1-2. a) Khu ginani hi tiyisegago gu khethu Jesu a di hadzi hi ninga ndziya nyo vbevbuge nyo dundruge khiyo gufa gwaye? b) Makhalelo muni ya Jesu hi na ganeyago khayo?

INA u ngu kodza gu tshamuseya esi si giregago avba nya Gidundrugiso nya mwaga ni mwaga nya gufe ga Jesu? Kha hi kanakani gu khethu nya vangi gwathu va ngu si dundruga esi si giregago avba nya Gilalelo gya Pfhumu. Khu ginani? Kholu gilalelo, gigiro nyo vbevbuge. Ambari ulolo, igyo khya lisima ngudzu. Khu kharato, adzina hi nga dzi wudzisa gu khethu: ‘Ina ka, khu ginani gilalelo gi gu gigiro nyo vbevbuge?’

² Thumoni waye nyo tshumayele mafuni, Jesu a di gu tidwa khu gu hevbudza lisine khu ndziya nyo vbevbuge, nyo pwale, ni gu pwisisega. (Mat. 7:28, 29) Khu ndziya nyo fane, uye hi yeyedzide ndziya nyo vbevbuge, ganiolu nya lisima nyo dundruge * khiyo gufa gwaye. Hongoleni hi nga bhulani khu Gilalelo gegi ni silo nyo khaguri Jesu a ganedego ni gu gira. Khavbovbo, hi na engedzeya gu pwisisa edzi a dzi nogisago khidzo, gutiya-hwambo gwaye, ni lihaladzo laye, hi bwe hi hevbula edzi hi nga mu pimedzeyago khidzo.

3. Kha nga si tshamusedwago omu ga Matewu 26:26-28, Gidundrugiso egi Jesu a gi emisidego gi di vbevbugide khu ndziya muni? Nigu silo sile sasivili nya litshina a si thumisidego si di gu emeya ginani?

³ Jesu a diri ni 11 vapostoli vaye nyo tumbege tepo a nga emisa Gilalelo nya gufa gwaye. A di dzega esi si nga ba si tshade avba nya Phasika a gira khiso gidundrugiso gegi nyo vbevbuge. (Leri Matewu 26:26-28.) A di thumisa basi gibaba nya mba thedwa mela ni vhinyu va nga ba vari nayo vbale. Jesu a di embeya vapostoli vaye gu khuye silwana sile sasivili nya litshina, gibaba ni vhinyu, si di gu emeya givili gyaye ni novba waye, a nga hadzi si ningeya khu kotani yawe. Vapostoli adzina kha va samala khu gu wona edzi gi nga ba gi vbevbugide khidzo gigiro gyogyo nya giphya. Khu ginani?

4. Wusingalagadzi owu Jesu a ningidego Marta gupheyani wa gu hi phasa kharini gu pwisisa gighelo gi mu giridego a gira gilalelo nyo vbevbuge?

⁴ Nga dundrugeya khesi si dugeledego migimana hwane ndrani nya mwaga nya wuraru nya thumo wa Jesu mafuni, tepo a nga endreya dzipari dzaye nya dzikhongolo ngudzu — Lazaro, ni Marta, ni Mariya. Wulangani wowo nyo rule, Jesu a di pheya gu hevbudza. Marta a di romo nuye ndrangani, ganiolu a di pharegide khu gu dongiseya guhodza nya gungi gasi gu ninga pfhumba waye nyo zundzege. Tepo Jesu a nga si wona, a di mu kawuka khu ndziya nya lihaladzo, a mu phasa gu wona gu khuye khandri tepo yatshavbo gu vbwetegago guhodza nya gungi. (Luka 10:40-42) Khu hwane nya tepo, na gu tshade vbadugwana basi gasi a ningeya womi waye, Jesu a di thumisa wusingalagadzi waye. A di gira gilalelo nyo vbevbuge. Sa gu hi hevbudza ginani isoso khu Jesu?

