1-2. a) Ginani egi Jehovha a gi wonago tepo dzimiliyoni nya vathu va tshanganago gasi gu gira Gilalelo gya Pfhumu? (Wona foto avba nya kapa.) b) Ginani hi na ganeyago khigyo avba nya ndrima yeyi?

NGA dundrugeya khesi Jehovha a si wonago tepo dzimiliyoni nya vathu mafuni gwatshavbo va tshanganago gasi gu gira Gilalelo gya Pfhumu. Uye kha woni basi gidzemo nya vathu; a gu wona moyo ni moyo a gomogo. Khu giyeyedzo, uye a ngu va wona vatshavbo ava va tago mwaga ni mwaga. Vbakari gwawe, adzina vomo va tago ambari na va gu emisana ni sigaradzo nya sikhongolo. Vambe kha vati matshigu yatshavbo mitshanganoni yathu, ganiolu Gidundrugiso va ngu gi ninga ngudzu lisima nyo bwe va si vbweti ni gu gi luza. Jehovha a ngu va wona gambe ava va ngo pheyago guta Gidundrugisotunu, adzina khu gu vbweta gu ta wona basi.

² Khu lisine, Jehovha a ngu tsaka ngudzu khu gu wona gu khuye nya vangi va nguta Gidundrugisotunu. (Luka 22:19) Ambari ulolo, Jehovha kha khathali ngudzungudzu khu tengo nya vathu va tago. Uye a gu khathala ngudzu khu gighelo gi va tisago; khigyo gi gu na ni lisima ngudzu ga Jehovha. Avba nya ndrima yeyi, hi na ganeya khu giwudziso gegi nya lisima ngudzu: Khu ginani hi si tshanganigo gumogo khu mwaga gasi gu gira Gidundrugiso basi, ganiolu hi tshangana gambe semana ni semana mitshanganoni nya libandla eyi Jehovha a giredego ava a va haladzago?

3-4. a) Khu ginani hi hongolago mitshanganoni nya libandla? b) Gumanega gwathu mitshanganoni go yeyedza ginani khethu? c) Khu guya khesi si ganedwago khu 1 Vakorinto 11:23-26, khu ginani si gu mba yela gu hamugega Gidundrugisotunu?

³ Gighelo nyo pheye gi hi kutsago gu hongola mitshanganoni nya libandla khu gu iyo gipandre nya wukhozeyi wathu ga Jehovha. Gimbe gambe khu gu ho ya hevbudzwa khu Jehovha mitshanganoni. Vathu nyo dzi khusedze kha dzumeyi gu khavo va yede gu hevbudzwa gilo nyo khaguri. (3 Joh. 9) Guhambana navo, ethu hi ngu tsakeya ngudzu gu hevbudzwa khu Jehovha ni hengeledzano yaye. — Isa. 30:20; Joh. 6:45.

⁴ Gu manega gwathu mitshanganoni go yeyedza gudzinogisa gwathu ni gudziemiseya gwathu gu hevbudzwa. Kha hi hongoli Gidundrugisotunu nya gufe ga Jesu khu gu gikolokole gu vbwetega hi hongola basi, ganiolu kholu hi engisago khu gudzinogisa gileletelo gegi gya Jesu: “Girani esi kha nga gialakanyo gyangu.” (Leri 1 Vakorinto 11:23-26.) Tshangano wowu wa gu tiyisa gutumba hi gu nago khu wumindru wu bwe wu hi dundrugisa edzi Jehovha a hi haladzago khidzo. Ambari ulolo, Jehovha a ngu dziti gu khuye gu vbwetega hi tiyiswa ni gu ningwa tshivba guvbindra gumogo khu mwaga. Khu kharato, a gu hi ninga mitshangano nya semana ni semana, a bwe a hi kutsa gu manega gwayo. Gudzinogisa go hi kutsa gu engisa. Semana ni semana hi ngu vbedza dziora nya dzingi na hi gu dongiseya mitshangano ni gu manega gwayo.

