jak. 4:8) Ethu hi ngu tsaka ngudzu khu gu yeyedza vathu makhalelo ya Jehovha ma gu romo omu nya Bhibhiliya nya nga, lihaladzo, gu lulama, guti, tshivba ni mambe makhalelo nyo hlamadzise a gu nawo. Ethu gambe hi ngu dhumisa Jehovha ni gu mu tsakisa tepo hi girago satshavbo hi si kodzago gasi gu mu pimedzeya. (Efes. 5:1) Tepo hi girago isoso, vambe va na wona gu khavo hi hambanide ni vathu va mafuni momu nyo vivbe. (Mat. 5:14-16) Tepo hi tshanganago navo, hi nga londrola lithomo nya gu va tshamuseye gu khethu khu ginani hi hambanidego ni vambe. Kha nga handro wakone, nya vangi va nga dzumeya gu hevbula nya singi khu Nungungulu wathu. Tepo hi dhumisago Jehovha khu dzindziya dzedzi, ha gu tsakisa monyo waye. — 1 Thim. 2:3, 4.

JESU A NGU TSAKA TEPO HI DHUMISAGO LINA LA JEHOVHA

8. Khu ginani Jesu a gu giyeyedzo nya gyadi nyo dhumise lina la Jehovha?

⁸ Ga satshavbo sivangwa si gu romo ndzadzini ni mafuni, gimwalo gitigo gwadi Jehovha guvbindra Jesu. (Mat. 11:27) Jesu a ngu haladza Papayi waye nigu a ngu pheya khuye gu dhumisa lina la Jehovha. (Joh. 14:31) Ga nombelo a nga gireya Papayi waye ga wutshigu nyo hegise na si gufi, a di ganeya khu thumo a wu giridego mafuni khu malito nya madugwana gu khuye: “Eni nyi va tiviside lina lago.” (Joh. 17:26) Jesu a di gu vbweta gu khuye ginani?

9. Giyeyedzo muni nyo vbevbuge egi Jesu a gi thumisidego gasi gu yeyedza makhalelo ya Papayi waye?

⁹ Jesu a giride nya singi guvbindra gu embeya basi vathu gu khuye lina la Nungungulu khu Jehovha. Vajudha va hevbudzidwego khu Jesu va di gu liti lina Nungungulu. Ganiolu, Jesu khuye a nga pheya khuye gu mu “tivegisa.” (Joh. 1:17, 18) Khu giyeyedzo, Milowo nya Gihebheru ya gu yeyedza gu khiyo Jehovha na ni wuhindzi ni pweya-wusiwana. (Ekiso. 34:5-7) Jesu vegide isoso guagani tepo a nga ganeya khu giyeyedzo nya papayi nyo khaguri ni gyanana gi nga ba gi dzimede. Tepo hi hevbulago khu papayi a nga wona gyanana gyaye na gi ngari hwindzo, a khuga khu gututuma a ya gi abrasari, a gi divaleya khu gu vbeleya, hi ngu pwisisa gwadi wuhindzi ni pweya-wusiwana wa Jehovha. (Luka 15:11-32) Jesu a hi phaside gu pwisisa gwadi edzi Jehovha a gu idzo khu lisine.

10. a) Ha gu dziti kharini gu khethu Jesu a di gu thumisa lina la Papayi waye, nigu a di gu vbweta gu khuye vambe va gira sasimweso? (Marko 5:19) (Wona fotu.) b) Ginani egi Jesu a vbwetago gu khuye hi gira muhuno?

¹⁰ Ina Jesu a di gu vbweta gu khuye vambe va thumisa lina la Papayi waye? Ina. Vathangeyi nyo khaguri nya dzitshetshi va di gu khodwa gu khavo gu ganeya lina la Nungungulu kha si yeyedzi githawo, ganiolu Jesu kha diga silo soso si gu mba seketedwa omu nya Bhibhiliya si mu himbedzeya gu dhumisa lina la Papayi waye. Dundrugeya tepo Jesu a nga vbanyisa mwama moyo a nga ba ari ni madhemoni gipandreni gya Vagerazi. Vathu va di thava ngudzu Jesu va bwe va mu lomba gasi gu duga khu gipandreni mule.  (Marko 5:16, 17) Ambari ulolo, Jesu a di gu vbweta gu khuye vathu va mule vati lina la Nungungulu. Khu kharato, Jesu a di embeya mwama a mu vbanyisidego gasi gu embeya vathu gu khuye a di vbanyiswa khu Jehovha nasiri khuye. (Leri Marko 5:19.) a Jesu a ngo vbweta gu khuye lina la Papayi waye li tidwa mafuni gwatshavbo. (Mat. 24:14; 28:19, 20) Ha gu gira gipandre gyathu, Pfhumu yathu Jesu yi na tsaka ngudzu.

