1. Dhavhidhe dzipwide kharini khu Jehovha, nigu isoso si mu kutside gu gira ginani?

PFHUMU DHAVHIDHE a lovide esi: “PFHUMU Nungungulu khongolo, a na ni fanelo nya guzundzwe.” (Ndzi. 145:3) Uye a di gu haladza Jehovha, nigu lihaladzo lolo li mu kutside gu zundza Nungungulu “vbakari nya libandla.” (Ndzi. 22:22; 40:5) Kha si kanakanisi gu khiso wa gu ba u haladza Jehovha, anuwe u na dzumeleyana ni malito ya Dhavhidhe: ‘U na bongwe Uwe PFHUMU Nungungulu wa Israyeli, babe wathu, khu gupindruga ni gupindruga!’ — 1 Dzik. 29:10-13.

2. a) Hi nga mu dhumisa kharini Jehovha? b) Sigaradzo muni va tshanganago naso vambe, nigu ginani hi na gi wonago?

² Muhuno, mweyo nya dzindziya nya gu zundze Jehovha khu gu ningeya mihlamulo yathu mitshanganoni nya wuKristo. Ambari ulolo, vandriyathu nya vangi si ngu va garadzeya. Avo va ngu dzina gu ningeya mihlamulo yawe, ganiolu va gu thava. Va nga gu pala kharini guthava gogo? Nigu ginani gi nga hi phasago hatshavbo gu ningeya mihlamulo yi tiyisago? Na hi si gu hlamuli siwudziso sesi, gupheya hongoleni hi wona 4 sighelo nya gu hlamule mitshanganoni.

3-5. a) Kha nga si tshamusedwego omu ga Vahebheru 13:15, khu ginani hi hlamulago mitshanganoni? b) Ina hatshavbo gu vbwetega hi ningeya mihlamulo nyo fane? Tshamuseya.

³ Jehovha a ngu ninga hatshavbo lithomo nya gu mu dhumise. (Ndzi. 119:​108) Mihlamulo yathu mitshanganoni ya gu gira gipandre nya “rungudzo [nya] mhamba mwendro muphaso,” nigu mwalo muthu a nga kodzago gu hi ningeleya muphaso wowo. (Leri Vahebheru 13:15.) Ina Jehovha a gu vbweta gu khuye hatshavbo hi ningeya muphaso mwendro mihlamulo nyo fane? Ne!

⁴ Jehovha a ngu dziti gu khuye makodzelo ni siemo sathu kha si fani, nigu uye a ngu yi tsakeya ngudzu miphaso hi kodzago gu mu ninga. Nga dundrugeya khu miphaso a nga ba hakha ga vaIsrayeli. Vambe vaIsrayeli, va diri ni makodzelo nyo ningeye nvuta ni phongo. Ganiolu, muIsrayeli a gu gisiwana si di gu dzumelega gu a ningeya “matuva mavili mwendro sifondro sivili nya sipomba.” Nigu muIsrayeli a nga ba a tandrega gu ningeya sifondro sivili, Jehovha a di gu dzumeya ambari “gipandre nya likhumi nya Efa nya wuguvbi.” (Levhi 5:7, 11) Wuguvbi kha wa nga ba wu dhura, ambari ulolo, Jehovha a di gu tsakeya muphaso wowo, wo nga nga ba wuri “wuguvbi nya wadi, NM.”

⁵ Nungungulu wathu nya wuhindzi a ngari uye wa moyo ni muhuno. Tepo hi ningeyago mihlamulo, kha vireyi gu khuye hi hlamula nga vathu nya guti ngudzu nga Apolo, mwendro yiri mihlamulo nyo tiyise ngudzu nga ya Pawulo. (Mith. 18:​24; 19:⁠8) Jehovha o vbweta gu khuye hi ningeya mihlamulo nya yadi khavba hi si kodzago khavbo. Dundruga noni yile yi nga ningeya sikinyetana sivili. Yi diri ni lisima ngudzu mahoni ga Jehovha kholu yi nga ningeya satshavbo esi yi nga ba yiri naso. — Luka 21:1-4.

6. a) Khu guya khu Vahebheru 10:24, 25, mihlamulo hi yi pwago mitshanganoni yi nga hi phasa kharini? b) U nga yeyedza kharini gubonga khu milhamulo yi gu tiyisago?