5. Khu ginani vathu nya gudzinogise va dzumeyago gu ya hevbudzwa khu Jehovha?

⁵ Mwaga ni mwaga, Jehovha a ngu rana vathu nya vangi gasi va ya hevbudzwa khuye, nigu vathu nya vangi nyo dzinogise va ngu dzumeya gu ta hevbudzwa khuye. (Isa. 50:4) Avo va gu tsaka khu gu manega Gidundrugisotunu, va bwe va pheya gu manega ga yimbe mitshangano gambe. (Zak. 8:20-23) Hatshavbo hi ngu tsaka khu gu hevbudzwa ni gu thangedwa khu Jehovha, muphasi ni muvbanyisi wathu. (Ndzi. 40:17) Ina gyomo gimbe gilo nyo tsakise ni lisima ngudzu nyo vbindre gu dzumeya gu ya hevbudzwa khu Jehovha ni Jesu, Gyanana gyaye a gi haladzago? — Mat. 17:5; 18:20; 28:20.

6. Gudzinogisa gu phaside kharini mwama yoyu gu manega Gidundrugisotunu?

⁶ Mwaga ni mwaga, ha gu dzi garadzeya gu rana vathu nya vangi khavba hi si kodzago khavbo gasi gu wona Gidundrugiso nya gufa ga Jesu. Vathu nya vangi nya gudzinogise va phasegide khu gu ta wona Gidundrugiso gyogyo. Nga dundrugeya khu giyeyedzo gegi. Ndrani nya myaga nya yingi yi vbindridego, mwama nyo khaguri a di hakha khonvhite yathu nya Gidundrugiso, ganiolu a di embeya ndriyathu a mu ningidego gu khuye kha na nga hongola. Ganiolu, khu litshigu nya Gidundrugiso, ndriyathu a di samala khu gu wona mwama wule na gu beya Salawuni nya Mufumo. Mwama yoyo nuye a si samala khedzi a nga hakhwa khidzo, khavbovbo a pheya gu hongola mitshanganoni nya libandla. Egi gi samadzisago khu gu, ndrani nya mwaga wule watshavbo a di luza mitshangano yiraru basi. Ginani gi mu kutsidego gu manega mitshanganoni yatshavbo? Uye a diri muthu nyo rule, khavbovbo kha sa mu lemeleya gu vbindrugedza. Khu hwane nya tepo, ndriyathu wule a mu ningidego khonvhite a di khuye: “Wule mwama a ngu dzi nogisa ngudzu.” Kha si kanakanisi gu khiso khu Jehovha a ranidego mwama wule gasi guta Mu khozeya, nigu olu i ndriyathu a bhapatisidwego. — 2 Sam. 22:28; Joh. 6:44.

7. Esi hi si hevbulago mitshanganoni ni esi hi si lerigo omu nya Bhibhiliya si nga hi phasa kharini gu dzi nogisa?

⁷ Esi hi si hevbulago mitshanganoni ni esi hi si lerigo omu nya Bhibhiliya si nga hi phasa gu dzi nogisa. Ndrani nya dzisemana nya Gidundrugiso, mitshangano yathu ya gu ganeya ngudzu khu giyeyedzo gya Jesu ni gudzinogisa a gu yeyedzidego khu gu ningeya womi waye gasi gu hi dzegisa. Nigu ndrani nya matshigu nya Gidundrugiso, ha gu kutswa gu leri matimo nya Bhibhiliya ma ganeyago khu sigiro nyo landreyane si giregidego gufani ni guwuswani ga Jesu. Esi hi si hevbulago mitshanganoni yoyo ni esi hi si lerigo omu nya matimo yoyo nya Bhibhiliya so engedzeya gubonga gwathu khu muphaso hi giredwego khu Jesu. Sa gu hi kutsa gu pimedzeya makhalelo yaye nya gudzinogise ni gu gira gugola ga Jehovha, ambari dza gu ba dzi wuya. — Luka 22:41, 42.

8. Jesu yeyedzide kharini gutiya-hwambo?

⁸ Ha gu zama gambe gu pimedzeya Jesu khu yeyedza gutiya-hwambo. Nga dundrugeya khu gutiya-hwambo a gu yeyedzidego matshiguni yaye nya guhegise na si gufi. A di gu dziti gwadi gu khuye nya mba hweya valala vaye va di hadzi mu tshonegisa, va mu veta, ni gu mu songa. (Mat. 20:17-19) Ambari ulolo, a di dzi emisede gufa khu ndziya yoyo. Na yi vbohide tepo yakona, a di embeya vapostoli vaye nyo tumbege, va nga ba vari naye Getsemani khuye: “Wugani hi hongola. A ngu vboha uye a vbwetago gu nyi ningela.” (Mat. 26:36, 46) Tepo wu nga vboha tsawa masotshwa gasi guta mu mola, a di va khinga, a dzi tivegisa gwawe, a bwe a lomba masotshwa gu khuye ma diga vapostoli vaye va hongola. (Joh. 18:3-8) Ina kha gu samadzisi gutiya-hwambo gogu gu yeyedzidwego khu Jesu? Muhuno, maKristo ma todzidwego ni aya nya dzimbe dzinvuta ma ngu dzi garadzeya gu pimedzeya gutiya-hwambo ga Jesu. Khu ndziya muni?

