KHU Mararu ni dzimindru, 24 nya Janeiro nya 2018, ndranga ya Bheteli ya Estados unidos ni Canadá yi tsakide ngudzu khu gupwa gitiviso gegi nyo hathege: Ndriyathu Kenneth Cook Jr, emisidwe kha nga givbango nya giphwa nya Huwo nya Guthangeye nya Dzifakazi nya Jehovha.

Ndriyathu Cook velegedwe a bwe a dandreya Pennsylvania, E.U.A. Hevbude lisine ni gihevbuli gikwawe na vari vbafuvbi ni gu vbedza xikola sekundariya, a bwe a bhapatiswa khu 7 nya Junho nya 1980. Belede thumo nya tepo yatshavbo kha nga piyonero khu 1 nya Setembro nya 1982. Hwane nyo thume nga piyonero khu myaga mivili, a di ranedwa gu ya thuma Bheteli, Wallkill, Novha Yorki, khu 12 nya Outubro nya 1984.

Ndrani nya 25 myaga yi nga landreya, Ndriyathu Cook giride mithumo nyo hambanehambene, omu nya gipandre nya Wughandli nya mabhuku ni Xikritori ya Bheteli. Tshadhide ni Jamie khu 1996, va thuma vatshavbo Bheteli ya Wallkill. Khu Dezembro nya 2009, Ndriyathu Cook ni mwangadzi waye va di vbindrugedzwa va ya thumeya Tsindza nya Wuhevbudzi wa Torre de vigia, Patterson, avbo Ndriyathu Cook a nga ya thuma omu nya Kometi nya Wulovi. Khu Abril nya 2016, gitepwana hwane nyo bweleye Wallkill, Ndriyathu Cook ni mwangadzi waye va di ya vbindriswa va hongola Brooklyn, Novha Yorki. Hwane nya livbandre migima, va di fuluga va ya khala tsindza nya mafu yatshavbo, Warwick, Novha Yorki. Khu Janeiro nya 2017, Ndriyathu Cook a di emiswa kha nga moyo nya muphasedzeyi nya Kometi nya Wulovi nya Huwo nya Guthangeye.