⁶ Hi ngu tiyisana khu mihlamulo yathu. (Leri Vahebheru 10:24, 25.) Hatshavbo hi ngu tsaka khu gupwa mihlamulo nyo hambanehambane mitshanganoni yathu. Hi ngu tsaka khu malito nyo vbevbuge nya sanana ma khugeyago monyoni. Hi ngu tiyiswa khu gupwa muthu a hlamulago khu gutsaka khu gu ba a tugude thomba nyo khaguri a yi manidego. Nigu hi ngu samadziswa khu vale va gu na ni “gutiya” nya gu ningeye mihlamulo, ambari va gu ba va khala dzitshoni mwendro va gu ba va nga gu pheya gu hevbula lidimi lathu. (1 Tes. 2:2) Hi nga yeyedza kharini gubonga gudzigaradza gwawe? Khu gu va bonga khu mihlamulo yawe yi tiyisago, hwane nya mitshangano. Yimbe ndziya khu gu anethu hi ningeya mihlamulo yathu. Khavbovbo kha hi na nga khaleya basi gu tiyiswa mitshanganoni ganiolu hi na tiyisa nethu vambe. — Rom. 1:11, 12.

7. Ha gu phasega kharini khu gu hlamula?

⁷ Tepo hi hlamulago anethu hi ngu phasega. (Isa. 48:17) Khu ndziya muni? Nyo pheye, ha gu ba hi vbweta gu ningeya mihlamulo, gu vbwetega hi dongiseya gwadi mitshangano. Tepo hi dzi dongiseyago gwadi, ha gu mana gupwisisa nyo ete nya Lito la Nungungulu. Nigu tepo hi li pwisisago gwadi, si na hi vbevbugeya gu vbanya khesi hi si hevbulago. Nya wuvili, hi na tsakiswa ngudzu khu mitshangano kholu anethu hi ngu patega khu mihlamulo yathu. Nya wuraru, kha nga olu si vbwetago gudzigaradza gasi gu hlamula, gutala nya dzitepo hi na dundruga esi hi hlamudego.

8-9. a) Kha nga hi si wonidego omu ga Malakiya 3:16, a gu dzipwa kharini Jehovha khu mihlamulo yathu? b) Khu sevbi sigaradzo esi vambe va emisanago naso?

⁸ Ha gu dhumisa Jehovha tepo hi ganeyago khu gukhodwa gwathu. Hi nga tiyisega gu khethu Jehovha a ngu hipwa nigu a ngu ninga lisima gudzigaradza gwathu nya gu hlamule mitshanganoni. (Leri Malakiya 3:16.) Uye a ngu yeyedza gutsakeya gogo khu gu hi kategisa tepo hi dzi garadzeyago gu mu tsakisa. — Mal. 3:10.

⁹ Khu lisine, hi na ni sighelo nyo pwale nya gu hlamule mitshanganoni. Ambari ulolo, vambe va ngu thava gu khusedza libogo. Wa gu ba u dzipwa kharato u nga vbeyi tshivba. Hongoleni hi wona matshina nya milayo nyo khaguri nya Bhibhiliya, ni siyeyedzo singaniyana, gumogo ni mawonelo ma nga hi phasago hatshavbo gu hlamula ngudzu mitshanganoni.

10. a) Khu gwevbi guthava ogu nya vangi va gu nago? b) Khu ginani guthava gu hlamula gu gu giyeyedzo nya gyadi?

¹⁰ Ina u ngu thava gu khusedza libogo gasi u hlamula? Wa gu ba u thava, khandruwe wenga. Khu lisine nya vangi gwathu va ngu thavanyana navo tepo va hlamulago. Gasi gu pala gudziwa gogo, gupheya gu vbwetega u tugula egi gi gu girago u thava. Ina wa gu thava gu divala esi u vbwetago gu ganeya, mwendro gu khuwe adzina kha si pwali? Ina wa gu garadzega khu gu khuwe hlamulo wago kha wu na nga tsakisa nga ya vambe? Khu lisine, gu thava gogo giyeyedzo nya gyadi. Isoso so yeyedza gu khiso u ngu dzi nogisa nigu u ngu wona vambe na vari vakhongolo avba gwago. Jehovha a ngu gu gola gudzinogisa. (Ndzi. 138:6; Filp. 2:3) Ganiolu Jehovha a gu vbweta gambe gu khuye u mu dhumisa ni gu tiyisa vandriyago mitshanganoni. (1 Tes. 5:11) Uye a ngu gu haladza nigu a na gu ninga gutiya-hwambo u gu vbwetago.

11. Sidundrugiso muni nya Bhibhiliya si nga hi phasago?

¹¹ Hongole hi wona sidundrugiso nyo khaguri nya Bhibhiliya. Bhibhiliya yari khiyo hatshavbo hi ngu hosisa ga iso hi si ganeyago ni edzi hi si ganeyago khidzo. (Jak. 3:2) Jehovha kha vireyi khu khuye hi vbeleya, ambari vandriyathu navo. (Ndzi. 103:12-14) Avo ndranga yathu ya liphuvboni, nigu va ngu hi haladza. (Marko 10:29, 30; Joh. 13:35) Avo va ngu si pwisisa gu khavo dzimbe dzitepo mihlamulo yathu kha yi dugi khedzi hi nga ba hi si vbweta khidzo.