11. Jesu a di hevbudza valandreyi vaye gu gombeleya ginani, nigu khu ginani isoso si gu na ni lisima? (Ezekiyeli 36:23)

¹¹ Jesu a di gu dziti gu khuye makungo ya Jehovha gu agisa lina Laye ni gu yeyedza gu khuye esi si ganedwego maningano khuye, malipha. Khu gighelo gegi, embede valandreyi vaye gu gombeya gu khavo: “Papayi wathu u gu romo ndzadzini, lina lago li na agiswe.” (Mat. 6:9) Jesu a di gu pwisisa gu khuye mahungu yaya ma ngu kuha sivangwa satshavbo. (Leri Ezekiyeli 36:23.) Ga satshavbo sivangwa si gomogo mafuni, gimwalo gi nga gira gilogyo gasi gu agisa lina la Jehovha guvbindra Jesu. Ganiolu, tepo Jesu a nga modwa, valala vaye va di mu singedza gu khavo kha nga ba a yeyedza githawo Papayi waye. Khu lisine, Jesu a di gu dziti gu khuye gu vala ni gu ganeya guvivba khu lina nya guage la Papayi waye gi diri gighoho nya gikhongolo ngudzu. Gu singedzwa khu silo sesi si mu vbiside ngudzu monyo. Adzina saye, khiso si nga mu gira a “garadzega ngudzu” na si modwi.— Luka 22:41-44.

12. Jesu agiside kharini lina la Papayi waye?

¹² Gasi gu agisa lina la Papayi waye, Jesu timisede gu tshaniswa, gu vadwa ni gu singedzwa malipha. Uye a di gu dziti gu khuye a di gu engiside Papayi waye ga silo satshavbo, khu kharato a diri mwalo gighelo nya gu khale dzitshoni. (Hebh. 12:2) Nigu gambe a di gu dziti gu khuye Sathane a di gu mu wugeya, ngudzu-ngudzu ga dzitepo dzile nyo garadze. (Luka 22:2-4; 23:33, 34) Sathane a di gu vbweta gu gira Jesu a diga gutumbega, ganiolu kha si kodza. Jesu yeyedzide gu khuye Sathane muliphi nya khongolo, nigu Jehovha a na ni sithumi si simamago gu tumbega gwaye ambari sa gu tshangana ni sigaradzo.

13. U nga tsakisa kharini Pfhumu yago?

¹³ U ngu dzina gu tsakisa Pfhumu yago? Simama gu dhumisa lina la Jehovha khu gu phasa  vambe guti makhalelo nyo hlamadzise ya Nungungulu. Wa gu gira isoso, wa gu pimedzeya Jesu. (1 Ped. 2:21) Gu fana ni Jesu, u na tsakisa Jehovha u bwe u yeyedza gu khuwe Sathane avbo nya malipha basi, kha padwi khu muthu!

ETHU HA GU DHUMISA LINA LA JEHOVHA TEPO HI PHASEDZEYAGO GU VBULUGISA VATHU

14-15. Silo muni nyo tsakise si giregago tepo hi hevbudzago vathu maningano khu Jehovha?

¹⁴ Tepo hi dhumisago lina la Jehovha ha gu phasa gu vbulugisa vathu. Khu ndziya muni? Sathane a di sega mapimo ya “vale nya mba khodwa.” (2 Kor. 4:4) Kha nga handro wakone, avo va gu khodwa ga malipha ya Sathane nya nga aya ma gu khayo: Nungungulu a mwalo, womo hwindzo ni ethu, kha khathali khu vathu, a vivbedwe khu monyo nigu a gu tshanisa sighohi kala gupindruga. Sathane a gu swayela malipha yoyo gasi gu tsundzisa lina la Jehovha ni gu himbedzeya vathu gu hidzimeya gwaye. Ganiolu, tepo hi tshumayelago ha gu himbedzeya Sathane gu gira isoso. Ethu ha gu dhumisa lina nya guage la Nungungulu khu gu hevbudza vathu lisine maningano khu Papayi wathu. Khu wevbini handro wakone?

