1. Khu ginani hi vbwetago gu thangedwa khu Jehovha? Ninga giyeyedzo.

 NGA DZI dundrugeya na wu gu dzumede khabini. Dzinyoga, dzingala ni simbe sirengo nya likhabi sa gu vbweta gu gu hodza. Khu lisine, u di hadzi gu tsaka wa gu ba u ri ni mapa ma na gu phasago gu duga khu khabini momo mwendro wa gu mana muthu a na gu phasago guti gwadi dzindziya. Litigo leli la gu fana ni likhabi. Li na ni silo nya singi si nga ghohago wupari wathu ni Jehovha. Ganiolu, hi na ni mapa nya gu tumbege, a gu Jehovha. Uye a ngu hi vhikeya avbo nya sigaradzo ni gu hi thangeya ga ndziya yi hi yisago womini nya mba vbeya, mafuni nya maphya.

2. Jehovha a gu hi thangeya kharini?

² Jehovha a gu hi thangeya kharini? A gu thumisa Lito laye, Bhibhiliya. Ambari ulolo, a gu thumisa gambe vathu gasi gu hi thangeya. Khu giyeyedzo, uye a ngu thumisa “githumi nya gutumbege” gasi gu hi thangeya ni gu hi phasa gu hunga makungo nya yadi. (Mat. 24:45) Jehovha a ngu thumisa gambe vambe vathu va ninganedwago gasi gu hi thangeya. Khu giyeyedzo, gu na ni vawoneleyi nya sirkwitu ni madhota nya libandla ma hi tiyisago ni gu hi phasa gu timiseya sigaradzo. Hi ngu bonga ngudzu Jehovha khu gu hi thangeya gwadi matshigoni yaya nya gu hegise. Isoso si ngu hi phasa gu simama ni wupari wathu ni Jehovha ni gu simama na hi tsakide kala gupindruga.

3. Ginani hi na bhulago khigyo avba ndrima yeyi?

³ Ganiolu, dzimbe dzitepo si nga hi garadzeya gu engisa sileletelo sa Jehovha ngudzu-ngudzu olu hi ningwago khu vathu nya mba vbeleya. Khu ginani? Kholu dzimbe dzitepo va nga hi ninga sileletelo si gu mba hi tsakisa mwendro hi nga pimisa gu khethu wusingalagadzi va hi ningidego kha wu pwisisegi nigu kha va ningwa khu Jehovha. Ga siemo nya nga esi, gu vbwetega hi tumba gu khethu Jehovha khuye a thangeyago vathu vaye, nigu gu engisa sileletelo si na hi reseya makategwa. Gasi gu tiyisa gutumba gwathu, avba nya ndrima yeyi hi na wona 1) edzi Jehovha a nga  thangeya khidzo vathu vaye va lizana myaga nya gupheye, 2) edzi a thangeyago khidzo vathu vaye muhuno ni 3) edzi hi wuyedwago khidzo khu gu engisa sileletelo saye.

JEHOVHA THANGEDE KHARINI VAISRAYELI

4-5. Jehovha yeyedzide kharini gu khuye a di gu thumisa Mosi gasi gu thangeya Vaisrayeli? (Wona fotu nya kapa.)

⁴ Jehovha hathide Mosi gasi gu thangeya Vaisrayeli tepo va nga duga khu Egipito. Nigu a thumiside siwoniso gasi gu yeyedza Vaisrayeli gu khuye a di gu va thangeya khu gu thumisa Mosi. Khu giyeyedzo, gasi gu va yeyedza ndziya, mihani a di gu thumisa lipfhi, vbawutshigutuno a di gu thumisa nilo. (Ekiso. 13:21) Mosi a di gu landriseya lipfhi li nga ba li va vbwegedza yiphwani nyo fuviye. Ganiolu, Vaisrayeli tepo va nga landrwa khu Vagipito va thavide ngudzu kholu va di gu pimisa gu khavo va na songwa. Avo va pimiside gu khavo Mosi a di va kanganyisa khu gu va yisa yiphwani nyo fuviye. Ganiolu, isoso gu diri malipa. Jehovha a thumiside Mosi gasi gu thangeya vathu vaye. (Ekiso. 14:2) Nungungulu ava tsudziside khu ndziya nya gu hlamadzise. — Ekiso. 14:26-28.