9. a) Khu ginani si vbwetago gutiya-hwambo gasi gu manega mitshanganoni tepo yatshavbo? b) Giyeyedzo gyathu gi nga khuha kharini gukhodwa ga vandriyathu va khotedwego pasoni?

⁹ Gasi gu manega mitshanganoni yathu tepo yatshavbo, adzina gu nga vbwetega gu hi tiya hwambo khu gu ba na hi tshangana ni sigaradzo nyo khaguri. Vambe vandriyathu va ngu manega mitshanganoni ambari va gu ba tshaniseka, na va vbede tshivba, mwendro na va gu dwala. Vambe va ngu tiya hwambo va manega mitshanganoni ambari va gu ba va wugedwa khu valongo vawe mwendro mifumo nya litigo. Nga dundrugeya vbadugwana khedzi giyeyedzo gyathu gi khuhago khidzo vandriyathu va khotedwego khu kotani nya gukhodwa gwawe. (Heb. 13:3) Gukhodwa, ni gutiya-hwambo, ni gutumbega gwawe si ngu tiyiswa tepo va pwago gu pwani hi ngu simama gu thumeya Jehovha ambari ha gu ba hi emisana ni silingo. Mupostoli Pawulo emisanide ni silo nya nga isoso. Tepo a nga ba a khotedwe pasoni Roma, a di gu tsaka khu gupwa gu khuye vandriyaye va di gu thumeya Nungungulu khu gu tumbega. (Filp. 1:3-5, 12-14) Gitepwana mbeli mwendro hwane nyo duswe khu pasoni, Pawulo a di loveya lidangaliya vaHebheru. Ga lidangaliya lolo a di kutsa maKristo yoyo nyo tumbege gu “haladzana” ni gu mba diga gu hongola mitshanganoni. — Hebh. 10:24, 25; 13:1.

10-11. a) Khu vamani hi yedego gu va raneya Gidundrugiso? b) Gighelo muni hi ningwago khu Vaefeso 1:7 nya gu gire isoso?

¹⁰ Ha gu yeyedza gutiya-hwambo tepo hi ranago valongo, sithumi-khwathu, ni vavhizinyu vata Gidundrugisotunu. Khu ginani hi ranago vathu vovo? Khu gu hi ngu bonga ngudzu khesi Jehovha ni Jesu va hi giredego avba nya gu hi si vbweti ni gu siheya vambe Gidundrugiso. Ha gu vbweta gu khethu avo navo vati edzi va nga phasegago khidzo khu “wuhigo” owu Jehovha a wu yeyedzidego khu gu hi dzegisa. — Leri Vaefeso 1:7; Gutu. 22:17.

¹¹ Tepo hi yeyedzago gutiya-hwambo khu gu tshangana hatshavbo, ha gu yeyedza gambe limbe likhalelo nya lisima, eli Nungungulu ni Gyanana gyaye va li yeyedzago khu dzindziya nyo samadzise.

12. a) Mitshangano ya gu engedzeya kharini lihaladzo lathu khu Jehovha ni Jesu? b) Ginani egi 2 Vakorinto 5:14, 15 a hi kutsago gu gira khu gu pimedzeya Jesu?

¹² Lihaladzo lathu khu Jehovha ni Jesu la gu hi kutsa gu manega mitshanganoni. Nigu, esi hi si hevbulago mitshanganoni si ngu engedzeya lihaladzo lathu khu Jehovha ni Gyanana gyaye. Mitshanganoni, tepo yatshavbo ha gu dundrugiswa esi va hi gireyago. (Rom. 5:8) Gidundrugiso gyonga gya gu hi dundrugisa edzi va hi haladzago khidzo, gupata ni vale va gu mba gu ninga lisima gudzegiswa. Khu kotani nya olu myonyo yathu yi tadego khu gutsaka, ha gu zama gu pimedzeya Jesu khu mavbanyelo yathu ya tshigu ni tshigu. (Leri 2 Vakorinto 5:14, 15.) Nigu, myonyo yathu ya gu hi kutsa gu dhumisa Jehovha kholu a hi dzegisidego. Mweyo nya dzindziya nya gu mu dhumise khiyo gu ningeya mihlamulo yi khugeyago monyoni mitshanganoni.

