NDRIMA NYA GIHEVBULO 1
‘U nga garadzegi, kholu eni kheni Nungungulu wago’
‘U nga khali hwanga, kholu eni nyi nago; u nga garadzegi, kholu eni kheni Nungungulu wago; nyi na gu tiyisa ni gu gu phasa, nyi gu seketela.’ — ISA. 41:10.
NDZIMO 23 Jehova, ntamu wa hina
ESI HI NA SI HEVBULAGO AVBA NYA NDRIMA YEYI *
1-2. a) Malito ma gomogo omu ga Isaya 41:10, ma khuhide kharini ndriyathu moyo nyo pwani khu Yoshiko? b) Malito yoyo ma nga phasa gambe vamani?
MOYO nya ndriyathu nyo tumbege nyo pwani khu Yoshiko a di hakha mahungu nya mba tsakisa. Dhogodheya waye a di mu embeya khuye a tshade ni migimana nya yidugwana gasi gu afa. Si mu khuhide kharini isoso? Yoshiko a di dundruga malito ya omu nya Bhibhiliya a ma golago ngudzu ma gomogo omu ga Isaya 41:10. (Leri.) Khavbovbo, na rude monyo, a di embeya Dhogodheya waye gu khuye kha nga ba a thava, kholu Jehovha a di pharide libogo laye. * Malito nya gu tiyise ma gomogo omu nya livhesi leli ma phaside ndriyathu yoyu gu tumba Jehovha khu guvbeleya. Livhesi leli li nga hi phasa nethu gu mana gurula ambari ha gu ba hi emisana ni silingo nyo garadze. Gasi hi pwisisa edzi li nga hi phasago khidzo, gupheya hongoleni hi wona gighelo gi giridego Nungungulu a ninga Isaya mahungu yoyo.
2 Gupheyani, Jehovha thumiside Isaya gasi gu lova malito yaya gasi gu thaveleya vaJudha va nga hadzi yiswa wugumbini Bhabhiloni. Ambari ulolo, Jehovha kha lova basi mahungu yoyo gasi gu phasa vaJudha va nga ba vari wugumbini Bhabhiloni, ganiolu gasi gu phasa gambe vatshavbo vathu vaye gukhugeya tepo yoyo kala muhuno. (Isa. 40:8; Rom. 15:4) Muhuno, ha gu vbanya ga “gikhati nya sigaradzo,” nigu khiyo tepo yeyi hi vbwetago ngudzu gu tiyiswa khu malito ma gomogo omu ga libhuku la Isaya. — 2 Thim. 3:1.
3. a) Situmbiso muni hi si manago omu nya libhuku la Isaya 41:10, wu gu lowo nya mwaga nya 2019? b) Khu ginani hi vbwetago situmbiso soso?
3 Avba nya ndrima yeyi, hi na ganeya ngudzu khu situmbiso siraru sa Jehovha nyo tiyise hwambo si gomogo omu ga Isaya 41:10: 1) Jehovha a na ba ari ni ethu, 2) khuye Nungungulu wathu, ni 3) a na hi phasa. Kha nga Yoshiko, hi ngu si vbweta situmbiso * soso, kholu hi ngu emisana ni silingo nyo garadze guvbanyani. Hi bwe hi emisana ni mikutsedzelo nya litigo leli. Vambe gwathu va ngu timiseya gutshaniswa khu mifumo nya tshivba nya mafu yaya. Hongoleni hi ganeya khu gimwegyo ni gimwegyo nya situmbiso soso nya siraru.
“ENI NYI NAGO”
4. a) Khu gevbini gitumbiso nyo pheye hi na ganeyago khigyo? (Wona gambe tshamuselo wa vbavbatshi.) b) Jehovha a gu yeyedza gudzipwa gwaye khethu khu dzindziya muni? c) Wa gu dzipwa kharini khu malito ya Nungungulu?
4 Gupheya, Jehovha a gu hi tiyisa khu malito yaya: “U nga khali hwanga, kholu eni nyi nago.” Jehovha a gu yeyedza gu khuye a na ni ethu khu gu hi khathaleya ni gu hi sayisa gwadi. Nga wona edzi a yeyedzago khidzo gudzipwa gwaye khethu! Jehovha wari khuye: “Uwe u [ngu] golega mahoni gwangu.” U ngu “zundzega, gambe nyi gu gode.” (Isa. 43:4) Yi mwalo tshivba mafuni ni ndzadzini yi kodzago gu vbedza lihaladzo eli Jehovha a gu nalo khu vale va mu thumeyago; gutumbega gwaye avbo gwathu gu tiyide ngudzu. (Isa. 54:10) Lihaladzo ni wupari waye khethu si ngu hi ninga gutiya-hwambo. Uye a na hi vhikeya nethu mahuno, nga edzi a nga vhikeya khidzo Abrama (Abrahama) pari yaye. Jehovha a di mu embeya, khuye: “U nga thavi Abrama. Eni kheni Muvhikeli wago.” * — Gen. 15:1.