⁵ Hwane nya 40 myaga, Mosi simamide gu tumba gu khuye Jehovha a di gu thumisa lipfhi gasi gu thangeya vathu vaye giwulani. a Khu tepo nyo khaguri, Jehovha a di tshisa lipfhi vbatshani nya litendra la Mosi gasi Vaisrayeli vatshavbo va kodza gu li wona. (Ekiso. 33:7, 9, 10) Mosi ganede ni Jehovha khomu nya lipfhi, ni gu khu gu landreya a di ya embeya Vaisrayeli sileletelo a ningidwego khu Jehovha. (Ndzi. 99:7) Vaisrayeli va wonide gwadi gu khavo Jehovha a di gu thumisa Mosi gasi gu va thangeya.

6. Vaisrayeli va si wonide kharini sileletelo sa Jehovha? (Mitengo 14:2, 10, 11)

⁶ Nya mba tsakisa khu gu Vaisrayeli nya vangi kha va nga ba va khodwa gu khavo Jehovha a di gu thumisa Mosi gasi gu va thangeya. (Leri Mitengo 14:2, 10, 11.) Khu dzitepo nya dzingi avo kha va khodwa ga esi Mosi a nga ba a ganeya. Khu kotani nya isoso, Jehovha kha va dzumeleya gu va beya Tigoni nya Gitumbiso. — Mite. 14:30.

7. Ginani Vaisrayeli nyo khaguri va giridego? (Mitengo 14:24) (Wona fotu.)

⁷ Ambari ulolo, Vaisrayeli nyo khaguri va engiside sileletelo sa Mosi. Khu giyeyedzo, Jehovha a di khuye: “Kalebi . . . a landrisago khu lisine ndzila yangu.” (Leri Mitengo 14:24.) Nungungulu tshatshazede Kalebi nigu a mu dzumelede gu a hatha wulanga a nga hadzi khala avbo Tigoni nya Gitumbiso. (Jos. 14:12-14) Vaisrayeli va nga dzumeledwa gu beya Tigoni nya Gitumbiso, va diri giyeyedzo nya gyadi nya gu landrise sileletelo sa Jehovha. Tepo Josuwa a nga khala muthangeli wa Israyeli avo “va di mu ninga githawo kha nga idzo va nga ba va ninga khidzo Mosi na nga gu vbanya.” (Jos. 4:14) Kha nga handro wakona, Jehovha ava kategiside khu gu va ninga litigo a nga ba a va tumbiside. — Jos. 21:43, 44.

8. Tshamuseya edzi Jehovha a thangedego khidzo vathu vaye matshigoni nya Dzipfhumu. (Wona fotu.)

⁸ Ga myaga yi nga ladreya, Jehovha a thumiside valamuli gasi gu thangeya vathu vaye. Hwane nya isoso, matshigoni nya dzipfhumu, Jehovha a thumiside vaprofeti gasi gu thangeya vathu vaye. Dzipfhumu nyo tumbege dzi engiside wusingalagadzi wa vaprofeti. Khu giyeyedzo, Pfhumu Dhavhidhe khu gu dzinogisa a dzumede wusingalagadzi wa muprofeti Natane. (2 Sam. 12:7, 13; 1 Dzik. 17:3, 4) Pfhumu Josafati a engiside wusingalagadzi a ningidwego khu muprofeti Jahaziyele a bwe a kutsa Vajudha gu va ‘khodwa ga vaprofeti va Nungungulu.’  (2 Dzik. 20:14, 15, 20) Tepo Pfhumu Ezekhiya a nga ba a tshangana ni sigaradzo, a lombide giphaso ga muprofeti Isaya. (Isa. 37:1-6) Tepo Dzipfhumu dzi nga ba dzi landrisa wusingalagadzi wa Jehovha, dzi di gu katega nigu vathu va nga ba va fumedwa khidzo va di gu vhikelegide. (2 Dzik. 20:29, 30; 32:22) Si di yede gu vbevbugeya vatshavbo gu wona gu khavo Jehovha a di gu thumisa vaprofeti gasi gu thangeya vathu vaye. Ganiolu, dzipfhumu nya dzingi gu pata ni vambe vathu, va kanyiside vaprofeti va Jehovha. — Jer. 35:12-15.