5. Guvbevbuga nya gilalelo gegi go hi yeyedza ginani khu Jesu, nigu isoso so yelana kharini ni esi si ganedwago omu ga Vafilipi 2:5-8?

⁵ Jesu a di gu dzinogisa ga satshavbo esi a ganedego ni gu gira. Khu karato kha si hi samadzisi gu ba a yeyedzide gudzinogisa nya gukhongolo wutshiguni wule nyo hegise nya womi waye mafuni. (Mat. 11:29) Uye a di gu dziti gu khuye a di hadzi ningeya muphaso nya wukhongolo ngudzu ndrani nya matimo nya vathu, nigu a di gu dziti gu khuye Jehovha a di hadzi mu wusa gasi a khala pfhumu ndzadzani. Ambari ulolo, uye kha dzi vbweteya wuzundzo khu gu khuye hi na gire gipfhitsha nya gikhongolo gasi gu mu dundruga. Wulangani nya isoso, a di embeya vapizane vaye gu khuye gumogo khu mwaga, va di yede gu mu dundruga khu gu gira gilalelo gegi nyo vbevbuge. (Joh. 13:15; 1 Kor. 11:23-25) Gilalelo gyogyo nyo vbevbuge, ganiolu nyo zundzege gyo yeyedza gu khigyo Jesu kha nga ba ari muthu nyo dzi khusedze. Hi ngu tsaka khu guti gu khethu gudzinogisa, limwedo nya makhalelo ya Pfhumu yathu ya ndzadzini. — Leri Vafilipi 2:5, 7, 8.

6. Hi nga pimedzeya kharini gudzinogisa ga Jesu tepo hi emisanago ni silingo?

⁶ Hi nga pimedzeya kharini gudzinogisa ga Jesu? Khu gu thangisa gudogoreya ga vambe vbatshani nya ogu gwathu. (Filp. 2:3, 4) Nga dundrugeya khu wutshigu nyo hegise nya womi wa Jesu mafuni. Jesu a di gu dziti gu khuye nya mba hweya a di hadzi gufa khu ndziya nyo vbise ngudzu; ambari ulolo, a di gu garadzega khu vapostoli vaye nyo tumbege, ava nya mba hweya va nga hadzi vbisega khu gufa gwaye. Khu kharato, a di londrola wutshigu wule gasi gu va hevbudza, gu va tiyisa, ni gu va thaveleya. (Joh. 14:25-31) Khu gudzinogisa, Jesu a di garadzega ngudzu khu gukhadzisega ga vambe guvbindra ogu gwaye. Ina khandri giyeyedzo nya gyadi a hi vegedego Jesu?

7. Khu ginani Jesu a yeyedzidego gutiya-hwambo nya gukhongolo gitepwana hwane nyo emise Gilalelo gya Pfhumu?

⁷ Gitepwana hwane nyo ba Jesu a emiside Gilalelo gya Pfhumu, a di yeyedza gutiya-hwambo nya gukhongolo. Khu ndziya muni? Jesu a di dzumeya gu khuye gugola ga Papayi waye gu tadzisega gwaye, ambari olu a nga ba a dziti gu khuye gu gira isoso si di gu thula gu songwa nya mba na nandru. (Mat. 26:65, 66; Luka 22:41, 42) Jesu a di simama gu tumbega gasi gu zundza lina la Jehovha, ni gu emeya wufumu wa Nungungulu, ni gu tula ndziya nya gu vathu va mana womi nya gupindruge. Khu tepo yayimweyo, Jesu a di gu dongiseya valandreyi vaye ga esi va nga hadzi emisana naso nya mba hweya.

8. a) Ginani egi Jesu a embedego vapostoli vaye nyo tumbege? b) Myaga yi nga landreya hwane nya gufe ga Jesu, vapizane vaye va landrede kharini giyeyedzo gyaye?