Khu gu phaswa khu Jehovha, hi na kodza gu pala sigaradzo si fanago ni tsongo mwendro nilo hi tshanganago naso (Wona dzindrimana 5-6) *
5-6. a) Ha gu dziti kharini gu khethu Jehovha a ngu dzina gu hi phasa sigaradzoni sathu? b) Ginani hi gi hevbulago avba nya giyeyedzo gya Yoshiko?
5 Hi ngu dziti gu khethu Jehovha a ngu dzina gu hi phasa sigaradzoni sathu kholu tumbiside vathu vaye, khuye: “Ambari wa guvbindra khu matini, eni nyi na bani nyiri nago, wa gu tsemakanya mitsongo, gima khu na dzama. Wa guvbindra khu vbakari nya nilo, gima khu na nga vbya, ambari gu vbiswa khu malavbelavbe.” (Isa. 43:2) Malito yoyo ma gu tshamuseya ginani?
6 Jehovha kha tumbisi gu dusa sigaradzo si hi tshanisago, ganiolu uye kha na nga dzumeleya gu khuye hi dzama omu nya “mitsongo” nya sigaradzo mwendro gu vbiswa khu “malavbelavbe” nya sigaradzo kala gupindruga. Uye a gu hi tumbisa gu khuye a na ba ari ni ethu, a na hi phasa “guvbindra” khu sigaradzoni sathu. Ginani egi Jehovha a na girago? A na hi phasa gu rula, hi si thavi gasi gu hi si kodza gu simama na hi tumbegide gwaye, ambari ha gu emisana ni gufa. (Isa. 41:13) Yoshiko, a khumbugidwego gupheyani, si wone khu maho yaye isoso. Gyanana gyaye nya gyadzyana gyari khiyo: “Nyi di gu samadziswa khedzi Mamayi a nga ba ari ni gurula khidzo. Khu lisine hi wonide gu khethu Jehovha a di gu mu ninga gurula mapimoni. Kala litshigu a nga fago khilo, Mamayi a di gu ganeya ni vadhogodheya khu Jehovha ni situmbiso saye.” Ginani hi gi hevbulago avba nya giyeyedzo gya Yoshiko? Ha gu tumba gitumbiso gya Nungungulu nya gu khigyo “Eni nyi nago,” anethu hi na tiya hwambo hi bwe hi manega ni tshivba tepo hi timiseyago sigaradzo sathu.
“ENI KHENI NUNGUNGULU WAGO”
7-8. a) Khu gevbini gitumbiso nya wuvili hi na ganeyago khigyo, nigu gya gu tshamuseya ginani? b) Khu ginani Jehovha a nga embeya vaJudha va nga ba vari wugumbini khuye: ‘Mu nga garadzegi’? c) Malito muni ma gomogo omu ga Isaya 46:3, 4, ma phasidego vathu va Nungungulu gu mba thava?
7 Wona gitumbiso nya wuvili gi gomogo omu nya libhuku la Isaya: ‘U nga garadzegi, kholu eni kheni Nungungulu wago.’ Ma gu tshamuseya ginani malito yaya? Avba nya livhesi leli, lito ‘gugaradzega’ la gu tshamuseya gu “khaleya gu khedza hwane khu gu thava gu khuwe muthoyo mwendro gilogyo gi na gu bayisa” mwendro “gu dzudzega mapimo nga muthu a gomogo mhangoni.”