JEHOVHA THANGEDE KHARINI MAKRISTO YA LIZANA MYAGA NYA GUPHEYE?

9. Khu mani Jehovha a mu thumisidego gasi gu thangeya Makristo nya gupheye? (Wona fotu.)

⁹ Jehovha wumbide libandla nya Wukristo ya lizana myaga nya gupheye. Jehovha a thangede kharini Makristo ga tepo yile? Uye hathide Jesu gasi gu khala hungo nya libandla. (Efes. 5:23) Ganiolu, Jesu kha nga ba a ganeya ga moyo ni moyo gasi gu mu embeya esi a nga ba a yede gu gira. Uye thumiside Vapostoli ni mambe madhota ya Jerusalema gasi gu thangeya. (Mith. 15:1, 2) Vbavbandze nya isoso, gu hathidwe madhota gasi gu thangeya mabandla yatshavbo.— 1 Tes. 5:12; Tit. 1:5.

10. a) Ginani Makristo ya lizana myaga nya gupheye ma giridego tepo ma nga nigwa sileletelo? (Mithumo 15:30, 31) b) Khu ginani ma nga mba engisa ava Jehovha a va hathidego gasi gu ma thangeya? (Wona kwadru “ Khu ginani Makristo ma nga mba engisa ava va nga ba va ma thangeya?”)

¹⁰ Ginani egi Makristo ya lizana myaga nya gupheye ma giridego? Nya vangi va engiside sileletelo va nga ba va ningwa ni gu bwe va si thumisa. Khu lisine, “va di tsaka khu gu ba va tiyisidwe.” (Leri Mithumo 15:30, 31.) Jehovha a gu thangeya kharini vathu vaye muhuno?

JEHOVHA A GU THANGEYA KHARINI VATHU VAYE MUHUNO?

11. Ninga giyeyedzo nya edzi Jehovha a thangeyago khidzo vale va hi thangeyago muhuno.

¹¹ Jehovha a ngu simama gu thangeya vathu vaye muhuno. Uye a gu gira isoso khu gu thumisa Lito laye Bhibhiliya ni Gyanana gyaye, a gu hungo nya libandla. Ina hi ngu si kodza gu wona siyeyedzo nyo khaguri si yeyedzago gu khiso Jehovha a ngu simama gu thumisa vathu gasi gu thangeya vathu vaye? Ina. Khu giyeyedzo, dundrugeya khesi si giregidego hwane nya mwaga nya 1870. Charles Taze Russell ni dzipari dzaye,  va di pheya gu pwisisa gu khavo 1914 wu na khala mwaga nya lisima ga Mufumu wa Nungungulu. (Dhan. 4:25, 26) Avo va pwisiside isoso kholu va di gu gira wugevesisi nya siprofeto nya Bhibhiliya. Ina Jehovha a di gu thangeya wugevisisi wawe? Ina. Kholu esi si giregidego mafuni gwatshavbo khu 1914 si vegide guagani gu khiso Mufumu wa Nungungulu wu phede gu fuma. Yi di pheya Nyimbi nyo Pheye nya Mafu Yatshavbo nigu khu gu landreya gu di manega sirevareva, ndzala ni mitungu nya gutale. (Luka 21:10, 11) Khu lisine, Jehovha a di gu thumisa vama vava nya gutumbege gasi gu thangeya vathu vaye.

12-13. Ginani egi vandriyathu va giridego ndrani nya Nyimbi nya Wuvili nya Mafu Yatshavbo gasi gu andrisa thumo nya gu tshumayele?