12-13. Ginani hi gi hevbulago ga giyeyedzo gya Nehemiya ni Jona?

¹² Dundrugeya khu siyeyedzo nyo khaguri nya Bhibhiliya si nga gu phasago gu pala guthava. Nga dundrugeya khu Nehemiya. Uye a di gu thumeya pfhumu nya tshivba. Nehemiya a di gu garadzegide kholu a di gu pwide gu pwani mabhiyo ni malimba ya Jerusalema ma di gu khungumudwe. (Neh. 1:1-4) Nga dundrugeya hwanga a wu pwidego tepo pfhumu yi nga mu wudzisa gu khiyo khu ginani a garadzegidego kharatede! Nehemiya a di gira nombelo khu gitepwana gile a vbedza a mu hlamula. Khu kharato, pfhumu yi di gira silo nya singi gasi gu phasa vathu va Nungungulu. (Neh. 2:1-8) Nga dundrugeya gambe khu Jona. Tepo Jehovha a nga mu lomba gu ya ganeya ni vathu va Ninivha, Jona a di thava ngudzu nyo bwe a tutuma a hongola gumbe. (Jona 1:1-3) Ganiolu khu gu phaswa khu Jehovha, Jona a hongode a ya tshumayela vaNinivha. Nigu esi a nga ganeya si va phaside ngudzu. (Jona 3:5-10) Ga Nehemiya ha gu hevbula lisima nya gu gire nombelo na hi si gu hlamuli. Gasi ga Jona, ha gu hevbula gu khethu Jehovha a na hi phasa gu mu thumeya ambari ha gu ba hi thava ngudzu. Ina lomo libandla li thavisago guvbindra vathu va Ninivha?

¹³ Khu yavbi mawonelo ma nga gu phasago gu ningeya mihlamulo yi tiyisago mitshanganoni? Hongoleni hi wona mawonelo nyo khaguri.

14. Khu ginani hi yedego gu dongiseya gwadi mitshangano yathu, nigu hi nga si gira kharini isoso?

¹⁴ Dongiseya mitshangano yatshavbo. Wa gu dzi dongiseya gwadi khu tepo, khu na nga thava gu hlamula. (Mav. 21:5) Lisine gu hi mwalo tepo nyo fane gasi gu dongiseya mitshangano. Eloise, noni yi gu na ni 80 myaga, a gu pheya gu dongiseya gihevbulo gya Mukhedziseyi na yi nga gu pheya semana. Uye wari khuye: “Nya gu phasega ngudzu khu mitshangano nya gu ba nyi dongisede gwadi.” Joy, a thumago litshigu latshavbo, a gu vbweta gitepwana khu Sabhadho gasi a dongiseya Mukhedziseyi. Uye wari khuye: “Nya gu gola gu hongola mitshanganoni, esi nyi si hevbudego na si ngo nagana.” Ike, a gu lidhota a bwe a thuma nga piyonero wari khuye: “Nyo si wona nari tshukwana gu hevbula khu gitepwana nyo khaguri ndrani nya semana yatshavbo guvbindra gu yi dzegedza ndrima kala nyi vbedza khu litshigu limwedo.”

15. U nga dongiseya kharini gwadi mitshangano?

¹⁵ Ginani gi vbwetegago gasi hi dongiseya gwadi mitshangano? Nu si gu pheyi gu hevbula, gombeya ga Jehovha gasi a gu ninga liphuvbo laye nya guage. (Luka 11:13; 1 Joh. 5:14) Khu gu landreya wona ndrima yatshavbo khu dzimeneti nyo khaguri, pheya khu gu khedza hungo nya mahungu, sihungwana nya mahungu, siyeyedzo, ni dzikwadru nya siwudziso nya guwusedze. Khavbovbo tepo u hevbulago ndrimana ni ndrimana, leri gwadi milowo yi khumbugidwego khavba u si kodzago khavbo. Dundrugeya khu mahungu yakona, u bwe u vega gupima ngudzungudzu ga esi u vbwetago gu hlamula. Wa gu ba u dzi dongisede gwadi, u na phasega ngudzu ni gu si na gu vbevbugeya gu hlamula. — 2 Kor. 9:6.

16. Khu dzevbi dziferameta dzi gomogo, nigu u nga dzi thumisa kharini?

¹⁶ Sa gu kodzega, thumisa dziferameta dza omu nya interneti khu lidimi u li tigo. Khu gu thumisa hengeledzano yaye, Jehovha a ngu hi ninga dziferameta dza omu nya interneti gasi dzi hi phasa gu dongiseya mitshangano yathu. JW Library^® yi ngu hi dzumeleya gu tshisa mabhuku nya gihevbulo omu nya dzitelefone dzathu. Khavbovbo hi ngu kodza gu hevbula, gu leri, mwendro gu engiseya mahungu yakona ni yevbini tepo ni wevbini wulanga. Vambe va gu thumisa dziferameta dzedzi gasi gu hevbula khu tepo nyo hefemule thumotunu ni xikwatunu mwendro tepo va endrago. Watchtower Library ni BHIBLIYOTEKA ya Torre de Vigia omu nya interneti^™ si ngu hi vbevbugiseya gu gira wugevisisi nya sipandre hi vbwetago gu si hevbula gwadi.