⁸ Jesu gambe yeyedzide gutiya-hwambo khu gu mba vega gupima avba nya gugaradzega gwaye, ganiolu khu gu vega gupima avba nya esi si nga ba si vbwetega ga vapostoli vaye nyo tumbege. Gilalelo nyo vbevbuge a gi emisidego hwane nyo tutumise Judha, gi di hadzi dundrugisa ava va nga hadzi khala valandreyi vaye nyo todzwe mihandro nya novba wu vbaladzidwego wa Jesu, ni gupatega gwawe omu nya gidzumeledzwano nya giphya. (1 Kor. 10:16, 17) Gasi gu va phasa gu simama gu tumbega kala va ranwa va ya fuma ni Jesu ndzadzini, uye a di embeya valandreyi vaye esi uye ni Papayi waye va nga ba va si vireya gwawe. (Joh. 15:12-15) Jesu a di embeya vapostoli vaye gambe silingo va nga hadzi emisana naso. Khavbovbo, khu gu thumisa giyeyedzo gyaye, a di va kutsa gu tiya hwambo. (Joh. 16:1-4a, 33) Hwane nya myaga nyo khaguri, vapizane va Jesu va di nga gu landreya giyeyedzo gyaye nya gu mba thangisa gudogoreya gwaye negi nya gutiya-hwambo gwaye. Ambari olu va nga hadzi tshaniseka khu kotani nya gu landreye giyeyedzo gya Jesu, avo va di tiyisana silingoni sawe nyo hambanehambane. — Hebh. 10:33, 34.

9. Hi nga pimedzeya kharini Jesu khu gu yeyedza gutiya-hwambo?

⁹ Anethu muhuno, ha gu landreya giyeyedzo gya Jesu khu gu yeyedza gutiya-hwambo. Khu giyeyedzo, sa gu vbweta gutiya-hwambo gasi gu phasa vandriyathu va tshaniswago khu kotani nya gukhodwa gwawe. Dzimbe dzitepo, vandriyathu adzina va nga khotedwa nya mba na nandru. Tepo isoso si giregago, gu vbwetega hi gira satshavbo hi si kodzago gasi gu va phasa, si patago ni gu va emeya. (Filp. 1:14; Hebh. 13:19) Yimbe ndziya hi nga yeyedzago khiyo gutiya-hwambo, gu simama gu tshumayela khu gu tiya. (Mith. 14:3) Kha nga Jesu, hi dzi emisede gu tshumayela mahungu nya Mufumo, ambari vathu va gu hi wugeya ni gu hi tshanisa. Ambari ulolo, dzimbe dzitepo, hi nga dzipwa na hi vbede tshivba. Hi na rini?

10. Ginani hi yedego gu gira ndrani nya dzisemana nya Gidundrugiso, nigu khu ginani?

¹⁰ Hi nga tiyisa gutiya-hwambo gwathu khu gu dundrugeya khu gutumba hi resedwego khu muphaso nya gudzegiswe wa Kristo. (Joh. 3:16; Efes. 1:7) Ndrani nya dzisemana nya Gidundrugiso, hi na ni lithomo nyo hathege nyo yeyedze gubonga gwathu khu muphaso nya gudzegiswe. Ndrani nya dzisemana dzodzo, leri sipimo nya Bhibhiliya si gimbileyanago ni Gidundrugiso, u bwe u dundrugeya gwadi khu sigiro nyo landreyane si giregidego kala afa Jesu. Khavbovbo tepo hi na tshanganago gasi gu gira Gilalelo gya Pfhumu, hi na wu pwisisa gwadi tshamuselo nya gibaba ni vhinyu si thumiswago avba nya Gidundrugiso, ni tshamuselo nya muphaso wakona. Tepo hi pwisisago esi Jesu ni Jehovha va hi giredego, hi bwe hi pwisisa edzi si hi phasago khidzo gumogo ni sigodwa sathu, gutumba gwathu go engedzeya gu tiya, hi bwe hi kutsega gu timiseya khu gu tiya hwambo kala mahegiso. — Hebh. 12:3.

11-12. Ginani hi gi hevbudego avba ndrima yeyi kala olu?