¹² Wona esi si nga girega ga Nyimbi nya Wuvili nya Mafu Yatshavbo. Hwane nya gu ba vandriyathu va tsindza nya mafu yatshavbo va hevbude libhuku la Gutuledwa 17:8, va di pwisisa gu khavo Arimagedhoni kha yi na nga vboha hwane nya gu ba gu giregide nyimbi nya wuvili nya mafu yatshavbo, ganiolu yi diri tepo nya gu rule nyi nga handzi tula lithomo nya gu thumo nya gu tshumayele wu engedzelega. Khu kharato, ambari olu si nga ba si si pwisisegi ga tepo yile, vandriyathu va nga ba va thangeya, va di hunga gu pheya Dzixikola nya Ghileadhi gasi gu trenari Vamisiyonariyo thumoni wawe nyo tshumayele ni gu hevbudza mafuni gwatshavbo. Vamisiyonariyo va di rumedwa guya tshumayela ambari olu gu nga ba gu ri ni nyimbi. Vbavbandze nya isoso, githumi nya gutumbege gi di gira malulamiselo nya gu vatshavbo mabandlani va trenarwi gu tshumayela ni gu hevbudza. b Khu ndziya yoyo, vathu va Nungungulu va di gu dongisedwa gu gira gwadi thumo nyo tshumayele ni gu hevbudza.

¹³ Muhuno, hi ngu kodza gu wona edzi Jehovha a thangedego khidzo vathu vaye ga dzitepo dzile nyo garadze. Gukhugeya avba nya Nyimbi nya Wuvili nya Mafu Yatshavbo, vathu va Jehovha va ngu tshumayela na va tshulegide mayigoni nya mangi. Khu lisine, vathu nya vangi va hidzimede ga Jehovha nigu sithumi saye si ngo simama gu tshumayela mafuni gwatshavbo.

14. Khu ginani hi tumbago sileletelo hi ningwago khu hengeledzano ya Jehovha ni madhota a ma emisidego gasi gu hi thangeya? (Gutuledwa 2:1) (Wona fotu.)

 ¹⁴ Muhuno, sivbango nya Huwo nya Guthangeye si ngo simama gu tumba Kristo gasi gu si thangeya. Avo vo vbweta gu khavo sileletelo va ningago vandriyathu si seketedwa khu wuthangeyi wu tago khu ndzadzini. Nigu vawoneleyi nya sirkwitu ni madhota va ngu ninga sileletelo mabandla. c Madhota matodzidwego momo ‘mandzani ga nyamudye’ ga Kristo. (Leri Gutuledwa 2:1.) Khu lisine, madhota yaya kha ma vbeleya nigu ma ngu gira sihoso. Dzimbe dzitepo Mosi ni Josuwa va giride sihoso, gufana ni vambe vapostoli. (Mite. 20:12; Jos. 9:14, 15; Rom. 3:23) Ambari ulolo, Jesu a ngo simama gu thangeya githumi nya gutumbege ni madhota khu ndziya nya yadi, gasi va si kodza gu gira silo nya sadi “matshigu yatshavbo kala guhegisani nya litigo.” (Mat. 28:20) Khu kharato, hi na ni sighelo satshavbo nya gu hi tumba wusingalagadzi hi ningwago khu ava va nga hatwa gasi gu hi thangeya.

HI NGU WUYEDWA KHU GU SIMAMA GU ENGISA SILELETELO SA JEHOVHA

15-16. Ginani u gi hevbulago khu matshango ya vale va engisidego sileletelo sa Jehovha?