¹⁵ Lisine nya Lito la Nungungulu li na ni tshivba ngudzu. Tepo hi hevbudzago vathu maningano khu Jehovha ni edzi a gu idzo khu lisine, hi ngu wona gilo nyo hlamadzise ngudzu. Vathu kha va kanganyiswe gambe khu malipha ya Sathane, nigu avo va gu pheya gu wona makhalelo nyo mbure ya Papayi wathu. Avo va gu samadziswa khu tshivba yaye nya mba vbeya. (Isa. 40:26) Avo va gu hevbuleya gu mu tumba kholu uye a lulamide khu gu vbeleya. (Dhet. 32:4) Avo va ngu hevbula khu guti gwaye nya gukhongolo. (Isa. 55:9; Rom. 11:33) Nigu va ngu dzipwa na va gu thaveledwa tepo va hevbulago gu khavo Jehovha lihaladzo. (1 Joh. 4:8) Tepo va simamago gu hidzimeya ga Jehovha, gutumba gwawe nya gu vbanye kala gupindruga gwa gu khala nya lisine. Lithomo nya likhongolo gu phasa vathu gu hidzimeya ga Papayi wathu! Tepo hi girago isoso, Jehovha a ngu hi wona nga “sithumi si thumago gumogo” naye. — 1 Kor. 3:5, 9.

16. Vambe va kuhidwe kharini khu gu hevbula lina la Nungungulu? Ninga siyeyedzo.

¹⁶ Adzina saye, gupheyani hi nga hevbudza vathu gu khethu lina la Nungungulu khu Jehovha. Isoso si ngu eneya gasi gu kuha monyo nya muthu a dzi emisedego. Khu giyeyedzo, muphya  nyo khaguri nyo pwani khu Aaliyah b dandrede ga tshetshe yi gu mba hevbudza Bhibhiliya. Ganiolu, kha nga ba a tsakiswa khu tshetshe yaye nigu kha nga ba a dzipwa vbafuvbi ni Nungungulu. Uye a vbindrugedzide hwane nya gu ba a phede gu hevbula ni Dzifakazi dza Jehovha. A di pheya gu wona Nungungulu nga pari yaye. Nigu hlamadzisidwe khu gu hevbula gu khuye lina la Nungungulu li dusidwe omu nya Dzibhibhiliya nya dzingi li bwe li tshikedzwa khu mambe malina nya nga, Pfhumu. Gu hevbula lina la Jehovha si vbindrugedzide womi waye. Uye a di khuye: “Pari yangu nyo golege yi na ni lina!” Khu wevbini handro wakone? Uye a gu engedza gu khuye: “Olu nyi na ni gurula monyoni gwangu nigu nyi ngu dzipwa na nyi tsakide.” Mwama moyo nyo pwani khu Steve, a diri muembi a nga dandriswa omu nya wukhozeyi nya Gijudha khu ndziya nya xapi. Kha nga ba a vbweta gu gira gambe gipandre nya tshetshe kholu a di gu wonide silo nyo vivbe si nga ba si girwa. Ganiolu, hwane nya gu ba mamayi waye a fude, a dzumede gu mana gihevbulo nya Bhibhiliya ni moyo nya Dzifakazi dza Jehovha. Uye kuhidwe ngudzu khu gu hevbula lina la Nungungulu. Uye a di khuye: “Eni gima nyi di nga si hevbuli khu lina la Nungungulu, nigu yi diri tepo nyo pheye nyi nga pwisisa gu kheni Nungungulu womo. Olu nya gu wona Nungungulu nga muthu, nigu eni nyi di gu dziti gu kheni nyi di manide pari nya lisine.”

17. Khu ginani u dzi emisedego gu dhumisa lina la Jehovha? (Wona fotu.)

¹⁷ Thumoni gwago nyo tshumayele ni gu hevbudza, ina u ngu bhuleya vambe khu lina nya guage la Jehovha? Ina u ngu va phasa gu wona edzi Nungungulu wathu a gu idzo khu lisine? Wa gu ba u gira isoso, wa gu dhumisa lina la Nungungulu. Simama gu dhumisa lina nya guage la Jehovha khu gu phasa vambe gu muti gwadi. Khu ndziya yoyo, u na phasedzeya avba nya gu vbulugise womi nya vathu. Nigu u na pimedzeya giyeyedzo gya Pfhumu yago, Jesu Kristo. Gu diga isoso, u na tsakisa Papayi wago nya lihaladzo, Jehovha. Simama gu “rungudza lina [laye] kala gupindruga!” — Ndzi. 145:2.