17. a) Khu ginani si gu sadi gu dongiseya milhamulo nya yingi? b) Ginani u nga gi hevbulago khu vhidhiyu yi gu khiyo Torne-se Amigo de Jeová — Prepare seu comentário?

¹⁷ Sa gu kodzega, dongiseya mihlamulo nya yingi avba nya ndrima ni ndrima. Khu ginani? Khu gu khandri tepo yatshavbo u na ningedzwago tepo u na gu khusedzago libogo. Si nga girega gu vambe va khusedza mawogo khu tepo mweyo, ganiolu mugimbidzisi a yede gu hatha moyo basi. Nigu gasi gu mitshangano yi vbeya khu tepo, mugimbidzisi adzina a na pima tengo nya mihlamulo avba nya sipandre nyo khaguri. Khu kharato u nga gorogi mwendro gu vbeya tshivba wa gu mba ningedzwa gupheyani. Wa gu dongiseya mihlamulo nya yingi, u na manega ni lithomo nyo hlamule. U nga dongiseya gambe gu leri Bhibhiliya. Ganiolu wa gu si kodza, dzi dongiseye gu hlamula khu malito yago. *

18. Khu ginani hi yedego gu rodzisa mihlamulo yathu?

¹⁸ Ningeya mihlamulo nyo role. Gutala nya dzitepo, mihlamulo yi tiyisago yi rode nigu yi vbevbugide. Khu kharato dzi garadzeye gu rodzisa mihlamulo yago. Zama gu yi gira khu 30 dzisegundo. (Mav. 10:19; 15:23) Wo ba u hlamula khu myaga nya yingi mitshanganoni, u yede gu vegeya giyeyedzo nya gyadi vambe khu gu rodzisa mihlamulo yago. Wa gu ningeya mihlamulo nyo laphe, vambe va na pilega hwambo, khu gu pimisa gu khavo avo va mwalo makodzelo nyo hlamule nga uwe. Nigu, mihlamulo nyo role yi ngu dzumeleya gu vambe navo va hlamula. Ngudzungudzu wa gu pheya khuwe u ningedzwa, ningeya hlamulo nyo vbevbuge wu hlamulago giwudziso khu gu kongoma. U nga zami gu hlamula satshavbo. Ga gu ba gu hlamudwe giwudziso, adzina u nga ningeya yimbe mitshamuselo nyo engedzelege. — Wona kwadru “ Sipandre nyi nga hlamulago ga iso.”

19. Mugimbidzisi a nga gu phasa kharini, ganiolu ginani u yedego gu gira?

¹⁹ Embeya mugimbidzisi gu khuwe u di gu tsakeya gu hlamula avba nya ndrimana nyo khaguri. Wa gu ba u tsakeya gu gira isoso, gu vbwetega u ya ganeya ni mugimbidzisi na yi si gu pheyi mitshangano. Ya gu vboha tepo nyo hlamule, dzegeya gu khusedza gwadi libogo lago gasi gu mugimbidzisi a kodza gu gu wona.

20. Khu ginani mitshangano nya libandla yi fanago ni guhodza hi hodzago ni dzipari dzathu?

²⁰ Gu vbwetega hi wona mitshangano nya libandla nga guhodza hi hodzago ni dzipari dzathu nya dzadi. Nga dundrugeya khesi. Dzipari dzago libandlani dzo dundrugeya gu gira hagano nyo khaguri, khavbovbo dzi gu lomba gu dongiseya guhodza nyo khaguri. U di hadzi dzipwa kharini? Adzina u di hadzi gu garadzeganyana, ganiolu u di hadzi gira satshavbo u si kodzago gasi gu dongiseya gilo gi na tsakisago vatshavbo. Jehovha, khuye a hi ranago, nigu a hi dongiselede meza nyo tale khu silo nya singi nya sadi mitshanganoni yathu. (Ndzi. 23:5; Mat. 24:45) Nigu a ngu tsaka tepo hi mu reseyago giningwa gyathu nyo vbevbuge, hi gi dongisedego gwadi khavba hi si kodzidego khavbo. Khu kharato dzi dongiseye gwadi u bwe u hlamula khavba u si kodzago khavbo. Khu ndziya yoyo khu na nga ya hodza basi vbamezani ga Jehovha, ganiolu u na hongola nuwe ni gilogyo gasi gu ya hodza ni libandla.