¹¹ Kala olu, hi hevbude gu khethu Gilalelo gya Pfhumu kha gi hi dundrugise basi lisima nya gudzegiswe, ganiolu gyo hi dundrugisa gambe makhalelo nyo samadzise ya Jesu, gudzinogisa ni gutiya-hwambo. Hi ngu bonga ngudzu kholu Jesu a simamago gu yeyedza makhalelo yoyo kha nga Muphasi wathu nya Khongolo nya Mhamba, oyu a tsakiswago khu mavbanyelo yathu! (Hebh. 7:24, 25) Gasi gu yeyedza gubonga gwathu nya gukhongolo, gu vbwetega hi dundruga gufa ga Jesu mwaga ni mwaga, kha nga olu a hi rumidego. (Luka 22:19, 20) Ha gu gira isoso khu litshigu li kotsanago ni 14 nya Nisani, li gu litshigu nya lisima ngudzu nya mwaga.

¹² Avba nya Gilalelo nyo vbevbuge gya Pfhumu hi nga hevbula gambe limbe likhalelo la Jesu li mu giridego a hi feya. Tepo a nga ba ari mafuni, a di gu tidwa ngudzu khu likhalelo lolo. Khu levbini lakona?

13. Johane 15:9 ni 1 Johane 4:8-10 va gu li tshamuseya kharini lihaladzo eli Jehovha ni Jesu va li yeyedzidego, nigu khu vamani va phasegago khilo?

¹³ Jesu yeyedzide khu guvbeleya lihaladzo nya likhongolo a gu nalo Jehovha khethu ga satshavbo a giridego. (Leri Johane 15:9; 1 Johane 4:8-10.) Gu diga satshavbo, Jesu ningede womi waye khu kotani yathu khu gu kutswa khu lihaladzo. Gani hi todzidwe gani ha gu gira gipandre nya “dzimbe dzinvuta,” hi ngu phasega khu lihaladzo eli Jehovha ni Gyanana gyaye va li yeyedzidego khethu khu gu thumisa muphaso wowo. (Joh. 10:16; 1 Joh. 2:2) Nga dundrugeya gambe khu gibaba ni vhinyu si thumiswago avba nya Gidundrugiso; iso niso so yeyedza lihaladzo ni gukhathala ga Jesu khu vapizane vaye. Khu ndziya muni?

14. Jesu yeyedzide kharini lihaladzo khu vapizane vaye?

¹⁴ Jesu yeyedzide lihaladzo laye khu valandreyi vaye nyo todzwe khu gu va ninga giyeyedzo nya magirelo nya gilalelo nyo vbevbuge nyo dundruge gufa gwaye, na siri gipfhitsha nyo garadze. Khu gu gimbiya nya tepo, valandreyi vovo va todzidwego gu vbwetegide gu va gira Gidundrugiso gyogyo mwaga ni mwaga, na va gu emisana sigaradzo nyo hambanehambane, si patago lipaso. (Gutu. 2:10) Ina va di gu si kodza gu engisa gileletelo gya Jesu? Nya mba kanakana, va di gu si kodza!

15-16. Vambe vandriyathu va si kodzide kharini gu gira Gilalelo gya Pfhumu ambari va nga ba vari ga siemo nyo garadze?

¹⁵ Gukhugeya ga lizana myaga nyo pheye kala muhuno, maKristo nya lisine ma ngu dzi garadza gasi gu dundruga gufa ga Jesu. Ayo ma gu landreya giyeyedzo nya Gilalelo gya Pfhumu gi giridwego khu Jesu khavba si kodzegago khavbo, dzimbe dzitepo siemoni nyo garadze. Nga wona siyeyedzo sesi. Tepo Ndriyathu Harold King a nga ba a khotedwe enga pasoni ga Xina, a di dzi bambeya gasi dundruga gufa ga Jesu. Gusihalani mu gwaye, a di dongiseya gibaba ni vhinyu, khu gu thumisa esi a nga ba ari naso. A di bwe a pima gwadi litshigu gi nga hadzi girwa khilo Gidundrugiso. Tepo li nga vboha litshigu lolo, na ari enga pasoni, a di embeleya, a gombeya, a bwe a dzi vegeya ganelo.