8 Khu ginani Jehovha a nga embeya vaJudha va nga hadzi hongola wugumbini Bhabhiloni gu khuye va ‘nga garadzegi’? Khu gu a di gu dziti gu khuye vathu va iyoyo va di hadzi khala hwanga. Ginani gi nga hadzi va theya hwanga? Guvbeyani nya 70 myaga nya wugumbi wa vaJudha, Bhabhiloni a di hadzi sasedwa khu masotshwa nya tshivba ya vaMedhi-Perisiya. Jehovha a di hadzi thumisa masotshwa yoyo gasi gu tshudzisa vathu vaye khu wugumbini. (Isa. 41:2-4) Tepo vaBhabhiloni ni vathu nya mambe mayigo va nga ba va vbanya teponi yoyo va nga dziti gu khavo valala vawe va diri vbafuvbi, va di zama gu tiyisana khu gu embeyana gu khavo: “Tiya longo, u nga thavi!” Avo va di bwe va gira gambe vanungungulu nya vangi nya sifananiso, na va gu khavo mwendro va na vhikedwa khavo. (Isa. 41:5-7) Khu tepo yamweyo, Jehovha a di gu rudzisa myonyo nya vaJudha va nga ba vari wugumbini khu gu va embeya gu khuye: “Uwe Israyeli, [guhambana ni vathu vava va gu randredego, uwe u] githumi gyangu . . . U nga khali hwanga . . . kholu eni kheni Nungungulu wago.” (Isa. 41:8-10) Wona gu khuwe Jehovha a di khuye: “Eni kheni Nungungulu wago.” Khu malito yoyo, Jehovha tiyiside vakhozeyi vaye nyo tumbege gu khuye kha va divala, uye a di ngari Nungungulu wawe, nigu avo navo va di ngari vathu vaye. Uye a di va embeya gu khuye: “Nyi na mi wugarela nyi mi vbanyisa.” Kha hi kanakani gu khethu malito yoyo ma tiyiside vaJudha vale va nga ba vari wugumbini. — Leri Isaya 46:3, 4.
9-10. Khu ginani hi gu mwalo gighelo nyo thave? Ninga giyeyedzo.
9 Ngudzungudzu muhuno, vathu nya vangi va ngu garadzega khu kotani nya siemo nya litigo si engedzeyago gu vivba. Khu lisine, anethu hi ngu khuhwa khu sigaradzo soso. Ganiolu gu mwalo gighelo nya gu hi thava. Jehovha a gu hi embeya gu khuye: “Eni kheni Nungungulu wago.” Khu ginani malito yaya ma gu gighelo nya gikhongolo nya gu hi simama ni gurula?
10 Nga wona giyeyedzo gegi: Jim ni Ben vomo omu nya avhiyawu yi tshanganago ni phuvbo nya yikhongolo ngudzu. Tepo avhiyawu yi kutsungwago khu phuvbo, mugimbidzisi nya avhiyawu wari khuye: “Tiyisani dzisinto dhe seguransa dzanu. Hi na emisana ni phuvbo nya yikhongolo khu tepo nyo khaguri.” Jim a pheya gu garadzega. Ganiolu, mugimbidzisi nya avhiyawu a bwe khuye: “Mu nga garadzegi. Khu mugimbidzisi nya avhiyawu a ganeyago isoso.” Khu kotani nya malito yoyo, Jim a kutsunga hungo, khuye: “Ina wa gu mba yi wona mhango?” Khavbovbo, a khedza Ben a wona gu khuye uye kha garadzegi ne vbadugwana. Jim a mu wudzisa khuye: “Khu ginani u gu mba garadzega?” Ben a mu hegeya, a bwe khuye: “Nyi ngu muti gwadi mugimbidzisi wakone. Uye Papayi wangu!” Khavbovbo Ben huye khuye: “Gwadi nyi gu bhuleya khu Papayi wangu sa. Nyi ngu tumba gu kheni tepo u na mu tigo gwadi ni guti gambe makodzelo yaye, anuwe u na rula.”
11. Ginani hi gi hevbulago avba nya giyeyedzo gya Ben ni Jim?
11 Ginani hi gi hevbulago avba nya giyeyedzo gegi? Kha nga Ben, hi ngu kodza gu mana gurula kholu hi ngu muti gwadi Papayi wathu wa ndzadzini, Jehovha. Hi ngu dziti gwadi gu khethu a na hi thangeya ni gu hi vhikeya ambari ha gu ba hi emisana ni sigaradzo nyo fane ni phuvbo nya yikhongolo sa matshiguni yaya nya guhegise. (Isa. 35:4) Hi ngu tumba Jehovha, khu kharato hi ngu kodza gu simama na hi rude ambari olu vathu va tigoni va dagareyago khu gu thava. (Isa. 30:15) Anethu ha gu fana ni Ben tepo hi bhuleyago vambe vathu khu gutumba hi gu nago khu Nungungulu. Khavbovbo, anavo va na tiyisega gu khavo ambari vo tshangana ni gigaradzo muni, Jehovha a na va phasa.
“NYI NA GU TIYISA NI GU GU PHASA”
12. a) Khu gevbini gitumbiso nya wuraru hi na ganeyago khigyo? b) Malito ma gu khayo “gyandza” gya Jehovha ma gu hi dundrugisa ginani?