¹⁵ Hi na dzi buza khu makategwa nya mangi ha gu simama gu engisa sileletelo sa Jehovha. Khu giyeyedzo, Andy ni Robyn va engiside wusingalagadzi va ningidwego khu githumi nya gutumbege wu ganeyago khu gu vbevbugisa womi. (Hebh. 13:5) Kha nga handro wakone, va si kodzide gu ya phasedzeya avba nya gu vbahwe nya Dzisalawu nya Mufumo ni yimbe mithumo nya guvbahe nya Dzifakazi dza Jehovha. Robyn wari, khuye: “Dzimbe dzitepo hi di gu vbanya ga wulanga nya wudugwana nigu hi di ri mwalo wulanga nya gu phuleye avbo. Nigu gambe, nyi rengiside mitshini yangu nya gu dusi khiyo dzifotu ambari olu nyi nga ba nyi gola ngudzu gu dusa dzifotu. Nyi lide ngudzu tepo nyi nga yi rengisa. Ganiolu, gu fana ni Sara, ngadza Abrahama, nyi di dzi emisede gu simama gu khedza mbeli nyi si bweleleyi hwane.” (Hebh. 11:15) Andy ni Robyn va wuyedwe kharini? Robyn wari, khuye: “Hi ngu tsaka ngudzu kholu hi ngu dziti gu khethu ho ninga Jehovha satshavbo hi gu naso. Tepo eni ni mwama wangu hi simamago gu gira thumo owu Jehovha a hi ningidego, hi ngu si kodza gu wona edzi womi wu na khalago khidzo mafuni nya maphya.” Andy o engedza khuye: “Hi ngu tsaka ngudzu khu gu thumisa tepo ni tshivba yathu gasi gu thumeya Jehovha.”

¹⁶ Hi nga wuyedwa kharini khu gu simama gu engisa sileletelo sa Jehovha? Khu giyeyedzo, hwane nya gu ba Marcia a vbedzide gu hevbula,  a di pheya gu thuma kha nga piyonera. (Mat. 6:33; Rom. 12:11) Uye wari, khuye: “Nyi di manide lithomo nya gu hevbule univhersidhadhe nya mba livba gilo. Ganiolu, nyi di gu vbweta gu gireya nya singi Jehovha. Khu kharato, vbavbandzi nya gu dzumeye lithomo lile, nyi di hunga gu hevbula thumo wu nga hadzi nyi phasa gu mana sitsapawana gasi nyi simama gu thuma kha nga piyonera. Aya makungo nya tshukwana gu vbindra satshavbo nyi hathidego. Nyi ngu tsaka ngudzu khu gu thuma kha nga piyonera, kholu nyi ngu si kodza gu hunga tepo nyi na thumago khiyo, gu phasedzeya Bheteli ni gu gireya silo nya singi Jehovha.”

17. Makategwa muni hi na ma manago ha gu engisa sileletelo sa Jehovha? (Isaya 48:17, 18)

¹⁷ Dzimbe dzitepo, hi ngu hakha sileletelo si hi vhikeyago ga silo nya nga dzithomba ni mithumo yi hi girago hi diga gu engisa milayo ya Jehovha. Ga siemo nya nga esi, hi na wuyedwa basi ha gu engisa sileletelo sa Jehovha. Hi na simama ni livhalo li agidego ni gu potsa sigaradzo nya singi. (1 Thim. 6:9, 10) Kha nga handro wakone, hi na thumeya Jehovha khu monyo wathu watshavbo. Ha gu gira isoso, hi na mana litsako, gurula ni gu khadzisega. — Leri Isaya 48:17, 18.

18. Khu ginani u dzi emisidego gu engisa sileletelo sa Jehovha?

¹⁸ Nya mba kanakana, Jehovha a na simama gu thumisa vathu gasi gu ningeya sileletelo ndrani nya tshanisa nya yikhongolo ni ga Mufumu nya Mil Myaga. (Ndzi. 45:16) Ina hi na si kodza gu simama gu engisa ambari so ba si si gimbeleyani ni gugola gwathu? Si na hi vbevbugeya gu gira isoso ha gu dzi garadzeya gu engisa sileletelo sa Jehovha olu. Khu kharato, hi yede gu dzi emiseya gu engisa sileletelo sa Jehovha gupata ni sileletelo hi ningwago khu vathu a va hathidego gasi gu hi thangeya. (Isa. 32:1, 2; Hebh. 13:17) Ha gu gira isoso, hi na landrisa mapa yathu a gu Jehovha khu gu tumba, kholu Uye a ngu hi vhikeya ga silo satshavbo si nga ghohago wupari wathu naye ni gu hi thangeya ga ndziya yi hi yisago womini nya mba vbeya, Mafuni nya maphya.