¹⁶ Wona gambe gimbe giyeyedzo. Vandriyathu nyo khaguri nya vanyamayi va nga ba va khotedwe wulangani gu tshaniswago vathu (campo de concentração) teponi nya Nyimbi nya Wuvili nya Mafu, va di vega womi wawe mhangoni khu gu gira Gilalelo gya Pfhumu. Ambari ulolo, khu kotani nya olu va vbevbugisidego gigiro gegi, va si kodzide gu gira Gidundrugiso khu ndziya nyo sihale. Vari khavo: “Hatshavbo hi di ema gumogo hi gira rodha, khu vbakari gwathu gu diri ni gibhankwana hi nga ba hi handzegide avbo gibaba ni vhinyu, hi si fenengedza khu panu nyo age. Hi diri ni vhela hi nga ba hi wona khiyo nyumbani nya gu adzina na yi hi tugudziside. . . . Hi di wusedza gifungo hi nga ba hi giride ga Papayi wathu wa ndzadzini nya gu thumise tshivba yathu yatshavbo gasi gu agisa lina laye nya Guage.” Si ngu samadzisa gu wona gukhodwa gu yeyedzidwego khu vandriyathu vava! Nigu, si ngu samadzisa gu wona lihaladzo nya likhongolo la Jesu khethu khu gu hi tuleya ndziya nya gu hi kodza gu gira Gidundrugiso ambari so ba si garadza.

17. Siwudziso muni hi yedego gu dzi gira?

¹⁷ Kha nga olu gi hidzimeyago Gidundrugiso, gwadi hi dzi wudzisa esi: ‘Nyi nga pimidzeya kharini giyeyedzo nya lihaladzo gya Jesu? Ina nyi ngu thangisa esi si vbwetegago ga vandriyangu guvbindra esi sangu? Ina nyo vireya gu kheni vandriyangu va gira silo si gu mwalo dzitshivbani dzawe, mwendro nyi ngu theya khu gutandrega gwawe?’ Hongoleni hi pimedzeya giyeyedzo gya Jesu hi bwe hi yeyedza “lihaladzo nya wundruye.” — 1 Ped. 3:8.

18-19. a) Ginani hi yedego gu tiyisega khigyo? b) Ginani u dzi emisedego gu gira?

¹⁸ Gidundrugiso nya gufa ga Kristo kha gi na nga simama gu girwa kala gupindruga. Tepo Jesu a na ‘wuyago’ ndrani nya tshanisa nya yikhongolo, a na ta tshanganisa “sihathwa” saye si ngo tshadego a hongola naso ndzadzini, khavbovbo kha hi na nga gira gambe Gidundrugiso. — 1 Kor. 11:26; Mat. 24:31.

¹⁹ Ambari olu hi na emago gu gira Gidundrugiso, hi ngu tiyisega gu khethu vathu va Jehovha va na gi dundruga gilalelo gegi nyo vbevbuge kha nga giyeyedzo nya gudzinogisa, ni gutiya-hwambo, ni lihaladzo nya gu gima li di si yeyedzwi khu muthu. Khu tepo yoyo, ava va gi wonidego gilalelo gegi nyo samadzise, kha hi kanakani gu khethu va na bhuleya ava va nga ne gi wona va na vbanyago teponi yoyo. Ganiolu, gasi hi phasega gwadi khu gilalelo gegi ambari muhuno, gu vbwetega hi dzi emiseya gu pimedzeya gudzinogisa, ni gutiya-hwambo, ni lihaladzo la Jesu. Ha gu gira isoso, hongoleni hi tiyisegani gu khethu hi na tshatshazedwa khu Jehovha. — 2 Ped. 1:10, 11.