12 Wona gitumbiso nya wuraru egi Isaya a gi lovidego: “Nyi na gu tiyisa ni gu gu phasa, nyi gu seketela.” Isaya a di tshamusede edzi Jehovha a nga hadzi tiyisa khidzo vathu vaye, khu gu khuye: “[Jehovha, NM] a nguta nari ni tshivba guta fuma khu gyandza gyaye.” (Isa. 40:10) Gutala nya dzitepo, Bhibhiliya yi ngu thumisa lito “gyandza” si tshamuseyago tshivba. Khu kharato malito ma gu khayo Jehovha a na “fuma khu gyandza gyaye” ma gu hi dundrugisa gu khayo Jehovha, Pfhumu nya tshivba. Uye thumiside tshivba yaye nya yikhongolo ngudzu gasi gu phasa ni gu vhikeya sithumi saye teponi ya gale, nigu muhuno nugo a nga gu simama gu tiyisa ni gu vhikeya ava va mu tumbago. — Dhet. 1:30, 31; Isa. 43:10.
Gu mwalo litshari li na dugeleyago avba nya gyandza nya tshivba gya Jehovha gi hi vhikeyago (Wona dzindrimana 12-16) *
13. a) Khu yevbini tepo eyi Jehovha a tadzisago gitumbiso gyaye nya gu hi tiyise? b) Gitumbiso muni gi hi girago hi dzipwa na hi tiyide ni gutumba?
13 Ngudzungudzu tepo valala va hi tshanisago, Jehovha a gu tadzisa gitumbiso gi gu khigyo: “Nyi na gu tiyisa.” Malangani nyo khaguri muhuno, valala vathu va ngu zama gu emisa thumo wathu nya gu tshumayele mwendro gu himbedzeya mithumo nya hengeledzano yathu. Ambari ulolo, ethu kha hi garadzegi ngudzu khu kotani nya isoso. Jehovha a ngu hi ninga gitumbiso gi hi tadzago khu tshivba ni gutumba. Uye a gu hi tumbisa gu khuye: “Matshari yatshavbo ma giridwego gasi gu gu sasela, kha ma na gu gira gilo.” (Isa. 54:17) Malito yoyo ma gu hi dundrugisa silo siraru nya lisine.
14. Khu ginani si gu mba hi samadzisa ha gu wugedwa khu valala va Nungungulu?
14 Nyo pheye, kha nga maKristo, kha si hi samadzisi ha gu zondrwa. (Mat. 10:22) Jesu profetide gu khuye vapizane vaye va di hadzi tshaniswa ngudzu matshiguni nya guhegise. (Mat. 24:9; Joh. 15:20) Nya wuvili, giprofeto gya Isaya gyo hi gengedza gu khigyo valala vathu kha va na nga hi zondra basi; ganiolu va na thumisa gambe matshari nya mangi gasi gu dwana ni ethu. Matshari yoyo, ma gupata gu sengedzeya khu dzindziya dzi gu mba wonega gwadi, malipha nyo thise, ni gu hi tshanisa khu ndziya nya litsoro. (Mat. 5:11) Jehovha kha na nga digisa valala vathu gu thumisa matshari yavo gasi gu dwana ni ethu. (Efes. 6:12; Gutu. 12:17) Ganiolu ethu kha hi yeli gu thava. Khu ginani?
15-16. a) Khu levbini lisine nya wuraru hi yedego gu li dundruga, nigu Isaya 25:4, 5 a gu li seketeya kharini? b) Isaya 41:11, 12 a gu tshamuseya kharini mihandro ya ava va hi wugeyago?
15 Wona lisine nya wuraru hi yedego gu li dundruga. Jehovha a di khuye “Matshari yatshavbo” ma thumiswago gu dwana nago “kha ma na gu gira gilo.” Kha nga mabhiyo ma hi vhikeyago ga singulu, Jehovha nuye a na hi vhikeya ga “vathu nya guvivbedwe khu monyo.” (Leri Isaya 25:4, 5.) Valala vathu gima kha va na nga dugeleya ambari gu hi gireya guvivba kala gupindruga. — Isa. 65:17.
16 Jehovha a ngu tiyisa gutumba gwathu avba gwaye khu gu hi tshamuseya gwadi esi si na dugeleyago ava va hi “zondrago.” (Leri Isaya 41:11, 12.) Ambari valala vathu va gu zama gu hi dwanisa kharini mwendro nyimbi yawe na yiri yikhongolo kharini, mihandro yakona yi ngu fana: Vatshavbo valala nya vathu va Nungungulu va na “vbwasamiswa . . . , va vbela havo bhi.”