13. Hi nga yeyedza kharini gu khethu hi ngu mu haladza ngudzu Jehovha ni Gyanana gyaye? Tshamuseya.

¹³ Hi nga yeyedza gu khethu hi ngu mu haladza ngudzu Jehovha ni Gyanana gyaye khu gu dzi emiseya gu dzi hiya silo nyo khaguri khu kotani yawe. Gutala nya dzitepo, gu vbwetega hi gira isoso gasi gu manega mitshanganoni yathu. Mabandla nya mangi ma gu tshangana vbasiyambotunu khu tepo eyi nya vangi va garadego. Wumbe tshangano wo girwa guvbeyani nya semana yi gu tepo eyi vambe va londrolago gu dagata. Ina Jehovha a ngu si wona gu khuye hi ngu hongola mitshanganoni ambari ho ba hi garade? A ngu si wona! Gasi gu ganeya lisine, tepo hi dzi garadzago ngudzu, Jehovha a gu tsaka ngudzu khu lihaladzo lolo hi mu yeyedzago. — Marko 12:41-44.

14. Jesu hi ningide giyeyedzo nya lihaladzo li gu mba thangisa esi si vbwetegago gwaye khu ndziya muni?

¹⁴ Jesu hi ningide giyeyedzo nya lihaladzo li gu mba thangisa esi si vbwetegago gwaye. Giride isoso khu gu dzi emiseya gu feya vapizane vaye nigu tepo yatshavbo a di gu vbanya khu ndziya yi yeyedzago gu khiyo a di gu thangisa gugola ga vapizane vaye vbatshani nya ogu gwaye. Khu giyeyedzo, a di gu tshangana ni valandreyi vaye ambari a gu ba a garade. (Luka 22:39-46) Nigu a di gu dundrugeya khesi a nga hadzi va ninga, walangani nya esi a nga hadzi ningwa khawe. (Mat. 20:28) Lihaladzo lathu khu Jehovha ni vandriyathu la gu ba li tiyide khu ndziya yoyo, hi na gira satshavbo hi si kodzago gasi gu manega Gilaletunu gya Pfhumu ni mitshanganoni nya libandla.

15. Khu vamani ava ngudzungudzu hi yedego gu va phasa?

 ¹⁵ Ha gu gira gipandre nya wundruye nya wuKristo wu gu uwo wonga nya lisine, nigu hi ngu tsaka khu gu thumisa tepo yathu khavba si kodzegago khavbo gasi gu rana vambe vata dzi pata ni ethu. Ambari ulolo, ha gu tsakiswa ngudzu khu gu phasa “vandriyathu gukhodwani”, ganiolu ngudzungudzu vale va digidego gu thumeya Jehovha. (Gal. 6:10) Ha gu yeyedza gu khethu hi ngu va haladza khu gu va kutsa guta mitshanganoni yathu, ngudzungudzu Gidundrugisotunu. Kha nga Jehovha ni Jesu, hi ngu tsaka ngudzu tepo hi wonago muthu a nga ba digide gu thumeya Jehovha na gu bweleya ga Jehovha, Papayi wathu ni Muhavisi wathu. — Mat. 18:14.

16. a) Hi nga tiyisana kharini, nigu mitshangano yathu yi na hi phasa kharini? b) Khu ginani iyoyo yi gu tepo nya yadi ndrani nya mwaga nyo dundruge khiyo malito ma gomogo omu ga Johane 3:16?

¹⁶ Ndrani nya dzisemana dzi tago, rana vathu nya vangi khavba u na si kodzago khavbo gasi va ta manega Gidundrugisotunu, gi na girwago khu Livbandre, 19 nya Abril nya 2019 ni siyambo. (Wona kwadru “Ina u na va rana?”) Ndrani nya mwaga wowu, hongoleni hi tiyisana khu gu manega tepo yatshavbo mitshanganoni yatshavbo hi ningwago khu Jehovha. Kha nga olu hi vbohago mahegiso nya litigo leli, mitshangano yathu yi na hi phasa gu simama gudzinogisa, gu tiya hwambo, ni gu haladza vandriyathu. (1 Tes. 5:8-11) Hongoleni hi yeyedzani khu monyo wathu watshavbo edzi hi dzi pwago khidzo khu Jehovha ni Jesu kholu va hi haladzago ngudzu! — Leri Johane 3:16.