HI NGA TIYISA KHARINI GUTUMBA GWATHU GA JEHOVHA?
Hi nga tiyisa gutumba gwathu ga Jehovha khu gu leri maningano ni uye omu nya Bhibhiliya tshigu ni tshigu (Wona dzindrimana 17-18) *
17-18. a) Gu leri Bhibhiliya ga gu tiyisa kharini gutumba gwathu ga Nungungulu? Ninga giyeyedzo. b) Gu dundrugeya khu lowo nya mwaga nya 2019 gu nga hi phasa kharini?
17 Hi na tiyisa gutumba gwathu ga Jehovha khu gu muti gwadi. Nigu ndziya yamweyo nya gu hi muti gwadi Nungungulu khu gu leri gwadi Bhibhiliya hi bwe hi dundrugeya khesi hi si lerigo. Bhibhiliya yi na ni matimo nya mangi ma ganeyago khedzi Jehovha a vbulugisidego khidzo vathu vaye teponi ya gale. Matimo yoyo ma gu hi ninga gutumba nya gu khethu a na hi khathaleya nethu muhuno.
18 Nga dundrugeya khu giyeyedzo gi thumisidwego khu Isaya gasi gu fananisa edzi Jehovha a hi vhikeyago khidzo. Uye fananiside Jehovha ni muhavhisi a bwe a fananisa sithumi saye ni dzinvuta. Isaya ganede esi khu Jehovha: “Khu mawogoni gwaye a na wugarela sinvutana a si vega vbakhanatunu.” (Isa. 40:11) Ha gupwa libogo nya tshivba la Jehovba li hi wugareyago, hi na dzipwa na hi vhikedwe hi bwe hi manega ni gurula. Gasi gu hi phasa gu simama na hi rude ambari ha gu ba hi tshangana ni sigaradzo, githumi nya gutumbege ni nya gugengeye gi hathide Isaya 41:10 kha nga lowo nya mwaga nya 2019: ‘U nga garadzegi, kholu eni kheni Nungungulu wago.’ Dundrugeya khu malito yoyo nya gu tiyise. Ayo ma na gu tiyisa tepo u na emisanago ni sigaradzo si nga gutago.
NDZIMO 152 Ntamu wa hina ni kutsumba ka hina
^ ndri. 5 Lowo nya mwaga nya 2019 wu ngu hi ninga sighelo siraru nya gu simame na hi rude ambari ha gu ba hi dugeledwa khu silo nyo vivbe mwendro esi si dugeleyago tigoni. Ndrima yeyi yi na ganeya khu sighelo soso, nigu yi na hi phasa gu mba garadzega ngudzu hi bwe hi engedzeya gu tumba gwathu Jehovha. Dundrugeya khu lowo nya mwaga. Wa gu si kodza, wu vegedze mapimoni gwago. Uwo wu na gu ninga tshivba nyo emisane ni sigaradzo si nga gutago
^ ndri. 1 Wona Mukhedziseyi nya Julho nya 2016, paj. 28, khu giThwa.
^ ndri. 3 MITSHAMUSELO NYA MALITO NYO KHAGURI: Gitumbiso malito nyo tumbege ma hi ningago gutumba nyo khethu gilo nyo khaguri gi na girega. Gitumbiso a hi ningago Jehovha gi ngu kodza gu hi gira hi si garadzegi ngudzu khu sigaradzo si hi dugeleyago guvbanyani gwathu.
^ ndri. 4 Malito “U nga khali hwanga” ma khumbugidwe guraru omu ga Isaya 41:10, 13, ni 14. Mavhesi yaya ma ngu wuyedzeya gambe lito “Eni” (Na gu thudwa Jehovha). Khu ginani Jehovha a nga gira gu Isaya a thumisa lito “Eni” dzitepo nya dzingi? Gasi gu tshingisa lisine nya lisima ngudzu, a gu eli nyo khilo hi na mana gurula ha gu tumba Jehovha basi.
^ ndri. 52 MITSHAMUSELO NYA DZIFOTO: Sivbango nya ndranga si tshanganago ni silingo thumotunu, madwali, silingo thumoni nya gutshumayele ni xikwatunu.
^ ndri. 54 MITSHAMUSELO NYA DZIFOTO: Dzifakazi dza Jehovha na dzi gu gira tshangano wawe gusihalani, dzi beledwa khu dzipolisiya, ganiolu vandriyathu va gu simama na va rude.
^ ndri. 56 MITSHAMUSELO NYA DZIFOTO: Gu gira wukhozeyi nya ndranga tepo yatshavbo gu ngu hi ninga tshivba nya gu timiseye.